ابقو عشرة

06:02 AM February, 13 2024

سودانيز اون لاين
Mutwali Malik-doha / qatar
مكتبتى
رابط مختصر

أبـقـوا عـشـرة
==============
ما الزمن مرات بفرّق..
وانتو ما عاملين حسابكم..
والبكون الليله قااعد
بكرة حا يفارق دياركم..
دام الدنيا فانيه
نحنا ليه بنجور ونقسى..
واي زول زعلّنا مرة
لما يرحل ما بننسى..
يبقى ليه نرجاهو يمشي
ياخ تعالو نراضي هسه..
يوم بيوم خلونا نفرح
العمر ما بدي فرصه..
لو ابوك وامك معاكا
ياخي قوم قبّل يديهم..
كل لحظة وكل ثانيه
املا عينيك انت بيهم..
وانت طالع وانت راجع
امشي واطمن عليهم..
والعمر لو ليك مادي
بكرة ما حا يمد ليهم..
الحبايب والقرايب
كل زول فيهم بفارق..
وانت جاري ورا المعايش
والعمر منك بسارق..
والقدر والموت طرايد
بكرة للباب تلقى طارق..
مافي زول في قبرو خشه
تاني يوم شفناهو مارق..
*أبقو عشرة على صلاتكم* ( الصلة)
دنيا ياخ ما ليها معنى..
ياما سكينا الفوارغ
وياما ورا شهواتنا ضعنا..
كنا نجري ورا المكاسب
شان نحسّن بس وضعنا..
كنا ناسين لما قالو
كلو زايل ما سمعنا...

نعم والله ولسه جارين ورا المكاسب عشان نحسن من وضعنا
وناسين أنه كله زايل ..كله زايل ...

..وشكرا على هذه القصيدة الحكمة ..لعلنا نتعظ ونعتبر ..

سلام متولى وضيوفك الكرام

قصيدة معبرة مليانة حكمة وحنية

ياسلام

تحياتى

قصيدة مؤثرة
يا ريت يسمعوها الناس الكانو سبب تشتت الشعب السوداني وقعدو فراجةً
والنَّاس تضاير ترجع السودان تضاير في بلدا الغني الموارد
براحة البال والضمير
القصيدة زي افضل تكون مسموعة مش مكتوبة وتنشرً في الواتس للتأثير الأكبر

القصيدة للامانة وحق الشاعر انا وجدتها في النت ولا اعرف شاعرها وبحثت عنه ولم اجد معلومة
شاكر جدا مروركم

سلام متولى وضيوفك الكرام

قصيدة معبرة مليانة حكمة وحنية

ياسلام

تحياتى

الشاعر اسمو حسام محجوب
عنده صفحة في. الفيس
لو نسخت القصيدة واستخدمت محرك قوقل
او هشناق #حساميات

ةسلم يا عادل امين علي اسم الشاعر
حسام محجوب لك الشكر علي هذه القصيدة الرائعة