"أفريقيا الجُوّة"- حدود جديدة تُرسم بالميكرفون لا بالخرائط - تصريحات ياسر العطا

08:26 PM November, 26 2025

سودانيز اون لاين
زهير ابو الزهراء-السودان
مكتبتى
رابط مختصر

طلع لينا القائد العسكري في بيان عاجل، صوته مليان ثقة ما بتتهز، وقال للمواطنين
"أي زول جاي من أفريقيا الجُوّة… يرجع أهلو."

طيب يا جنرال…
أفريقيا الجُوّة دي وين؟
نحنا قايلين أفريقيا واحدة، اتنين بالكثير لو حسبناها وجدانياً… لكن أنت الليلة فتحت لينا ملف جغرافي جديد ما موجود لا في الأطالس ولا في الأمم المتحدة.

هل أفريقيا الجُوّة دي منطقة سرّية ما معروف بيها إلا غرفة عملياتك؟
ولا هي ذاك الخط الوهمي القاعد في مخيلة كل زول ماسك سلطة وعايز يرسم البلد براهو؟

السوداني البيعيش نازح داخل وطنه، وطارِد الحرب من ولاية لولاية، يسمع كلمة "أفريقيا الجُوّة" ويحتار
يعني نحن جايين من وين بالضبط؟
من بلد ما فيها كهرباء مستقرة، لا أمان، لا خبز، لا خرطة حياة… وبرضو مطلوب نرجع "جوة" ما معروف حدودها!

المضحك المبكي…
إنك بتطلب من الناس يرجعوا لأماكن ما وصلها الدعم السريع ولا الجيش ولا حتى المنظمات. مناطق ما فيها

مانجة تبرد القلوب
بطيخ ينعش الروح
حفرة دخان للأفراح
ولا حتى "خميرة عجين" عشان نعمل لقمة تسد الرمق

يعني الناس تطلع من حرب عارية… عشان ترجع لصحراء مجهولة؟

الحقيقة القاسية
السودان كله بقى أفريقيا الجُوّة.
وكلنا بكرامة الله بقينا نازحين في خرطة ما عادت ملك للشعب… بل ملك لمن يملك الميكرفون ساعة البيان

*عرفت قصتنا يا ود العطا وبعدين خليك ظريف انت عندكم حيكورة معنا .