اكبر كتاب عن امدرمان فى تاريخ امدرمان قريبا

07:05 AM February, 02 2024

سودانيز اون لاين
مصطفى نور-امريكا نيوجرسي
مكتبتى
رابط مختصر

السلام عليكم ورحمه الله بركاته
\الاخوه الافاضل الكرام
اتمنى ان يكون الجميع بخير وصحه وكذلك كل الاهل والاخوه فى السودان
قريبا ان شاء الله تعالى اكبر كتاب عن امدرمان تلك العاصمه الاثنى
والكتاب فى حوالى 1260 صفحه وسيكون متاح بى دى اف لكل الاخوه الراغبين فى قراه الكتاب
وفى الكتاب كل ما كتبت عن امدرمان فى خلال السنوات الماضيه وبعض ماكتب الاخوه من اهل امدرمان
الكتاب فيه تفاصيل دقيقه عن
رجال السياسه
كره القدم
الشعراء
الفنانين
اغانى الحقييه
ظرفاءامدرمان
والكثير من الشخصيات الامدرمانيه
الكتاب سوف ارسله بى دى اف لكل من يرد على البوست ان شاء الله تعالى

مع تحياتى
اخوكم مصطفى نور

مقتطفات من الكتاب هديه لكم

كل شخص قال انو امدرمان ماعندها اسياد وهم كثر الحاقدين على حب اهل امدرمان لتك العاصمه الانثى امدرمان
اقول ليكم
لو كنت سوداني ...كنت عرفت انو امدرمان العريقه عندها اسياد وتعال فى البدايه نعرفك ست امدرمان لو كنت سوداني
لماذا سميت مدينة أم درمان بهذا الاسم؟
أم درمان -
امراة تنتمي إلى أسرة مالكة كانت تسكن المكان الذي قامت عليه المدينة بالقرب من ملتقى النيلين الأبيض والأزرق، وكان لها ولداً اسمه «درمان وكانت تسكن منزلاً مبنياً من الحجر ومحاط بسور متين ظلت أثاره باقية حتى عهد قريب في حي «بيت المال» الحالي، وإلى أم هذا الولد نُسب اسم المكان وامدرمان تلك العاصمه الانثى الجمليه الرائعه .
كتبوا عنها الكثير والجميل
وقال الشعراء عن امدرمان
ما قاله شعراء الحققبيه من شعر عن امدرمان اكثر منما قيل عن عاصمه العراق بغداد فى عهد الخليفه هارون الرشيد .
العبادي يقول:
ليك سلامي يا ام در أمان
اقبليه وهاتي الضمان
ويقول عبيد:
طال هجري يا ام در أمان
بي بعادك حكم الزمان
وخليل فرح يقول:
أذكر بقعة امدرمان
وانشر في ربوعنا أمان
ذكر يا شبابي زمان
درانا ودار أبونا زمان
فيها رفات جدودنا كمان
ما بنساك خلقة ضمان
جنة وحور حماك أمان
ذكر يا شبابي زمان
بطري الاسسوك زمان
كانوا نحاف جسوم ما سمان
كانوا يحلحلوا الغرمان
يساهروا يتفقدوا الصرمان
اتذكر يا شبابي زمان
في السودان فتيح معروف
ولسه بعنجة خوره سروف
ود نوباوي زول معروف
باقي وديك مشارع
ذكر يا شبابي زمان
كانوا جبال مكان وتقال
نزلوا اتربعوا الأركان
خلوا البقعة كل مكان
آهلة ورازة بالسكان
ذكر يا شبابي زمان
ليه ياكعبة العربان
غاضبة وفين عريسك بان
قبال نسأل الركبان
حبك من حسودك با نذكر يا شبابي زمان
في جوفي كاويني حب ام عفاف
أم در من قبل تكويني كمان
وقال عتيق:
من النيل بالجهة الغربية
أنظر معقل الوطنية أم درمان
أﻧﺎ ﺍﻣﺪﺭﻣﺎﻥ أﻧﺎ ﺍلأﻣﺔ
ﻭﺻﻮﺕ ﺍلأﻣﺔ ﻭإﺣﺴﺎﺳﻪ
أﻧﺎ ﺍﻟﺘﺄﺳﻴﺲ ﺑﻲ ﺗﻢ
ﻭأﻧﺎ ﺍﻟﻠﻤﻴﺖ ﺷﺘﺎﺕ ﻧﺎﺳﺎ
ﻣﺰﺟﺖ ﺷﻤﺎﻻ ﺑﺠﻨﻮﺑﺎ
ﻭﺳﻜﺒﺖ ﺷﺮﻭﻗﺎ ﻓﻲ ﻏﺮﻭﺑﻪ
ﻭﺯرﻋﺖ ﺍﻟﻄﻴﺒﺔ ﻓﻲ ﺩﺭﻭﺑﺎ
ﻭﻃﺎﺑﺖ ﻋﺰﺓ للأﻭﻃﺎﻥ

ولكن اجمل ماقيل عن امدرمان من شعر عالق فى ذهن كل اهل امدرمان
من فتيح للخور للمغالق
من علايل أبروف للمزالق
قدله يا مولاي خافي حالق
بالطريق الشاقه الترام
خليل فرح، “ما هو عارف قَدَمُه المُفارِق”
البقعه بلا ريب هي التي كانت حاضنة وبوتقة إنصهار القومية السودانية بكل مكوناتها التعددية الأصيلة . إن أم درمان بلا جدال هي العاصمة الوطنية والسياسية والثقافية والفنية والأدبية والفكرية ، بكل أحيائها ورقعتها الجغرافية الممتدة، لكل السودانيين. يكفيها فخاراً أنها كانت موطن كل الرجال الإعلام ، من شتى المشارب الفكرية والخلفيات والجهويات في السودان المعاصر وفي مقدمة هؤلاء الأعلام الإمام السيد عبدالرحمن المهدي الذي كان الى جانب السيد علي الميرغني والشريف الهندي والأميرعبدالله عبدالرحمن نقدالله ومعهم رجال عظماء مثل عبدالرحمن علي طه و عبدالرحيم الأمين وعبدالخالق محجوب زعيم الجبهة المعادية للاستعمار هؤلاء يمثلون الجبهة الاستقلالية التي خاضت معركة الاستقلال بنجاح يقوي من شكيمة موقف هذه الجبهة رجال من عيار أحمد خير المحامي ومحمد عامر بشير. آخرون من شتى المشارب مثل الاستاذ صادق عبدالله عبد الماجد (عليه رحمه الله ) زعيم بواكير حركة الاخوان المسلمين في السودان، والأستاذ المرحوم التيجاني الطيب بابكر من مؤسسي حركة اليسار السوداني في منتصف أربعينيات القرن الماضي وهو من مواليد شندي وتوفي قبل أيام قليلة في القاهرة ونقل جثمانه إلى السودان وقبر في أم درمان،
طيب تعال يامسكين انت والمعاك من المرتزقه نعمل ليكم جوله فى احياء امدرمان وصحى زى ماقال الشاعر العبادى قال امدرمان القامت بجهله اوت الغريب وطردت اهله عشان كده زول زيك يا دخيل ممكن يقول امدرمان ماعندها اسياد
تعال نوريك احياء أم درمان
المهندسين (أم درمان)
امبدة (أم درمان)
ود نوباوي
االثورة (أم درمان)
العمدة (أم درمان)
بيت المال (أم درمان)
أبو كدوك (أم درمان)
الجزيرة اسلانج
العباسية (أم درمان)
العرضة (أم درمان)
المسالمة (أم درمان)
الموردة (أم درمان)
الهاشماب (أم درمان)
بانت (أم درمان)
حي الضباط (أم درمان)
خور أبو عنجة
حي تعويضات بيت المال
حي بانت وتنقسم إلى قسمين: بانت غرب، وبانت شرق.
حي الثورة ويضم عدة أحياء أبرزها حي مدينة المهدية، وتعرف أقسام الحي بالحارة (المفرد حارة) وتبدأ من الحارة 1 بالمهدية إلى الحارة 63، أما حارات الثورة فتبدأ من الحارة 1 وتنتهي في الحارة 101..
