ذكري رحيل ابوي أعظم رجل في العالم

06:39 AM November, 23 2024

سودانيز اون لاين
mohmmed said ahmed-
مكتبتى
رابط مختصر

ابوي سيد احمد مصطفي...باعتبرو أعظم رجل في العالم
والعظمة دي مش هو زول مشهور ولا اغني زول ولا اشجع زول
لكنو ابوي عظمتو بسيطة جدا
ابوي تعليمو بسيط جدا تانية ابتدائي...حافظ جزء كبير من القران بتجويد وصوتو جميل في ترتيل القران وأداء مدائح الختمية في الحضرة وفي المقابر
ابوي وهو شاب صغير في الإسماعيلية كان بيكتب الجوابات ويقراها لكل أهلنا المعاهو...في القاهرة كون جمعية أبناء نلوتي...وعندما عاد للخرطوم في بداية الخمسينات اشتغل عامل في الري المصري وفي نهاية الخدمة وهو في جبل أولياء ترقى لموظف
في الخرطوم برضو كون جمعية لابناء نلوتى
في جبل أولياء استغل في لجنة بناء المصلى الصغير
اشتغل سياسة في الحزب الاتحادي وبالرغم من انو ختمي وخليفة انضم للحزب الاتحادي ولم ينضم لحزب الشعب الختمي
خليفة دي يعني بيعمل الحضرة كل شهر في بيتنا...يولعو الرتاين ويعملو الفتة ويطلقو البخور والشاي بالنعناع ويعطرو الجو بانشاد عذب
اللهم صلي وسلم علي حبيب الله
ابوي عمل مع عمنا عابدين في لجنة بناء مسجد السوق سافرو مدني والحصاحيصا والخرطوم يجمعو التبرعات لبناء مسجد شامخ وكبير...ثم اصبح المؤذن ونائب الامام...ومسؤول ومشرف علي إقامة ٢٠٠ طفل يدرسون القران يؤمن لهم الطعام والغذاء
اشرف على مسجد الكوثر الصغير بالقرب من المنزل..أمام ومؤذن ومحفظ للقرآن والتجويد
اهم من دا كلو
ابوي عندو شغف كبير بالعلم والتعليم
علمنا نحنا اولادو وبناتو العشرة تعليم جامعي
مش كدة وبس
استضاف في منزلنا ١١ من الأقارب والمعارف اكملوا تعليمهم من منزلنا...منهم من درس من اول ابتدائي حتى الجامعة ومنهم من اكمل سنوات عليا
من طرايف وصول البعض منهم للإقامة معنا
يوم في السوق شاب سألو وين المدرسة المصرية...ساقو وفي الطريق سألو عاوز شنو من المدرسة...الشاب أجاب بكل صراحة...انا كنت طالب في المدرسة المصرية في ام درمان وعملت مشكلة مع استاذ...فصلوني وبقرار ما ادرس في اي مدرسة مصرية في الخرطوم..وجاي ادرس في الجبل
ابوي قاليهو..طيب لو قبلوك حتمشي كيف من الجبل للخرطوم زمن الخرطوم لام درمان.. لكن مافي مشكلة
الشاب قبلوهو في المدرسة...ومن المدرسة جابو البيت..قعد معانا سنة وامتحن الشهادة ودخل كلية الحقوق ولصبح قاضي مشهور

من القصص عن حرصو على التعليم
معانا زميل في الفصل شاطر جدا..في سنة ساته اتمرن وساب المدرسة..يوم جاي حايم جنب المدرسة بعجلة ابوي..مسكو واتكلم معاهو واقنعو يرجع للدراسة...رجع المدرسة وتفوق ودرس صيدلية والان لديه صيدلية في سوق الجبل
حكاية اخري...حدثني بها المرحوم عمر عوض السيد العبادي..وقال انت عارف يا محمد ابوك دا عمل لي فضل ما انساهو طوال حياتي
عمر ابن اكبر تجار الجملة في سوق جبل أولياء...ترك الدراسة...ابوي جا بتونس مع عمنا عوض السيد...لقا عمر قاعد...قال ليهو الولد دا ليه ما في المدرسة...عمك عوض السيد قال والله يا سيد احمد ساب المدرسة وقدر ما اتكلمنا معاهو رافض كدي حاول اقنعو...عمر قال ابوك اداني كلام حار تاني يوم شلتا شنطتي ورجعت المدرسة..عمر تخرج من كلية التجارة

