من بوقوتا صور و تعليقات

00:42 AM February, 02 2024

سودانيز اون لاين
النصرى أمين-كالغرى, كندا
مكتبتى
رابط مختصر

الما بعرف تقع وين بوقوتا يكون ضعيف جدا فى الجغرافيا ، اكيد ما بعرف
ليما و مادلين و سانت هوسيه .


يا بريمة يا جنجويد حالى كوز سابق دخلت بوست شيخ الامين
لقيتك عامل كاريكاتير ضنب الككو ، هل تصدق انا لسه مقتنع انه حميدتي اتعرض
لاصابة تسببت فى غيابه الطويل و غيرت من شكله.
المهم ، التعليق الفوق ده عشان كسلان افتح بوست للرد على الجنجويد الكوز سابقا بريمة
عصفورين بحجر و كده


المهم نرجع للموضوع
بوقوتا مدينة جميلة جمال خرافى و فيها جو رهيب فى شهر يناير و فبراير.

الصور فى الطريق

نبدأ بأهم حاجة عرفت عن كولومبيا (غير المخدرات ) وهى القهوة

قاعد دلوقت بكتب فى البوست ده فى محل Dunkin Donuts بشرب فى
قهوة كولومبية

https://ibb.co/jJLCpSZ

اول مفاجأة غير سعيدة لمن وصلت المطار و ناس الجوازات شافو الجواز الكندى ، فرزونى من الناس وو قفت فى صف براى.
قلت فى سرى دى حركات عنصرية ولا شنو ، بعد دقائق جات بنت شابة قالت
لى اى جواز كندى لازم يدفع 85 دولار رسوم دخول و وضحت السبب فى ورقة مكتوب فيها
نسبة لمعاملة الحكومة الكندية لمقدمى التاشيرة من كولومبيا و مطالبتهم بعمل فيش و تشبيش (صاح المصطلح ده؟)
فرضت حكومة كولومبيا هذه الرسوم كنوع من التعامل بالمثل .
85 دولار كندى رسوم دخول .
طلعت من المطار و خشمى ملح ملح

حليل ايام كنا عفاريت فى المنبر ده!!!
حسى الواحد لو داير يرفع فيديو يعمل شنو !!!
اوع من يوتوب ، قناتى فى يوتوب قفلتها زمان و لا ادخل اليوتوب
الا مرة فى السنة و بالصدفه كمان.
كيف نرفع فيديوهات يا عفاريت المنبر؟

العملة فى كولومبيا هى البيسو Peso
حوالى سبعة دول فى امريكا الجنوبية و المكسيك عملتهم بيسو
و اعتقد كلهم يستعملو $ كرمز للعملة ، متاكد من المكسيك و كولومبيا.

البيسو الكولومبي مستقر لحد كبير.
الأوراق التى تعاملت بيها فئة الخمسة و عشرين و خمسين
كل ورقة مكتوب قدامها الف ،لكن انسى الالف و اتعامل بالرقم الظاهر.
مثلا البيتزا بتلاتين بيسو ( على الورق 30 الف)
ما سمعت زول بيذكر الالف .
مثال اخر اشتريت قهوة و muffins ب 15 بيسو ( الورقة النقدية تقول 15 الف )
المهم بعد يوم واحد اتعود و بقيت اتجاهل الالف .
الدولار الأمريكي يساوى اقل من اربعة بيسو بقليل 3.9 تقريبا

العملة فى كولومبيا هى البيسو Peso
حوالى سبعة دول فى امريكا الجنوبية و المكسيك عملتهم بيسو
و اعتقد كلهم يستعملو $ كرمز للعملة ، متاكد من المكسيك و كولومبيا.

البيسو الكولومبي مستقر لحد كبير.
الأوراق التى تعاملت بيها فئة الخمسة و عشرين و خمسين
كل ورقة مكتوب قدامها الف ،لكن انسى الالف و اتعامل بالرقم الظاهر.
مثلا البيتزا بتلاتين بيسو ( على الورق 30 الف)
ما سمعت زول بيذكر الالف .
مثال اخر اشتريت قهوة و muffins ب 15 بيسو ( الورقة النقدية تقول 15 الف )
المهم بعد يوم واحد اتعود و بقيت اتجاهل الالف .
الدولار الأمريكي يساوى اقل من اربعة بيسو بقليل 3.9 تقريبا

حتى ول أبا النصري، الزول المحترم وعفيف اللسان قبل علينا .. وبقي فلول!!

