بكياتنا نحنا ناس الخواض زمان بمدني

04:15 AM January, 02 2026

سودانيز اون لاين
أبوبكر عباس-الإمارات
مكتبتى
رابط مختصر

عاينت ليكم من عل لقيت كتاباتكم تحنن؛
قلت أبرّ زوار المنبر العابرين بكتابة تمسح شنو كدا ما عارف.

بكياتنا نحن ناس الخواض زمان بمدني:
بقلم أبوبكر الخواض
ناس الخواض ديل جعليين عوضية من كمير العوضية غرب شندي، بعد قيام مشروع الجزيرة هاجرت منهم مجموعة كبيرة جداً لمدني وأغتنوا وأثروا وبنوا بيوت سمحة بالدرجة وبانت والقسم الثاني والمزاد والحي السوداني ومايو، وعملوا ليهم فندق في بداية الستينات البنات غنن ليهو؛
نزلنا بفندق الخواض
ومدني جميلة ما تنفات
المسافرين.
أبوي ود خالتهم وبينا علاقة محنة عجيبة، اسم الخواض ما موجود في اسمنا لكن ناس بانت في مدني مسمننا ناس الخواض، وأنا بعد جيت غرينسبورو أمريكا نزلنا في المدينة مع جيرانا بمدني ناس أستاذ عبد الغفور مدير التعليم الفني بمدني والناس كلها بقت تناديني على مناداتهم أبوبكر الخواض، ولمان يكون في بكاء في غرينسبورو وأسجل اسمي أبوبكر الخواض في الكشف، قاعد أعاين للاسم في الكراس وبجيني احساس انو دا اسم أدبي أحسن من اسمي الأول.
نرجع لموضوع البوست؛ في السبعينات والتمانينات كان عندنا أعراس وبكيات كتيرة بمدني بحكم كترة عددنا بالمدينة، والنصيحة كدا بكياتنا كنت بستمتع بيها أكتر من الأعراس، ناس مروقين وحنينين وجاهم بكاء؛ بعزوا ليك الميت عزّة شديدة بالأكل، والله، الخرفان دي في الحوش الورا باع باع باع ما تديك الدرب، أي زول بجي بجيب معاه خروفو وشوال سكر وشوال دقيق، لقيمات شهية جداً ريحة عجين القمح دا لمان يلامس الزيت الحار تشمها من السوق الجديد، ويا الله، على دمعة الغدا المليانة لحم والكمونية وأم رقيقة وبالليل دمعة وفول وطعمية وعيش حار، بعدين بستمر قريب أسبوع وما بنرفع إلا ناس البلد يجوا من الكمير، والحمد لله الزمن داك شارع التحدي كان ما فيش والموبيلات ما في وكبري شندي ذاتو ما في.
ناس الكمير بهناك حريصين يحضروا نشرة تمانية من إذاعة أمدرمان، سمعوا الخبر طوالي بتفقوا مع بتاع اللوري بدري صلاة الصبح في بتطون المتمة.
نحن هنا فبي مدني شغالين خرفان تقيلة ونسأل؛ ناس البلد سمعوا؟ تجيك اجابة نعم سمعوا أمس ذاعوهو في نشرة تمانية، نحن كأطفال وبعدين شباب بنكون في بداية نتمنى إنو الخبر يتأخر وبعد داك نتمنى اللوري يوحل.
وصلوا ناس البلد بحرروا البكا من جديد وبنديهم حقهم يعزوا الميت يومين تلاتة ويعزوا من العزّة وليس البكا،
رجال البلد صارمين لسّ مياعة مدني ما دخلتهم وفيهم أنفة وعجب نفس عجيب ومحنّة مدسوسة ووناسين وساخرين سخرية لاذعة.
النسوان بعد يومين والبكا يبرد بندخل نسلم عليهن وفيهن محنّة أكبر من الدنيا كلها، ولليلة محنّة سلام حبوبتي عشة خواض وعماتي زينب وآمنة والرضية وبنات المك وبنات السني وبنات الرزم وبنات أم بريرة وبنات مجذوب ما شفتها تاني، وسبب كتابتي للبوست دا وهسّ أنا مساهر، سمعت مصطفى بغني لصلاح حاج سعيد:
كتبت ليك والله يا قمر الزمان شان جيتي بزمن المحنة وشفت فيك حس أهلي القدام، تذكرت حبوباتي وعماتي وكتبت ليكم داير أوري صلاح حاج سعيد ومصطفى محنّة أهلي.

