هدية لكل من تجاوزت أعمارهم مقاسات ( نعلاتهم )

11:07 AM December, 20 2024

سودانيز اون لاين
ابوحراز-
مكتبتى
رابط مختصر

غايتو الواحد من ( عمرو ) يتجاوز مقاس النعلات تاني الا يلزم الاستغفار
■■■■■■■■■■■
● النزوح والحرب وذكرياتك التي سرقت دي كلها كافية من أن تجعل نظرك ( مزغلل ) ومرات تمر بك لحظات اي حاجة تشوفا قدامك ثمانية ثمانية
● راجعت طبيبة عيون قبل أيام
وكنت استغرب كثيرا
حيث أن اغلب المراجعين أعمارهم لم تتجاوز مقاس النعلات فحسب
بل ان بعضهم
الا تضرب مقاس النعال × ٢
وجميعهم لابسين نظارات سوداء فاقع لونها يقشعر من رؤيتها الناظرين
● الطبيبة للأسف صغيرة
ولاتزرع فيك اي نوع من الأمل
بل تتعامل معك على انك منتهي الصلاحية وغير قابل للتجديد
● المهم رفعت حاجب العين بقوة
حتى تجاوز ( فلقة الصلاة ) !!!!
ومن ثم ارجعته مرة أخرى وقالت لي
( اسمع ياحااااااج جاء معاك واحد من أهلك وللا براااااك )؟
قلت ليها معاي عمي ( قوقل ) ح يوصلني لحد البيت
قالت لي القطرة الحانديك ليها
ح تخليك مزغلل زيادة
على كيفك .. قال قوقل قال !!!
● بعد يومين راجعنا طبيب العظام نسبة لوجود ااالام في القدم
اها كل واحد بيدخل على الطبيب بيساله
♤ انت مالك ؟؟ كورة
♤ وانت ؟ كورة
♤ وانت ؟ وقعت من الموتر
♤ وانت ؟ في تمرين رفع الأثقال
♤ وانت ؟ والله يادكتور وقعت في الكورة
♡ وانت ؟ ركشة
♤ حينما أتى دوري سبحان الله لم يسألني
غايتو الدكتور غلب عمك قوقل واشعة X ٨ صفر
طوالي وبدون أي مقدمات قال
انت اكيد ياحااااااج (انزلقت)
قلت له .. ليه ما يكون كورة ؟؟
ضحك وقال لي
نوعكم دا يأتينا يوميا
يا وقع من تربيزة
يا اتزحلق تحت التربيزة
قال ياحااااااج قال
■■■■■■■■
هجمة مرتدة
بمناسبة انتهاء الصلاحية
مسطول ذهب بطفله للدكتور بعد استفراغ ومغص حاد
فقال له الطبيب
الشافع عنده تسمم
لانه شرب حليب منتهي الصلاحية
المسطول قال ليه صادق يادكتور
لانه رضعتو حبوبته

ابوحراز

من نواحي الفيس
https://www.facebook.com/share/p/17yLzHNEyQ/؟mibextid=oFDknkhttps://www.facebook.com/share/p/17yLzHNEyQ/؟mibextid=oFDknk

عوافي يا حبيبنا ابو حراز
وعساك طيب وشديد

يبدو انك ما صدقت كلامي
الكلام القلته ليك في خيط الترحيب بيك بعد طول غيابك من المنبر
أو انك ما اقتنعت بالكلام

المنبر الإنت بتعرفه انتهى يا ابو حراز
الشي الإنت شايفه قدامك هنا دا شي تاني خالص

ما فيه شي غير الحاجات المنقولة والمحمولة من محلات تاني

عشان كدا مافي لزوم وداعي تتعب نفسك وتكتب موضوع من عندك
بالجد والله
امش بس بكل سهولة والقط واخطف ليك ليك اي فيديو يعجبك أو موضوع مكتوب في محلات تاني وتعال الصقه هنا

شغلانة بسيطة وساهلة

الآن والله يا ابو حراز وفي اللحظة دي
يوم الاثنين 23 ديسمبر 2024، الساعة 8:54 صباحا بتوقيت غرينيتش

في 67 موضوع منقول وملصوق في الصفحة الأولى في المنبر
(سبعة وستين)

حاجة غريبة وعجيبة ومحيرة

عليك الله اخد ليك جولة في الصفحة الأولى وشوف
يمكن تصدق كلامي

وبالمرة حاول القى لينا تفسير للشي العجيب دا

سلام اخونا ابو حراز و اخونا ابوذر.
بليس واصلو في الابداع. نحتاج الى كثير من هذا فى زماننا هذا.
صحيح الصفحة الاولى دائما مليئة باخبار الحرب و لكن اذا هجر اهل الابداع المكان, فمعناه انتصار القبح.

