قصر جقود بديلاً لقصر غردون...

11:36 AM March, 27 2025

سودانيز اون لاين
HAIDER ALZAIN-
مكتبتى
رابط مختصر

رغم الوش الضاحك دا لكن الموضوع دا جواي كدة بكتبه جااادي.. جدادة مالك عقار بس..
اعلام خالد الاعيصر وعيال الخرتوم شابكننا ليك القصر الرئاسي ورمز السيادة الوطنية وما اعرفش ايش
تقول ليهو الرمز السيادي شنو هو.. ينطعز كدة طعزة عمر التاج ويقول ليك قصر غردون..
أجي يا غردون رمز السيادة ؟؟؟!!

قبل يومين مشيت زيارة لوافد من حلتنا معاهو ابوهو واخوه..

في حلتنا المدرسة محل قريت الابتدائي فاتحة على زلط اتبرا بربر .. وبينها والزلط كدة 150 متر وبعرض المدرسة..
المنطقة حوالين المدرسة تحولت لمنطقة تجارية واستثمارية بامتياز بفعل الزيادة السكانية والتطور العمراني
وزاد عليها انها اصبحت موقف للمواصلات ودكاكين ومستوصف وعيييييك واصبحت افئدة من البشر تهوي اليها ..
قووومي يا ادارة المدرسة وبتعاون اظن مع مجلس الاباء حول سور المدرسة من جهة بوابة دخول الطلاب لسور استثماري واجروهو دكاكين
شئ بنشر وشئ مطعم وشئ بوتيــك وشي مطعم تاني وشي بقالة وشئ محل خضار وفواكه وآخر شئ نادي مشاهدة ..

وبقى التلميذ جااي الصباح المدرسة تلقاهو بيفج القوم ديل عشان يلم في فتحة باب مدرسته ويدخل ..

طبعا الوضع طبيعي والناس متماشية معاهو واهو نقاطة تلم تلم منها المدرسة قروش تصرف علي نفسها واساتذتها ومجلس ابائها..
لكن الوضع دا ما كان طبيعي في نخيلتي انا وعامل لي ناخورة في راسي انه كيف يعني تكون دي بيئة دراسة الطلبة الصغار
في نص السوق.
ويمكن عشان بقارنها بزمن قرايتنا نحن والمنطقة كانت خلاء صي حتى موية مافي بنجي شايلنها في جركانة مخيشة ..
المهم دا ما موضوعنا موضوعنا لسه بيتعلق بقصر غردون باشا رمز السيادة..

قصر الشوق
يا حيدروف
السيادة مشروحة في دستور2005
زول ماوجابتو صناديق، اقتراع او مشورة حقيقية. في، ركان السودان الستة الاقاليم
ما يتكلم عن سيادة
جنرلات مشغلاهم مصر
جنجويد، مشغلاهم الامارت
وشركات تنهب موارد، السودان
سيادة شنو
الناس الكانو في، القصر 1956
انتخبهم الشعب
والهسة ديل جابوهم عيال الكلب
السيادة بتجي، بالصندوق بس
غير كده ش... ساكت

وقصر السكرية وبين القصرين يا جقود :)

Quote: جنرلات مشغلاهم مصر جنجويد، مشغلاهم الامارت وشركات تنهب موارد، السودان

نعم ودي الحقيقة..
يآخ نحن وصلنا انه وزير خارجيتنا دلقوتي مصري.. شكلاً ومضموناً .. شايف كيف؟

واحدة من الحاجات المابتعجبني في نفسي اني البشوفها غلط وما نافعة معاي طوالي بنضم ما بتريث ولا بحسب البعدها..
زي يومه داااك اظن اخر أيام حكم المرحومة الانقاذ جيت بعد غياب سنين ودنين من الخرطوم ماشي اتبرا وقفنا الباص في كافتيريا راحة وغداء وصلاة..
وكمية من الباصات الماشية والجاية بتقيف يمكن ولا 300 نفر في اللحظة دي..
اول من نزلت مشيت افتش الله يكرمكم دورات المياه عشان اتوضئ .. سألت واحد اشر على لمة ناس وافقة تقريباً صف جنب برميل مع امتداد مظلة الكافتيريا نفسها..
مشيت لقيت عمك قاعد في كرسي وقدامو ماشاء الله اباريق البلاستيك ما تديك الدرب .. وعندو ولد يشيل ويعبي في الاباريق من البرميل
وهو ماسك الحساب وتسليم الاباريق ..وضوء والا حمام ؟
الوضوء بخمسة و الحمام شامل بي عشرة.. الله دا شنو؟

جيت لي عمك قلت ليهو اسمع انا زبون جااي اتغداء في الكافتيريا دي
قال لي حبابك الف والله
قلت ليهو طيب بتطقطق قروش الحمام والوضوء من الزبائن لي شنو؟ ابى يرد لي.. ياعمك انت عاوز مني قروش لي شنو مش مفروض الحمامات دي من ضمن خدمات الاستراحة الفي الكافتريا دي
الجماعة الوراي في الصف بقوا يفوتوا بيمني وشمالي عشان يسلموا قروشوهم ويستلموا اباريقهم .. زول شغال بي مافي
يازول قمت عملت كولنج وشديت ليك ركن في نص الكافتريا دي وطالبت بحقوقي كمواطن في انه اطلع زي وزي الناس وامارس حقي الطبيعي بدون صفوف وبدون ذلة وبدون طقطقة..
وطالبت الاخوة الركاب والمسفرين بالاعتصام امام الحمامات والامتناع عن دفع قروش لممارسة حقوقهم الانسانية الطبيعة باعتبار انه دا واجب اصحاب الكافتيريا والمستثمر بتوفير دورات مياه نظيفة لهم
وتوفير مسجد للصلاة كحق وليس منّة في مقابل الفائدة البيلقوها من المطعم والبقالة وستات الشاي وبقية الخدمات الببيعوها للجمهور..
المهم .. انق وانق وانقنق والناس دي بتعاين لي كدة زي المغترب البيجي يشكي من قطوعات الكهرباء وحفر الشوارع والسخانة
اكتر زول وقف معاي واتفهم موقفي واحد كدة مشى دفع حق الابريق وجابوا لي قال لي هاااك امشي البص ما يفوتك..:)