ملحوظة:
كاتب آلشعر أسامة الخواض من أسرة الخواض أسياد الاسم الحقيقي،
نحنا جدنا مسمنو على جدهم الشيخ الخواض وهم شيوخنا في الدين،
لكن في القروش والأدب آ هو براكم شايفين الأحسن منو

كلمة ابر جاتها شدّة ما عارف جات من وين؟

تحياتي الأخ الكريم
ليس غريبا ان ( تبرنا) فالبر و الإحسان شيمة ال الخواض ( و معاهم ال ابو سنون)
اذكر تاريخنا الجامعي و بدايات جامعة الجزيرة بمدني...وكم كانت أيادي ال الخواض و ال ابو سنون البيضاء تجعل حياة الجامعة اكثر ( حيوية)

بعض الأعراض الجانبية لبركم هذا ......
هو اضعاف ناس ( قريحتي راحت) .... و الذين ( وان عدموا ذكاءا) قالوا لجهاز حاسوبهم ( اعطيني مما اعطاك مبرمجك)

هلا دكتور زكريا،
يا أخي، بر شنو العملناهو نحن لجامعة الجزيرة؟!
جامعة الجزيرة كانت أهم حاجة حصلت لينا في حياتنا في المدينة.

أخوي المرحوم دكتور محمد الأمين محمد أحمد عباس كان في الدفعة الأولى كلية الطب أظنك كنت تعرفه،
كل الدفعة بتاعتم كنت بعرفها

جامعة الجزيرة حسست ناس مدني بفخر شديد في الزمان داك

مواصلة في أدب البكيات؛

وفاة جدنا العمدة الحسن ضبعّة:
(سيد مُحكر الديوان)
في حدود سنة ٤١ أو أقل قليلاً، الوكت داك بنتو فاطمة الملقبة ببنت الخليفة ساكنة رفاعة، جاء تلغراف من المتمة لرفاعة بوفاة العمدة، أستلم التلغراف جدي إبراهيم أبو قناية شقيق جدي شيخ الطيب زوج بت الخليفة،
إبراهيم جاء لبيت أخوهو ولقاهو ما موجود، قال لبت الخليفة تمويهاً جيت داير الطيب أخوي يحل لينا مشكلة، قالت يا مؤمن يا مصدق سويت ليهو عصير ليمون وفطرتو بملاح خدرة،
بعد ساعة جاء شيخ الطيب وقال ليها؛ يا فاطنة جاء تلغراف قال أبوك خطري، قومي سوقي بناتك آمنة وخديجة خلينا نسافر من الحصاحيصا بالقطر لشندي،
أمي آمنة قالت كنت بكون زي خمسة ولّ ستة سنين وبتذكر قبل نركب المركب من رفاعة للحصاحيصا في القيفة كنت بلعب بالقرقور سورو.
قالت ركبنا القطر والمكرفون ما زال مع أمي، قالت كنت في المحطة بعاين من شباك القطر وسارحة وأمي التفتت علي وجات تعاين بالشبكاك، لقت زوجها شيخ الطيب في الواطة وجاء الحسن العوض زوج أختها السيدة ومعاهو ود ملاح زوج أختها السارة وبشيلوا في الفاتحة مع شيخ الطيب، وركبوا في العربية التانية، عرفت كدا أبوها العمدة توفى، لم تتجزع في القطر.
بهناك شيخ العرب أحمد عوض الكريم أبو سن في رفاعة طلع النحاس والقرع والطشاطة، لكن حذر الجماعة قال ليهم ما ينطلق بكا إلا بنتو تسافر.
آمنة أمي قالت وصلنا الجوير ولقينا النسوان يتكتحن بالرماد وزبالة البهائم، وطوالي بت الخليفة فجت الرجال ودخلت الصالون لبست بدلة العمدة بنياشينها وشالت سيفو وسوّت في أبوها البكا الخمج الما خمج.
تقول السيدة بت العمدة الحسن على لسان عاطف الأحيمر:
قالت جو الانجليز وشرو فوق جثمان ابوها العلم الانحليزي وحملوه العساكر والانجليز مشوا مشيّة عسكرية؛ لانو طبعا كان موظف دولة.
وضُرب نحاس الحسن وكل نحاسات عمد الضفة الغربية الجوير، الكتياب، ولي حجر العسل والبسابير جابو نحاساتهم، وكان يسمع صوت النحاس في أماكن بعيدة شرق وغرب النيل.
بعد أيام بت الخليفة قالت لأخواتها؛ عليكن الله، شوفن إبراهيم ود أبقناية دا، جاء شايل خبر أبوي ويشرب عصير الليمون وأبوي ميت؟!
اتيمنتا إبراهيم يموت أشرب الليمون قبل يدفنوهو،
أمي قالت لي عمي إبراهيم توفى في رمضان وأمي عزّت حلفها لشربت الليمون في الفطور لكن بعد الدفن!
بعد زمن طويل جداً واحد من أصحاب شيخ العرب محمد البشير (أخو بت الخليفة) سأل شيخ العرب؛
أختك السمحة أم شعر طوال ديك ماتت ولّ حيّة؟
قال ليهو كمان أختي شفت شعرها وين يا باطل؟
قال ليهو شفتها يوم بكت أبوك بالسيف!

