هل دخل تقسيم السودان حيز التنفيذ؟

00:02 AM January, 24 2025

سودانيز اون لاين
طارق عبد الله-السعودية
مكتبتى
رابط مختصر

استعادة مدني واخبار معارك بحري مقابل قرب سقوط الفاشر وخط الامداد من ليبيا على تخوم الولاية الشمالية وتشكيل حكومات موالية للطرفين، كل هذا بدون معارك حقيقية على الارض عكس ماتروج له السوشيال ميديا، هل يعني ان هناك اتفاق تسليم وتسلم على الطريقة السورية قد تم إقراره بين اللاعبين الرئيسيين في الملف السوداني الامارات وتركيا ومصر؟ والجيش والدعم مجرد أدوات على الأرض؟ بمعنى الشمال والوسط والشرق للجيش والغرب للدعم واحتمال تقاسم مناطق النيل الأزرق؟ الجاي كتير وربنا يكضب الشينة

متوقع كردفان من هذا!!!!!
تحياتي

نعم الله يكضب الشينة يا طارق
والجاي كتير ...
وكل ذلك من أجل ماذا ؟؟
من أجل مصالح شخصية بحتة ..

دي كذبة صلعاء
الجنجويد دارفور ما حقتم عشان يسلطوهم عليها
الجيش والمشتركة أنتصروا عليهم انتصار عسكري
ومستحيل يترك للأوباش ديل شبر يحكموهو
في دارفور ولا غيرها

يا منتصر كلامي انو الأحداث تشير الى ان السودان بشكله القديم انتهى خلاص، وأنه هناك شبه توافق دولي غير معلن على تقسيم البلد والجيش والدعم مجرد ادوات لا تتورع عن بيع اي شي مقابل مكاسبها الشخصية حتى لو كان الوطن الذي أقسمت على حمايته! والقطيع المغيب شغال في بل وجغم وباقي التفاهات ناهيك عن الملايين الذين استوطنوا المنافي بتذكرة خروج بدون عودة! عموما لازلت عند كلامي ربنا يكضب الشينة ويلطف بالبلد والناس!

الجنجويد ما عندهم حتة يتقلب عليها الورل في دارفور، الاسم دار الفور والقبائل الافريقية الاخرى
شن جاب العرب في دارفور عشان يجوا يحكموها،

سلام يا طارق

Quote: والقطيع المغيب شغال في بل وجغم وباقي التفاهات

ياريت يا طارق تورينا إنت الما مغيب عملت شنو عشان تمنع التقسيم؟

اقتباس حافظ بشير

"ياريت يا طارق تورينا إنت الما مغيب عملت شنو عشان تمنع التقسيم؟"

اديني سلاح ترامب ولا بوتين وبوريك بعمل شنو، بالمناسبة شغل الدردقات ده قديم يا مولانا، والطرفين العاملين بتحاربوا ديل كل واحد شغال تقسيم كويس لكفيلو من مطار مروي والري النهري للمصريين، للتصنيع الحربي بتاع الإيرانيين والاوكرانيين لي المعابر من تشاد المفتوحة للاماراتيين، خليت ده كلو وناطي فيني؟ نسأل الله السلامة، على العموم شغال ذكر فان الذكرى تنفع المؤمنين

المريسه و البغنيه

كل دول العالم اتفقت علي تقسيم السودان و نحن قاعدين امفكوا

بعزم الرجال في القوات المسلحه تحمى الارض مش بالكي بورد و العسليه


الزبير الختمي

اقتباس الزبير

"المريسه و البغنيه

كل دول العالم اتفقت علي تقسيم السودان و نحن قاعدين امفكوا

بعزم الرجال في القوات المسلحه تحمى الارض مش بالكي بورد و العسليه


الزبير الختمي"

كسير التلج للبوت من مرافئ اللجوء بعيد من طيران البرهان وشفشفة الجنجويد وباقي الملايش و ذل طوابير الحدود ده سمح شديد يالزبير مش كده؟

Quote: خليت ده كلو وناطي فيني؟

زي ما إنت برضو خليت ديل كلهم ونطيت في القطيع المغيب.
فالقطيع المغيب أيضاً لا يملك سلاح ترامب ولا بوتن.
وأنت والقطيع المغيب تملكون نفس الأدوات وأنت تتفوق عليه بإمتلاكك للمعرفة والعقل الحاضر،
لذلك سؤالي لك بإعتبار أنك تملك المعرفة والعقل الحاضر.