حي الرياض، ومن أشهر الأسر المقيمة فيه أسرة زيادة ساتي سوار الذهب واسره الاستاذ عبدالصمد عبدالله والد الاخوه الاستاذ الكافى والمهندس عصام والدكتور اسماعيل والاخ ياسر وهناك اسره الاستاذ الاخ استاذ كامل محمد احمد احمدنور والد نزار الكامل ومعتز الكامل
ومن الاسر اسره الديرانى والاخوه عليهم رحمه الله حافظ وفريد ومن الاسر اسره المرحوم الريح القبانى والاخوه عبدالهادى ودكتور محمد الريح عبدالهادى القبانى .
حي الحتانة شمال وجنوب. ومن أشهر سكانه الفنان حسين شندي قبل ان يرحل الى الرياض الثوره ومن الرياض الثوره الى الرياض الخرطوم والفنان مجذوب أونسه، والحاج جادين (الحاج أبونخيلة)
حي الواحة شرق وغرب وهو امتداد لحي الحتانة ومدينة النيل والشاطئ والثورات.
حي المنارة.
حي ود البخيت
حي الجرافة
أم بدة وتضم ثلاث أحياء أصغر وهي أم بدة السبيل
، أم بدة الردمية،
أم بدة الجميعاب؛
وهي أيضاً مقسمة إلى حارات (يصل عددها إلى خمسين حارة في كل حي تقريباً) وكان يوجد فيها أبرز معسكرت النازحين من مناطق الجفاف بدارفور وهو معسكر المويلح.
حي المسالمة وهو من أقدم الأحياء في أم درمان ومعظم سكانه من الأقباط.
حي أبوسعد وينقسم إلى عدة حارات.
المهندسين كانت تابعة في العهد المايوي إلى السلاح الطبي.
حي العودة وسميت بهذا الاسم تيمناً بعودة الرئيس جعفر نميري إلى الحكم مرة أخرى بعد إحباط انقلاب عسكري ضده دبره الرائد هاشم العطا.
الفتيحاب ويقال عنه أنه من أقدم المناطق السكنية في أم درمان، ومعظم سكانه ينتمون إلى عرب منطقة النيل الأبيض.
حي الشقلة
المربعات
دار السلام وكان يصنف من ضمن أحياء السكن العشوائي القديمة.
حي الصالحة ويقع جنوب مدينة أم درمان .
فريق السيد المكى ولا في
بانت ،ولا في ابوروف القال عليها كابلى من عليل ابوروف للمزالق قدله يامولاى حافى حالق بالطريق الشقيه الترام وهل عمرك سمعت بالترام لما كان فى امدرمان من زمن الانجليز ،ولا في عشت فى المسالمه القال عليها الشعراء لى فى المسالمه عزال نافر بغنى عليه ، ولا شفت حى الملازمين وناس امين النقر ولا ناس عبدالمنعم نعومه ولا ناس جمال كمال ولا ناس فريجون ولاناس دكتور اسماعيل ابو ولاناس طه عبدالسيد ولاناس النزير الاحيمر ولابيت كابتن المريخ العم منصور رمضان ولا بيت العم محمد عبدالرحمن كبيده والد الاخوه فيصل كبيده وكمال كبيده وعبدالحميد كبيده وجد الرشيدعلى عبدالله وجد ناس حسام محجوب على ولابتعرف بيت ناس سليمان صالح خضر ناس محمد سليمان وصالح سليمان
ولا عمرك سمعت بناس طه الوكيل وعبدالقادر وطه اولاد ناس الوكيل ولا فى بيتهم سمعت بدكتور الخير الشفيع ما اظن قبل كده سمعت بالناس ديل طيب خليك من ديل هل اشتريت اى شى من دكان عم احمد اليمانى ناس عبدالولى ولا تكون اكلت طعميه من العم حسين دنيا ولا فصلت ليك بنطلون عند العم عوض الله ولا كان اصدقاء ليك الناس الظريفين اولاد باب الله ناس كابتن ميسره باب الله ومنصور باب الله ولا عمرك سمعت عن دكتور عطيه القبانى ولا بتعرف ناس الحله دى ناس اولاد البارودى ناس احمد سلوم ولاناس عباس وعبدالعزيز اولاد عم عبدالله ابوشنب ولا كان عمرك بتعرف الناس وورينى هل بتعرف الفاتح عزالدين ومحمد عزالدين طايوقه ولا ناس شرراه ولاناس معتصم محمد الحسن ولاناس اولاد الصايغ الاخ المرحوم كمال الصائغ ولاناس سليمان صالح خضر الاخوه محمد سليمان صالح خضر والاخ صالح سليمان خضر ولا الجيران ناس العم محمد عبدالرحمن كبيده ناس الاخوان الوزير فيصل محمد عبدالرحمن كبيده والمرحوم عبدالحميد كبيده ووكمال كبيده ولا لعبت فى ميدان سوق السور حيث كانت طاحونه العم عبدالحميد ولا اكلت باسطه الطيب سيد مكى فى اول دكان للعم الطيب سيد مكى فى شارع ابوروف قريب من السوق والمحطه الاوسطى ولا عمرك سمعت بباسطه عم بين ولا ممكن تكون اتعشيت فول فى احمد سعد وكان فول العم احمد سعد هو المنافس لفول موسى نفخو واحمد سعد كان فوال الناس البتعرف امدرمان وكان المحل قريب جدا من بيت الرئيس النميرى حيث كان النميرى يسكن فى منزل اهل زوجته المرحومه بثينه خليل عليها رحمه الله
من القصص الظريفه انو النميرى وهو رئيس البلد كان مرات يكون عندو مزاج يجى ودنوباى وبمفرده ويجى دكان الفوال احمد سعد وطبعا فى نفس الشارع ويجى نميرى ويطلب فول مصلح وياكل بنفسه ومره كان النميرى بياكل فى فول وبمفرده وشاف زول سكران يشيل ويعاين ليه قام نميرى شال صحن الفول بتاعه ومشى كبه صحن الفول بتاعه مع صحن الزول السكران وقال للزول السكران انت يازول من قبيل بتعاين لى مالك قام السكران قال ليه والله بتشيه لى زول النميرى قال بشبهه ليك منو السكرؤان قال ليه بتشبهه لى الرئيس القشيرى قام النميرى قعد يضحك وقال انا ياهو ذاتو الرئيس القشيرى كمل اكللك خلينى اوصلك محل ماشى
لانك سكران ومابتقدر تمشى وفعلا اوصله نميرى الى محل ما ماشى فى ودنوباى كان النميرى رجلا وشخصيه وطنيه
من اجمل القصص حصلت للنميرى مع الاستاذ المرحوم صديق مولى كرار الذى عرفت الاخت قبل دقائق انو قد توفى فى القاهره عليه رحمه الله تعالى وبركاته
النميرى كان ذاهب الى ودنوباى بمفرده جاى راجع من الخرطوم وصديق مولى كرار قاعد فى البرنده التى امام صننيه مكى فى دكان ناس الاخ ازهرى دكان الخياطه وكان فى الصنييه زحمه عربات والنميرى سائق العربه بنفسه ووقف قصاد الاستاذ صديق مولى كرار وسلم النميرى على الاستاذ صديق مولى وقام استاذ صديق قال ليه والله يانميرى من اعطالك بالكوريك يعطينا بالمعلقه وطبعا كانوا شله وواحداه قبل مانيرى يصير الرئيس فقام النميرى وقف وقال ليه تعال ارح معاى ودنوباى ياصديق اتغدا معاى استاذ صديق قال لى نميرى والله ما امشى معاك انت جنب بيتنا وكنت ساكن فيه ليل ونهار هسه خلاص نسيت الناس قام نميرى قال ياصديق طيب انا نازل وماشى اتغدا معاك واسلم على الحاجه وواقف نميرى سيارته ودخل مع استاذ صديق مولى كرار بيتهم ومكث فيه حتى العصر وتناول وجبه الغذاء مع الاستاذ صديق مولى كرار ومن ثم غادر وقال لصديق مولى كرار تتطلب اى شى ياصديق استاذ صديق قال ليه والله بس لما تجى بى هنا تعال وسلم علينا واتذكر الايام الحلوه واتذكر الناس
