بين اليقظه والاحلام،،،

08:32 PM February, 21 2024

سودانيز اون لاين
علوبه-KSA - Sudan
مكتبتى
رابط مختصر

*بي📝 الحنين،،، ،،، ،،،*
*د. علي الشيخ ،،، ،،، ،،،*

*بين اليقظة والاحلام،،،*
في تقديري،،، في كتابات نثريه أو شعريه،،، قديمه ،،، تقوم تهبش فيها،،، بتتأكد إنه
إتكتبت للأحداث الآن ،،، أو بتصور مشاهد واقعيه،،، نعيشها ونتعايش معاها،،،
*نار البعد و الغربة*
الغربه البنعرفها كلنا،،، مليئة بالتفاؤل و الأمل و الضحكَات😄😄😄،،، و الضْحكاتً💰💵💷💶 ،،، متعدده فروق سعر الصرف،،، ودي غربه مافيها نار،،، إلا نار الشوق،،،
*شوق لأهلي و الصحبة*
*شوق لكل جميل في الحي*
*شوق للشينة لو صعبة*
دي بس انحنا فيها الآن شوق للشينه لو صعبه،،،
بقينا نشتهي الحاجات الشينه هسه ونشتاق ليها ،،،
نشتاق لي شارع الزلط المحفر،،، نشتاق للكهرباء البتقطع،،، نشتاق للصفوف،،، والله حتى بقينا نشتاق لي بيوت البكاء😭 فيها الرحمه واللمه،،،
*بين اليقظة و الاحلام*
*بين أجفان تقول للناس*
*ياريت النوم يزورني اليوم*
*أنوم لو ليلة في كل عام*
أي الناس مرقت كايسه الأمن والأمان،،، لكن بقت *سُقدْ* الناس قلبوا الليل نهار،،، مشتهين نوم السهلات والحيشان،،، و مشتهين يشمو ريحة التراب الداقاهو المطره،،، مشتهين مالك يا ولد اتأخرت وين،،،
يجي من وين النوم،،، وقلبك بي هناك،،، وعقلك ما معاك،،،
*بين اليقظة و الأحلام*
*آهة بتطلع في دمع العين*
*و زفرة بتشعل أنفاسي*
*آه بتداوي فينا حنين*
الاَهه،،، البتطلع في دمع العين،،، ده تصور خرافي،،، لوحه تشكيليه،،، وحال الشفع بعد ما يتدقه،،،
نقيف في كلمة *حنين،،،* دي حكايه و روايه،،،
*حنين* لي أي زول حتى لو كان عدوك،،، هسه ببقى صديقك،،،
*حنين*،،، لو هوهوو فيك كلب تقول ليهو *جرررر،،،*
*حنين* لي باب بيتكم،،، تقيف مرات تدق في الباب،،، و يشوفك ناس البيت،،، يسألوك الليله جبته لينا معاك شنو،،،
*بين اليقظة والأحلام*
*بين أجفان تقول للناس*
*ياريت النوم يزورني اليوم*
*أنوم لو ليلة في كل عام*
*لو عبرة تزيل غصة*
*غصه،،،* في الحلق لاتقدر تبلع ريقك،،، ولا تقش دموعك،،،
*غصه،،،* وانت مرقت ماعارف ترجع متين،،،
*غصه،،،* وحلم عمرك وسنينك بقى في متاهات،،،
*لو ذكرى تهدي حنان*
أرق الكلمات تلك التي تبتدي بي حرف *الحاء،،،*
مرقنا من حنين،،، ودخلنا في حنان،،،
*حنان* للحيطه وإنت متكل فيها،،،
*حنان* للعتبه وإنت قاعد مع أصحابك،،،
*حنان*،،، مابتشبع منه،،،
*لو إنسان صبح قصة*
*أنا القصة يا أم درمان*
كل زول وقصته،،، و كل زول و ذكرياته،،، أمدرمان ،،، عشان أواصل لازم اخد نفس ليس ذلك،،، ولكن نفس لتجديد أكسجين،،، زي مابعمل محمد وردي في غنائيه من مقطع ضخم،،، لي اخر أكثر ضخامه،،، شيلة النفس دي بتمرقنا من قصتنا،،،
*بين اليقظة و الأحلام*
*بين أجفان تقول للناس*
*يا ريت النوم يزورني اليوم*
*أنوم لو ليلة في كل عام*
منو البقدر هسه ينوم،،، مش قلت ليكم في قصائد كده بتهد الحيل،،،
نحن عايزين ننوم ليله في كل عام،،،
*ليله* نخلي باب الشارع فاتح،،، للزول الجاي متأخر،،، مساهر في بيت عرس،،،
*ليله* تكون العربيه واقفه في الشارع للصباح،،،
*ليله* نتعشى فيها في الدكان و نتواعد بعدها،،،
*بين اليقظه والاحلام*،،، أي كلام لحنه *عبداللطيف خضر ودالحاوي* ،،، بنردده و بنتغني بيه ،،، إلا دي،،، لحنها بي جمل موسيقيه ملانه وقفات تأمل،،،
كلام كتبه *عبدالمنعم عبدالحي* وهو في غربته،،، يبقى صالح لكل زمان،،، و مكان،،، وملك لأي إنسان،،،
ابدع في توصيله بكل رهافه المطرب *حمد الريح،،،*

*بين اليقظه والاحلام،،،*

*نحن لا كنا في يقظه و لا أصبحت عندنا احلام،،،*

*د. علي الشيخ*
*الحنين*
*٢١ فبراير ٢٠٢٤*