الله يرحمك اللواء اركانحرب صديق الزيبق ...الجيش زمان والآن ..

04:18 PM June, 14 2025 سودانيز اون لاين
السر عبدالله-
مكتبتى
رابط مختصر

(adsbygoogle = window.adsbygoogle || []).push({});قصة قصيرة تحكيها اريج عندما كانت عمرها ٧ سنوات لتؤكد لنا الفرق بين الجيش زمان والآن ...تقول اريج ..:زمان وانا في سنة ثانية ابتدائي وعمري ٧ سنوات اتشاكلت مع زميلتي في الفصل ( مع اني كنت خوافة شديد وما بحب اشاكل)..بس سبحان الله اليوم داك صوتي طلع كيف ما عارفة وبصراحة البنت استفزتني شديد واتشاكلنا، وقتها ابوى كان قائد سلاح المدرعات في الدمازين ،والبنت زميلتي ابوها كان عسكري في نفس السلاح ...
.والمهم وانا بشاكل معاها قلت ليها : "استني بس لو ما خليت ابوي يرفد ابوك " وهنا البنت سكتت مني ،ولحظتها شعرت بالانتصار وخصوصا لمن جاني السواق بي عربيتنا وركبت قدام بكل فخر ،ورجعت البيت وانا فرحانة وبشعر بالفخر ..واول ما جا ابوي من الشغل وكالعادة بنحكي ليه الحصل شنو في اليوم وقمت حكيت ليه الحصل بالتفصيل مع زميلتي وانا بضحك والكلام القلته ليها و احساسي بالانتصار ..وفجأة ابوي ملامح وشه اتغيرت وقال لي امشي البسي سريع نحن طالعين وقالها لي بزعل شديد ..وامي بقت تسال ماشين وين ؟ ما رد عليها بس قال ليها لمن نرجع بتعرفي ...
.وطلعنا وما عارفة نحن ماشين وين ..وابوي ساكت وفجأة سألني : واتشاكلتي معاها ليه؟ وقلت ليه هي جرت شنطتي .. وقالت لي شنطتك السمحة دي ..وقطعتها لي وهي بتجر فيها ....وفي أول محل بتاع شنط ابوي وقف واشترى شنطة حلوة شديد وطبعا فرحت وافتكرت لي انا ..ولمن طلعنا بره الدمازين قلت ليه : يا ابوي نحن ماشين وين؟ وقال لي : " ماشين عند ناس عمك جاد الرب ،والد زميلتي الاتشاكلت معاها...
.ووقتها ابوي قال لي كلام عمري ما حانساهو...
قال لي: " اسمعي كلامي ده كويس وختيه حلقة في اضانك ..اياك وإياك يا اريج تفتري على خلق الله وخصوصا لو كانوا أضعف منك وحسيتي نفسك اقوى منهم ..ديل عبيد الله ما عبيدنا نحن ..فاهمة الكلام ده..ويمكن هم عند ربنا أحسن مننا ..وربنا خلقنا كلنا زي بعض ووزع لينا ارزاقنا بالتساوي لا هي احسن منك ولا انتي احسن منها ..وتقولي ليها ابوي يرفد ابوك!!؟؟هو الجيش بتاع ابوك ؟ الجيش ده جيش الشعب والوطن والشعب اللي هم جزء منه ..يعني الشعب لو عايز الجيش والحكومة يمشوا ...يمشوا على طول لانه حقهم هم ..والقائد في خدمة العسكري والعسكري في خدمة المدني ..فهمتي الكلام ده يا بنتي ؟!وانا ما عايز اكرر الكلام ده ثاني ..فاهمة ..وهسع حنمشي بيتهم وتديها الشنطة دي هدية وتعتذري ليها قدام اهلها وتعتذري لابوها ..وانا بكره حاجي المدرسة عشان تعتذري ليها قدام الفصل .وعقابا ليك تاني حترجعي من المدرسة برجلينك او بعربية النقل بتاعة المدرسة ..لحد ما تحرمي تفتري على خلق الله ...
.وفعلا وصلنا بيتهم واستقبلونا بفرح شديد واول حاجة ابوي قال لابوها: " اعفي لي يا عمي جاد وباسه في راسه ..و خلاني انا ذاتي ابوس يده ورأسه ..ووقتها الراجل لمن بكى وقال لابوي: والله سعادتك الموضوع ما بيستاهل وديل شفع..ولكن ابوي رد عليه : " بكره الشفع بيكبروا ولازم يتعلموا ...وانا اعتذرت لزميلتي قدام اهلها واديتها الشنطة هدية ...وثاني يوم الصباح ابوي مشى معاي المدرسة وفي الفصل وفي الحصة الأولى وقف ومعاه الأستاذة وطلعوني قدام الفصل واعتذرت لزميلتي. ..وفي نهاية الحصة الأستاذة وقفتنا نحن الاثنين وقعدتنا جنب بعض ومن يومها بقينا صاحبات ...
.وقتها عرفت يعني شنو قيمة الإنسان اللي كرمه ربنا ..وان التواضع شيمة الشرفاء ..وفي كده ابوي ربانا وعلمنا وفهمنا ..وبالجد انا فخورة بابوي وربنا يرحمك ويحسن إليك ويجعل مثواك الجنة يا ابوي ...

