سألت د. حمدوك في لندن لو حميدتي حي !!!

04:52 PM October, 31 2024

سودانيز اون لاين
يحي قباني-فى الدنيا العجيبة
مكتبتى
رابط مختصر

و الله يا دكتور انا لو منك ما بجاوب على جنس السخف ده ..
لا .. و كمان الناس بتضحك و البلد في محنة !!

للاسف .. كان لازم يرد و ذلك لخفة عقول الناس و ترهات الكيزان ..

السودان حقيقة في محنة بي ناسه ..

و الاعجب .. و ما مستغرب .. اعتذار الحزب الشيوعي عن لقاء حمدوك ..
و كعادة الحزب الشيوعي .. انا اعترض اذاً انا موجود .. خخخخخخخخخخخخخخخخخ

سلام باشمهندس يحيى
هنا كوميديا
" />" target="_blank">كوميديا

مافي جهات تانية اعتذرت .. اش معني بس الضاوي اعتذار الشيوعيين ؟؟

حميدتي كان حى ماااات وشبع موت عند السودانية وتانى ما بتقوم لى قايمة حرامى الحمير ألذى ارتقى حرامى للحريم

Quote: للاسف .. كان لازم يرد و ذلك لخفة عقول الناس و ترهات الكيزان ..

ما أكثرهم
تحية لحمدوك
-
سلام ود قباني

Quote: حميدتي كان حى ماااات وشبع موت عند السودانية وتانى ما بتقوم لى قايمة حرامى الحمير ألذى ارتقى حرامى للحريم

العزيزة أميرة - عبارة صادقة!
…الشعب السودانى فى شنو وهم فى شنو ، الشابة قالت بتاعت "أخبار" مجرد ثرثرة يعنى ، وكمان تشيل وتشكر فى حمدوك😀
…كنت متوقعاه يقول ليها - دايما بتغدى معاه، ما كلهم فى تلك البلاد!
*حمدوك المزوراتى لما قدم استقالته ل البرهان+حميدتى وعبد الرحيم زاته على رأس السنة
*قال المدنين لم يتفقوا
*اليوم زور كلامه وقال - العسكر ما إتفقوا
*حمدوك يوم ما فارق العسكر ،ولا فارق تحقيق مقاصد البنك الدولى وصندوق النقد الدولى - كما عمله مع دكتاتورات الدول الأفريقية
ودا دلالة بعدم إحساسه بالسودان والشعب السودانى - جاء خبير ولا شنو كدا خارجى، لدرجة انه أصبح يعمل تحت إمرة حميدتى رئيس اللجنة الإقتصادية.

سلام قباني ونتمناك بخير في غيابك

Quote: لا .. و كمان الناس بتضحك و البلد في محنة !!

المشكلة حمدوك ذاتو قال الحرب دي فيها طرائف كتيرة خلاص.
والغريب أن كل المنشور في الميديا عن زيارة حمدوك وخالد سلك للندن هو التظاهرات والهتافات ضد حمدوك وهذا المقطع الذي يؤكد فيه حمدوك بأن حميدتي حي.
الغريب برضو أن التي سألت حمدوك عن حميدتي لا كوزة ولا فلولية، فهي من الواضح سألت السؤال لتتيح الفرصة لحمدوك عشان يرد.
هل تأكيد حياة حميدتي هو كل الغرض من الندوة التي نظمتها تنسيقية القوى الديمقراطية المدنية تقدم في لندن؟

Quote: ما أكثرهم تحية لحمدوك - سلام ود قباني

حيدرنا .. سلامات

مشتاقين ياخ ..
و الله فعلا ما اكترهم و ما اسخفهم و ما ابلدهم ..

تخيل يا حيدر .. لسة مصدقين انه في جيش .. و بي كل بلاهة شغالين .. جيش واحد شعب واحد ..

حميدتي كان حى ماااات وشبع موت عند السودانية وتانى ما بتقوم لى قايمة حرامى الحمير ألذى ارتقى حرامى للحريم

Quote: سلام باشمهندس يحيى هنا كوميديا

محجوب يا صديقي ..

حال الناس اصبح بائس جداً ..

