#حَبَّوبة قالتْ لَيْكُنْ#

09:44 AM September, 29 2024 سودانيز اون لاين
دفع الله ود الأصيل-
مكتبتى
رابط مختصر;

ححبوبة قالت ليكُنْ
+اكل في بيت اخوك وماتنوم عندو ونوم
في بيت اختك وماتاكل عندها .❤🌸
في بيت اخوك انت بتاكل من جيبك و من دمك
ولحمك بس نومك عندو بتكشف محارمو ( زوجتو )
وبتقيد حركة زوجتو ومابتلقي راحتا .💛🌸
في بيت اختك نومك عندها حراسه ليها واكلك
عندها من جيب راجلها ماصاح تاكل من
جيب راجل بتتعلم التملق .
🧡🌸

+ لو جاك ضيف اوووعك تقوم من صينية الأكل قبلو حتى
لو شبعت خليك قاعد عشان مايتحرج ويقوم وهو جعان 💜🌸
وما تبخل باالفي جيبك علي محتاج قصدك حتى لو كان ماعندك
غير الفي جيبك .. يكفي انو اتعشم فيك خير 💙🌸
ماتخلي حقك لي راجل زيك ولو خليتو خلي رجالتك معاه 💚🌸
عرض جارك من عرضك احفظو زي مابتحفظ عرضك الصمت
هيبة الرجال والشكوى لغير الله مذلة بيوت الناس اسرار اذا
دخلتها ادخل عميان واطلع منها اخرس .
💖🌸

شاف حبوبة تتاوق بفوق لجارتا الهيتة بالهيتة
و سمعا ( تشحد ) منها سلقة ملحة بي فوق الحيطة فقاليها :
يا أمي لي شنو تشحدي الملح وأنا أمس جبت ليكم كيس كببر
قالت ليهو ياولدي نحنا وهم قاعدين نتشاحد عشان المحنة لأنهم
بيشحدوني برضو وهم وضعهم تعبان فحبيت اشحدهم دعكة ملح
بخاجة بسيطة ما تكلفهم وانا اصلن ما محتاجة ليها لكن حبيت
يحسو إني برضو بحتاج ليهم عشان أسهل عليهم
يطلبوا اي حاجة عايزنها مني وما يخجلو ...
♥♥♥♥
كل البيوت بيتنا جاري القريب
و لا شقيق البعيد ❤️

حبوبة قالتْ لَيْكُنْ..
"البريدِك بياكل خمج إيدِك، و الما دارك مكتحه اوعاكِ تتمسحي ليو،
والخوة بتظهر ليك ساعة الحاره وقت تكوني براك و راسك مقطوع،
وما تفتشي الاصحاب ولا الحبان، الرزق دا من الله ان اتوكلتي عليه عوجه
بتجيك مافي،والجايه من الله زولاً بوقفها مافي،و اتعلمي ارضي بالقاسمو
‏ليك الله ان كتير ولا قليل ، لانه الرضا بالمقسوم عباده..
+ والراجل ما تكوسيهو ولا تفتشي ليهو، بت العِز الاصيله عَدَلأا بجيها قبَلها،
و لسانك دا امسكي عليك يا(القول الطيب ولا السكات) و الكلام الشين عمرو ما
بتنسي و البدخل البطون ما بغسلو الصابون، و الكلمه السمحه بذكروا بيها سيدا،
‏واصبرررري الصبر سمح مفتاح الفرَج، و محل ما مشيتي
أبقي خفيفه على الناس لا تقابضي لا تجابدي❤