ما دام الدولار الأمريكي يساوي 3.9 بيسو الموديك شنو؟


بريمة

سلام النصرى,
تعرف من بين اسماء المدن العندها وقع خاص في مخيلتى هى بوقاتا, سايغون, هلسنكى و بيونغ يانغ و فانكوفر.
اسماء كدا تحس ناسا فكرو تفكير عميق قبل التسمية.

محجوب

بوقاتا Bogota تعنى "سيدة الأنديز"، كما تعنى "أسوار الحديقة"
سايغون Saigon تعنى المسكن أو الموطن
هلسنكى تعنى رقبة النهر (أكثر محلة يضيف فيها نهر الهلسنكي)
بيونغ يانغ: تعنى الأرض المنبسطة ..
فانكوفر أخذت إسمها من جورج فانكوفر .. وتعنى شخص ينسب إلي مدينة فونكفورديون الهولندية .

بريمة

اهلا بالحبيب محجوب
شايف بريمة ماقصر فى تعريف اسماء المدن .
بوقوتا و ينطقونها بُقُتا مدينة جميلة جمال ما طبيعى و تستحق الزيارة
انا اكتفيت بالداونتاون لغاية اليوم ، مدينة راقية لا تقل عن العواصم الاوربية او المدن الأمريكية.
طبعا اكتر حاجة بقيس بيها المدن هى جودة المصارف الصحية ، كلما اتدهورت كلما المستوى نزل

من ناحية نظام و حركة مرور و مواصلات عامة ممتازة جدا
بالنسبة للامن ،لم اشعر لحظة واحدة بعدم الامان ،اتحرك بحرية كاملة ( احتمال الشكل ليهو دور)
التعامل مع الجمهور راقى جدا جدا بس معظمهم لا يعرف كلمتين بالانجليزي، اتعاملت مع العاملين فى البقالات و الفراشه فى الشوارع و فى المطاعم ، فى كل مكان شعرت انهم شعب لطيف مهذب.
طبعا اى مدينة فيها قاع مدينة ،لسه ما شفت القاع بعد لكن غالبا اجر تاكسى ساعتين يلف بى احياء المدينة الشعبية

يا بريمة
البلد رخيصة رخصة ما طبيعيه
اضرب ليك تمثال
الفندق تلاته نجوم فى قلب الداونتان ب 22 دولار فى اليوم و يشمل الفطور المجانى .


قبل شوية حصلت جوعة ، مشيت مطعم قريب ، لقيته زحمة شديد ، الساعة عشرة بالليل
طلبت ربع دجاجة محمرة زى KFC معاها بطاطس و رغيف صغار كده و قزازة بيبسى ، التكلفه 14 بيسو
يعنى تلاته دولار و نص .
اما اكل اهل البلد من لغاويس تاكو و بريتو رخيص جدا جدا لكن طعمه لم يستسغ لى .



الإنترنت رخيصة جدا .المواصلات رخيصة جدا
اعتقد هى من ارخص دول امريكا الجنوبية

لو جمعت تكلفة الفندق 22 دولار
الفطور مدفوع.
الوجبة التانية 4 دولار

يعنى 26 دولار فى اليوم اكل و سكن

والله يا النصرى انا كنت مفتكر ان مدن كولومبيا كلها مليانة مجرمين وقتلة زى الجنجو يد لأنها مشهورة بتجارة المخدرات ..وفعلا ٢٦ دولار في اليوم سكن واكل شئ ممتاز ودليل على أن كولومبيا من ارخص دول العالم .
٢٦ دولار في نيويورك ممكن تصرفها وانت قاعد جوه ستاربكس ...اما الاقامة في فندق فحدث ولا حرج ..وانت سيد العارفين بي نيويورك ....انا
...اظن الجواز الكندى بقى مهزلة ..حتى المصريين وضعوا شروط قاسية ورسوم عالية عشان يدوك تأشيرة دخول في جواز سفرك الكندى مع انه زمان تاخد التأشيرة في مطار القاهرة وبرسوم رمزية ...اما الان فتحسس جيبك قبل ما تقدم لتأشيرة لزيارة مصر ..و تاخد التأشيرة بعد اسبوعين انتظار ...