ربنا يرحمو كان سعيد سعادة غامرة..عندما تم تكريمه من شباب وطلاب وطالبات المدرسة المصرية بجبل أولياء وحكو عن ذكرياتهم

اها مش من حقي اعتبر ابوي أعظم رجل في العالم

يا سلام يا شيخ محمد
والله افرحتنا و ابهجتنا و شرحت صدورنا بهذا الكرم و الطيبة و الهمة للوالد العظيم
الواحد بيفرح بالطيبة و الكرم و مساعدة الاخر
رحم الله الوالد العظيم و اسكنه جنات الفردوس الاعلى مع النبيين
و اعانكم ف المضى فى طريقه
الف شكر
مودتى و تقديرى

شكرا محمد
والله بحاول وبدعو ربنا
يقدرني اعمل ربع الكان بيعملو ابوي

له الرحمة والمغفرة ونسأل الله أن يدخله جنة نعيم بلا حساب وأن يوسع له في قبره ويجعله روضة من رياض الجنة.

السودان دا خدموه رجال يجلهم التأريخ، فأنت رسول لوالدنا جميعاً وليس أنت وحدك وأخوتك، رجل ربي وعلم وخرج أجيال، نسأل الله أن يجعل كل ما قدمه للوطن في ميزان حسناته
وأن ينزل البركم فيكم أبناءه وبناته وأحفاده ومعارفه.

ثم شيئ أخر، هو والدك، رغم أهمية هذا الكلام الذي أدليت به، يكفي فخراً أنه أنجك ورباك وعلمك وأخرجك للسودان؛ ثم حديث المصطفي ليس هناك أعظم من والديك لديك، أمك ثم أمك ثم أمك ثم أبيك ..

اللهم أنزل عليه وعلي والدينا شعآبيت رحمتك يا رب العالمين.

بريمة

تقبله المولى قبولا صالحا ودعوة منك لن تنقطع

ربنا يرحمه ويغفر له..ويجعله من أهل النعيم المقيم.

نعم الاب ولك الحق ان تفتخر به
له الرحمة والمغفرة ولكم دوما احر التعازي

رحم الله العم سيد أحمد وتقبله مع الصالحين الأخيار وأحسن عزاءكم في هذا الأب الرجل العظيم، وجعل بركته فيكم وفينا.

شكرا ياسر

شكرا علي

شكرا دكتور محمد

ابننا تو ترهاقا
ابوي اهدى للسكوت عامة وجزيرة نلوتى خاصة٢١ خريج جامعي

١٠ من الأبناء
و ١١ من الاهل والاقارب

شكرا بريمة

جزء من رد الجميل
نحن الابناء انخطرنا كلنا في العمل العام
شقيقي الأكبر مصطفي ضابط إداري جاب عدد كبير من مدن السودان
ابودليق...الشيخ الصديق...الدويم...ربك..الكريدة..الحوش. ود الحداد..الحاج عبد الله ..الحصاحيصا...كادقلي...رشاد. ابوجبيهة...بربر
وكان مثال للامانة والنزاهة.. نزل معاش ولم يمتلك منزل ولا قطعة أرض

شقيقي جمال د كتور مهندس..في ألمانيا كان رئيس اتحاد الطلاب العرب واتحادالطلاب الافارقة

عمل رئيس لجنة تطوير مستشفى جبل اولياء أنجزت غرفة عمليات وعنبر الأطفال في مستشفى الجبل

