أبكانى هذا المنشور

12:15 PM July, 03 2024

سودانيز اون لاين
مهيرة-Sudan
مكتبتى
رابط مختصر

الناس العندهم عربات وتركترات وترلات في القضارف شيلو عصيدة وموية ومشمعات وحبال (سلب) وشاي وبرتقال وقريب وشيلو بلح كتير ..وأنسلوين وأدوية ولو عندك باور بانك اشحنه وشيلو معاك..
وأمشو على منطقة المقرح والبقدر يمشي ينتظر قدام على الجبال في طريق اب رخم يمشي ..
الناس الطالعين من أب رخم فيهم ناس جعانين شديد وعطشانين وما عندهم قروش لان التلفونات اما مغلقة أو اتسرقت
في ناس راكبين في عربات كاشفة محتاجين مشمعات لانو المطر نزل من أمس والدنيا بردت والجوع شديد وفي عربات اتعطلت في الطريق محتاجة يجروها ..
الناس التعبانين أكتر ديل المنتشرين في الطريق بين كبري الدندر وأب رخم على الطرقات من أمس وأول أمس ومافي أكل لكن الترعة قريبة بيشربو منها ..
الأطفال بيبكوا بأصوات تقطع القلب والله بسبب الجوع ..
الرضع أمهاتهم ما فيهم لبن بسبب الجوع الشديد ..وماقادرين يشيلوا نفسهم ..
العدد النزح دا مقدر ب 50 ألف ويمكن أكتر .
.
والله الناس من أمس بعاينوا للسماء وخايفين المطر يارب حواليا ولا علينا ..
المطر بيقفل الطريق وبيزيد المعاناة والجو بيبرد والجوع بشتد ..
وفي ناس حتموت من الجوع ..
نحن كان معنا 31 بلحة أدينا مرضى السكري 5 بلحات وفضل 21 بلحة وزعناها على الأطفال بلحة بلحة ..
والله فرحتهم بيها كانت لا توصف ..
مافي حاجة أشد من بكاء الأطفال من الجوع ..
في أب رخم اشتريت 2 عصير مازا لأمهات حوامل عشان جاهم هبوط ويومين جعانات وعطشانات .. وقلت ليهم أشربوها بالدس لأنو الأطفال لو شافوها بقولوا عايزين ومافي قروش ..
والله شايلات العصير وما قادرات يقيفن ولا قادرات يشربن ويخلن أطفالهن ..
رجعت تاني اشتريت قارورتين لمرضى سكري وقارورة واحدة وزعناها سكتنا بيها الأطفال جرعة جرعة ..
والله المستعان ..
#شير يا جماعة شير
يا ناس القضارف شدو حيلكم وأطلعو بالأكل
..
لو عندك عصيدة بس بدون أي شيء شيلها وأطلع بيها ..
#شير

يابرهان وياكباشى وياسر العطا

ومن يشاركونهم فى جرم استمرار الحرب حتى آخر جندى

أرجو أن تلين قلوبكم المتحجرة بعد قراءة هذا النداء

أرجو أن تصحو ضمائركم النائمة

أرجو أن تستيقظ إنسانيتكم المهترئة

أرجو أن تعودوا إلى رشدكم وتذكروا ربكم ،
ولو فى صلواتكم التى لم تنهاكم عن المنكر،
ولو فى تلاوتكم التى لم تغادر حلوقكم ،

وحين تحللون صيام الإتنين والخميس

كما تحللون دماء إخوتكم فى الوطن لأجل

الوصول للسلطة وهى جنتكم التى أنستكم

الله وحسابه وعقابه ، يوم لا ينفع مالٌ ولا بنون!

أوقفوا الحرب

أوقفوا الحرب

أوقفوا الحرب

تحياتي اختنا الاستاذة مهيرة
علكم والاهل بخير

تنطبق على حالتنا في السودان، هذه الاقصوصة :
قال احدهم لا فض فوه ولا نفدت جعبته:
تشاجر كلبان شجارا عنيفا وصارا يأكلان بعضهما البعض حتى لم يتبق منهما الا الذيول
فقال الذي يستمع: كيف ذلك، لا يمكن
فقال الراوي بثقة :
في الحروب تتساوى الذيول والرؤوس

*
فبهت الذي سأل

لا حولا ولا قوة الا بالله
اللهم العن من تسبب في هذه الحرب
ربنا يكون في العون

ابو
جهينة
مداخلتك
عينة
لكن البنية
مهيرة
ابدا مها
هينة
جابتك عشان
تدلي بالبينة
ربنا يحفظ
السودان واهله
بسورة البينة

وضع النازحين بإتجاه القضارف مأساوي جدا
أتمني أن تتكاتف الجهود لإنقاذهم
ناس الدندر ديل بالذات كانو قمة في الكرم عندم يمر عليهم النازحون
كل الناس تحاول تساعد حتي البعيدين