ولا عمرك سمعت بفول موسى نفخو فول العم موسى نفخو كان منافس لفول احمد سعد وطبعا المسافه بينهم لاتتعدا نصف كليو فى نفس المنطقه ودنوباى ولكن كان منافس خطير فول موسى نفخو ممكن تمشى اى وقت وتجد الفول المصلح والمدنكل والعيش البلدى وكل ما تشتتهى النفس اجمل مافى الموضوع انو كل منهم موسى نفخو واحمد سعد كل منهم له ناس وقروبات وشلليه يتلقوا تقريبا يوميا عشان يتالوا وجبه العشاء مع بعض وهذه هى امدرمان الجمليه فى كل شى
ولا عمرك ممكن تكون سمعت بفول الجان فول الجان عليه رحمه الله طبعا الجان ده زول رائع وظريف وبعمل فى الفول عمايل يعنى ممكن يخلط ليك اى شى عندو فى الفول بيض وطعميه فول وطرشى وتوم وفول وجبنه وبيكون راصى كم صحن مع بعض وعارف كل صحن سيدو عايز شنو بالضبط وفى الحساب برضو زول خرافى بيكون عارف كل زول شال صحن فول حسابه كم وكان الجان من المشاهير فى امدرمان بخفافه الدم واطلاق النكات وزول فى كل وقت تجده هاش وباش فى وجهه كل زول كان محل الجان فى ودنوباى فى الميدان
جوار جامع الانصار
ولا ممكن تكون عمرك اكلت فول وطرشى من حشمت النقادى
جوار بيت اسماعيل الطهار طبعا كمان فول حشمت ده ليه طعم تانى والله اول شى حشمت عندو كل شى فى طشاته الطعميه البيض المسلوق الطرشى طبعا تخصص لانو الطرشى تخصص النقاده فى السودان وغايتو الما اكل فول من حشمت نص عمره ضاع والله
حشمت كان المحل طبعا نا زول بياكل فى المحل بتشيل الفول وتتخارج وكل المحل فيه اضاءه كده خافته مابين لمبات حمراء وبيضاء وظهريه والله ياحليل امدرمان وناس امدرمان
ولا ممكن تكون بتعرف شجره الدومه جنب بيت ناس شيخ الصادق عبدالله عبدالماجد شجره الدومه معلم من معالم امدرمان حيث كانت شجره تالدومه فى نصف الشارع وبجوار منزل ال المرحوم الشيخ صدق عبدالله عبدالماجد حيث كان تقيم هذة الاسره الكبيره واتذكر منهم ابناء الرحوم العم صابر عبدالله عبدالماجد الاخوه سمير وامير ومنير ونصير والاخوه ياسر خوجلى والاخوه فخرى موسى والمرحوم امير موسى وفيصل موسى
ولا عمرك مشيت لبخ ابوروف وشفت زريبه الفحم وشفت اولاد ابوروف الزمن داك بلعبوا كره قدم كل زول احرف من التانى ناس عبدالمنعم خشبه وناس صلاح ابوروف وناس اولاد الرفاعى الاخ الظريف عبدالحليم الرفاعى وناس صلاح بشرى ولابتعرف حوش ناس الحكومه ولا بتعرف بيت ناس وسامه انس ولا جيت ماشى بجنب بيت ناس عادل السمانى ولا كنت يوم ساكن فى حله ناس خالد جادين ولا اكلت من حلاوة الخال محمداحمد قرشى ولا عمرك ممكن تشوف الزول الراقى النظيف اخلاق ولبس الرائع فتحى ابراهيم عيسى وهل بتعرف ولا عمرك سمعت بسوق الشجره وناس النصرى وناس محمدعثمان محجوب وناس عمك محمد عبده وناس المطبعجى ناس الاخ طه على المطبعجى واحمد المطبعجى ودكتور طارق على المطبعجى المقيم فى راس الخيمه الامارات منذ عشرات السنوات ومن اشهر الاطباء فى راس الخيمه وناس صلاح نمر الشيخ ولا ناس المهندس هاشم نمر الشيخ وناس بيت المال هل عمرك ممكن تكون سمعت بناس بيت المال وناس سوق ام سواقه وناس الاخوه عزام الدعيته ولا الاخ معاويه الدعيته ولا الاخ عبدالله الدعيته وهل عمرك اشتريت قماش جلابيه من ناس عمك الامين الصافى والتحيه من هنا توصل الى الاخ عمر الامين الصافى المقيم فى لندن
ناس بيت المال ولا فى عمرك شفت بيوت ناس المادح فى الملازمين ولا جيت مارى العصير بجوار حديقه مدرسه الاهليه العامه جنب بيت ازهرى
كانت حديقه بيت ازهرى حديقه ملتقى الاصدقاء فى امدرمان وكان هناك مطعم ظريف متخصص فى الفول المدنكل وكنا كثيرا ما نذهب ونعلب فى الحديقه فى العصر بحكم ان الحديقه كاانت قريبه من منزلنا تبعد فقط امتار وكنا نقطف منها بعض الزهور خاصه زهره الياسمين طيبه الرائحه
ياربى تكون عمرك شربت ليمون من كشك عمنا حسن قرشى جوار المجلس البلدى امدرمان كشك العم حسن ده كان من معالم امدرمان الظريفه حيث كان العم حسن قرشى يبدع فى عمل الليمون المعصور باليد واتحدى اى زول يكون شرب من العم حسن قرشى ويقول فقط شرب كبايه فقط لازم لا بد على الاقل كباتين اوثلاث ومرات اربعه اتذكر كان كوب الليمون فى عام 1975 فقط خمسه قروش عليك رحمه الله وبركاته العم حسن قرشى مازال طعم ليمونك المعصور بحنان وحب اهل امدرمان مذاقه فى الحلق وفى الجوف ينزل بردا وسلاما
ولا عمرك وقفت فى بازار الاحفاد جنب المجلس البلدى امدرمان واكلت من الدكان الكان فى كورننر مدرسه الاحفاد الثانويه بنات اكلت باسطه كعب الغزال الطيبه المذاق وكنا مرات نعمل شيرنق ونشتترى صننيه كامله بتاعت كعب الغزال بحوالى جنيه اتخيلوا كيف كانت الدنيا فى الزمن الجميل
وما اظن تكون اكلت ايس كريم فى عماره محمد حسين فى البدروم تحت واتونست مع المرحوم مجدى محمد حسين وصديقه الزول القيافه الاخ المرحوم طارق بابكر وقد توفى الاخوه طارق بابكر ومجدى محمد حسين فى حادث حركه موسف فى شارع الاربعين عليهم رحمه الله
طبعا ايس كريم البدروم فى عماره محمد حسين ده كمان قصه تانيه كنا بعد المدرسه يوميا بعد اكل باسطه كعب الغزال وشراب ليمون العم حسن قرشى نذهب الى عماره محمد حسين وننزل فى البدروم وهناك اجمل ايس كريم بتاع فانييلا وشكولاته ومليك شيك والله كنا لانغيب عن المدرسه يوم حتى لا نفسد البرنامج اليومى بتاع شراب الليمون واكل باسطه كعب الغزال واكل ايس كريم عماره محمد حسين كانت لنا ايام مازالت اطراها ياليتها عدنا وعادت الايام
