يا بيرييلو أفرز

09:54 AM August, 14 2024

سودانيز اون لاين
حيدر حسن ميرغني-Colombo -Srilanka
مكتبتى
رابط مختصر

المبعوث الأمريكي الخاص للسودان توم بيرييلو، قال هنالك طرف سيئ جدا في المعادلة يحاول الوصول إلى السلطة من الباب الخلفي لعلمهم بعدم شعبيتهم عند الشب السوداني

واضحة جداً
العندهم مصلحة في إطالة الحرب هم الفلول مافي غيرهم

ول أبا حيدر
من ناحية السياسة الأمريكية، الرجل سمى الممانعين لوقف الحرب، الفلول. وبعدين كلمة bad actors المجموعات الشريرة .. في وجهة نظري تشمل الكيزان، الحركات المسلحة وغيرها،


وفي أمريكا حينما يصل الأمر لسياسي يقول مجموعة شريرة يعنى يتم التعامل معها ليس من خلال الحوار بل من خلال القانون.

المبعوث ربما يصدر أمر قبض علي بعض القيادات كمطلوبين للعدالة في القضية السودانية.


بريمة

سلامات يا حيدر.

هم الأمريكان ديل ياتو يوم كانوا مناصرين للشعوب ولا قلبهم عليهم؟

يا هم كدأبهم يمارسون دور الوصايا على شعوبنا ويكيدون لها ليل نهار.

لا يعوّل على الأمريكان وعلى الغرب عمومًا إلا ساذج أو عميل.

أما اللي في بالك بالك، فشعبيتهم بلغت الحضيض يوم 11 أبريل 2019، فاقتلعهم الشعب اقتلاعًا، لكن القحاطة نفخوا فيهم الروح من جديد شيئًا فشيئًا برعونتهم كلما أشرقت شمس صباح على حكمهم البائس المشؤوم. وجات الحرب دي تمَّت الناقصة.

القحاطة كانوا يعلمون حقيقة أمرهم وأنهم حمقى وما عندهم شيء يقدّموه للشعب، فأدخلونا في مسرحيات إلهاء وأسطوانات على شاكلة "الدولة العميقة" و"إزالة التمكين"، وكانوا واثقين أنه اللي في بالي بالك حا يرجعوا بالمزيكا للسلطة لو كانت الفترة الانتقالية قصيرة، عشان كده حاولوا يمطّوها ويناوروا عشان ما يعملوا انتخابات ترجعهم إلى مقامهم الحقيقي وهو مقام الناشطين، وإلى محطتهم الأولى وهي أركان النقاش.

هؤلاء العطالة وعديمو الموهبة والتأهيل والضمير وجدوا ضالّتهم في الجنجويد القتلة، فباعوا أنفسهم لهم بأبخس الأثمان وخسروا دنياهم وآخرتهم.

واحد صحفي فاشل ومغمور زي ود الفكي ده وما بيفرّق بين الهاء والتاء المربوطة، وواحد زي خالد سلك النهار كله يرَتْرِت وجملتين وراء بعض ما بيقدر يقولها، وواحد زي التعايشي كان فاقد أمل وحيران في بريطانيا، وواحد قالوا قانوني وكان وزير عدل زي نصر الدين عبد الباري يجهل أنه حقّ التصوير في الأماكن العامة في بريطانيا مكفول بالقانون: جنس ديل تتوقّع منهم شنو غير الارتماء في أحضان الجنجويد. أنا ما مستغرب فيهم إطلاقًا لأنه ديل كانوا مهيأين نفسيًا للدوس على أي قيم ومبادئ في سبيل الطفو على سطح المجتمع والوصول إلى دائرة الضوء.

على العموم، كلام المبعوث الأمريكي عن "باب خلفي" ده كلام بطيخ ساي، لأنه أيّ حديث عن شعبية بتحدّده نقعة صناديق الاقتراع والقبول في الشارع، مش تصريحات واحد أمريكي متعجرف زي بيرييلو ده.

Quote: ول أبا حيدر من ناحية السياسة الأمريكية، الرجل سمى الممانعين لوقف الحرب، الفلول. وبعدين كلمة bad actors المجموعات الشريرة .. في وجهة نظري تشمل الكيزان، الحركات المسلحة وغيرها،

افو يا ولد ابا
بقيت ما بتسمع كويس ولا شنو
bad دي جبتها من وين و كمان ترجمتها شرير
اصلو الزول دا ما ذكر الكلمة دي خالص

ول أبا معاوية
أحسنت .. تصحيحك في محله .. رجعت للفيديو، نعم الرجل قال Negative Actors .. وأتقف معك هي أقل حدة من ال Bad Actors .. وهنا يقصد المجموعات المعرقلة للسلام ..
لكن الفهم يظل هو أنهم الكيزان وفلنقاياتهم .. وليس الدعم السريع أو نشطاءه.

بريمة

سلام حبيبنا محمد صديق

Quote: يا هم كدأبهم يمارسون دور الوصايا على شعوبنا ويكيدون لها ليل نهار.

صدقت يا دكتور .. مسلكهم الجبروتي واضح في كل مكان .. يكفينا ما يجري في غزة وحمايتهم لإسرائيل .. هذا كيل بمكيالين
الإشكال إن الجيش هو من شجعهم على لعب دور الراعي للمفاوضات بعد ان رفض مبادرات اقليمية (الاتحاد الافريقي والإيقاد ودول الجوار) بحجة تخيزهم للدعم السريع
لا تنسى كمان دورهم في لقاء البرهان بنتنياهو ..
ده حكم الضعيف على القوي ..
للآن ما فات شيء ..
على الحكومة ان تشارك في المفاوضات وتفرض شروطها لإظهار رغبتها في وقف القتال.
القحاتة فعلاً ما بتشكَرو ..

يا حيدر، الدنيا قبايل انتخابات في أمريكا، والحكومة الأمريكية الحالية كايسة ليها طرف إنجاز واختراق يزيد من كروتها ويرفع أسهمها في ملف السياسة الخارجية عشان كده ألقت بثقلها الدبلوماسي في جنيف.

السؤال الحقيقي اللي عايز ليهو إجابة هو: اتفاق جدة مالو؟

يا أخي، على الأقل الطرف التاني وأمريكا كان يتعهدوا بأنهم يجعلوا اتفاق جدة أساس للمفاوضات بدل تصفير العدّاد.

الوسيط المفروض يتحلّى بالحكمة، لأنه لو إنت لاعب دور الوسيط وواحد من الطرفين رفض المشاركة من حيث المبدأ، معناها إنك ما واقعي ومتحيّز وشغّال بنظرية خنّق فطّس..

إنت أضمن مشاركة الطرفين في الأول بتقليل نقاط الاختلاف وبعدين لو ما اتفقوا، انقل الحوار لمرحلة تانية وابني على نقاط الالتقاء.

فشل مفاوضات جنيف تتحمله الولايات المتحدة أولاً وأخيرًا بنزوعها إلى التعامل مع الأمر بصلف وعنجهية.