06:06 PM December, 29 2024 سودانيز اون لاين
أبوذر بابكر-
مكتبتى
رابط مختصر
قمرية أم درمان
*********************
حزينه خليتي الغُنا
ونحن زيك يا وحيده
تعبنا هدّانا العَنا
وتَعب الكلام
يبست مواويل القصيدة
سكتت غناويك يا مجيدة
وما فينا غير مُر الملام
غنيتي لى عطش البحر
تاوقتي فجيتي الزحام
راجيه الخبر
ونحن زيك يا وجيدة
وسط الدرادر والسفر
مغسة هديلك والخصام
يا جايه من حِرب الحراز
المسقي بي موية المطر
بي لمة الناس العُزاز
إطمّني
فشة غبينتك يوم قريب
إطمّني
طلة شبابيك الحبيب
إطمّني
باكر تجيب الهمبريب
فرحة شوارعك وضل بيوتك
وضحكة في خطوات مشيك
مفطومة من نبع الحليب
هدير غناكي مهر سكوتك
جهرة ملامحك ضي وشيك
إطمّني
يا طالعه من بطن الحقيقه
وساكنه في جروف الخيال
إطمّني
باكر نغني وننتشي
بي شوق مشاويرنا الأنيقة
باكر أكيد
فرحك يزيد
باكر نشد خيل الوصال
إطمّني
ما تخلي شي
هزي اليك جذع الهديل
يتساقط المنى والجمال
فرحاٍ هميل
يسقي الشوارع والبيوت
ما يخلي شي
وتب ما بموت
وصباح بشارتك يبقى عيد
إطمّني
باكر أكيد
ترجع سماحتك من جديد