واكيد وانت صغير ولا كبير اتصورت فى استوديو الوداى وصورك الهادى ولا عم عبدالله كان استوديو الوداى مشهور فى امدرمان فى بدايه شارع ابوروف من ناحيه سوق امدرمان وكان الاستوديو عباره عن زفه الوان وتجد صور الكثير من الاطفال الحلوين مكبره وصور بعض مشاهير الغناء وكره القدم وكمان تجد صور بعض العرايس وده كلوا نوع من الدعايه للاستوديو
وبسالك ياحاقد وكل الحاقدين هل زول منكم شرب شاى لبن مقنن عن عم احمد ابوشنب وكان العم احمد متخصص فى الشاى المقنن والشاى الاحمر مع نكهه النعنناع الذى يعدل الكيف والمزاج
اتذكر كنت يوميا بعد المدرسه اذهب للوالد عليه رحمه الله وبعد تناول وجبه الغذا اذهب لقهوه العم احمد ابوشنب واشترى الشاى للوالد ومن معه من الاعمام الذين يعملون معه فى المحل واشترى لنفسى كبايه شاى لبن مقنن واشترى بسبوسه من حلوانى خيرات وكان برنامج ثابت تقريبا كل يوم نفس الشاى والبسبوسه كانت ايام سعيده ربى مناى تعيده كانت الدنيا بخير وطيبه
ولا زول منكم اتحداه انو يكون اكل زبادى عمنا يعقوب الكان فى بيت شيخ عجب فى حى الشهداء العم يعقوب كان من اصول يقال انها اصول يهوديه ولكن هناك مقوله انه من اقباط مصر العم يعقوب كان رجل ضخم الجثه يلبس الميرله ورجل ابداع فى النظافه وكان يصنع الزبادى بطريقه تخليك تشتتهى الزبادى وكان لديه عدد من الثلاجات لحفظ الزبادى وللمبالغه كان على الاقل يببع فى اليوم 500 كاس من الزبادى وكان دثيق فى عمله نظيف الملبس والمحل فى غايه النظام وكان رجل مثقف جدا يناقش الجيران فى السياسيه وفى كره القدم وفى شتى ضروب الحياه وكان دقيق فى المواعيد فى فتح واغلاق المحل يوميا
الله اعلم وهل فى زول منكم اشترى دواء ولا صرف روشته من صيدليه وددراو ابدا من دكتور علم الدين الشبلى ولا لقيت فى الصيدليه اظرف شباب امدرمان الاخوه دكتور مكى اسماعيل ولا فضلى اسماعيل ولا الرائع الدكتور محمد اسماعيل قيلى من كتب اجمل قصيد الحلمنتيش زى
قال تسمح؟
و كيف يا الحلوة ما بسمح؟
أصابعي العشرة تكتب ليك
و قلبي أبقيه إستيكة
عشان بس للغلط يمسح
يذوب بين أصبعين حلوين
يتوه وسط السطور يسرح
و لمن تنتهي الكلمات
يخش الشنطة في منديل
و نمشي القهوة نتفسح
-------
و صار عاشق يطيع سحرك
يجيب الفانتا شان أمرك
تختي الشنطة في حكرك
وقلبي الدايش وسط منديلل
يسكلب ساي يقول يا ليل
و جوة الشنطة يتمرجح
و ترجعي تاني يا الحلوة
و أكون راجيك هناك مصلوب
أشوف الناس طشاش في طشاش
و أقرأ سطوري بالمقلوب
-------
تقعدي
و أعاين ليك.. تغمضي إنتي
تعايني لي.. أغمض أنا
و أعاين ليك.. تغمضي إنتي
تعايني لي.. أغمض أنا
نعيد الكرة من أول
و أعاين ليك.. تغمضي إنتي
تعايني لي.. أغمض أنا
و أعاين ليك.. تفري البسمة
تضوي سنة
-------
أحك راسي
و أبلع ريق
و أتنحنح
و أجر الكرسي لي قدام
و أرجعو تاااني و أتزحزح
و أقول للسمحة لو تسمح
ممكن كلمة في زاوية؟
تقول بسمح
-------
تقوم السمحة تتلمم
و تتبسم
و أنا أتراجف. و أتخمخم
و أقوم أفرح
و أدق الجيك
و أطق روري
و أرمي الكرسي.. أوبس سوري
و أقع في الجنبي.. أوبس سوري
و أدقش الماشي.. أوبس سوري
و جنب السلم.. أوبس سوري
-------
هناك في الزاوية نتقعد
و أستغفر.. و أتشهد
و أشيل أنفاسي.. و أتنهد
و أقول ليكي
والله
و غايتو الزول
و الحاصل
و في الواقع
و ما عارف
هه ما قادر أقول ليكي
-------
تقول لي
هي يا دا
و فيها شنو
و معانا منو
و يخسي عليك
و قول يعني
هه ما تخجل. و تتعقد
-------
أنا أتعقد؟؟؟
أجر الكرسي
أزيد الخمسة تدليكة
و أقول ليها
وبي صوتا ندي و رايع
يفيض رقة و موسيقى
من فضلك
و أترجاك
ترجعي لي الإستيكة
عليك رحمه الله وبركاته اناء الليل واطراف النهار اخى الغالى دكتور وداسماعيل كان رجل خفيف الظل مضحك ابداع فى كل شى فى الرزانه وفى الهدواه وفى كل شى
ولا لقيت فى الصيدليه فى الاماسى الحلوه الزول الظريف دكتور احمد بابكر العشا الذى كان من اوئل من نصب فى نادى الصيدله فى الخرطوم كان الرئيس للنادى واتذكر قصه طريفه كان دكتور احمدبابكر يعمل فى شركه ادويه فى الخرطوم واعطوه سياره بيجو 304 جديده كرت وفى المساء جاء الينا فى صيدليه وددروا وقال للاخ امين غسال العربات عليك الله يا امين زبط العربيه دى المهم الاخ امين غسال العربات ابدع فى غسيل العربيه الجديده وخلص وجاب المفتاح للدكتور الاخ احمد بابكر وقال والله يادكتور العربيه بقت زى صحن الطلس الجديد المهم كنا ماشين مع الدكتور احمد بابكر قاعه الصداقه لحضور شاهد ما شافش حاجه لعادل امام عندما عرضت فى الخرطوم وفجاه فى الكبرى فرمل مجروس ودخل دكتور احمد بابكر من الخلف فى المجروس وتهشمتت مقدمه السياره وتانى يوم الدكتور احمد بابكر قال لى الاخ امين والله عنيك حاره عملت حادث واتكسرت السياره وحالتك بعين واحداه لان الاخ امين مان لديه مشكله فى العين الاخرى قال ليه يعنى لو بالعننين الاثنين مان متنا ولا شنو وضحك الجميع
ولا شفت الاخ الجميل عبدالعزيز الصاوى ولا لقيت فى الاماسى الحلوه الاخ الدكتور عزالدين
ولا فى يوم صليت فى جامع ناس الصديق ارو ولا جامع الضرير ولا جامع النحاس ولا جامع السوق الكبير ولا جامع الانصار فى ودنوباوى ولا جامع ابوروف جوار بيت ناس العم محمد عبده ولا جامع ابوروف جنب زريبه الفحم جوار ناس دكتور صلاح بشرى ولا صليت فى جامع الانصار جنب بيت الخليفه ولا جامع الملك فيصل فى العرضه ولا جامع النو فى الحاره الثامنه ولا جامع انصا السنه بتاع الشيخ ابوزيد حمزه فى الحاره الاولى
الشيخ ابوزيد حمزه رحمه الله عليه كان اظرف انسان فى السودان كان رجل دعوه من طراز لايمكن ان يجود السودان بمثله
كان اى زول ماقدر يحصل صلاه الجمعه فى الثورات يذهب الى مسجد انصار السنه فى الحاره الاولى ويجد الشيخ ابوزيد مازال فى الخطبه