و الكوميديا الجد ما آل اليه حال الحزب الشيوعي السوداني .. لسان حالهم كما يهوى الكيزان .. و وجود الكويز السغيروني داخلهم خلاهم و كأنهم بوق للكيزان ..

رحم الله نقد و راشد و الشفيع و آخر من انجب الشيوعيين الخاتم عدلان .. ثم عقرت ولّادتهم ..

Quote: وامرق على التاريخ تلقاه في السهلات مستني كمسيدك لا بيظلم التاريخ ولا بيرحم التاريخ إياه عوس ايدك.

ومعاها كمان

Quote: الساسة نِيّام العسل بين انتباهة وغفلتين

*لقد صدق فيهم قول القدال، عليه السلام فى عليائه
سلام باشمهندس قبانى ~
*انتو مش قلتو الشيوعين بالكثير يملوا حافلة عايزين بيهم شنو
*شوفوا موضوع قحت/تقدم الكانوا مالين "شريحة" وكمان فيها دقلو معاهم، والآن يتضاحكوا وكأن وجود حميدتى أو عدمه أمنية وتسلية للشعب المغلوب على أمره !
*وحتى لما دقلو الغائب قال ليهم "الحرب سببها الإطارى" ، يكون طوالى التفتوا على الشيوعين - دا كله منكم إنتوا بتحللوا صاح وبوعى شديد كدا ليه …

*الشيوعين ليسو مهزلة يا باشمهندس ، قاعدين مع شعبهم "ملح الأرض ان جفت وان كانت غنية"
*آخر الزمن عايزهم يتلموا على طبقة السياسين (الحقوق محفوظة لخالد سلك)
*وكمان يا باشمهندس بقيت تناديهم باسمائهم الحركية😀

أكثر من استفاد من اشاعة موت حميدتي
ومن فرضية موته هو حميدتي نفسه
لأن هذا عطل وجمد السؤال المحرج وهو
طيب يا حميدتي العايش أين أنت الأن؟
قد رأينا ولا زلنا نرى مرات متعددة البرهان والعطاء
وكباشي وهم بين جنودهم وداخل السودان في أماكن
معلومة أين حميدتي ؟
حميدتي أسير لدى الإمارات عالجته
وجعلته رهن رغباتها لا يقول إلا ما تريده أن يقول !
وهذه ميتة أشر من أي ميتة

الشيوعين والكيزان
وجهان لعملة واحدة

Quote: حميدتي كان حى ماااات وشبع موت عند السودانية

اميرة سلامات ..

منو " السودانية " بالضبط في رأيك ..

و منو الما "سودانية" 🤔

قبة سلام
بركه الجيت..... بطنا طمت من خضر وبريمة
زمان في توب اسمه رسالة لندن
هسة. كدي خلي ندوة حمدوك
تعال معاي، الشارع تشوف فضيحة، لندن
وجاوب
هل، معقول لندن دي فيها بس،
ال30 نفر، الطاردو ناس، حمدوك في، شوارع لندن؟؟
لو فرضنا تقدم دي بتمثل، السودانيين
والشيوعيين بمثلو السودانيين
ليه ما قدرو يطلعو كل، السودانيين في بريطانيا الشارع
واضح انه سودانيين لندن
عايشين بيات شتوي، كبير،
لا في برنامج لا رؤية
،لا، ابداع فكري، ولا، سياسيً ولا، اقتصادي،
وحكمة ربك لسه مكنكشين في، علم، مايو والاسترقاق، الايدولجي،
كدي، من هسة
لحدي 1 يناير 2025 التحدي، امام كل، القوى، السياسية
في، لندن
منو البمرق 100000 سوداني في هايد، بارك بي برنامج وعلم الاستقلال،
عشان يجي الميلاد، الثالث البشبهنا
اها شيوعيين لندن وقحاتة لندن
موعدنا يناير،
ونشوف
عاش ابو هاشم والحركة الشعبية
وحسنين

