مجرد ( غلاط في غلاط )

11:38 AM October, 02 2025

سودانيز اون لاين
ابو جهينة-السعودية _ الرياض
مكتبتى
رابط مختصر

مجرد ( غُلاط في غلاط )

و ما معروف الحالة حتمشي كدة ؟ مع إنو البلد متروسة تِكْنوقراط* ؟

جهْلاً يُكال مرة بالكيلة و مرة بالملوة
مع إنو العِلِم جُوّانا فات .. قَطَع أشواط
و العزة نامت بس في عيون غِنوة
و النخوة تاهت في هزة سيف و نقرة طبلة
و عروق الإنْتِما زي نَتِف مُلْقاط
مجاديف السياسة و دفة مراكب البلد
متوهِّطة نص بحر الَّلوْلوة
يا خوفنا من بحر الفوضى و الإفراط

***
متروسة القواسيب بالعزة و النخوة
و خناجْر الضلام أنْماط :
واحْداً بالجفير محفوظ ..
و واحْدا باللسان ملفوظ...
و زولاً بي واحْداً سنين مطبوظ...
و الدنيا جنا الأعمال و ماها حظوظ
راح زمان الدهشة و الحِجوة
و جانا زمن نص النهار يطير وطواط
***
( بعد طلاق الغابة و الصحراء )
و ما بين بَيات الغفلة و الصحوة
نتباكى من شان حليب مسكوب
و نصقع جَرْة ال في الجبين مكتوب :
ونكورك : ( متين يا علي تكبر تشيل حملي؟ )
حياتنا ديمة كدة : لا غالب ولا مغلوب
مرة ال في يمين يبقى يسار
( و كلام الليل يمحوه النهار )
و ديمة ال قَلَب هُوبة ما بِكون مقلوب


و ما معروف الحالة لمتين بتمشي كدة ؟

( ربما حتى يلِج الجمل في سَم الخياط )

********************


• تنويه : حسب تعريف/ جان وليم لابيير : التكنوقراطي Technocratic " هو الخبير المدعو الى المشاركة في صياغة القرارات التي يستفاد منها في ممارسة السلطة الفعلية ، اما بتأثيره الغالب على أصحاب السلطة الشرعية، أو بالنيابة عنهم في حلوله محلهم، أو – أخيرا- باستيلائه على السلطة الصريحة باسم الشرعية العقلية".
• فأين نحن من كل هذا وذاك ؟؟؟؟؟؟

سلام ابوجهينة علك طيب كلماتك مرتبة لكن منو البرتب الصف عشان الناس تصطف بدل الدوران واللف المعروف الكلمة تبدأ بحرف والسياسة تبدأ بالنفخ فى قربة حيث لا سمع لا شاف انسان السودان الواقف فى الصف منتظر الفرج من رب عرف عنه بالحنية والعطف على مخلوق مولود ضعف فى ضعف يلا يا ابوجهينة وضعنا على كتفك شارة الشرف ابدأ بنتف كل من عرف عنه الدوران واللف والله لينا عظيم الشرف ان نتعرف على شخص كتاباته مملوءة حنين وعطف على شعب موضوع فى الرف
تحياتي
يا جميل

ابو جهينة انت زاتك تكنوقراط...


يكملوا الجنجويد الطزيانيين ويتأدب الجنجويد المقمليين البلد دي بي تمش خيرا وافر حجر وبشر...

ملحوظة :
(الحجر) هي الموارد.