الأس_تق_طاب_

05:42 PM October, 10 2024

سودانيز اون لاين
علي دفع الله-سنار
مكتبتى
رابط مختصر

جاءت الانقاذ الشؤم بوجهها الكالح الكريه في ظلام 30 يونيو
كانت الكذبة العنوان الرئيسي لبداية عهد الكذب المعطون في الدين
ساطوها وجاطوها
عدلة وقلبة طبقوا اي نظرية جاتهم في راسهم
ناكل مما نزرع
تقصير الظل الاداري
المشروع الحضاري
تزكية المجتمع
الاستعانة بالقوي الامين
الخ الخ الخ

قبلوا على المشاريع المنتجة الشايلة الناس وشايلنها تخصيص وبيع
مشروع الجزيرة
السكة حديد
النقل النهري
سودانير
الخطوط البحرية
مشاريع النيل الازرق الزراعية
المصانع في هوامش الوطن

تخصيص وتمكين
وفساد لحدت عرابهم الترابي قال ليهم وهو كذوب نرى بعضا من الفساد
يسكت علي عصمان الشيطان ومجموعته ابدا
قادوا خط المفاصلة ودخلنا العشرية الثانية من حكمهم الكؤود
(بمناسبة الكؤود والله ما عارف معناها لكن لقيتا جايا في الوصف)
و بعدها ظهر الفساد جهارا نهارا و خصوصا في تلك الفترة ظهر البترول وما ادراك ما البترول هو الكارثة الحقيقية في تمكينكهم كتنظيم وافقار الوطن والمواطن
لان كل مداخيله ذهبت الى مشاريعهم الطفيلية التي ليست للمواطنين اي فائدة تذكر
لا طوروا الزراعة العمود الاساسي للاقتصاد
و لا اعادوا السكة حديد لسابق عهدها
ولا توسعوا في المصانع البسيطة
بل ركزوا على العاصمة في مشاريع غير تنموية مما اثر على الريف وظهرت الهجرات من الهوامش الى العاصمة
اهمل الزرع والضرع

نواصل

ول أبا علي دفع الله

إنهم مجرمون كبار، قد كشف الشعب حقيقتهم ..
30 عاماً تكفي ..
القصور الشاهقة في الأمارات .. وماليزيا .. وتركيا ..
الرحلات الترفيهية والسياحية في جزر المالديف وتركيا .. والريفيرا
الحسابات البنكية المليارديرية .. بأسماء أناس كان الواحد فيهم لا يستطيع تأمين قوت يومه ..
النساء .. مثنى وثلاث ورباع ..

في حين الشعب يتضور 30 عاماً في البؤس والشقاء والمرض والعوز والفاقة ..
30 عاماً من القتل والتنكيل .. خصاء الرجال، حشر مواسير الحديد في الأدبار ..

واليوم قطع الرؤوس ..
وبقر البطون ..
وأكل كبود البشر

فضل إلا أن يستوقوا الناس ويزبحونهم في الجزارات ويوزعوا لحومهم فيما بين منازلكم!

إلي متي؟ كفي والله كفي!

بريمة

الناس تعبت
الهاجر هاجر والانزوى محبط لحدت ما هبت بشائر انتفاضة سبتمبر
تم قمعها ولكن زاد الوعي الثوري و تراكمت الخبرات والقناعات
توجت تلك الجهود في ثورة ديسبمر المجيدة
ولكن
الكوز يسكت ابدا ،،،،،

الكوز عمل كل شيء لوأد الثورة شيطنها كفر رموزها
عمل زحف اخضر واصفر وكل الوان قوس قزح البتمثلهم
عمل على قفل الميناء
وتعبئة الادرات الاهلية
و فشل و الثورة مستمرة حكومة فحت كانت ما بطموح الشارع ولكن قادرين نعدل دفتها
يسكت الكوز لا لا و في اخر رمضان شفنا الافطارات الحربية التي تدعو للحرب علانية
وانفجرت الحرب مع ابنهم الشرعي الطالع من رحمهم
نحن كديسمبريين ذنبنا شنو
لي شنو بعد ما قومت الحرب برضو مصر
واصبح كل ديسمبري خاين وعميل الا ان يستنفر غير كدة الخلية الامنية جاهزة لاعتقالك
الشارع بقى يا اما تمدح جيش الحركة الاسلامية في منطقة سيطرته او الموت او الاعتقال
وفي نفس الوقت لابد ان تمدح الدعم السريع وتسبح بحمده في منطقة سيطرته
-----------------
نواصل

ما عندك خيار يا اما تسبح بحمد الكاهن و تتابع الانصرافي
او انك عميل وخاين واين ستين جزمة
لازم تقول جيش قوقو واصلا ما تفكر ولو لحظة لي شنو الجيش انا ما لقيتو لحطة اجتياح الجنجويد للقرى والمدن
ما حماني و فوق لي دا تسكت او يتم اعتقالك ولو برة السودان ما يجدد جوازك
في كوز اصلا ما تحلم بي وطن متعافي
بعد كم سنة اذا الكوز سيطر على الوطن حا تسمع حرب جديدة مع نفس البقاتلوا معاه الان
و هكذا دورة الكوز في الجياة
لازم حرب واستقطاب وتخوين
ذنبنا شنو
عمرنا ضاع كلو في عمايلهم
قرفنا ومتنا بالقهر

احتمال اواصل واحتمال ما اواصل
ان شاء نموت زاتو

علي ادم . ازيك . ولعلك بخير .