كنت كثيرا ما اذهب الى مسجد الشيخ ابوزيد فى الحاره الاولى واكون قد ذهبت لزياره منزل الاخ الغالى هيثم فواد قدوره وطبعا الاخ هيثم زول ظريف جدا وانصار سنه وعندو نكته ظريفه فى واحد قال ياهيثم فواد قدوره انت كنت مسيحى واسلمت ولا شنو لانو الاسم غريب شويه والاخ هيثم زول مضحك جدا وكان جار الشيخ ابوزيد حمزه وعندو قصص كثيره مع الشيخ ابوزيد حمزه من القصص الظريفه
حكى لى الاخ هيثم فواد انو ايام ازمه البنزين جماعه انصار السنه كان عندهم سياره بوكس وكان هيثم بمشى يوم صرف البنزين يكب البنزين
والاخ هيثم رجع زى المغرب وكان واقف مع الشيخ ابوزيد حمزه وكانوا بشطفوا فى البنزين فى جركانه من البوكس قام جاء سكران ماشى وسكران شديد من ناس الحله وشاف شيخ ابوزيد ومعاه هيثم وهيثم بشفط فى البنزين قام قال للشيخ ابوزيد وان السياره سالت باى ذنب شطفت
فى اللحظه ديك شيخ ابوزيد وهيثم ماتوا من الضحك وشيخ ابوزيد قال ليه روح ربنا يهديك يازول وكان رجل فى غايه العطف والموده واللطف
وهل فى زول منكم يا مرتزقه اكل سندونش طعميه مع سلطه اسود ولا سلطه روب ما اظن ممكن يكون حصل ليكم الشرف ده انو اكلتوا من الخاله بت الفضل التى كانت تجلس قدام طابونه العم حسن عبدالباقى فى شارع عبدالله خليل كنت اتذكر الخاله بنت الفضل امراه كبيره فى السن مكافحه تاكل لقمه حلال من عرق الجبين وكانت بتعمل سندونشات نوعين فقط طعميه مع سلطه روب ولا طعميه من سلطه اسود ولكن شى عجيب والعيش البلدى السخن من مخبز العم حسن عبدالباقى
ولا يوم اتعيشت من الخاله بت اللول التى كانت قريبه من بيت ناس الاخ جمال حلمى وعزالدين حلمى وكانت بتعمل سندونشات طعميه وفول شى خرافى الله
وهل يابشر انتوا فى زول منكم اشترى رغيف بلدى من طابونه حسن عبدالباقى وبعد كده العم حسن عبدالباقى عمل العيش الكانبتعمل فى قوالب النيكل وكان ابداع عليه رحمه الله العم حسن عبدالباقى التقيته اخر مره فى الحج عام 1994 عليه رحمه الله
ولا فى زول من اهلكم شاف طاحونه العم جعفر
فى عبدالله خليل ابوناس صهيب وكباشى وامين جعفر عازف البيز جيتار المعروف من امهر العازفين على البيز جيتار وطوالى بطلع حفلات مع كما ترباس
من القصص الظريفه جدا تحكى عن العم جعفر انو مره الكهرباء قطعت عن الطاحونه فقام العم جعفر بمحاوله ان يستدين خمسه جنيهات من الاخ صاحب البقاله ابن عمى طه محمداحمد احمدنور واعتذر له الاخ طه محمداحمد انو لايملك المبلغ فذهب العم جعفر الى العم حسن عبدالباقى لكى يستدين منه المبلغ فاعتذر له ايضا العم حسن عبدالباقى والعم جعفر راسو ضارب وراجع وجد الزول الظريف عبدالله رمز العيون طالع من الزقاق بتاع بيت ناس مولى السيد كرار وشاف العم جعفر قال جاى من وين ياجعفر اخوى قام العم جعفر قال ليه القصه بتاعت الكهرباء وطه وحسن قام عبدالله رمز العيون فتح الشنطه بتاعته كان عندو شنطه بدررعه فى ايدو وطلع عشره جنيه وقال للعم جعفر امشى رجع الكهرباء بخمسه جنيه وخلى الخمسه جنيه الثانيه مصاريف والله كمان ماترجع العشره جنيه فقام العم جعفر قال قولته المشهوره والله يا عبدالله رمز العيون انت فيك الخير والبركه
طيب من منكم شال رغيق سخن من طابونه عمنا البخيت واظرف زول فى الطابونه عم بليو وطابونه العم البخيت عليه رحمه الله كانت فى جوار بيت العم امين الطاهر الشبلى وطبعا كان من اعز الاصدقاء فى امريكا الاخوه المرحوم زكريا البخيت والاخ محمد البخيت
هل فى زول شرب شعير ولا اكل ايسكريم من برعى المصرى طبعا محل برعى المصرى كان فى البدايه فى شارع ابوروف قصاد محل حلوانى خيرات فى نفس الصف الفيهو محل الفاكهانى ناس العم جادو وبعد ذلك انتقل المحل الى شارع ابورف قصاد بيت ناس العم احمد العبادى فى الكونرر بتاع الشارع البوديك بيت ناس الاخ اللواء احمد مكاوي
كان برعى المصرى ملك شراب الشعير بلا منافس وايضا ملك الايس كريم وكان شراب الشعير بنكهه روح الموز شى ابداع والله
ولاعمرك اتعرفت على ابن ابوروف الشاعر محمد المكى ابراهيم من كتب اكتوبر الاخضر باسمك الظافر ينمو على الغابه والصحراء وهل سمعت بالشاعر احمد محمد صالح من قال انا الاغرونى بالجنه جعلت غراهم سنه لما نالوا مرماهم جفونى وقالوا حبى جنون وهل سمعت بكل شعراء امدرمان وديل فقط شعراء الاغانى الحديثه وديل كتبوا اجمل الاغانى التى كم اطربت الناس فى السودان وحتى فى الدول الجيت منها كل الناس الحاقده على امدرمان وما اكثرهم

تحياتي مصطفي

أنجاز جدير بالقراءة والف مبروك هذا الجهد وله قيمة عظيمة في المكتبة السودانية
أتوقع منك نسخة بي دي أف أخي

زهير ابو الزهراء
الصديق الدفعه انت المعلم وانت الخبره والاحتراف وانا مجرد هاوى فقط
مبروك ليك الكتاب ربنا يجعله ليك فاتحه خير حتى توصل لشهره الرائع الطيب 2صالح يارب

هل ايها الحاقدون على امدرمان واهل امدرمان هل بتعرفوا الشعراء ديل

أحمد محمد صالح (السودان)
أسامة عثمان عوض الكريم
إسحاق محمد الخليفة شريف
التجاني حاج موسى
الحبر يوسف نور الدائم
السر قدور
الصادق الرضي
الطيب العباسي
الطيب عبد الله
الناصر قريب الله
النور عثمان أبكر
الهادي آدم
بشرى الفاضل
توفيق صالح جبريل
جعفر محمد عثمان خليل
حاج الماحي
حسن إبراهيم الأفندي
حسين عثمان منصور
حيدر إبراهيم علي
خالد أحمد المصطفى حسين
سيد أحمد الحردلو
سيف الدين الدسوقي
عبد الرحمن الريح
عبد الرحيم أبو ذكرى
عبد القادر الكتيابي
عبد الله إبراهيم موسى
عبد الله الطيب
عبد المنعم رحمة
عبد المنعم عبد الحي
عبد النبي عبد القادر مرسال
عثمان بشرى
عثمان محمد هاشم
علي أحمد الرفاعي
علي الكوباني
علي عبد القيوم
مبارك المغربي
مبارك بشير
مجدي النور
محجوب شريف
محمد السني دفع الله
محمد المكي إبراهيم
محمد المهدي المجذوب
محمد سعيد العباسي
محمد عبد الحي
محمد عبد القادر كرف
محمد عثمان عبد الرحيم
محمد عثمان كجراي
محمد علي أبو قطاطي
محمد محمد علي
محمد ميرغني
محمد ود الرضي
محمود ميسرة السراج
محي الدين فارس
مختار دفع الله
مصطفى سند
