Post: #1
Title: ظهور سناء حمد الآن محسوب و ملعوب: كتبه زميل المنبر عصام جبرالله
Author: Mahjob Abdalla
Date: 07-09-2024, 02:30 PM
02:30 PM July, 09 2024 سودانيز اون لاين
Mahjob Abdalla-
مكتبتى
رابط مختصر
Quote: * إجتماع القاهرة و تصريحات سناء حمد و كم خبر تاني دي كلها مؤشرات قوية إنو التفاوض أصلآ شغال أو انو حيبتدي قريب جدآ، و كل طرف أو أطراف بيكبر في كومه و بيقوي في موقفه التفاوضي لانتزاع أكبر قدر من الغنائم و النفوذ و المناصب في الصفقة الجاية.
* واضح جدآ انو كل الأطراف تم الضغط عليها من الخارج، و ما لازم ضغط شديد، أصلآ لما تكون مرهون الارادة لي محور أو جهة خارجية عندها حساباتا و مصالحا هي و انت كنت و لا زلت مجرد أداة و بيدق في خططها ما بتحتاج ضغط شديد، لو كانت الجهة دي الامارات او السعودية او مصر أو قطر او تركيا أو أوروبا أو أمريكا أو إسرائيل أو تقاطعات مصالح و حسابات سياسية اقتصادية جغرافية و عسكرية بين بعض هذه الدول و الأحلاف. كل أطراف الصراع الراهن الرئيسية العسكرية و المدنية السودانية بلا فرز هي رهينة لدول أو حلف.
* ظهور سناء حمد الآن محسوب و ملعوب، و رسالة الحركة الاسلامية واضحة بلا غموض، نحن مستعدين نتفاوض و نتفاهم، بس بدون ثورة ديسمبر و إقصاءها لينا.
* قيادات الكيزان و حلفاءهم الاقليميين و دول زي مصر فاهمين انو انهيار الجيش المحتمل بيعني الفقدان الكامل للسلطة في السودان و وقوعه بالكامل تحت سيطرة منافسين و خصوم إقليميين (الامارات/اسرائيل) ، و عارفين انو الافضل الحفاظ علي السلطة و لو حزئيآ بتقديم بعض التنازلات هنا و هناك، و انو بل بس قد تقود للتهلكة الكاملة، تلتو و لا كتلتو. و فاهمين انو الاطراف التانية ما بتمانع في صفقة و شراكة أي نعم حتقطع من نصيبهم في كيكة السلطة لكنها افضل من خسران كل شئ.
* ظهور سناء/الحركة الاسلامية بي رأي واضح و قوي و استعدادهم للجلوس مع حميدتي حيحسم كل هرجلة الجيش حول ما بنتفاوض و بل بس، و حيكشف أكتر منو الماسك المفاتيح الحقيقية جوة الجيش و كل الأجهزة الأمنية و مدور كل اللعبة، سلام مربع لي ناس "جيشنا القومي و الدولة و صغار الضباط و الجنود الوطنيين".
* تمنع الكيزان و قحت/تقدم ضد بعض و حتي انسحاب مناوي و عقار و جبريل من التوقيع كلها لعبات و حركات تفاوض متوقعة و عادية، و كلهم حيجو يقعدوا مع بعض، الفاقد إرادتو.. فاقد قرارو.
* مضحك و مبكي الآن حال البلابسة (من غير الكيزان) و الجغامسة (من غير القحاتة التقدميين) الكانوا مصدقين انها فعلا بل بس و طرد الجنجويد و الاجانب المرتزقة، أو النوع التاني المصدق انها حرب ضد الكيزان و الفلول الي حين ازالتهم، الصادقين و المصدقين من الصنفين ديل حينصدموا شديد الفترة الجاية.
* التمنع حيستمر اعلاميآ فترة، لكن البتبلبل في التفاوض يعوم... و كضب القال التفاوض عندو كتافين.
دة في ما يخص هيصة اليومين ديل و الجايات،
باقي صعوبات السهول حقتنا: ماذا سنفعل و أين نبدأ و بماذا؟ |
|
Post: #2
Title: Re: ظهور سناء حمد الآن محسوب و ملعوب: كتبه زمي�
Author: Mahjob Abdalla
Date: 07-09-2024, 02:31 PM
Parent: #1
Quote: سناء جدعت ال "ون" .. يوسف عزت رجع ليها ال "تو" ..
رد التحية و الانبراشة بي أبرش منها...
و فعلآ شنو البخليك تفاوض الضل و الضنب ما دام الفيل موجود؟ كدة كدة الضنب حيجي يوقع صاغر و يرضي بي البيتقسم ليهو من الفتات..
اللعب المرتب و مجود بيعجب..
و دة ما شغل اتسبك امس و لا قبلو... شكلو شغل مدور ليهو فترة و وراهو دول و قوي مسيطرة. |
|
Post: #3
Title: Re: ظهور سناء حمد الآن محسوب و ملعوب: كتبه زمي�
Author: Mahjob Abdalla
Date: 07-09-2024, 02:53 PM
Parent: #2
| Quote: البلابسة (من غير الكيزان) و الجغامسة (من غير القحاتة التقدميين) |
سمعت ب "البلابسة" لكن "الجغامسة" دى جديدة بالنسبة لى.
|
Post: #4
Title: Re: ظهور سناء حمد الآن محسوب و ملعوب: كتبه زمي�
Author: محمود الدقم
Date: 07-09-2024, 03:02 PM
Parent: #3
الجغامسة ديل يا محجوب ناس جغم-بس..
في رأي ان الاطراف المتحاربة فقدت السيطرة علي منسوبيها اي طرف يريد أن يفشخ الاخر والامر الان تحول الي ثارات قبلية وحرب عرقية وجهوية ومناطقية
وهذا سوف يمد في اجل الحرب...
|
Post: #5
Title: Re: ظهور سناء حمد الآن محسوب و ملعوب: كتبه زمي�
Author: Mahjob Abdalla
Date: 07-09-2024, 04:08 PM
Parent: #4
سلام محمود,
فعلا المصطلحات تمثل شعارات كل طرف.
زمان, احزابنا عندهم مصطلحاتهم الخاصة, مثلا ناس حزب الامة بقولو "حبيب" و الاتحادى "شقيق" و الشيوعى "زميل" و البعث "رفيق" و الاخوان "اخ".
الان لما تسمع "بل بس" هم طرف الحرب الذى يؤيد الجيش و "جغم بس" هم طرف الحرب الذى يؤيد الدعم السريع.
|
|