لو صح هذا فدي حاجة مؤسفة ومخجلة جدا يا مزمل

12:44 PM June, 01 2024

سودانيز اون لاين
طلحة عبدالله-
مكتبتى
رابط مختصر

كتب مزمل أبو القاسم

Quote: وزارة الخارجية البريطانية تخير جايلز ليفر سفيرها في السودان بين الاستقالة أو الإقالة بسبب تقديمه دعماً مالياً كبيراً لمؤتمر (تقدم) كجهة سياسية واحدة ومن ميزانية التنمية، واتهامه بتضليل الخارجية البريطانية بتقارير تفتقر إلى الدقة والمهنية بخصوص ما يحدث في السودان.

فجاء السفير البريطاني وكذب الخبر وسخر منه
يتبع ان الله هون

Quote: Yes, this is of course fake news! 😂I remain in my job, and my HQ is happy to see the success of the Taqaddum Founding Convention. The UK will continue to support the voices of Sudanese civilians who stand against the war, and in favour of civilian rule and democracy.

قلت في بوست غاتس هنا
ان مجموعة من جماعة منهم أخونا مزمل دا
بغتسوا حجر أية حاجة في اية حاجة
وقلت مزمل دا زمان لما كان بكتب في الرياضة
وبشجع المريخ في عمودو كان المدعو طلحة عبدالله
بشوفو كاتب شنو ويكتب عكسو تماما بالضمة والشولة والكسرة
والنقطتين فوق بعض
وكان العبدالله دائما كلامو الصاح
وقلت ان مزمل أحد اسباب نكسة المريخ لانو انطباعي وانفعالي
أكتر من كونو صحفي
وغايتو المهم بس

طبعا تكذيب خبر أخوكم مزمل منتشر في تويتر
وفيس بوك والمدعو طلحة عبدالله عتلو جابو هنا
مع اصافة تعليق وعنوان
ودهشة مما صار اليه أمر البعض منهم مزمل
ومحمد عبدالقادر وآخرين كنت اعرفهم بغير مما هم عليه الآن
........
ياللدنيا وتقلباتها وما صارت اليه أحوال اهلها
خخخخ

لو صح شنو يا طلحة
انت مش جبت الرد بتاع السفير ؟
ادي مزمل ده على راسه طوالي بدون مقدمات

والله يا حيدر الواحد بقى يعمل حسابات ما ليها عدد
قبل ما يتيقين من صحة أخبار المنتديات والمنصات
الفبركات والذكاء الاصطناعي افة الأسافير
والحرض واجبفي كل الأحوال .
لكن يا حيدر اعتقد فات عليك كونو افتح الموضوع هنا
واساهم في انتشارو دا في حد ذاتو ردم
لأنو ببساطة كان ممكن اعمل نائم منو
واللا شنو ؟؟

صيغة الرد (الاقتباس) الوارد في مداخلتك بتوحي انه كان خلال مقابلة وليس تغريدة في حسابه في تويتر
دخلت حسابه ولم اجد اي اشارة للموضوع ده
المهم مزمل زول متورجغ على طريقته كما عهدناه في الكورة

على اية حال أخوكم مزمل اتردم محل ما عتلت الكلام دا
وبصراحة عليه بعد كدا يحاول يعتكف أو على الأقل
ياخد اجازة من كونه اعلامي خمس ست عشر سنوات أو يزيد
وبرضو ح تظل اللافتة مكتوبة بالخط العريض
(حلة جعيبات فلان الفلاني)
خخخخخ

يا حيدر جهازي ما مساعد أنقل صورة كلام السفير لكن ممكن اديك
روابط فيها التكذيب والردم أمس مثلا https://www.facebook.com/osman.abdalla.121https://www.facebook.com/osman.abdalla.121
دي صفحة واحد اسمه عثمان عبدالله في الفيس بوك
ودا في تويتر https://twitter.com/GilesLeverUK/status/1796841173916459125https://twitter.com/GilesLeverUK/status/1796841173916459125
وهكذا وهكذا

الغريبة انا صفحة مزمل ما قاعد تظهر لي ما عارف
اذا كان مبلكني واللا عامل لي عمل خخخخخخ

سلام طلحة،،بعض الأخطاء ممكن تتصلح باعتذار
لكن يخيل لي أن هذا المتزمل يكتب وهو في حالة اللا-وعي..