اقتباس حافظ بشير

"زي ما إنت برضو خليت ديل كلهم ونطيت في القطيع المغيب.
فالقطيع المغيب أيضاً لا يملك سلاح ترامب ولا بوتن.
وأنت والقطيع المغيب تملكون نفس الأدوات وأنت تتفوق عليه بإمتلاكك للمعرفة والعقل الحاضر،
لذلك سؤالي لك بإعتبار أنك تملك المعرفة والعقل الحاضر."

يمكن ماوضحت المعنى كويس، قصدت بالقطيع المغيب معارك دون كيشوت الوهمية بين مناصري الفريقين في السوشل ميديا، لكن واقعيا معظم الشعب السوداني (بما فيهم مشعلي الحرب والمتاجرين بها انفسهم) يدركون تماما انها تخلو من البعد القومي وأنها مجرد صراع لصوص فيما بينهم والدليل توجه معظم القادرين على حمل السلاح الى منافذ الحدود بدل معسكرات التجنيد بما فيهم ضباط جيش وشرطة بالخدمة والمعاش، ومن يحارب على الارض ملايش تجار حروب من البراء وكيكل والمشتركة ومؤخراً التقراي وماخفي اعظم. على العموم انا بحاول اوضح الصورة للناس المؤيدة لاحد الطرفين بسبب الغبن من الطرف الاخر بان الحرب كلها شر وكل يوم تستمر فيه معناه مزيد من الخسائر والمنتصر فيها (ان وجد) سوف يواصل رقصة الموت والدمار والفساد والاستبداد على رأس من تبقى من الشعب. والحل الوقف الفوري واكمال ترتيبات جمع السلاح والجيش المهني الواحد

مش اتفقت على التقسيم بل اتفقت على بيعها للدويلة كسمسار للقوى الكبرى و استخدمت الجنجويد الاوباش كادوات لتنفيذ ذلك
ولكن قوة ارادة هذا الشعب و جيوشه المقاتلة افشلت المؤامرة. انت اتفرج للنهاية مشروع البل التقيل القادم للاوباش عربان الشتات......و مصيرهم المحتوم

اما قصة تقسيم السودان فده حلم ابليس بالجنة.

Quote: بعزم الرجال في القوات المسلحه تحمى الارض مش بالكي بورد و العسليه الزبير الختمي

سلام الزبير الختمي
ياخي انا مستغرب شديد من محمد عثمان الميرغني، امس شفت فديو لمن يسموها (أم الشهداء) وهي السيدة القونة ندى القلعة في حفل تكريم لها من قيادات الدولة لدورها الفعال في قيادة المعارك الحربية. في حفل التكريم ذكر المذيع ان السيد محمد عثمان الميرغني بيهنيء ندى القلعة وارسل (ظرف) لها من مصر ( الاحتفال كان ببورتسودان)
الكلام دا كيف😲
هل معقول ان السيد الكبير تدهور مستواه لهذه الدرجة.
انا ما مصدق الكلام دا خالص لسبب بسيط انه ناس (سيدي علي) ديل اصلآ ما بيدخلوا يدهم في جيوبهم عشان يدوا زول حاجة.
هل ممكن يكون الظرف الرسله دا عبارة عن (فاتحة) لدعم عزم رجال الجيش.

Quote: والحل الوقف الفوري واكمال ترتيبات جمع السلاح والجيش المهني الواحد

هل دا حل واقعي ام مجرد امنية؟
ما لم تكن تملك قوة تفرض على الطرفين وقف الحرب وآلية لتحويل وقف الحرب إلى واقع، فإن دعوتك لوقف الحرب تظل امنية بعيدة عن الواقع.
امنية تتجاهل واقع المصالح المتضاربة لا تأخذ في اعتبارها التوازنات السياسية والاقتصادية والاجتماعية التي تدفع الحرب.
امنية تعتمد على افتراضات بعيدة عن الواقع ولا تقييم معوقات تحققها.