سلام يحيى
: هي اشاعة اطلقها الكيزان ثم قاموا بتصديقها. مطلق الاشاعة هو (حسن زردية) بايع سعوط بالقرب من مستشفى شرق النيل ببحري الذي رأى الدعامة يحملون شخص مصاب نحو المستشفى فتهيأ له انه حميدتي.
لا يوجد أي هدف من الاشاعة ولكن من ارادوا تصديقها ظنوا ان الدعامة سينهارون بعد مقتل قائدهم مثل ما كان يحدث في زمن القرون الوسطى.
ثم بدات المسرحية الكوميدية بتلفزيون الجزيرة من تاكيد من الزول البيقوم بتمثيل دور سفير السودان بليبيا وتبعه بقية البروفسرات والدكاترة والخبراء والمحللين الاستراتيجيين والسياسيين بالواتسب والفيسبك وقام (مبارك الفاضل) بدور كبير في. نشر الاشاعة وهو شيء محير جدآ.
بعد ظهور حميدتي قال مبارك الفاضل للجزيرة بان من نقل له اخبار اصابة حميدتي هو الفريق الطبي الذي قام بتركيب ظهر صناعي وعين صناعية و و و ...الخ لحميدتي بالمستشفى ببحري وان الطبيب المشرف هو دكتور فضيل... ودكتور فضيل طبيب باطنية لا علاقة له باجراء عمليات جراحية.
رواية مبارك الفاضل تدل على الجهل او قلة المعرفة التي يتمتع بها.
مبارك لا اظن انه شاهد او زار اي مستشفى بالسودان دعك عن مستشفى الحاج يوسف الذي يقوم بصناعة (زول) مثل ( رجل ال ٦ مليون دولار في المسلسل الامريكي القديم) وهذه مصيبة من مصايب السودان ان مثل مبارك الفاضل كانوا يديرون السودان (كان وزير داخلية😲)
ولا يدرك مبارك الفاضل واشباهه خطورة حديثة الذي يدل على الامكانيات الهائلة التي يملكها الدعم السريع من اطباء وعلماء يستطيعون صناعة (انسان) وهي تكنولجيا لا تملكها الدول المتقدمة الآن او بعد خمسين سنة
.ثم بدأت كتائب الجهل وكتائب (بل بس) بنشر وتأكيد ان الشخص الاصطناعي حميدتي الذي يظهر ويقابل رؤساء الدول هو صناعة بواسطة (الذكاء الاصطناعي) ومن يتحدث عن الذكاء الاصطناعي تجده يظن انه فوتوشوب او تقليد اصوات تم اختراعها والهدف منها هو تركيب شبيه لحميدتي.
من اغرب الاشخاص الزول الفريق بتاع سلاح الطيران الذي يؤكد مقتل حميدتي وانه يوم القيامة لن يجدوا جثته ويروي قصة شبيهة لقصة مبارك الفاضل. غير بلادة قائد طيران الجيش فهو اول من قال لشباب الاعتصام بعد قتلهم عبارة (ما كنتو تمشو الدايات، ليه جيتونا في القيادة) وجيل الشباب الجديد لم يفهم المعنى القذر للعبارة.
خلاصة الأمر ان الذي اصاب السودان من تفشي الجهل والانحطاط الاخلاقي يحتاج لعقود لاصلاحه اذا حافظ السودان على وجوده.

اهلا قبانى
السودانين الذين جعلوا منه بطل خرافى يمكنه تحقيق أحلامهم وآمالهم …..وطلع حرامى ولصّ كبير نهب خيرات بلدهم عينك عينك وقرر يبقيها مملكة او إماراة لاهله وقبيلته …..وبالمناسبة هو ما سودانى لو سودانى لما فعل ما فعل ….يا كافى البلا لا نخوة لا رجولة بس تفاهة ولقيط قروش ……لو سودانى كان عرف قيمة كل حيطة كسرا و كل نفس كريمة أزلها وقتلا
الله ينعلوا وينعل يومو وينعل من صنع منه بنى آدم وينعل من والاه وايدو
السودانيين نحن ديل الماسكين فى السودان بكل قوتنا ما خطينا منه خطوة أتربينا وعشنا فى وربينا اولادنا وأحفادنا فى سعينا وجاهدنا وعشنا رغم كل الظروف ….ما عرفنا لينا بلد غيرو ليس عجزا ولكن ايماناً منا بان الناجحة بتزوزى فى عشها