هلا يا الدقم
والله يكون في عونو واللخو الاسمو ضياء الدين بلال
ومحمد عبدالقادر
أنا حزين بالجد على الأخير دا
ياخ الدنيا دي ضيقة وقبرها أضيق
والعمر قصير وما في زول ح يشيل معاهو
حاجة .. حتى التوب البغطوهو بيهو بسحبو منو
قبل ما يردموه بالتراب
أنا ما عارف الناس دي بتنسى واللا مغضوب عليهم
وضالين واللا شنو ؟

غايتو بالنسبة لي والله العظيم
الزول يكون ( كلجة) عديل ما يكون
أخو متأسلم أو عنصري والعياذ بالله
...........
البتماهى مع المتأسلمين والعنصريين ويشيل ليهم المباخر
والأباريق أسوأ منهم

ربما اعود ان الله هون

شايف الفنان عمر دفع الله
جاب صورة. لكلام مزمل ابوالقاسم
وصورة لرد الدبلوماسي البريطاني

ومزمل طبعا زول كذاب من زمان واصبح الان ينسج ويفبرك الاخبارلاولياء نعمته

وهو طبعا ربيب جمال الوالي
(الكوز الفاسد واحد عناصر الحلقة الضيقة لأسرة عمر البشير

اثناء الثورة الشعبية وفي عنفوانها
لاحظ تاريخ المقال )
كتب مزمل ابوالقاسم عن
مجرم الحرب " امسح. اكسح ما تجيبو حي "!!
المجرم احمد هارون


مزمل أبو القاسم يكتب : الخليفة المكلف (أحمد هارون).. بين الشِّدَّة واللولاي .. التحدي الأكبر والأخطر

3 مارس، 20190 2 دقائق

عجم الرئيس كنانته، فلم يجد فيها سهماً أقوى وأصلب من مولانا أحمد هارون، كي يُصوِّبه نحو رئاسة المؤتمر الوطني بالوكالة، إلى حين انجلاء الأمور، بعد أن فضَّل البشير أن ينزع عباءته الحزبية، ويرتدي الكاكي من جديد، مكتفياً بصفته القومية، لفترةٍ انتقاليةٍ، يتوقع لها أن تتخطى الأمد المحدد لانتخابات 2020.
اختيار الرئيس لهارون لم ينبع من فراغ، (فالخليفة المُكلَّف) يتمتع بمزايا عديدةٍ، وخبراتٍ استثنائية، وخلفياتٍ متنوِّعة، أهَّلته لنيل ثقة البشير، لقيادة الحزب، في مرحلةٍ مفصليةٍ بالغة الصعوبة والتعقيد.
تأهيله الأكاديمي يقول إنه قانوني ضليع، درس الحقوق في واحدة من أعرق الجامعات المصرية، قبل أن ينتظم في سلك القضاء، ويتحوَّل منه إلى ساحتي العمل السياسي والتنظيمي، ويتقلَّد مناصب حكوميةً عديدةً، تنقَّل فيها بين المركز والولايات، كوزير دولةٍ أسبق للداخلية والشؤون الإنسانية، ووالٍ لجنوب وشمال كردفان، بخلاف عمله السابق كمنسقٍ للشرطة الشعبية.
تجارب مولانا أحمد هارون في العمل التنفيذي استندت في غالبها إلى شراكاتٍ فعالةٍ، تجمع السلطة الحاكمة برباطٍ قويٍ مع المجتمع المدني، عبر إدغام المواطنين في العمل الرسمي، والجهد التنموي، مثلما حدث في ولاية شمال كردفان، التي أعلى فيها هارون ثقافة (النفير)، بشعاره الأشهر (موية طريق مستشفى)، مستهدفاً به تنمية المجتمع، وتحسين بيئة الخدمات الأساسية للمواطنين، ببرامج مدروسة، يشارك في تنفيذها المجتمع بكل فئاته، جنباً إلى جنب مع السلطة الحاكمة.

كذلك شهدت فترة عمل مولانا هارون في ولايتي جنوب وشمال كردفان اهتماماً ملحوظاً بالرياضة عموماً، وكرة القدم على وجه الخصوص، توظيفاً لشعبيتها الطاغية في خدمة أهداف حكومة الولاية، سيما في الجوانب التنموية والاجتماعية.
انعكس ذلك الاهتمام على ناديي هلال كادوقلي وهلال الأبيض، فحققا نتائج لافتة في بطولتي الممتاز وكأس السودان، ونالا شرف تمثيل السودان خارجياً، مثلما شهدت الولايتان تشييد اثنين من أجمل وأفضل الاستادات الرياضية في الحقبة نفسها، ونعني بها ملعب مورتا في كادوقلي، وملعب قلعة شيكان، المُشيَّد بمواصفاتٍ دوليةٍ، في الأُبيِّض، حاضرة شمال كردفان.