((.والله يرحمك يا سعادة اللواء صديق الزيبق وهو صاحب الموقف والعبارة الشهيرة : " صفااااااااانتباه....أرضا ظرف ..خااااالف در ..معتدل مارش وكل جندى وضع الظرف على الأرض والذي به كان به مبالغ مالية من حكومة الكويت للجنود السودانيين ..وتوجهوا نحو الطائرة وعادوا للسودان مرفوعي الرأس..مؤكدين أن جيش السودان لا يشترى ولسنا مرتزقة ...(( منقول))..وانا

.و يا ول أبا بريمة اذا عندك صورة المرحوم اللواء اركانحرب صديق الزيبق نزله لينا هنا ...وانا جاني المقال ده وبه صورته ولكن ما عندنا القدرة التكنلوجية زيك عشان ننزل الصورة هنا في المنبر ....

Quote: .والله يرحمك يا سعادة اللواء صديق الزيبق وهو صاحب الموقف والعبارة الشهيرة : " صفااااااااانتباه....أرضا ظرف ..خااااالف در ..معتدل مارش وكل جندى وضع الظرف على الأرض والذي به كان له مبالغ مالية من حكومة الكويت للجنود السودانيين ..وتوجهوا نحو الطائرة وعادوا للسودان مرفوعي الرأس.. مؤكدين أن جيش السودان لا يشترى ولسنا مرتزقة ...(( منقول))

سلام السر
اعرف الرجل وكان صديق لشقيقي الاكبر. كان آخر منصب له هو قائد الكلية الحربية بدولة الكويت.
قصة (ظرفآ سلاح) لا اساس لها من الصحة ويمكن الشخص الذي ألفها كان متأثر بالافلام الهندية.... هل يعقل جنود ماشبن على الطائرة وكل منهم شايل في جيبه الشمال ظرف مليان قروش وواقفين انتبتاه وفجاة القائد بتاعهم يقول ليهم ظرفآ سلاح وطوالي هم يطلعوا الظروف ويضعوها على الارض كعملية عسكرية متدربين عليها😲 وكأن القائد لا يعرف من اعطاهم الفلوس ولماذا قبلوها.
قصص كثيرة لا اساس لها يرددها السودانيون مثل المرحوم دكتور زاكي الدين اجري عملية جراحية وانقذ بنت امبراطور اليابان واليابانيبن بنوا المستشفى اكرامآ له.
وايضا قصة خطاب محمد احمد المحجوب في الامم المنحدة والذي كان يحفظ الخطاب في رأسه ويرتجله في الامم المتحدة وبرضه كلام كذب.

حباب ول أبا السر عبد الله
هناك صور عدة .. وربما بالخطأ وردت بأشخاص مختلفين ويحملون أسم صديق الزئبق ... المسألة عايزة تحقيق .. لكن أوردها كلها
هنا اللواء الصديق الزئبق .. له الرحمة






وهنا نسخ أخري: هذه النسخة هى ما ألتبس علي هل هو صديق الزيبق أم الصورة السابقة ..؟



هنا صورة أخرى الناس يخلطون بينها وبين اللواء صديق الزئبق .. ولكن يبدو أن هذا هو الدكتور عبد الحميد محمد لطفى الذي حكى قصة الزئبق.




-------------------------------
من هذا التناول أن الصورة الأولي هى أقرب للصاح بعامل تصوره مع الرئيس جععفر نميرى ، أضف أن الصورة التالية .. تشبه صورة الزئبق ..




بريمة

شكرا ول أبا بريمة
نعم الصورة الأولى هي صورة المرحوم اللواء أركان حرب صديق الزئبق ..يرحمه الله ويغفر له ...
هؤلاء هم الذين كانوا من أبطال القوات المسلحة السودانية ..ومن بين الأبطال أيضا اللواء ابو كدوك
واللواء عبد الماجد حامد خليل ..وسعد بحر وابو شيبة ..كانوا لا يهابون الموت ...ووطنيون حتى النخاع....

زين عبد الله
اخالفك الرأي يا زين لان قصة ظرفا ارض...قصة حقيقية ...ووقعت بالفعل ...
لانني لم اسمع بهذه القصة فقط من هذه القصة المنقولة ولكن في ذلك الوقت
حكاها لي احد اصدقائي الذي كان زميلا لي في المدرسة الابتدائية والوسطى واصبح
لواءا في القوات المسلحة ....
القصة حقيقية ....لانه وفي ذلك الزمان كان رجال القوات المسلحة أبطال ووطنيين ...
لا يعملون من أجل كسب المال ولكن للدفاع عن الوطن ...وكانت الجندية شرف ووسام على صدورهم ...

...اذا حدثت هذه القصة الآن لم اكن اصدقها ...فإن الزمن قد تغير ...وأصبح الناس يعبدون أصنام العصر ( المال )..

ضابط الجيش (المشلخ) ليس هو الزيبق ولا يشبهه.
الصورة الاولي هو الزيبق.
الضابط المشلخ فيه شبه للواء حسن بشير نصر ولكن الصورة عاملاهو لونة فاتح...

لواء حسن بشير نصر

نعم يا زين الصورة الأولى النزلها ول أبا بريمة هي صورة اللواء صديق الزئبق ..

لو عايز يالسر اديك مليون قصة عن تواضع واريحية البشير السوى فينا العجائب!! ربط القصص بأشخاص لايغير حقيقة ان المؤسسة العسكرية فاسدة وهي السبب الرئيسي في وضع السودان المتردي سابقاً وحالياً! والقصة غالبا من نسج خيال احدهم لا مصدر موثوق لها رغم وجود افراد محترمين في الجيش وغيره في كل مكان في العالم والسودان ليس استثناء