ناس بل وجغم راهنوا على قوة الجيش في حسم الحرب لصالحه ومنع تقسيم السودان.
فعلى أي قوة يراهن طرحك لوقف الحرب والحفاظ على وحدة السودان؟
ما هو الأساس العملي الذي تبني عليه حلك المطروح لوقف الحرب؟

اقتباس حافظ

"هل دا حل واقعي ام مجرد امنية؟"

هو حل واقعي لكن يظل تحقيقه أمنية، المشكلة مافي خيار غيره لكن العساكر سقطوا في امتحان الوطنية والمسؤولية والبديل هو السيناريو القائم الان، تقسيم عيني عينك الغرب مقابل الشمال والوسط وربما نشهد في الأيام القادمة إعلان حكومتين بالطريقة الليبية وإيقاف الحرب بعد كل زول اخذ كومه. بالمناسبة يا حافظ لو فاكر البل باعتقادك حيحصل وترجع عقارب الساعة الى ماقبل ١٥ أبريل تبقى غلطان، الحل خرج من يد السودانيين خلاص.

Quote: هو حل واقعي لكن يظل تحقيقه أمنية

تاني:
ما لم تكن تملك قوة تفرض على الطرفين وقف الحرب وآلية لتحويل وقف الحرب إلى واقع، فإن دعوتك لوقف الحرب تظل امنية بعيدة عن الواقع.
امنية تتجاهل واقع المصالح المتضاربة لا تأخذ في اعتبارها التوازنات السياسية والاقتصادية والاجتماعية التي تدفع الحرب.
امنية تعتمد على افتراضات بعيدة عن الواقع ولا تقييم معوقات تحققها.

ناس بل وجغم راهنوا على قوة الجيش في حسم الحرب لصالحه ومنع تقسيم السودان.
فعلى أي قوة يراهن طرحك لوقف الحرب والحفاظ على وحدة السودان؟
ما هو الأساس العملي الذي تبني عليه حلك المطروح لوقف الحرب؟

اقتباس حافظ

"ناس بل وجغم راهنوا على قوة الجيش في حسم الحرب لصالحه ومنع تقسيم السودان."

زي مابقولوا المصريين ابقى قابلني

Quote: اديني سلاح ترامب ولا بوتين وبوريك بعمل شنو

ههههههههههه
يعني أنت ممن إعتبرتهم قطيع؟!
موش أنت نفسك اعتبرت بتاعين البل والمتك قطيع؟!
ول لمن يكون البل والمتك بسلاح ترامب أو بوتن ما قطيع
والقطيع حصرا على البل والمتك المحلي؟!
يا بتاع المستورد!
وأنت اختصرت صورة واقع القحاتة وافلاسهم!
وانهم عديمي الرؤية الوطنية

منتصر،،، عديمو الرؤية هم ناس البوت وعبيدهم من الجهتين، وبراك شايف وصلنا وين بسببهم

Quote: اقتباس حافظ "ناس بل وجغم راهنوا على قوة الجيش في حسم الحرب لصالحه ومنع تقسيم السودان." زي مابقولوا المصريين ابقى قابلني

حاقابلك في كل الأحوال،
فحتى لو لم يكسبوا الرهان فهم راهنوا على شيء واقعي وموجود،
وهنالك الاف المبررات التي تجعلهم يراهنون على قوة الجيش،
على الأقل لأن ذلك هو واجبه المنوط به.

سؤالي لك الذي تتجنب الاجابة عليه هو:
على أي قوة يراهن طرحك لوقف الحرب والحفاظ على وحدة السودان؟
ما هو الأساس العملي الذي تبني عليه حلك المطروح لوقف الحرب؟

حافظ داير تصل لشنو؟ أنا اديتك الحل المفروض يكون، لكن الأطراف الفي يدها السلاح مادايراهو خلاص خموا وصروا وفرتقوا البلد بطريقتكم انا قلت العندي. لكن عايزني أدي تفويض للبرهان ولا حميدتي بعد العملوه في السودان ما بتلقاها عندي. مليشيا الكيزان ضد مليشيا الجنجويد وفي النص تجار الأزمات ناس جبريل ومناوي وعقار وكيكل، دي قصة مابتهمني كمواطن ، فخار يطحن بعضه طز فيهم لكن المشكلة على حساب البلد والناس، سبحان الله شفّع المدارس اعقل منهم، بصفوا حساباتهم بينهم بدون مايدخلوا زول في النص!