تصحيح للسودانيين فى اول كتابتى مفروض تكون السودانيون
مع آنى كاتبة بالبلدى ساى

حيدرهم

Quote: تحية لحمدوك

زح من حمدوكنا ده ما ناقصين بلاوي
هسي بي كفوتك دي يجينا واحد ناظي و يقول كفوتك دي مشروعية من حمدوك للجنجويد
______
سلام قباني
كبيان رسمي هم غائبون
لكن كمبادرات فردية حاضرون
فهتاف بيع الدم ظهر مع توقيع الوثيقة الدستورية

حتى الطفل الصغير يعرف ان حمدوك وتقدم يدعمون ويحرضون الجنجويد لتمزيق الوطن
وتشريد الشعب السوداني خدمة لأهداف دول الشر وكي ينالوا رضى تلك الدول ...
هتفنا لحمدوك عندما رفض ان يتولى منصب وزير المالية في عهد سئ الذكر الذي أسس الجنجويد
وعندما جاء رئيس وزراء الثورة هتفنا باسم حمدوك مرة ثانية ظنا منا انه سيقود الوطن للرخاء والنماء
والامن والاستقرار ولكن للأسف لم يحقق شيئا من هذا لأنه أصبح العوبة في يد العسكر ...
واخيرا وللاسف يدعم المغول والتتار الذين يذيقون شعب السودان الذل والمرارة والتشريد والقتل والاغتصاب ..

اعظم انجاز لحمدوك هو كشفه لحقيقة خاتفي اللونين

دا جزء من مداخلة كتبتها فى بوست مجاور قلت مناسبة هنا :
…………
Speaking about حميدتى+حمدوك يا للأسماء ووقعها…
*الجماعات الداعمة للجنجويد كلمات كى بورداتها ما بردت وهم يكتبون - حمدوك مرحلته انتهت وحمدوك شنو وشنو

*بمجرد ما حمدوك قال حميدتى يده دافئة ولا يد صناعية - وكمان وقع معاه اتفاق فى أثيوبيا وثابتين عليها
بحسب كلام محمد الفكى
حمدوك جلس جوار حميدتى فى أديس أبابا كما التلميذ النجيب ووقتها مدنى وقرى الجزيرة الجنجويد وكيلك مولعين فيها الجحيم.
وكمان حمدوك يضحك ويقول الحرب دى فيها مواقف طريفة - لا الحرب ولا فيها ضحك ولا فيها هزار ، فيها موت وتحرش واذلال للشعب السودانى وإعتداءات جنسية على النساء، الأطفال والرجال
*يعنى حمدوك يكون قهقه لما شاف شارون وهو يذل شيخا فى عمر "والده"👿

Quote: السودانيين نحن ديل الماسكين فى السودان بكل قوتنا ما خطينا منه خطوة أتربينا وعشنا فى وربينا اولادنا وأحفادنا فى سعينا وجاهدنا وعشنا رغم كل الظروف ….ما عرفنا لينا بلد غيرو ليس عجزا ولكن ايماناً منا بان الناجحة بتزوزى فى عشها

يا أميرة دي انشا ثورية و بس معليش ..

يعني السوداني العنده قطية و غنماية بياكل لبنها و لا يملك الا عزة نفسه سواهم .. ده زيو و زي السوداني البقدر يسافر و يقضي نص السنة بين الامارات و امريكا و اوروبا !!!

يعني الاتنين ماسكين بقوتهم و جاهدوا ؟

Quote: سلام قباني ونتمناك بخير في غيابك المشكلة حمدوك ذاتو قال الحرب دي فيها طرائف كتيرة خلاص. والغريب أن كل المنشور في الميديا عن زيارة حمدوك وخالد سلك للندن هو التظاهرات والهتافات ضد حمدوك وهذا المقطع الذي يؤكد فيه حمدوك بأن حميدتي حي. الغريب برضو أن التي سألت حمدوك عن حميدتي لا كوزة ولا فلولية، فهي من الواضح سألت السؤال لتتيح الفرصة لحمدوك عشان يرد. هل تأكيد حياة حميدتي هو كل الغرض من الندوة التي نظمتها تنسيقية القوى الديمقراطية المدنية تقدم في لندن؟

حافظ سلامات و شكرا لسؤالك يا جميل ..