شقيقتي زليخا محامية نزيهة
صاحبة فكرة رابطة أبناء جبل أولياء بجامعة القاهرة الفرع
وصاحبة فكرة تخصيص بص للموظفين من الجبل للخرطوم

شقيقتى فاطمة عملت المدير المالي لسفارة السودان بالقاهرة وتميزت بالأمانة والنزاهة


شقيقتي هدي مفتش ضرائب ما دخل جيبا درهم واحد حرام

له الرحمة والمغفرة
ان شاء الله تمسكوا دربوا وتربوا وتعلموا وتغرسوا كل ما جميل فى ابناءكم

شكرا أميرة
نحاول

ربنا يرحمهويغفر له ويتقبله قبولاحسنا ويجعله فى اعلى عليين
الاخ محمد سيداحمد ابوكم رجل عظيم حقا ما شاء الله رباكم فاحسن تربيتكم لكم ان تفخرون به وتسجلون تاريخ حياته فى كتاب ليكون عبرة وعظة للسودانيين

رحمه الله رحمة واسعة
وغفر له
واسكنه فسيح جنانه
وجعل البركة في ذريته اجمعين

*
تحياتي اخي محمد

شكرا ابوجهينة

شكرا ابوجهينة

شكرا حسن

فعلا هو أعظم أب
عليه الرحمة و البركة
سيكون في أعلي الفراديس بفضل الله و جاه النبي
صلي الله عليه و سلم

شكرا طه

رحم الله. رحمة واسعة
وصبركم علي. فقدهم
وقواكم علي السير في دربه
اخي محمد سيد احمد

بس الحضرة. عند اهلنا الختمية
في مناطقنا
كل يوم اثنين وخميس

وهي. قراءة. كتيب المولد

شكرا كمال
ايوة هي نفس الحضرة
دايما تكون يوم الخميس
وممكن تكون مرة في الشهر
لم يكن للختمية في الجبل مقر ثابت
لذلك كانت تستضاف بالتناوب في المنازل

وهل من ضمن
" طقوسها"
الشاي والزلابيةً

والفتة. في بعض. المناسبات ؟

ايوة يا كمال

بتذكر تفرش البروش ويطلق البخور
تدور كبابي الشاي بنعناع
والختام عشاء فتة

قراءة قران ثم مديح ثم اذكار
قراءة المولد
يارب بهم وبالهم عجل بالنصر وبالفرج
اشتد هواي على المهج يارب فعجل بالفرج

اخ محمد سيد احمد
ابوك فخرا لنا جمعياً
فحقيقة هم جيل طاهر لقوا ربهم على الحق والصراط المستقيم
كانوا كرماء نبلاء شجعان يخشون الله و لا احد غيره
ويبتغون مرضاته
والشجرة تعرف بثمارها
وانت ثمرة ذلك الاب
اسأل الله مخلصا له الدين
ان يجعله رفيقا لصحابة رسول الله صلى الله عليه واله
ورفيقا للشهداء والصالحين من عباده
وعلى دربهم نسير ونسعى

رحم الله والدك وغفر له فهو فعلا انموذج للاباء في ذاك الزمن الرحيم
نعم رجل عظيم ويستحق ما كتبه عنه ...

له الرحمة و المغفرة.
و البركة فيكم.

شكرا محجوب

شكرا حمد

شكرا علي

ياريت نكون فرع صغير من هذه الشجرة الوارفة

مرة راجع مع ابوي من الخرطوم للجبل
البص دخل قرية من قري شمال الجبل
و في شهر ابريل اجازة مدارس.. شفنا مدرسة خالية

ابوي قال لي فعلا
المال والبنون زينة الحياة الدنيا
هسا المدرسة دي شكلها من غير الطلاب ما جميل
لمن تشوف الطلاب داخل المدرسة منظر مفرح

دوائر عديدة شكلت اهتمامات الوالد

الدين ممارسة وسلوك
العلم والتعليم
فعل الخير والعمل العام