يا بلد

08:14 PM December, 04 2024

سودانيز اون لاين
ابو جهينة-السعودية _ الرياض
مكتبتى
رابط مختصر

البلد ..
رغم العبوس ال بادي في محياهُ
و ال بَتابِتْ ال نازلة يوماتي
و عكْرة فضاواتو و سماهُ
مع كلُّ دة .. و كل داك
صورْتو كاسياها الوسامة ..
لوحة ماليها الوجاهة
( موناليزا سمرا و قيافة
مرة باسمة .. و مرة غاشِيها الحُزُن ..
سِيرَتَا في الآفاق تحوم ...
تاريخاً يمْلا صفحات المُتُن )
....
ياها ذاتا الوجوه أل من زمان
و نفس النوايا الطيبة ..بلا ظنون
نحن و إنتو .. كنا و لا زلنا ...
و حنكون للأبد .. أصل الدنيا .. و جوهر كُون
نبْذُر الآمال للخلِق .. و نحن أحوج ما نكون
( و لسان الحال .. أن نكون أو ما نكون )
منو ال من جدودنا فارق ترابو
و سلك... درباً للسفر مجنون ؟

يانا نحن
فاردين جناحاتنا صوب الغربة
طابقين جراحاتنا سنين و دنين
نعاود السفرة بعد السفرة
لا فتر عصا الترحال .. لا العزيمة تلين
و نرجع نحن يانا و إنتو ياكم
تلاقونا و نلاقيكم :
( حبابك .. يا حشاى .. )
( و حليلك يا روحي و حبيب قساى .. )
( يا بعد جوع روحي الطويل .. دخري و عشاى )

نفس السؤال الما بارح خيالاتنا و خيالاتكم
يا ألف مرحب و يا حبابكم
حالكم و أحوالكم ..؟
وليداتكم ..؟ بنياتكم ؟
فلانة عساها .. و فلان داك عساهُ

لا تكِلّوا من كتر السؤال ..
لا نحن من الرد نَمِلْ

نفس الإمتحان و نفس الدرِس
و إنتو ياكم .. لابسين من زمان ذات اللبس
في خريفكم و في شتاكم
هن لافحات نفس التياب
هم شايلين نفس العِصي
هن متوشحات توب القدر الما بِتْعَصي
هم فاردين شراع الصبُر .. شاقين بحر الصعاب

نحن يانا و إنتو ياكم
جبلا ما بهزو الريح
تاريخاً كِتَاُبو .. ما بيلزمو التوضيح
لساناً تصاريفو عجَب ...
رَطِن أعاجمو فصيح
و نحن يانا و إنتو ياكم
واقف محلو زمن .. قادوس حياتنا و تِرِس حياتكم
لا بِقَدم لا بِأخّر ..
زى ساعات الميادين العتيقة
و زى عُنُق الحقيقة ..لا بِتْلَوي لا بِنْكَسِر
سِرْ يا يا بلد .. ما تقيف محلك سِرْ

و إنتو ياكم
مضمونين تمام .. ضمان موية الدميرة
معجونين بالطمي.. فال حنة و ضريرة
أعلام ترفرف فوق كل القمم
مزاحمين كل الأمم
مواثيق عهود و بصمات ذمم

و إنتو ياكم
بي صيامكم و خم رمادكم
بي سجودكم .. و بي قيامكم
معفّرة بي أديم الأرض جِباهْكم
سديدة في قلب الهدف رمية سهامكم
و كل البلاوي الجات مسامحانا و مسامحاكم
في المال و الولد ..و في هامات مقامكم

و عشان كدة
أركز يا بلد ..
حنكون للأبد .. أصل الدنيا .. و جوهر كُون
نبْذُر الآمال للخلِق .. و نحن أحوج ما نكون

***
جلال الدين ابو جهينة
( في معية بعض النازحين من الحرب)

سلام ابوجهية اراك بكيت البلد والام والاب والبنت والولد وبكيت سمائها البسحب ملبد ياحليل البلد وأغنية الربوع والزهور والورد

تحياتي اخي صديق
مشكور على المرور البهي
والله يا صديق الذي حدث بالسودان اكبر من ان تهدهد مآلاته صرخات الالم والبكاء
دعواتنا بأن يحفظ الله العلي القدير السودان واهله وأن يعود السودان كما كان
اللهم آمين