احذر يا أخونا بريش

08:47 PM September, 02 2025

سودانيز اون لاين
الطيب الشيخ-القاهرة ـ مصر
مكتبتى
رابط مختصر

يا منزل إئلاف و قريش
ولا تسأل لفعلك ليش

و يا فالق نواة العيش
خالق الكون من مافيش

مجراتك عدد قدر أيش !؟
تدور في الفلك غير طقيش

رازق للقوي و هشيش
وخلايا النمل مثل الجيش

أصحى يا أخونا بريش
ما يغرك لذيذ العيش

تطمع في بيويت و حويش
ولا أموال دهب و غويش

عمرك ما يروح في الطيش
ولعب الضمنة و الكشكيش

تقفل بي الجهار و الشيش
هناك في الآخرة تطلع بيش

تقابل الوعظ بالتطنيش
وحق الناس تسوي كريش

فارق اللهو و الطرطيش
و ابعد من خمور و حشيش

الصفحات هناك بتطيش
احذر لا تكون الطيش

ما بتنفع هناك معليش
ولا ردوني تاني أعيش

تقبل وين تروح شقيش !؟
تقابلك نار وقودها عويش

خازن النار معاه كلابيش
ولا بيفرد لي ضيفه وشيش

ما بيحنس ويسوق بي شويش
يجرك يلطشك تلطيش

قوم الليل وأصحى دغيش
مد اللقمة للجيعانة و لا جريش

بس نص تمرة او حربيش
تقيك لهيب يسوي دويش

وتنجيك بكرة من تشتيش
شهيق النار حسيس و وشيش

ملك باب الجنان شاويش
و ما بتدخل بلا تفتيش

يسمح لي نضيف الفيش
خالي الشرك غير تغبيش

خواطر بالمديح بتجيش
وينبت في جناحها الريش

لي العدناني فخر قريش
مثله في الرسل مافيش

شكتلو البادية شظف العيش
جاتلو السحب بي الرشريش

غيث مغدق ولا هو دشيش
ربت أرض قايمة قشيش

شاة جابر و ملوة عيش
بي بركاته كفت ديش

عين قتادة جوة رميش
رجعت سالمة دون تعميش

يوم الهجرة شفتو قريش
خاب مسعاها جاها طشيش

أمام الغار لقوهو عويش
خيوط العنكبوت كالخيش

وجدوا حمامة بانية عشيش
باضت و نفضت للريش

و خربانه البناها قشيش
في الأعمال تصيب و تطيش

هو في الاعمار فضل قدر إيش
تموت في ثانية ولا تعيش

ملك الموت بجيك لو أيش
ساكن قصر ولا حويش

عبدك يا كريم درويش
ترفعه ذكره غير تهميش

صلاة ناعمة ماها دريش
لذيذة و طاعمة ديمة فريش

تكون في الآخرة لي تحويش
قناديل فاخرة غير عميش

الطيب الشيخ عليها يعيش
وطالب الراوي بس بقشيش

تجوز أمه السراط بشيش
وتسلم ما يصيبها خريش

وينجو أباه من خربيش
يدخل الباب بدون تفتيش

وفي الجنة أم حرير تفريش
قصور فاتحات علي الكورنيش

عنب مزوعة فوق عريش
وحور بيناتها مافي غبيش

بي نظرات و طرف رميش
شغاف القلب تخلي حشيش

جسوم نائرات بدون طريش
خدود لامعات بلا اورنيش

حليهن يكشكشن كشكيش
خلاخل لابسات و غويش

شهواتك تجيك في رميش
و شراب من بعده مافي عطيش

وكم مسكين خفيف كالريش
عبر فسراع سبق حنكيش

سعادة تدوم ضحك فرفيش
هناك لا شكلة لا تحريش

الطيب الشيخ