Post: #1
Title: حب النبي ﷺ
Author: الطيب الشيخ
Date: 09-17-2025, 09:52 PM
09:52 PM September, 17 2025 سودانيز اون لاين
الطيب الشيخ-القاهرة ـ مصر
مكتبتى
رابط مختصر
حب النبي ﷺ
بسم الله قول مبدانا
رحيم الدنيا والرحمن
ثنيت بالرسول الـ جاءنا
اولى بينا من انفسنا
وارحم بينا من آباءنا
*****
رسول بحياته اقسم ربه
في سورة التوبة حدد حبه
بي أعيننا مقدار وهبه
نلزم سيرته نتبع دربه
نحرص ما نفارق سربه
*****
عاشقين الرسول يا إخوانا
مين في حبه يتحدانا
لو كان سيرته جابها لسانا
نهديه الصلاة النديانة
دينه ساد على الأديانا
*****
قصة حبه من منشانا
لو مرة العصار لاقانا
يقول أطفالنا منذ زمانا
مادام ما رسولنا معانا
الشيطان ولا بيغشانا
****
حب لي طيبة شب معانا
لها في قلوبنا اعلى مكانة
شوقا ليها هد قوانا
أقصى منانا كل هوانا
ندفن في بقيع عثمانا
*****
دليل الحب في السودانا
حتى بقيعها و الجبانه
إسمه نسمى بي النسوانا
بي سيرته الخلوق فرحانة
سيرته تجسد القرانا
*****
الحب ما ادعاء واصوات
الحب في اتباع خطواته
هيئة صومه مثل صلاته
كيف تعامله طيب نفحاته
قدوة واسوة كل حياته
*****
كان الزهد أبهى صفاته
متواضع في كل حياته
يتبسط مع اسباطه
يرقع ثوبه يحلب شاته
وكم مرات يعين زوجاته
*****
الصلاة والسلام يا اخلا
كيف بيها العقد تنحل
كم هائج لي خوسته سل
وعكازة المضبب تل
حجزه كان بيغلب الشلة
*****
الحجاز يقول يا اخلا
صلوا على الحبيب نبي الله
زي لبنا يفور في الحلة
رشو بي مويه خمد اتدلى
زي ما كان قبيل بيتقلى
*****
يهجس فيها واطة الله
شيطان الغضب ينذل
لا بوليس ولا شيخ حله
راجع نفسه يحمد الله
ما اتهور وسجل ذلة
*****
حبنا للرسول والآل
تاج في راسنا عمة وشال
في الشباك وقوفنا طال
قول؛ إيش هذا يا رجال
في سوحك سمعنا سؤال
*****
الليلة البروق دغشية
تلصف زي سيوف فضية
جات قاصدانا تب دغرية
يا عشاق اعقدوا النية
تاخيركم دي ما المحرية
*****
الصلاة والسلام نهديها
جودة في نوعها و الكمية
تكون بيها الغروض مقضية
لو كان بالمراد و النية
الطيب الشيخ جواره نبيا
*****
ندخل في نفوس مرضية
ما عند الله حاجة عصية
الوالدين مكانها علية
وآل الشيخ تجيها هدية
وتنجي المسلمين كليا
الطيب الشيخ
|
Post: #2
Title: Re: حب النبي ﷺ
Author: عزالدين عباس الفحل
Date: 09-18-2025, 05:28 AM
Parent: #1
صلى عليك الله يا علم الهدى،
ما هبّت النسائم،
وما ناحت على الأيك الحمائم
،،،،،،،
عزالدين عباس الفحل
ابوظبي
|
|