بريمة الوهم . الكلام ده كلو عارفنيوا ، وجيتوا انتو " الجنجويد " . بحجة القضاء علي الكيزان ! وتميتوا الناقصة .

وينهم الكيزان هسي ؟


طبعا حتقول لي كتائب البراء ، وماالبراء ! براءة بتاعة الساعة كم . ؟

ديل شباب سودانين من مختلف مناطق السودان . جوا للدفاع عن بلدهم وعروضهم . وعروض . غيرهم .
اول حاجة :

رجال . ورجال ماشين للموت عديل .

عندهم " نخوة " . بتعرف شنو يعني نخوة ؟
لم يهربوا خارج السودان . بل بقوا فيه وشعارهم محاربة الغزاة المعتدين من جنحويدك السفله .

ولعلمك . في مئات الكتائب ، والمستنفرين ، والمقاومة الشعبية ( تلات ترباع السودانيين الموجودين في الداخل كلهم مدربين علي استخدام السلاح . للذو عن عروضهم ، ومالهم .) ديل كيزان ؟
الكيزان " الفزاعة " . تشهر . في وجه كل من يختلف معك . او معهم . وده شى معروف .

كما قلت انت " وانت اصلا كوز كبير ومطبل ليهم هنا ، والمنبر يشهد علي ذلك "

الكيزان في تركيا ، وماليزيا ، واوربا ، وحتي في اميريكا نفسها .
ديل شالوا شيلتم " وشتتوا " .
لما كانوا حاكمين ، ليه ماكان في زول بتذمر ؟
انا ماداير اشكرم ليك . لكن لو كان في زمنهم . الفوضي دي كلها مابتحصل .
كان في امن . كان في دولة . تقدر تنوم وبابك مفتوح .
في راجل ود مرا بقول " بغم " .!
الشعب السوداني ليس بالخارج . الشعب السوداني هو الموجود بالداخل .
كم مليون نحنا ؟ اربعين ؟ خمسين ؟
البره السودان كلللهم . مغتربين علي مهاجرين ، علي بلوط . كلهم مابصلوا عشرة مليون . !
الشعب الموجود بالداخل . لابهمه يحكم كوز ولا جردل .
شعب عايز يعيش بسلام وامن ويربي عيالوا وبس .

الليدو في الموية مازي الايدو في النار.
في ناس ايدهم ورجولهم ، وكل شى . يمكن يكونوا غاطسين جوة الموية .
وديل " ينظروا " !!
تعالوا هنا شوفوا البل ده كيف .
فقصه كوز وماكوز دي قصه عفا عليها الزمن .
الناس ماتقعد تندب حظها ، وهي واقفه محلها خمسين سنه . ويلوكوا في نفس اللبانية وعائشين في جهل وتخلف .
والعالم فااات .

يحكمنا كوز
يحكمنا لوز
يحكمنا الجن الاحمر . المهم الناس عايزة تعيش في سلام كما اسلفت .

الا الجنجويد . ديل ياابدناهم او ابادونا

........


قم لف يابريمة . هس بعمل ليك " بوست قفص " اجننك بيه ..

التحايا على وهاشم~

Quote: احتمال اواصل واحتمال ما اواصل ان شاء نموت زاتو

هههها
أميرة حسين والحالة كان قبل الحرب -جابت سيرة قصيدة/أغنية : إنشاء الله القيامة تقوم وكل زول يمشى لأهله 😀
*لازم تواصل يا على - لسه ما كتبت عن الكيزان النص التانى مثالا وليس حصرا
الباشا طبيق ، حسبو (امس ندهوه) ، كيزان لندن، ميلانو وغيرهم كثير
…
هاشم~
ما تلخبط : إسمه على دفع الله 😀

عندهم ياهدي مليون مستشار . وكلهم بيض ساي . ودونك " سمعة " .
ناس طبيق ونبيق وعمران والربيع ، وباقي العقد الفريد . ديل تاني قريب ده مابتسمعي بيهم . طبعا هم ما "حينجغموا" لانهم بعدين . لكن حيمشوا لمزبلة التاريخ ويختفوا . ( كانت حفلتهم قصيرة ) !!

وعلي ادم . اسموا كده في البروفائل .😁







تحياتي يا اخت هدي ،،،،،،،