Post: #1
Title: البلبوس/اسطورة الجهل النشط...راشد عبدالقادر
Author: Nasr
Date: 09-05-2024, 03:38 PM
03:38 PM September, 05 2024 سودانيز اون لاين
Nasr-Los Angeles
مكتبتى
رابط مختصر
البلبوس/اسطورة الجهل النشط
راشد عبدالقادر
5 September, 2024
تعرف يا عزيزي البلبوس الاهطل القاعد فى موية المخلل لو زول قال ليك اعادة هيكلة الجيش ح تنط في رقبته وتقعد تنبح زى الكلب السعران وتتهمه انو عاوز يفرتق الجيش وتروح رامى طقم الاتهامات بتاع (العمالة والارتزاق والخيانه وباقى الرصة)
فى حين انه لو قالوا ليك الجيش نفسه قنع من قصة الهيكلة دى ومشى ابعد من كدا ووقع ايييوه وقع عديييل على (اعادة البناء والتأسيس) ما للجيش براه وانما للجيش والشرطة والامن طبعا ما ح تصدق لانك وهمي وما عارف سجم رمادك وتكرر البلاهات البيغذوا بيه فاخورتك المجوفه..
والابعد من كدا ان الجيش وقع على تفكيك نظام الانقاذ بالكامل وكدا الاسلاميين ح يصيعوا..
ودا البيخليهم يعرقلوا استكمال التفاوض والبحث عن حجج ميته وحركات وهميه عشان ما فى اتفاق يمشى لقدام ولو تتحرق البلد كلها..
طبعا ببلاهة ح تقول لى الكلام دا تم وين
ح اقول ليك فى اعلان المبادئ بتاع المنامه الوقع عليه (كباشى) البعده طوااالى الاسلاميين دقوا جرس وناس مزمل قنابل والكورجة بتاعت الصحفيين قاموا يكوووركوا ويصرخوا
وبالتحديد فى الفقرات 7 و8 و10 و11
ال ح انقلا ليك بالحرف ادناه..
ولعلمك اتفاق المنامة مبنى على اتفاق جده ...
***
٧/ بناء وتاسيس جيش واحد مهني وقومي يتكون من جميع القوات العسكرية (القوات المسلحة والدعم السريع وحركات الكفاح المسلح) ولا يكون له انتماء سياسي أو أيدلوجي ، يراعي التنوع والتعدد ويمثل جميع السودانيين فى كافة مستوياته بعدالة وينأى عن السياسة والنشاط الاقتصادي.
٨/ بناء وتاسيس القوات الأمنية (الشرطة وجهاز المخابرات العامة) بصورة تضمن كفاءة ومهنية وقومية ومدنية هذه الأجهزة وعدالة توزيع الفرص في كافة مستوياتها بين السودانيين.
١٠/ تطوير وتحديث الجيش المهني والقوات الامنية (الشرطة وجهاز المخابرات العامة) بعد اكتمال البناء والتأسيس.
١١/ تفكيك نظام الثلاثين من يونيو ١٩٨٩ فى كافة مؤسسات الدولة.
فاتفاق جدة فى اجراءات بناء الثقة فيه تسليم الهاربين ناس بشه والجاز ونافع واتكررت برضو فى اعلان المبادئ الفقرة 17 و18
ووثيقة المبادئ فى المنامة فيها تفكيك الانقاذ واعادة تأسيس وبناء الاجهزة الامنية..
فدى حاجات ما ح يسمحوا بيها ويخلوك تبلبس وتكورك وانت ما فاهم كوعك من بوعك لانهم بيستثمروا فى غبائك وفى جهلك النشط
#حرب_عبثية
|
Post: #2
Title: Re: البلبوس/اسطورة الجهل النشط...راشد عبدالقا�
Author: Hafiz Bashir
Date: 09-05-2024, 05:20 PM
Parent: #1
سلامات يا نصر
| Quote: الوقع عليه (كباشى) |
وكباشي هو الفريق شمس الدين كباشي نائب القائد العام للقوات المسلحة.
مقتبس من الفقرة 7 والمقصود ينأي الجيش عن السياسة.
| Quote: تفكيك نظام الثلاثين من يونيو ١٩٨٩ فى كافة مؤسسات الدولة. |
مسافة الواحد يقرأ الفقرة 8 و 9 و 10 ويجي للفقرة 11 يكون نسى الفقرة 7 ويلقى الفريق كباشي متنبل جوة السياسة.
هسه يا نصر إنت في رايك دي اتفاقية يستشدوا بيها؟
وهسه دي اتفاقية صاحبك راشد يفرح بيها؟
أنا غايتو من اجل الاتساق اطالب الجيش بالالتزام بالفقرة 7 وبالبحث عن اتفاق وآلية لوقف الحرب ولتسليم السلطة لحكومة مدنية.
قصة "تفكيك نظام الثلاثين من يونيو ١٩٨٩ فى كافة مؤسسات الدولة" ما شغلتك يا جيش ولا القرار فيها حقك.
دا شغل الحكومة المدنية.
وموضوع تسليم الهاربين ناس بشه والجاز برضو ما شغلتك، دا شغل الاجهزة العدلية واجهزة انفاذ القانون (قضاء ونيابة وشرطة).
|
Post: #3
Title: Re: البلبوس/اسطورة الجهل النشط...راشد عبدالقا�
Author: Nasr
Date: 09-05-2024, 05:41 PM
Parent: #2
لو ظفرنا من كل هذا بوقف الحرب
فبنكون قد ملكنا الدنيا وما فيها
|
Post: #4
Title: Re: البلبوس/اسطورة الجهل النشط...راشد عبدالقا�
Author: Hafiz Bashir
Date: 09-05-2024, 05:50 PM
Parent: #3
ما بتظفر بوقف الحرب طالما راشد (الاسم سالم) عبدالقادر فرحان بإتفاقية يكون للجيش فيها القرار والقدح المعلى في تفكيك نظام الثلاثين من يونيو ١٩٨٩ فى كافة مؤسسات الدولة.
لاحظ لكافة مؤسسات الدولة دي.
|
Post: #5
Title: Re: البلبوس/اسطورة الجهل النشط...راشد عبدالقا�
Author: Nasr
Date: 09-05-2024, 08:54 PM
Parent: #4
يا حافظ
ديل خصمين متحاربين في الساحة السودانية
الإثنين أتفقوا علي خطورة بقايا نظام الثلاثين من يوليو في أجهزة
والأثنين أتفقوا علي أزالته
يمكن الجيش مجبر هنا لا بطل
لكن طالما وافق علي دي فدا تقدم كتير
وضربة لناس بل بس وكيزان السجم والرماد
|
|