هاشم صديق فديتك يا وطن

09:15 AM June, 26 2024

سودانيز اون لاين
Yasir Elsharif-Germany
مكتبتى
رابط مختصر

[14 يونيو 2019]

Quote: فديتك يا وطن شعر : هاشم صديق كأنك يا وطن مجبور على الفجعة ونقيح الهم كأنك من عصور ودهور مَقَسّم بين وجود وعَدَم كأنك راجي خيل الغيب وحلمك خَطّ راسو الشيب ولسع لا كمل عَشَمك ولا خاطرك فَتَر يحلم. ....... كأنك يا وطن موعود تعاند كلُ باب مسدود ويهل فجرك طريق ممدود وفي الآخر يعَقْبو ندم كأنك للجروح مرهون ومن ليل رحلتك مغبون وفي غار النضم مسجون ومحروم بالفعال تنعم. ...... سألتك يا وطن إرتاح فديتك يا وطن تسلم قريت في دفترك شَجَنَك وذاكرتَ المعاني حِكَم مشيت بي قصتك للريح وشَدّيت في مسارب الهم لقيت حالك سؤال محتار وجرحك من نقيحو نَضَم. ...... تتعلم تغني غُناك وفي حلقك غبار وألم وتتعلم تبارْك النار وكت حلمك بَرَد وأظلم وتتعلم تموت وتعيش كأنك حاجة ما بتكمل ولا بتزيد ولا بْتنِتم. ...... أشوفك بالعذاب مصقول وبي لهب الجرح مغسول ولسع لا سكت عَرَقك ولا فَتَّر شقاكا قَدم. سواعدك ضاربه فوق الريح وجِرْسك ديمه صوتو فصيح ونجمك في الأماسي علم. ...... سألتك يا وطن إرتاح فديتك يا وطن تسلم . ..... متين تلمس صوابْعك قيف؟! متين تعرف خلاصك كيف؟! متين تفرح متين تنِجَم؟!!