سلام النصريلو ما زلت هناك في بوغوتا حاول اشتري حجر الزمرد الاخضر الكولمبي الاصلي الصافي الغرام في حدود ٢٠٠ الي ٤٠٠ دولار اميركي باب اول، في كندا 🇨🇦 الغرام ب ٨٠٠-١٠٠٠دولار اميركي.في حالة العدم اشتري التنزنايت سعرو معقول، من باب التجربة Best of luck

نعم يا السر حكومة كندا تعامل الاجانب المقدمين لتاشيرة سياحية كأنهم مجرمى حرب
الدول دى كنوع من ال retaliation وضعت رسوم و قيود على حاملى الجواز الكندى.
تأشيرة مصر بقت زى تاشيرة امريكا من السودان، عذاب شديد و تاخير و بريد ماشى جاى.


بالنسبة لكولومبيا ، كارتيل المخدرات هو صراع بين عمالقة لا يشعر به
المواطن العادى فى حياته اليومية ، الاسواق عادية و الناس فى الشوارع و كل الخدمات متوفرة
و رجال الشرطة منتشرين بشكل غير مزعج و مخيف .
الحاجة المزعجة، كل زول شايل مكبر صوت صغير و شغال موسيقى.
الببيع تسالى و نبق عنده مكبر صوت شغال غنا.
حاجة مزعجه كانت بالنسبة لى .

مرة ماشى و بصور بالجوال ، ضربت الترتوار وطاخ وقعت كسرت النضارة (العدسات سليمة)
مشيت محل اغير الفريم ، النوع ما متوفر تلك اللحظة ، طلبوا منى العودة تانى يوم
التكلفة عشرين دولار !
عارف براك تكلفة الفريم فى كندا ،شى خيالى!

خيالى انت يا دقم
قايلنى بعرف حجر الزمرد ؟
ياخ فى حاجات مابفهم فيها خالص
العربات و الاحجار الكريمة كالذهب .
قوقلت الزمرد ده لكن ما وصلت لنتيجة
نبدأ نفتش النت عن كيفية الشراء و قوانين الجمارك
اصلا قاعدين ساكت مافى موضوع نقزقز بموضوع حجر الزمرد.

ناس التجارة ، القهوة الكولومبية اجود انواع القهوة فى العالم (غالية شوية)
لو الواحد فتح خط استيراد حتى لو بكميات بسيطة ممكن يستلم السوق .
جاهزين لاى شراكة ذكية

لا حولا يا دقم
طلعت من بوفيه الفندق المجانى ،فى اللوبى لقيت فترينه قزاز صغيرة
فيها لغاويس صغار ، حجار ملونة . شفتها اول يوم لكن لم اعر الامر اهتمام
دلوقت ركزت فيها ، ياها زولتك زاتا ،احجار الزمرد .
معناه النصيبة دى مطلوبة و مرغوبة عند السواح لدرجة الفنادق تبيعها
شكرا للمعلومة القيمة
يبدو انى لم ادرس كولومبيا جيدا قبل الوصول اليها

يا نصري عام ٢٠١٥ عرضوا لي حجر زمرد سبعة غرامات زمرد وردي كولمبي اصلي مصقول ب ١٣ الف دولار اميركي بمدينة برمينغهام البيريطانية.الشيء دا فيهو قروش زي الرز، بخصوص الجمارك ما بتوقفوا في غرام او غرامين، لكن مع تكرار الزيارة ولو شايل معاك احجار كريمة اي كان نوعها فوق ٢٠ غرام تقريبا فلازم Declaration في اي مطار تمر بيهو المهم استمتع بالرحلة بالتوفيق

*لكن لابد من استشارة اهل الاختصاص [جمارك، تجار، في لبنايين وسوريين اصحاب مناجم ليهم اكتر من ٣٠ سنة في كولمبيا ديل خارج العاصمة] بدوك التفاصيل والعناويين والتراخيص من الف للياء ممكن مستقبلا.