Quote: حافظ داير تصل لشنو؟ أنا اديتك الحل المفروض يكون، لكن الأطراف الفي يدها السلاح مادايراهو

طالما الاطراف الفي يدها السلاح وتمتلك قرار وقف الحرب ما دايرة طرحك وطالما ما عندك آلية لفرض وتنفيذ طرحك،
يبقى إنت ما طرحت حل.
إنت طرحت امنية.

حسب معرفتي من كتاباتك وما تبذله من آراء في تقديري إنك طارح التفاوض دونما اعتبارات لتوزنات القوة الميدانية.
وبالتالي لا تضع في حسباتك تقدم أي من الطرفين ميدانياً كمؤثر على التفاوض.
طيب لو فرضنا الطرفين جلسوا على مائدة التفاوض واتفقوا على التقسيم ووقف الحرب، هل هذا الحل مرضي لك؟

سلام طارق اخوى وضيوفك الكرام

Quote: سلام الزبير الختمي ياخي انا مستغرب شديد من محمد عثمان الميرغني، امس شفت فديو لمن يسموها (أم الشهداء) وهي السيدة القونة ندى القلعة في حفل تكريم لها من قيادات الدولة لدورها الفعال في قيادة المعارك الحربية. في حفل التكريم ذكر المذيع ان السيد محمد عثمان الميرغني بيهنيء ندى القلعة وارسل (ظرف) لها من مصر ( الاحتفال كان ببورتسودان) الكلام دا كيف😲 هل معقول ان السيد الكبير تدهور مستواه لهذه الدرجة. انا ما مصدق الكلام دا خالص لسبب بسيط انه ناس (سيدي علي) ديل اصلآ ما بيدخلوا يدهم في جيوبهم عشان يدوا زول حاجة. هل ممكن يكون الظرف الرسله دا عبارة عن (فاتحة) لدعم عزم رجال الجيش.

انتهى الإقتباس
عاد ندوية كان ما عملت طقطوقة لأبو هاشم ( السيد محمد عثمان مبسوط منى )

اتلومت لوم العدو

https://www.0zz0.com

مكرر
عذراً

وحدث ما حذرنا منه،،، الفاتحة على السودان

ومن هو السبب في كل ذلك ؟ في هذا العبث الذي يجري في الوطن ؟
واحد جاهل كان سراق حمير ....تم استغلاله من طرف سئ الذكر البشير ومن ثم من
طرف دويلة الشر ...
وافضل للسودان ان ينقسم إلى ألف ألف دويلة او ينمحي من الوجود من أن يحكمه جاهل كان سراق حمير ..
وهذي زمانك يا مهازل فامرحي ..

قلناها يا السر كم مرة بل بتاعت الكيزان وجغم الجنجويد حتوصلنا لكدة،الطرفين ما عندهم قدرة حسم عسكري وحتى لو كان لا يختلفان عن بعض من ناحية السوء والنتيجة دمار شامل على كل الأصعدة وتمزيق كيان البلد. الموضوع وصل نقطة اللاعودة، نسأل الله اللطف بالناس

قلناها يا السر كم مرة بل بتاعت الكيزان وجغم الجنجويد حتوصلنا لكدة،الطرفين ما عندهم قدرة حسم عسكري وحتى لو كان لا يختلفان عن بعض من ناحية السوء والنتيجة دمار شامل على كل الأصعدة وتمزيق كيان البلد. الموضوع وصل نقطة اللاعودة، نسأل الله اللطف بالناس

قلناها يا السر كم مرة بل بتاعت الكيزان وجغم الجنجويد حتوصلنا لكدة،الطرفين ما عندهم قدرة حسم عسكري وحتى لو كان لا يختلفان عن بعض من ناحية السوء والنتيجة دمار شامل على كل الأصعدة وتمزيق كيان البلد. الموضوع وصل نقطة اللاعودة، نسأل الله اللطف بالناس