لا كوزة لا فلولية كيف !! مش الناس مقسمة (رجالة ) يا كده يا كده .. مش ده بقى حال السودانيين !!

Quote: سلام باشمهندس قبانى ~ *انتو مش قلتو الشيوعين بالكثير يملوا حافلة عايزين بيهم شنو *شوفوا موضوع قحت/تقدم الكانوا مالين "شريحة" وكمان فيها دقلو معاهم، والآن يتضاحكوا وكأن وجود حميدتى أو عدمه أمنية وتسلية للشعب المغلوب على أمره ! *وحتى لما دقلو الغائب قال ليهم "الحرب سببها الإطارى" ، يكون طوالى التفتوا على الشيوعين - دا كله منكم إنتوا بتحللوا صاح وبوعى شديد كدا ليه … *الشيوعين ليسو مهزلة يا باشمهندس ، قاعدين مع شعبهم "ملح الأرض ان جفت وان كانت غنية" *آخر الزمن عايزهم يتلموا على طبقة السياسين (الحقوق محفوظة لخالد سلك) *وكمان يا باشمهندس بقيت تناديهم باسمائهم الحركية

هدى كيفنك ..

انتي شيوعية ؟

Quote: الشيوعين والكيزان وجهان لعملة واحدة

و عملة اصبح لا قيمة لها يا تسنيم ..

Quote: هدى كيفنك .. انتي شيوعية ؟

لالا
هو اي زول يلعب في خانة الجناح الشمال معناتا شيوعي

يا قبانى العندو غنماية وقطية قانع بى حياتو ….
وبالمناسبة الارزاق بيد الله وربنا ما خلق الناس متساوية
انا كنت قررت ما اتدخل فى اى شى يذكرنى بالذى حدث وظل قابع على قلوبنا ونفوسنا وارواحنا وكل حياتنا لكن مرات اجد روحى مضطرة اعلق ……

Quote: هدى كيفنك .. انتي شيوعية ؟

سلام واحترام باشمهندس قبانى~
انت تبع قحت/تقدم؟

Quote: سلام واحترام باشمهندس قبانى~ انت تبع قحت/تقدم؟

هسي عليك الله انا سالتك .. تقومي تردي علي بسؤال؟
جوابك مفروض يا نعم او لا .. صعبة دي ؟

الزمزغة دي يا هدى حقة الكيزان .. و بي صراحة كلامك و طريقتك تشبه الكيزان .. او من بداخلهم كويز سغيروني ..


و اهلنا الكنديين عندهم جملة مشهورة بيقولوا ليك
If it walks like a duck, looks like a duck, and quacks like a duck, it's a duck.

Quote: قبة سلام بركه الجيت..... بطنا طمت من خضر وبريمة زمان في توب اسمه رسالة لندن هسة. كدي خلي ندوة حمدوك تعال معاي، الشارع تشوف فضيحة، لندن وجاوب هل، معقول لندن دي فيها بس، ال30 نفر، الطاردو ناس، حمدوك في، شوارع لندن؟؟ لو فرضنا تقدم دي بتمثل، السودانيين والشيوعيين بمثلو السودانيين ليه ما قدرو يطلعو كل، السودانيين في بريطانيا الشارع واضح انه سودانيين لندن عايشين بيات شتوي، كبير، لا في برنامج لا رؤية ،لا، ابداع فكري، ولا، سياسيً ولا، اقتصادي، وحكمة ربك لسه مكنكشين في، علم، مايو والاسترقاق، الايدولجي، كدي، من هسة لحدي 1 يناير 2025 التحدي، امام كل، القوى، السياسية في، لندن منو البمرق 100000 سوداني في هايد، بارك بي برنامج وعلم الاستقلال، عشان يجي الميلاد، الثالث البشبهنا اها شيوعيين لندن وقحاتة لندن موعدنا يناير، ونشوف عاش ابو هاشم والحركة الشعبية وحسنين

عدولة يا صديقي ..

مشتاقين كتير و الله ..

بريمة الجمعوا مع خدوري شنو ؟
انا كان كده كم لبثت ..

حمدوك يا عادل فوق عقول الجهلاء و شوية الهتيفة المرقو ديل ..

