دكاترة مدني

Quote: د احمد الطيب إبراهيم استشاري جراحة الكلي والمسالك ((دكاترة مدني )) طبعا دكتور ياسر شبارقة ما عندي بيهو معرفة عشان كده ح أتجنب الكتابة عنه ح اكتب عن بقية الزملاء و الأساتذة الهناك .. يقال والعهدة علي الراوي في دكتور فقاااع شغال مع بروفيسور احمد الأمين الشيخ و فاقع احمد الأمين فقع شديد و برايهو برررري 🖊 لمن وصلوا الاستيكة .. اها 😤 ناداه قدام الدكاترة وقال ليه ( يا دكتور الله يدينا خيرك .. و سكت مساااافة كده وهو بحمر فيه و قال ليه انت خير ما فيك بس الله يكفينا شرك )… غايتو بروف احمد اللمين ده لو ما كان اول السودان والله كان يكون اول العالم كله .. عنده فراسة فراسة بدو ولو قال ليك رأي أصلا ما تشوف غيره تبقي عليه وانجم . طبعا مدني دي حقتنا لكن م كل راجل بيقدر يقعد ويشتغل في مدني دي محتاجة منك طولة بال و طولة يد و طولة كراع عشان تساسق بالفواتح برضو - اها بروف عثمان طه ده كان متبنيني في الجراحة وقت كنت نائب اختصاصي حتي لما مشيت من جراحة الأطفال بدافع عني في اللقاء الجراحي الأسبوعي و يردمني في العنبر وفي العمليات و المكتب و النصيحة كده أنا كنت بقول ليهم أنا بخاف من عثمان طه ده اكتر من الله .. يا اخي الله ده ما غفور رحيم لكن البروف ده لو مسكك تفكفك منه كيف ؟؟؟؟ بعد بقيت جراح ناداني وقال لي تجي عشان اكتب ليك خطاب تتعين في الكلية و تمشي جراحة أطفال … -- يا المهدي تفكني من البروف ده … جراحة أطفال !!!! يا اخي فيصل نقد ده سايق ليه سيارة Matiz كلما أسوقها منه مشوار تتعطل بي و اجيب ليها ميكانيكي اقسم بالله كم مرة فكرت احرقها و اريحو منها و السلام احسن ليه يشتري ليه عجلة 🚲 من الخردة الراكبها دي .. طبعا فيصل ده سيدنا أيوب بتاع الجراحين لكن أنا لا مدني ولا الفلس ولا جراحة الأطفال ولا الأطفال ذاتهم ما عندي ليهم أخلاق … تنقش تنقش لحدي عيادة البروف مشيت لقيت عمك البسجل ليه .. سلمت عليه قلت ي عمي الشيخ أنا دايرك في مشورة.. قال لي بتدور تعرس وللا شنو ؟ قلت ليه يعرس ركبيك عرس شنو يا زول مع فلسي ده انت داير ناس بيتنا يطلعوا مظاهرات وللا شنو..... البروف قال لي اقعد في مدني و اتعين في الجامعة وجراحة اطفال رايك شنو ؟ وأقسم بالله ما بقول ليه الشيخ قال .. قام من كرسيه وجاء قعد جنبي وقال لي نحن فاتحين العيادة من العصر جوا تلاتة مرضي الاول قال ما عنده قروش دخل مجانا والتاني دفع نص القيمة خمسطاشر جنيه و التالت دفع تام ولما جاء طالع البروف قال لي رجع ليه قروشه ومعاه الخمسطاشر بتاعة المريض القبلو عشان يقدر يشتري الدواء ... قال لي بعد كده انت مخير شوف فهمك .... دخلت للبروف طوالي يابروف والله ما قصرت معاي لكن انا مدني وجراحة الاطفال والفلس التلاتة ما بنفعوا معاي .... والله يا بروف زي ما قال المثل ( زول بيشتغل مع أهله ده الا باالهو طويل او مالو. كتير ) .. قال المثل ده ما سمعت بيه قبل كده قالوا منه .. ضحكت وقلت قلتو انا .... امشي قال لي في الخرطوم بيصلوك ناس الضهراء. مدني دي ما فيها برابفت ولا فيها قروش ولا فيها اساسا مستوصفات خاصة بمعني خاصة تكلفة أي عملية في الخرطوم بتساوي عشرة أضعاف تكلفة مدني رغم أنهم مميزين في الجراحة و شاقين طريقهم براهم و ما عندهم حاجة لي زول بصريح العبارة ما شايلين الخرطوم علاقاتهم الخارجية مع العالم البرة ظابطة ... مستشفى الجزيرة لأمراض الكلي و جراحتها بي مجهوداتهم الذاتية وترابط الكوادر الفيه أصبح المركز السوداني الوحيد المطابق للمواصفات وبيتم توزيع متدربين من دول أخري فيه ... ومدعوم من ال SIU جمعية المسالك البوليه العالمية ... نائب الإختصاص لو قعد معاهم ستة شهور بجيك جراح عديل لانه فاضين للتدريب و الشغل و ابعد مشوار عندهم من المستشفى خمسة دقائق ... المستشفى ده كان اكتر عنبر معفن في مستشفى مدني و مرمي في اخر زاوية و بيفتح علي سوق الحوش ومقابر النصاري اي زول في مدني بعرفه اسمه عنبر شيخ العرب ... عملوا منه مركز وبصراحة تجربتهم دي ما قدرنا نعيدها في أي حتة أخري بما في ذلك مستشفي الخرطوم و سوبا ... فهو المركز الوحيد فيه طوارئ مسالك و زراعة كلي وغسيل كلي و جراحة مسالك بكل أقسامها و الله مشكورين شديد عشان كده لمن الدكتور ده هاجمهم كل دكتور كتب بطريقته لانه نحن كدكاترة بنعرف بعض كويس و يمكن القطاع الوحيد الممكن يدوك تفاصيل اي زميل من يوم دخل الكلية لي يوم امس هم الأطباء . مرة لاقيت دكتور في السعودية قلت ليه بتعرف د احمد الطيب بتاع مسالك ؟ قال لي موش الزول الفقااااع بتاع الكتابات داك ؟ قلت ليه اي قال لها مالوا كتب شنو ؟ قلت ليه ح يكتب فيك مقال يا معفن ... غايتو كلما يلاقيني قاعد يعزمني لكن ما بخليهو .. عليكم الله ركزوا في الموقف التحت ده :👇 -- ناس المسالك في مدني لما الدعامة دخلوا مدني واي زول ركب سيارته وفحط قعدوا في المستشفى و جمعوا كل معداتهم في اكبر غرفة في الثيتر و قلعوا الابواب والشبابيك. و جابوا بنايين بنوا الحائط و بيضوها و ضربوها بوهية و الشفشافة لما جوا ما لقوا الغرفة وين في حد ذاتها ما طلعوا بي جهاز واحد ذو قيمة وبذلك مركز الجزيرة لجراحة الكلي هو المركز الوحيد المعداته موجودة في الحفظ والصون .. عليكم الله ناس زي ديل بتخاف منهم علي مركز بتخاف منهم علي مواطن بتخاف منهم علي زميل ... انا أبيت اكتب عن ياسر ده لاني ما بعرفه و لكن بعرف الدكاترة الفي المركز ده فردا فردا و صدقوني برضو لو جاهم راجع ح يستوعبوه معاهم لانه شعارهم ظل ثابت وهو : (( عدوك اديهو حلوك يا عدلو أو قتلو )) .. شكرا اخونا الكبير بروف محمد امام و ابونابروف عمران وانتم تقدمون بلا كلل ولا ملل شكرا اخونا الصغير و ما صغير شديد بي دفعتين بس بروفسيور سامي محجوب . شكرا ود الجو دكتور الغلابة لازام التقيلة و العاطلة دراجة ــشكرا م.ميرغني سيف النصر وشكرا اولادنا المساتر الصغار م.يس ،م.عزام،م.رماح،م.حسام،م.علي،م.بكري،م.مظفر شكرا د.محمد خلف الله في التخدير ،شكرا د.محمد المعتصم في الاشعة ــ شكرا نفرولوجي المؤسسين محمد السابق ود محمد الحافظ شكرا دكتورة انوار و د.حبيب الله هجو. كلكم كده بنعتذر ليكم نيابة عن اخونا د ياسر شبارقة وقالوا اللوم بجي بالغفلات .... والشكوي دي سمحت للناس يعرفوا انتوا منو و بتعملوا في شنو و وصلتوا وين وح تفتحوا وتقيفوا متين علي حيلكم. نحن عارفنكم و واثقين ح تتعافوا قبل كل مراكز الخرطوم لانكم يدكم واحدة . و ياسر ده ولدكم و ياهو جنكم الطلع منكم و قالوا (( ولدك كان طلع دبيب أربطأ في صلبك)) ... تمسكوا لكن اوعكم تمسكوه مدير بعوقكم و يعوق روحه و يعوق المركز كله و لو جاء وزير و الله مدني تعدم الدكتور . اخونا ياسر شبارقة انت يا زول ما بتعرفني ولا بعرفك لكن يا اخوي انت مدير ما بتنفع و زير ما بتنفع و بقيت عاقل إدارة البيت ذاتها سلمها للمرأة و أتفرغ لي طبك بس . وبما انك قلت انك اسلامي نذكرك بحديث ابي موسي الاشعري: حديث أبي موسى الأشعري  قال: دخلت على النبي ﷺ أنا ورجلان من بني عمي، فقال أحدهما: يا رسول الله، أمِّرنا على بعض ما ولاك الله ، وقال الآخر مثل ذلك، فقال النبي ﷺ: إنا والله لا نولِّي هذا العمل أحداً سأله، أو أحداً حرص عليه[1]، متفق عليه. و نبذك الجماعة ديل حرقنا لكن الحرقنا اكتر قشرتك بانك شاركت في حرب الكرامة .. يا اخوي كرامة شنو نحن كرامتنا راحت زمااان من اول طلقة بدأت الحرب حلتكم الشبارقة كلها نزحت و توزعت بين نازح و هارب و مجلود و مسلوب حريته وسيارته .. و كرامتنا نحن كدكاترة انساها ساي اقسم بالله كم وظيفة في مستشفى خاص في السعودية مشيت لقيت قريب الخمسة الف من دكتور لي فني سوداني جاين يقدموا ليها .. مافي حرب فيها كرامة كلامك ده قولوا للوهم البتخموا لكن مكنة زي دي عند الدكاترة ما بتقسم . الحرب زلة والحرب فقر الحرب نزوح واغتصاب و استلاب و سجون واعتقالات و موت رخيص . مافي كرامة مع الجوع و مافي كرامة مع العوز ومافي كرامة مع الخوف الكرامة مع السلم خليك فاهم يا اخي خليك حكيم خليك دكتور . وبطل حركات الكيزان الفارغة دي  و دمتم سالمين