الاهتمام بالرياضة تخطى الحيز الولائي، ليشمل النشاط القومي، برعاية مباشرة من هارون للمنتخبات الوطنية، بكل فئاتها، وفي عهده أصبحت مدينة الأبيض عاصمةً لكرة القدم في السودان، واستضافت معظم مباريات منتخباتنا الوطنية خلال الأعوام الثلاثة الماضية، ليكتسب بها هارون مكانةً ساميةً عند الرياضيين، وتعدادهم بالملايين.
يتضح من ذلك السرد أن الرئيس تعمد اختيار شخصية نوعية مُركَّبة لخلافته في الحزب.
شخصية كارزيمية، تستند إلى (كوكتيل) متناغم من المؤهلات والمهارات والخبرات، وتجمع بين الدراية العالية بالقانون، والتمرس في مجال العمل العام، بشقيه السياسي والتنفيذي، وقوة الشخصية، والقدرة على اتخاذ القرارات الصعبة، والتواصل الفعال مع المجتمع المدني، والانتماء الراسخ للحركة الإسلامية، والقدرة العالية على الخطابة للتأثير في الرأي العام.
لا ندري الكيفية التي سيقود بها هارون حزباً يمر بمرحلة فطامٍ صعبة، يفارق فيها سوح العمل التنفيذي، ليكتفي بالنشاط الحزبي، ويفترض أن تشهد إعادة بناء المؤتمر الوطني على أسسٍ جديدةٍ، بمعزل عن استناده القوي، وهيمنته الطاغية على السلطة لسنواتٍ عديدة.
الثابت أن كل ذلك يفترض أن يتم بتنسيق عالي المستوى بين الرئيس والحزب، لضمان ركض مؤسسة الرئاسة مع الحاضنة السياسية وقع الحافز على الحافر، بمعزل عن أي تشاكسٍ، قد يتسبب في ما لا تُحمد عقباه.
سيناريوهات المرحلة المقبلة غير واضحة المعالم، وهنا يكمن التحدي الأكبر لهارون، لأنه سيكون مكلفاً برسمها وتوضيح مؤشراتها وتحديد اتجاهات سيرها، بالتنسيق مع قيادة الدولة، لاجتراح طريق ثالث، يجمع الأضداد، ويوفر ملعباً مهيأً لممارسة نشاط سياسي سلمي بمواصفات جاذبة، واشتراطات موضوعية، تُقنع الممانعين والساعين إلى إسقاط النظام بفوائد الحوار، وإمكانية وصوله إلى مخرجات إيجابية، تنهي حالة الاستقطاب العالية التي تسيطر على المشهد السياسي منذ فترة.
أما التحدي الأخطر الذي يواجه الخليفة المُكلَّف فيتمثل في كيفية إحكام القبضة على (قرني) الحزب نفسه، حفظاً لكيانه من التفلت والتنازع والتشظِّي، إلى حين عبور مرحلة الفطام.. حتى ولو استدعى منه الأمر استخدام الشِّدة.. و(اللولاي

شوف المسؤول الانقاذ السابق ده قال شنو يا طلحة

وهذا رد بابكر فيصل عليه وعلى امثاله من المتزمزغين من شاكلة مزمل

Quote: fake news! 😂I remain

يا طلحة الوش الضاحك الفي نص حديث السفير دا إن شاء الله من عندك.

غايتو لو بقى من عند السفير البريطاني تبقى عوجة كبيرة.
واحتمال كبير الخارجية البريطانية تشيلو عشان الوش الضاحك دا.

Quote: واحتمال كبير الخارجية البريطانية تشيلو عشان الوش الضاحك دا

والله جد يا طلوح
يكون عضو معانا هنا ؟

مرحبا
يا كمال عباس
مزمل دا خجلت ليهو بالجد .. مع انو قال هو
اتحادي أو حاجة من هذا القبيل لكن ما يكتبه
لا يكتبه اعتى الكيزان وأكثرهم تعصبا
أخوكم مزمل زول انطباعي وانفعالي ومتعصب جدا
كما عرفته عندما كان يكتب في الرياضة واعتقد جازما
انو أحد اسباب دمار المريخ العظيم
ليهو سنوات طوال يشتم في كمال شداد ( عام وخاص)
وشداد كل ما يمشى يمشوا أهل الرياضة العارفين
في بيتو يجيبوا تاني رئيس للاتحاد
آخر مرة قال أنا جابوني من حافة القبر .. وأخوكم مزمل
ماشي في الشتيمة يمد .. خخخخخخخخ

يا حيدر حسن ميرغني الحكومة السابقة اسقطها الأخوان
المتأسلمين بأفكارهم المحنطة وسلوكهم الإرهابي واسلوبهم
المستفز للسودانيين .. لا غيرهم

يا مولاهم حافظ أنا عملت للكلام بتاع السفير دا كوبي
وعتلتو جبتو بي وشوشو وفواصلو
ما عملت حاجة في البوست دا إلا الاستغراب والحسرة
على البعض بس .. الباقي كلو حطب