معاوية نور
معتصم فضل جلابي
هاشم صديق
يوسف عيدابي
يوسف مصطفى التني
اه سوال تانى ليك يادخيل هل سمعت بملكه جمال امدرمان فى الزمن الجميل
عزيزه ادم منديل ملكة جمال السودان
التي غنى لها (عبيد عبدالرحمن) و (سرور) اغنية (آه من جور زماني).. (أفكر فيه وأتامل).. (حليل زمن الصبا).. ( ذكراك سمير روحي).. (غزال البر).أما أغانيها من سيد عبدالعزيز، فهي: (يا مداعب الغصن الرطيب).. (أنَّة المجروح).. وأغنية (يا بنت النيل) وهي بطلة اغنية “ظبية المسالمة” و “غزال المسالمة” واغاني أخريات من اغاني الحقيبة
طيب هل قرات مجله الصبيان وعمك تنقو والرسام الفنان شرحبيل احمد و لا مريت بسوق المورده واكلت سمك من شعيب ولا من عوضيه وتكون محظوظ يا زول يا ولد دقلو ومن معك من المرتزقه لو كنت من ناس ومواليد امدرمان كان وانت طفل وانت مريض عالجك الدكتور فواد عبده ولا فى زول فيكم امو اتعالجت عند دكتور ابراهيم الحضرى ولا دكتور ابراهيم المفتى ولا عندك فحص دم وفحص ليك الفحيص العم مكى والد علاء الدين مكى ووسامه مكى ولا انت كبير وعيان كان عالجك للكسور الفيك قبل الموت كان عالجك دكتور خواجه فى حى العمده ولادكتورعبدالمنعم الشفيع اخصائى العظام البروف الذى لديهم حيى كامل فى امدرمان اسمه حى الشفياعه وهل فيكم زول كان عندو حاله نفسيه ورقد فى التجانى الماحى فى امدرمان ولا اتعالجتو بالموسيقى مع الفنان عبدالعظيم حركه اولوفيكم زول اتكسراى كسر فى العظام رجعت الكسر الخاله بت بتى قدرت ترجع ليكم الكسر بالجبيره
وتعال افسحك فى النيل هل شربت مويه النيل ولاشميت الهواء تحت كبرى شمبات ولا فى نهار رمضان الحار قيلت تحت الكبرى بتاع شمبات الذى غرق فيه خيره شباب امدرمان زى السر دؤاد عليه رحمه الله ولا اكلت ليمون وجوافه من مزراع السيد عبدالرحمن التحت الكبرى بتاع شمبات ، ولا رميت سناره من فوق كبرى شمبات ، وانا بحلف انو ما حصل ليكم ولا هل حضرت حفله فى صاله الريفيرا ولا عمرك سمعت بى اشهر القابلات ، الخاله الشول خيرى ،ولا حاجه وزنوا الدايه وديل كلهم اشهر القابلات فى امدرمان واغلب علماء ومشاهير امدرمان اتولدو على يد هولاء الفاضلات
..ياحليل امدرمان وناس امدرمان ..... ولا فى يوم من عمرك مشيت عصرية في دار الرياضه امدرمان وشفت الموت الاحمر بين قريق ابوروف وبيت المال وناس كلبو وعلى صمغه وشرف وهل فى دار الرياضه اكلت تسالى عمك ابوشنب الشايقى طبعا لا و لا شفت عمك كاك ولا شفت ولا شريت شاى فى دار الرياضه ولا فى الليل مشيت حفله فى العباسيه وغنى فيها العندليب الاسمر زيدان ابراهيم وسط الزهور متصوروجهه الصبوح ومنور
وهل سمعت زيدان ابراهيم بغنى للكابلى فيك يامروى شفت كل جميل
وهل فى يوم اى خميس قعدت فى حديقه المورده ولا الجندول وكان معاك الاصحاب ومعاكم زول عامل فنان وبعزف فى العود ويغني اغانى الزمن الجميل
ولا زول بقول فى نكات وهل شفت اولاد امدرمان فى الهلال والمريخ ناس كمال عبدالوهاب دكتور الكره السودانيه وناس عزالدين الدحيش الحريف وهل كنت بتلعب فى رابطه المك عبيد ولا فريق نجوم افريقيا فى الحاره الثامنه زمن عماد ابوادريس وجمال عباس وخالد حمورى وخالد قاقرين
هل شفت يوم دكتور هاشم عجيب الحفيان ابن ودنوباى والمقيم الان فى ايرلندا وهو طيبب خريج جامعه الخرطوم وكان ان احرز اجمل هدف فى مرمى الهلال وفاز فريق ودنوباى على الهلال بهدف دون مقابل والقصه الطريفه انو الاخ دكتور هاشم عجيب قبل مايلعب فى فريق ودنوباى كان قد ذهب مع احد الادراين من نادى الهلال عشان يتمرن ويلعب فى فريق الهلال ولكن لم يجد الترحيب والمهم سجل فى فريق ودنوباى وفى اول مباراه ضد الهلال احرز الهدف الوحيد فى مرمى الهلال وكان نجم المباراه بلا منازع وسال عنه مدرب الهلال وقال لبعض الادراين الزول ده جبتوا من ووين الله ابداع وعرف انو الدكتور هاشم عجيب كان عايز يسجل فى الهلال ولكن لم يجد الترحيب وفات على الهلال لاعب لقطه زى الدكتور هاشم عجيب
ولا لقيت الرائع ابراهيم عوض وغنى ليك تذكار عزيز ياقلبى شايلوا جرح اليم
وهل عمرك شفت الانيق الرائع ابراهيم عوض بكامل اناقته وهندامه زمان وكيفيه تسريح الشعر حتى كانت هناك شقه شعر وتسريحه اسمها تسريحه ابراهيم عوض ذلك الانسان الفنان الكريم وقد حكى لى الفنان ابراهيم عوض بانه اول من حمل المايك فى ايده
من لبس الساعه بيده اليمنى قبل انصار السنه وكان السبب انه كان لديه ساعه ماركه عالميه وكانت الكتينه بتاعت الساعه من نيكل وسبب له النكيل حساسيه فى اليد اليسرى وقام احد اصدقائه فى سوق امدرمان وقام بصناعه كتينه من جلد ولبس بعد ذلك الفنان الرائع ابراهيم عوض الساعه بيده اليمنى حتى فارق الحياه عليه رحمه الله وبركاته
ولا سمعت اشعار الصديق سيف الدين الدسوقى لما قال سألت الشاعر الكبير الصديق العزيز سيف الدين الدسوقي الذى ساله احد الاصدقاء من حى العرب ان كان لا يزال يسكن في منزل أسرتهم بحي العرب فقال له انه رحل حين ضاق بهم المنزل والحال إلى منزل شيده قرب جبال المرخيات وارتجل هذع الكلمات الرائعه
ولكني رحلت معي صغاري
إلى غرب المدينة في الحدود
عواء الذئب نسمعه نهاراً
وصوت الجن ليلاً بالنشيد
وأنفاس الجبال لها بخار
جهنم في الممات وفي الوجود
حياة ليس للشعراء فيها
هناءات من العيش الرغيد
أنا أم درمان تسكن في عروقي
فكيف أعيش في قفر وبيد
وغيري في الضفاف لهم قصور
تلوح مع الحدائق من بعيد
ويكون عمرك كلوا ضاع انت ومن معك من المرتزقه لانو لم تسمع عن محمداحمد عوض لما يغنى ويقول ابوي يا يابا ماتقول ليه فى الحاره السادسه الثوره كان لديه كشك او مطعم صغير فيه الذ واروع كوراع
كدى سوال هل إنتا بتعرف سوق الشجرة ...حي المظاهر ...والكبجاب ...وحي السيد المكي وفريق ريد وفريق المسالمه وهل كنت بتسمع الفريجونى وهو يغنى ويقول امسيتو كيف ياملوك امدر !؟!