المهم رفضت بكل انفة وكبرياء اني اشيل الابريق :) ومشيت مارست حقي الانساني على سور الكافتيريا من الخارج.. والجميع ينظرون
وفي نفسي اقول يآخي والله نحن بالجد نستاهل عمر البشير طالما بيسأل حصل كضبت عليكم والجماعة يكوركو ليهو .. لا لا لا .. الله واكبر
زي ما بنستاهل انه رمز سيادتنا وعزتنا يكون " قصر غردون "

Quote: عمر التاج ويقول ليك قصر غردون..

متين عمر التاج اعترف ليكم بقصر ول منشية ول سيادة غوردون
موضوع الاستقلال والاستغلال والمهدية والقصر اصلا عمر التاج ما اتغش فيهم
قصر شنو القعدوا فيه الطرورات من لدن عبود حتى حمدوك واعتبره ضيعة خاصة بهم
او مجرد مطبخ يقتاتون فيه أطيب الطعام والعطايا والامتيازات ..
أنا في موضوع السيادة دي اشتراكي عديل، ولو اتنازلت شوية بتماشى مع فكر واعتقاد كبيرنا عادل امين بخصوص الاقاليم وقرود السيرك وهلم جرا
أيام الاعتصامات نصحت البليد حمدوك وقلت ليه سوي لك خيمة في ميدان الاعتصام دي وقول ده القصر الرئاسي او مكتب رئيس مجلس الوزراء، وخلي الوزراء يحلوا مشاكل الشعب من مكاتب تطل على المعتصمين واجعل اكبر خيمة فيه لوفود الدول والضيوف ، ولكن المغفل مشى عملها مزارع خاصة ورحلات ماكوكية ومساككة للدول لا حكم البلد لا ارضى الشعب

Quote: تين عمر التاج اعترف ليكم بقصر ول منشية ول سيادة غوردون

انا ما قلت ليك اعترفت بسيادة غردون ولا جبت سيرة موقفك من القصر..

سيرتك جات في الطعزة الشبيهة لطعزتك فقط :)

لكن اذا كان دا موقفك من القصر وتؤيد موقف جقود فألف مرحب بيـك في القصور الاقليمية الستة
والحكم الفيدرالي وعلم حسنين والجقودات الخمسة

نرجع لموضوع المدرسة..
أها قمت قلت للجماعة الموضوع دا وانتقدت ادارة المدرسة ومجلس الاباء ووصفتهم بالمصلحجية وانه ما مفروض يسمحوا بكدة ويعرضوا حياة الطلاب لهيييك وضع..
وانه انا لو في السودان ما كان حصل واول من ارجع حا اقيف الف احمر لغاية ما انضف بيئة الطلاب من هذا الخ الخ الخ..
قام اخوهو قال لي والله بتدور نقطع لك لسانك قبال تقطع رزقنا :)
طلع عنده دكان في السور واخوهو التاني في مجلس الاباء وود عمهم استاذ في المدرسة..

المهم جقود للسيادة الوطنية

Quote: القصور الاقليمية الستة

سرقوا فكرتي في العواصم الفدرالية التسعة: دنقلا، الدامر، بورتسودان، كسلا، الدمازين، مدنى، الابيض، كادقلي، الفاشر.

الخرطوم .. بدأ إهلاكها .. وأقتربت ساعة الصفر (ضرب كبري شمبات)!الخرطوم .. بدأ إهلاكها .. وأقتربت ساعة الصفر (ضرب كبري شمبات)!

بريمة

لسه قاعدين تهضربو
يا ناس لالا في، البورد
حلة بوتسودان بشوربة ماجي، المصرية
وحلة اديس نومة وسهرة وقهوة وسكرة
وحلة نيروبي... عصيدة بي، ملاح رووب
وتتطالوو علي حلة جقود
وعاملين رايحين
وانا من 2019 برنامجي، واضح، وثابت ويبدا وين وينتهي، وين وبي، وسائل تعليمية
انتو وينا برنامج تاسيس الدولة حقكم
رفس بس وتوهان
البوست ده منطقة عمليات يا حيدر
ورينا قصر جقود، ده شنو
الانقاذ، من ساسا لي، راسا، ما نافعة. 1989-2025 ما نافعة ولا تنفع
هسة بعد، الجنجا بدورو لينا مسلسل جديد، مع جبريل ومناوي
ونشوف حكومة بوتسودان فرع مصر دي، بتكون كيف
ناقص بس، قبة..... وخضر،.... ودينق
يجو هنا
برنامجي اما all او non
ما بتشيلو تفصلو كلوش يا حيدر، والتاج
سيستم قصاد، سيستم وموجه للشباب، والشعب فقط
النخب المؤدلجة الخايسة دي، رميت طوبتا زماااان