تحياتي يا محجوب
كيفنك

إبداع ؟

يا حليل المبدعين وزمن الإبداع في سودانيزاونلاين

غير رزايا وأحزان وهموم الحرب
بقينا في هم وغم سودانيزاونلاين

المنبر يا محجوب وصل مرحلة والله ما لاقين ليها لا إسم ولا تعريف
ودونك المنبر يا محجوب شوف إنت بنفسك

شي طبيعي أخبار الحرب تكون هي الغالبية ومواضيعها تكون الأكتر

لكن

المشكلة الآن في آفة النقل والترحيل
فيديوهات ومواضيع مكتوبة

يا ريت لو نفس الناس البنقلو الأخبار دي، يكتبو رأيهم وطرحهم هم
ان شاء الله حتى الواحد يكتب عشرة مواضيع في اليوم
كان الوضع بكون مقبول وسمح وفيه إضافة للمنبر
مش ينقلو كلام ناس تانين، ويا ريت كمان لو كانت الأشياء المنقولة دي ذات قيمة وعلي قدر المقام

تحياتي اخي محجوب
وشكرا لكلماتك المحفزة على الاستمرار

Quote: لكن التفاعل ضعيف وحركة المنبر بطيئة جدا الااان بعمل إحصاء سريع فان عدد المواضيع في الصفحة الأولى 100 المواضيع ذات المشاركات الاقل يعني مشاركات من ٧ وتحت بلغت 75% المواضيع التي بها عدد المشاركات صفر تقريبا 32% وهذا الشيء لم يحدث منذ التاسيس

---

Post: #5 Title: Re: هدية لكل من تجاوزت أعمارهم مقاسات ( نعلاته Author: ابوحراز Date: 12-24-2024, 03:22 PM Parent: #3 تحياتي ابوذر كلامك كله صحيح تابعت المنبر وبالفعل مختلف جدا إصابته متلازمة النسخ واللصق كما أن التفاعل ضعيف جدا والمنبر شبه مترنح بل يكاد يسقط على الأرض يفتقد المنبر لذلك البريق والالق والكيمياء التي عهدناها وكان سابقا تحدث للمنبر بعض الهزات والرعشات الطفيفة وذلك بسبب بعض التطبيقات الأخرى والتي تسرق منه الاضواء حينا ثم سرعان ما تعود القاطرة لسكتها حيث يفرض التنوع والثقافات المختلفة سطوتهما ويعود المنبر اكثر بريقا ولمعانا والقا الان المنبر شبه مصاب ب ( الباركنسون) لحق محمد علي كلاي وجدي حاج الخدر ود الخزين انا لدي بعض المواضيع الساخرة وهذا احداها قلت عسى أن تلامس كوامر البورد وتعيد تنشيط الخلايا الجذعية للمنبر فرميت بالشبكة في بحر سودانيز اون لاين لاتفاجا بأن عدد المشاركات (0) ولمدة يومين وذلك يحدث معي لأول مرة منذ 2002 مما جعلني اصنف نفسي بانني أصبحت منتهي الصلاحية رغم التفاعل الكبير الذي وجده نفس الموضوع مع عمنا مارك

---

Post: #7 Title: Re: هدية لكل من تجاوزت أعمارهم مقاسات ( نعلاته Author: أبوذر بابكر Date: 12-25-2024, 07:32 AM Parent: #5 حبيبنا ابو حراز اهو انت شفت وعرفت ظاهرة غريبة وعجيبة وما ليها اي تفسير والله ويا ريت لو كانت مفيدة ومجدية المنبر ومن بداية دخولنا واشتراكنا فيه سنة 2002 وانت معانا من البداية كان كتير جدا بمر بأوقات وهزات زي ما انت قلت خصوصا بعد سنة 2013 تحديدا لكن كلها كانت من الأشياء العادية وبتعدي بوقتها وبزوال المسبب لكن نحن حاليا في معضلة غريبة بالجد والله مجموعة كبيرة من الزملاء والاعضاء المشو وفاتو واعتزلو الكتابة والمشاركة في المنبر طوالي بقولو لي "يا زول انت مالك" مافي شي بجبرك تقعد في المنبر وتزعل روحك، وطالما المكان بقى ما عاجبك زينا كدا فوت وخليهو بالنص كدا والله يا ابو حراز ودائما ردي ليهم كان انه أنه مزعلني المنبر وحال المنبر عارف يا ابو حراز احساس الزول لما يلد ويربي ولدو ومن البداية يعلمه كل شي سمح وكويس وجميل، وبعد ما يكبر يحصل ليه انحدار وتدهور وفشل او لما انت تزرع شتلة جميلة وتتولاها وتتعهدها بالرعاية والسقاية والاهتمام، وفجأة بعد ما تكبر تحرق وتموت دا بس هو الاحساس شوف احصائية اليوم: الصفحة الأولى اساسا فيها 100 موضوع عارف كم موضوع من ال 100 دي منقول، نسخ ولصق 63 موضوع اي والله تلاتة وستين بالتمام والكمال