برضو هل عمرك تسمع بى حى العرضه وامبده والفتيحاب وابوسعد والمهندسين وحى الروضه وحى المهندسين والسلاح الطبى وسلاح الموسيقى وحى السوق وحى العرب
وهل درست الابتدائى فى بيت المال ولابيت الامانه ولا الهجره ولا ابوروف ولا مدرسه المورده وهل كان الاستاذه الاجلاء استاذ شعيب فى بيت المانه الابتدائيه ولا سيداحمد الغول ولا الفاضل ولا صديق مولى كرار ولا درست الثانوى العام فى بيت الامانه ولا النهضه ولا درست الثانوى العالى فى الموتمر ولا محمد حسين ولا الاهليه ولا حتى الاحفاد ولا بيت الامانه و استاذتك استاذ شداد ولا كرف ولانورين ولا عوض حسن احمد مدرس اللغة الانجليزيه ومن كتب الاتذكرين صغيرتى ولا درسك استاذ حمزه ابوحنك ولا استاذ حسين الامام ولا استاذ معروف
وهل لعبت فى الدوره المدرسيه مع احرف ناس ممكن يكونوا لعبوا فى المدراس فى ام درمان
فطحاله المدراس الكان فيها كل لاعبى الهلال والمريخ والمورده كان فى بيت الامانه ابرهومه ابراهيم عبدالعظيم حماده وعصام عشرى وحمدى العرضى وكموله وحمورى وسامى عزالدين ومصطفى سيماوى وابوبكر سيماوى وعبده الشيخ ومعاويه كرتيه والعدد الهائل من لاعيبه كره القدم عطيه حسن ومجدى سنتر ونحله والحريف عبدالمنعم الصياد الرائع شرحبيل
طيب سوال ليكم ياال دقلو وكل المرتزقه هل فيكم من شاف وشاهد مباراه بين الهلال والمريخ فى الزمن السمح زمن كاسات الدهب قبل ماتسرقوا الدهب
ومنو فيكم شاف ناس الهلال من زمن سبت دودو حارس الهلال ومنو منك شاف صديق منزول وجكسا والدحيش وعلى قاقرين وزغبير وقاسم الحاج وفوزى المرضى وكسلا والريشه وعلى عبدالقادر وابوالعز وقله
ومن فيكم شاف لاعبيه المريخ
عبدالعزيز عبدالله حارس المرمى والسر كاوندا وسليمان عبدالقادر وعزالدين خورشيد وفيصل الكورى والفاضل سانتو وسامى عزالدين والدكتور كمال عبدالوهاب وجقدول ومعتصم حمورى وعبده الشيخ وقرعم ومنصور رمضان وفيصل العجب
ومن فيكم شاف لاعبيه المورده ناس الصياد والتوم العاتى وشرحبيل
وسوال تانى يامرتزقه هل بتعرف فى امدرمان اغلب من كانوا على يدهم بدايه ناس فرق الجودو والكارتيه الاخوه عبدالباقى عجب سيدو والاخ حسن كديس والاخوه بطل العالم هاشم بدرالدين وسامى محمدعلى والكثير من ناس مركز الربيع والاخ عماد عباس ولاخ طلب عباس
...يا حليلك يا "دلاقينو" ...ما خشيت معانا...سينما العرضه والفليم الهندى من اجل ابنائى وانت الان دخلتنا بعملتك السوداء دى فليم هندى
ولا شربت معانا "لبن مقنن فى كليه الزراعه شمبات ولا سمعت ابوعركى ومحد الامين وومحمد وردى فى الميدان الشرقى فى جامعه الخرطوم "
يا حليلك يا " مسكين " انت امدرمان والعاصمه بتعرف ليها شنو...!!!؟؟
لم تحضر حفلات عقد الجلاد ولا استمتعت بغناء الرائع الجميل الاستاذ مصطفى سيداحمد ،،... لم تتذوق شاى قهوه يوسف الفكى قصاد سينما امدرمان كان لما يجوا المرتزقه الزيك ديل ووالواحد يصفق معناه انت من خارج امدرمان وجاى طاشى ساكت ومافى زول ولا جرسون بشتغل بيك
طيب هل بتعرف محل جورج مشرقى واشتريت منو زيتون يونانى ولا جبنه مضفره ولا سجاير كنت مستورد ده بعد السماء منك ولا حتى فى الخيال ...
ولو " سالوك يا يادخيل وين مقابر احمد شرفى ...وين اشلاق البوليس ووين كان السجن الحربى فى امدرمان ووين جامع الادراسه " ووين طاحونه الملح بتاعت الاخ نادر ملح ووين بيت الكسره فى محطه مكى الخاله نضيفه واظن ما سمعت بالخاله جارتنا بخيته عليها رحمه الله التى كم اكلنا من يدها الطاهره النظيفه الشريفه كسره حاره فى كوره طلس مع سكر وكدى وريني يادقلو وين جمعيه الصداقه الصننيه السودانيه ووين ميدان الحديد وفى ميدان الحديد تلقى هناك امير عبدالله خليل واسماعيل عابدون وتلقى اسماعيل ابراهيم البطيخه وكمان تلقى دكان طه وتلقى اولاد عوض حنين وتلقى خليل الشريف بتاع برنامج بدون تكليف وتلقى جمال حلمى وعزالدين حلمى وهناك الاخوه الظريفين ناس سيد كبوشيه والمرحوم محمد عوض كبوشيه الاخ الرائع المرحوم عزالدين كبوشيه ولو عربيتك ما اتنجدت بفرش جلد جديد عملوا ليك العم عوالدين كبوشيه ولا الاخ فوزى طيب خلينا من ده كلوا عليك الله عمرك سمعت عن طاحونه كولبس ووين زقاق المدق ووين حى الصقور
...وهل بتعرف شارع السوق من بيت ازهرى شارع السيد عبدالرحمن يبدا من جامع النحاس وناس كزام والاخوه نادر والمرحوم دكتور العاقب كزام وطابونه حسن عبدالباقى وبيت ناس ناس كباشى جعفر وامين جعفر وصهيب وهناك بيت العم عوض عبدالرحمن حنين وناس بيت المرحوم امين الشبلى وزير العدل فى الزمن الجميل وبيت ناس عوض كبوشيه وبيت ناس دكتور علم الدين الشبلى وبيت عبدالله خليل بك وتقطع الشارع فى الناصيه بيت ناس يوسف الكردفانى وعلى شمالك بيت ناس واسامه حسن هيبه و تلقى جنبو بيت ناس سليمان ابوغالب وتلقى الظريف وتلقى همامى الترزى وتلقى ناس احلى حوليه فى بيت وصلاح ابوعالب وجمال ابوغالب والمرحوم عمر ابوغالب والمرحوم سلامه ابوغالب والاخ هاشم ابوغالب حارس مرمي الهلال وتمشى شويه بيت ناس العم الحارث وبيت ناس الاخ خالد
ميرعنى مبروك والعم ميرغنى مبروك رئيس القضاء فى زمن العدل الزمن الجميل وتلقى هناك بيت طارق ابوعكر وقبل بوابه ابوالعلاء بيت ناس العم حسن السيد شيخ الطريقه الاحمديه والتحيه الى الاخوه عبدالروف حسن السيد وهم من الجعافره وكمال حسن السيد وياحليل الحوليه بتاعت الجعافره الطريقه الاحمديه و فى بوابه ابوالعلاء الاخ سلامه ابوغالب والاخ جمال يوسف ابوالعلاء ويا حليل الاخ عاصم زمبه احسن من يعرف صيانه العربات ماركه مرسيدس فى السودان والتحيه للاخوه الدفعه فى بيت الامانه الابتدائيه الاخوه سارى ابوغالب والاخوه التميان حسن وحسين ابوالعلاء
وتدخل فى النهار فى بيت ناس حسن ابوزيد اجمل لمه عذابه نهاريه مع ويطرب اذانك الرائع المرحوم الجابرى عندما يصدح ويغنى
انت يا قلبي المتيم كنت خالي
كنت نايم مارايت سهد الليالي
كنت قايل كل شي في الدنيا خالي
جيت لقيت باب الغرام فاتح دخلت
من شراب الريدة يا مسكين نهلت
وابتدين ياقلبي تعشق وانشغلت
كنت جاهل
العشق ظنيتو ساهل
إلا ياريتك عرفت وما جهلت
المحاسن اغرتك وبقيت عشوق
انت قايل عاصفات الحب شفوقه
بالمحبة وانت ساير في طريقه
لما باكر تصحي تلاقي الحقيقه
والنهاية تكون سعيده
لما جاءت عكس ما انك تريدة
فالمقادير حيث ما شاءت تسوقه
وتتطلع من ناس حسن ابوزيد تدخل بيت ناس البدرى حسين وتسمع القران الكريم تلاوه لايف بصوت المقرى الجميل العم حسين عبدالعزيز
عندما يضع يديه فى اذنيه ويتلو سوره تبارك الذى بيده الملك ما اجمل صوتك ايها العم الطيب الجميل الشيخ حسين عبدالعزيز

وبهناك اظن يازول ما بتعرف زول فى الحى ده ناس الاخ احمد الخطيب والاخ محمود الخطيب وناس الزول الظريف الهندى نيلين وناس الاخ احمد عابدون وناس العم امين النخليى وناس عمنا احمد عبيد ناس المرحوم ابوحفص وابوعبيده وتلقى فى الناصيه وانت داخل على البقاله الافريقيه تلقى رائحه اجمل بخور واجمل عطور عند دكان العم الراقى العم المرحوم خالد من اكبر موظفى بنك باركليز فى الخرطوم انسان مجامل تجده فى اى فرح او ترح والله
وتلف يمين تلقى دكان الترزى الظريف الشيخ احمد الشيخ وما اظن فى عمرك ما تكون فصلت بدل ولا بناطلين عند الترزى الانيق الشيخ احمد الشيخ وقدام الدكان فى الامسيات تجد نجوم المجتمع لاعب الهلال عزالدين الدحيش والشاعر سيف الدسوقى والفنان الرائع عوض الكريم عبدالله وكل ظرفاء امدرمان ....
