يا جماعة الخير، عندي اقتراح بسيط شديد:المرة الجاية الفريق البرهان يطلع قرار أو يوقّع توجيه، ياريت يرسل لينا فويس نوت في قروب واتساب السفارات، أو يعمل لايف في تيك توك ويقول يا جماعة القرار دا يمشي ينفّذ هسع… هسع يعني الليلة، ما بعدين لأنو الواضح إنو السفارات شغّالة بنظام الحمام الزاجل – إصدار 1945، ولسه البريد ما وصل فتحت التلفزيون، لقيت الخبر الكبير بُشرى للنازحين والمتضررين… دكتور حمدوك مُنِح جواز وتسهيل استخراج الجوازات بتوجيه من قائد الجيش لكل المعارضين والخيانه والعملا أنا طبعاً من الفرح قلت - سبحان مغير الأحوال! لبست أنضف قميص عندي، داك القميص البلبسو في المناسبات التاريخية، وقلت اليوم بطلع من خانة “مشتبه فيهو في المطارات” لخانة “إنسان عندو وثيقة
مشيت السفارة… داخِل وأنا رافع رأسي، شايل أوراقي وكرامتي وذكريات النزوح والبلاغ حق كيل ادريس ضدي وصلت الشباك، الموظف ورا القزاز، سلمت عليهو سلام زول حاسس نفسو مدعوم سياسياً أنا — يا سعادتك زهير عثمان جيت بخصوص الجواز، حسب توجيهات قائد الجيش. الموظف رفع راسو، وعيان لي بنظرة الزول البتسألو عن السر النووي — قائد شنو؟ وجواز منو؟ قلت ليهو بهدوء مواطن لسه مصدق الدولة — البرهان يا أستاذ… القرار القالوا في الأخبار، بخصوص المتأثرين بالحرب قالي بصوت عالي كدا ما انتو يا قحاته بعدها الموظف قلب في ورق قدامو، نفض الغبار، قال لي بصرامة ولئم عجيب — والله يا ولدي، نحنا السيستم واقف في 2023، أي حاجة بعد داك لسه ما نزلت لينا قلت ليهو — لكن القرار طلع في التلفزيون! وحمدوك صدر ليهو جواز يا اخي قال لي بمنتهى البرود المؤسسي بتاع الافندية في دولة 56 — التلفزيون ما جهة تنفيذية، نحنا بنستنى الحقيبة الدبلوماسية… والبريد الرسمي… ويمكن الإشارة تجي بالبحر. يا جماعة، إحنا بقينا عايشين في فجوة زمنية -القرارات بتطلع في تويتر والجزيرة والعربية والتصريحات في الهو ساي والتنفيذ في السفارة محبوس في درج موظف،والدرج دا مفتاحو ضايع من زمن الإنقاذ هسع أنا محتار أمشي أجيب للموظف ريسيفر HD عشان يتابع الأخبار؟ ولا أعمل ليهو سكرين شوت وأطبعو؟ ولا ننتظر السيستم يصحى من الغيبوبة ويفتح عينو ويقول «آسفين… كنا مفصولين شبكة» يا سادة- نحنا بين «توجيهات القيادة» و*«لسه ما جانا شيء»* محتاجين جواز سفر دبلوماسي مش عشان نسافر… بس عشان نعدّي من بوابة الموظف!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
فيس بوك
تويتر
انستقرام
يوتيوب
بنتيريست