نحن لا نستحقه ..

ما مشكلة يا باشمهندس صنفنى زى ما عايز، بس ما تستجوبنى زى ما عملت مع دكتورة نعمات

منقول

اللقاء الذي حدث اليوم في قناة الجزيرة مباشر وكان ضيف اللقاء نائب المؤتمر السوداني Khalid Omer Yousif المشهور بخالد سلك.
اثار المذيع عدة نقاط خطيرة للضيف منها :
من الذي فوض تقدم من الشعب السوداني ؟
وكانت اجابة الضيف انه لم يكن هناك تفويض ولكنهم سودانيين وقوي سياسية مدنية يحملون هم الوطن.
💥 تحدث المذيع مع الضيف عن مفهوم سيادة الدولة في حال مطالبتهم بتدخل اممي لتوفير مناطق آمنة منزوعة السلاح من الطرفين وان هذا الخيار من الخطورة بمكان ويؤدي الي حظر طيران القوات المسلحة السودانية التي تعتبر القوات الوحيدة الشرعية كما ضرب له مثال ليبيا كانموزج عند انهيار جيشها وان التدخل الاجنبي لم ينفع الليبين والدولة الليبيه والشاهد علي ذلك انفصال ليبيا الي دولتين وحكومتين.
فكان رد الضيف انه لا توجد سيادة ولا دولة في السودان نافيا تماما وجود سيادة الدولة السودانية وذهب اكثر من ذلك متهما الجيش بتفريخ مليشيات جديدة ذكر من ضمنها قوات مناوي وجبريل وطمبور ليوهم المجتمع الدولي بان هذه مليشيات فرختها القوات المسلحة متناسيا انها كانت موجودة اصلا ودخلت الخرطوم عن طريق اتفاق جوبا للسلام وفي عهد حكمهم إبان الفترة الانتقالية.
ثم تحدث الضيف بان السودان الان كله لا توجد به مناطق امنه اطلاقا في حملة كذبه وتضليله الاعلامي لاقناع المجتمع الدولي بضرورة دخول قوات امميه مضللا ومتناسيا ان كل مناطق سيطرة الجيش مناطق امنه ابتدأ من الولاية الشمالية ونهر النيل مرورا بولاية البحر الاحمر وكسلا ذهابا الي ولاية القضارف فهذه المناطق تعتبر امنه تماما ولا ينكر ذلك إلا عميل مرتزق له اجندة واهداف او قطيع منساق لا يهرف بما يعرف.
ومن اخطر الاتهامات والنقاط التي ذكرها الضيف خالد سلك تكراره المتعمد بان الجيش مرتكب للانتهاكات والجرائم في هذه الحرب مثله والمليشيا سواء.
واخيرا سأل المذيع الضيف خالد سلك عن ان كثير من السودانيين رافضين لهذه المليشيا بحكم ما فعلته من نهب واغتصاب ومجازر واحتلال لبيوت المواطنيين؟
فكان رد سلك كالعادة ارتزاقي بامتياز وقال : عندنا مثل بيقول من فش غبينته خرب مدينته . لذلك لابد من تناسي هذه الامور وان لا نتعامل بغبن.
ويفهم من صياغ حديثه في هذه النقطة: انسوا كل جرائم المليشيا وابدوا معاهم صفحة جديدة.
وهذا الكلام ان لم يكن عمالة وارتزاق فليس في الدنيا عمالة او ارتزاق .
وسؤال بسيط للمدعو خالد سلك: ما طبقته نظرية من فش غبينتوا خرب مدينتوا مع الكيزان ليه.
البخلي دي رجل شنو ودي كراع شنو ؟
#تقدم_عميله_بامتياز
#حمدوك_لا_يمثل_السودان
#قحت_لا_تمثلني

Quote: خلاصة الأمر ان الذي اصاب السودان من تفشي الجهل والانحطاط الاخلاقي يحتاج لعقود لاصلاحه اذا حافظ السودان على وجوده.

تحياتي زين ..
جبت الخلاصة مافي شك ..

مشروع الكيزان في تجهيل الناس ثم أسلمتهم و تكويزهم و تخوينهم* نجح تماما ..


* مصدرها كلمة أخوان ..