عوداً حميداً يا المستنير

كل عام وأنتم وآل الخواض بألف خير.

بريمة

العالم الان داخل الحرب العالمية بالفعل
مايحدث اكبر من الاشخاص والدول

Quote: جدنا العمدة الحسن ضبعّة

يا بكور ياخي أنا زمان وقت سيرتك يجيبوها بآخد لي صنة مسافة كدا تأدباً
بإعتبار أنو جدك أُنزل في ليلة القدر.
قبل كم يوم أكتشفت إنو ود ليلة القدر هو الحسن ود الصديق ود الحسن من قرية البشاقرة الغربية في شمال الجزيرة.
وجدك الحسن ود ضبعة لا صاقعة نجم لا جلة بارودها نار وكمان أُنزل في يوم عادي.
فشنو؟ رجع لي صناتي الصنيتها تأدباً.

آلمستنيرين لطيف وحافظ والمستنير سابقاً بريمة شكراً على المرور والتحيّة.
صاح يا حافظ، صاعقة النجم ما حقتنا
بنرجع ليك صناتك بالكتابة عن جدي الشيخ مصطفى الأمين خال حبوبتي بت الخليفة، أصلاً كل المال العندو سببو ليلة القدر جاتها والزمن داك حبوبتي أم أمي كانت قاعدة معاها وهي طفلة،
السيدة آمنة أم الشيخ قالت لليلة القدر تغني الشيخ ولدي لي جنى جناهو
جلال خالي قال لامه بت الخليفة يعني يمّة لو كانت دعت ليك مع الشيخ ما لو؟!

بعدين يا حافظ البيت بتاع من السوط ما بهم
بدل على أن بطل القصيدة من عامة الناس وليس بطل من الصفوة
يعني الحسن ضبعة بجلالة قدره ما ممكن ينجلد في الأعراس

يا سلام ……

تحياتي وتقديري،
نسأل الله الرحمة والمغفرة للجميع،
الأحياء والأموات.
ولان المناسبات الإجتماعية (الأعراس - الوفيات) كالعادة تتخللها
سحب كراسي لونسات جانبية
زيادة تعارف، تجديد ذكريات وأحداث ، واستمرار تواصل... وحتى السياسة والرياضة ..
قريب من بيوتكم في بانت بالقرب من ميدان المولد =
بيوت الخيلان يوسف يوسف الإزيرق وعلي عبدالحميد،

تحياتي اخي الكريم ابابكر
سبحان الله ....محمد الامين الخواض ( كما كان يشتهر بالجامعة ) شقيقك؟
رحمه الله رحمة واسعة و غفر الله ذنبه و اسكنه فسيح جناته مع الصديقين والشهداء والصالحين.

كان ( التهذيب) يمشي على قدمين.
وقد كان لاعب كرة ممتاز في منتخب كلية الطب
قابلته مرة واحدة عن طريق عبد النبي خلف الله الدفعة الثانية طب حيث كان لي صديق عزيز جدا اسمه جعفر عبد المجيد سكن مع عبد النبي في غرفة واحدة.

زندقة أشرقت الأنوار اختفيت أنا قلت الله يستر الزنديق ما يكون بقى إمام مسجد غرينزبورو حمدلله على السلامة