وكدى قول لى يا حاقد يادخيل انت ولا الزيك فى زول منكم مشى صالون الحلاقه بتاع عباس فرحات ولا بدوى فرحات ولا بعرف العم السمانى فرحات ولا فى مره من المرات حلق ليك الاخ عوض
ولا حتى بتعرف شى عن الاماكن دى لانو الاماكن هى هى جنب دكان ناس العم عيسى ابوغالب والعم عجيب الحفيان والعم اسماعيل قيلى ولا العم الخطيب ولا دكان الفواكه بتاع الناس العم جادو طبعا العم جادو كان مع اولادو بييع الفواكه المعلبه والتى كانت منتهيه الصلاحيه مره جاء وواحد شكلوا من ناس على مستمعينا فى الاقاليم مرأعاه فروق الوقت قال للعم جادو عليك ثلاثه علب كمثرى طبعا العلب منتفخه وعم جادو زول طيب وصادق قال للزول والله ياولدى علبه ووحداه امكن توديك فى دهيه سوال تانى هل فيكم لبس ولا خيط قميص فى البرنده بتاعت نقطه البوليس الفى سوق امدرمان التمنه عند العم عبدالرحمن ابوالتومات ولا فى يوم بالصدفه لقيت الفنان الجميل الرائع خليل اسماعيل جالس مع الترزى العم عبدالرحمن ابوالتومات ولابس القمصان الكنغوليه المزركشه ودراع السبحه فى ايدو اليمنى وكان زى ماهو غنى جميل كلك خغبف ظلك كان كانه بغنى لنفسه وروحة الطيبه لانه بحق خفيف الظل وجميل النفس والطبع
هل عمرك فى صننيه محطه مكى ودعروسه لقيت وشفت وتعرفت على اظرف رجل شرطه فى قسم الحركه الاخ جبريل الظريف الذى لم يحرر اى مخالفه طوالفتره عمله فى مرور امدرمان
جبريل الرجل الهاش الباش طوال اليوم يسلم على هذا ويضحك مع هذا ويهزر مع هذا كان فى الاعياد يكون لديه كميات من الحلوى والعصائر والمياه الغازيه هدايا من تجار واهل امدرمان وفى عيد الاضحى يكون لديه كم خروف وخضار وفواكه برضو هدايا والله كان تتجسد فيه جمال الروح ونبل الانسانيه
ولا انتوا بتعرفوا خيرات ولا ميامى ولا محل الباسطه بتاع ناس العم سيد ابوغالب ولا محل الباسطه قدام شويه فى شارع ابوروف بتاع العم يعقوب بتاع الدنواب ولا فى زول منكم قرض عيش سخن من طابونه العم احمد العبادى ولا بتعرف فى الحته ديك بيت ناس العم احمدعبادى والاخوه الوزير كمال عبادى والسر عبادى وهل بتعرف ناس الاخوه عامر فرواى وعلى فرواى وهل بتعرف فى الشارع جنبهم فى شارع برعى المصرى والمرحوم ضابظ الشرطه بابكرالخليفه مكاوى وابن عمه الصديق الغالى اللواء جمارك احمد مكاوى وهل بتعرف فى نفس الزقاق بيت ناس امين الشوافعه وفى الشارع بره بتاع ابوروف هل بتعرف بيت ناس عبدالمنعم شمينا ومحمد شيمنا وحامد شيمنا وهل هناك بتعرف بيت ناس الاخ الجميل محمد جميل والاخ الحكم الدولى عباس جميل وهل بتعرف فى شارع ابوروف وانت ماشى على السوق بتعرف دكان ناس العم المرحوم الجاك الخليل بتاع الصياغه والتحيه للاخوه فى امريكا صلاح الجاك تبيدى وعماد الجاك تبيدى وعلاء الدين الجاك تبيدى والخ عماد الجاك الخليل تبيدى والرحمه للاخ عصام الجاك تبيدى والتحيه للاخ اسماعيل سليمان تبيدى وكل ال تبيدى
طيب هل بتعرف سوق القصيريه ولا بتعرف دكان العم بله محمد الامين والد الاخوه الاحبه البروف عبدالمنعم بله والبروف حسن بله والاخ ضابط السجون محمد بله والاخ احمد بله المعرق بالحردلو
لا بتعرف دكان الشهيد عوض الذى استشهد فى احداث اكتوبر 1964
ولا بتعرف دكان اولادابومرين لبيع الدهب الفالصو دهب الغلابه
ولا دكان العدنى ولا بتعرف بيت ناس الاخ فرحات جوار المخبز بتاع العيش البلدى
طيب برضو سوال يا حاقد هل بتعرف ووين كان دكان العم فضل الله الحاج عرضى الكان ساعاتى الملك عبدالعزيز ال سعود وكان من رجال الوطن الاتحادى وقام بتسميه اولادو ومنهم اسماعيل الازهرى الحاج فضل الله العرضى واغرب اسم اطلقه العم فضل الله على الابناء كان اسم احد الابناء الاخ الغالى الصديق فيصل ال سعود حاج فضل الله العرضى والابن الثانى عبدالعزيز ال سعود فضل الحاج فضل الله العرضى
طيب يا زول يا دايش هل بتعرف دكان الهندى سانتو بتاع الخياطه القمصان والبناطلين الجاهزه والزى المدرسى الهندى سانتو والابناء الظريفين اولاد سانتو راجيش وراجو ورسمى وكان معه فى الدكان العم اسماعيل الخياط
طيب نطلع من دكان سانتو الخياط وندخل محل اجمل بسبوسه وباسطه العم الراقى النظيف المهندم دائما وانظف باسطه وانضف جلابيه وعمامه العم الطيب سيد مكى الرجل الضاحك دائما المبتسم فى كل حين الرجل العصامى العم الطيب سيد مكى
ومن هناك تجد دكان الاخوه سيد ابوغالب المنافس للطيب سيدمكى وعندو الباسطه والكنافه والبسبوسه ايضا
تجى فى الناصيه وتجد دكان الاخ جمال البدرى ناس حى البوسته وتجد في الدكان كل انواع البلاستيك بتاع الاراضى للغرف طبعا دة الدكان الناصيه
طيب يا حاقد لو دخلت يمين بتلقى محلات الثلج وتلقى الطابونه وتلقى على الشمال دكان العم خوجلى بتاع العجلات وهناك بتلقى كشك توتا كوره وكان قد اصبح مكتب سودان ايروز تدخل المكتب بتاع سودان ايروز تجد الاخوه مدير المكتب الاخ فيصل جاد والمحاسب الاخ صديق برعى وتجد الموظفين الاخ ابن خالى محمد سعيد الصادق والاخ عادل بتى والاخ محمد عبدالرحمن والاخ عبدالحليم الرفاعى وهناك ممكن تصادف اجمل صحن فول مدنكل مع عمك صبير ومع الفول اجمل عيش بلدى من طابونه العدنى
طيب يادخيل لو دخلت خلف مكتب سودان ايروز بتشم رائحه الجلود ضاربه ومحل الاخ الاخ العزيز عبدالمنعم عبدالصمد لصياغه الذهب الحلي الفضييه وتمشى شويه تجد دكان الاخ المرحوم حمدى العرضى بتاع بيع ادوات صناعه الاحذيه زول رائع ومستحيل تمشى سوق امدرمان وما تتنونس مع الاخ حمدى العرضى ولو مشيت شويه تجد الاخوه اولاد العم حسن السيد اولاد الساده الاحمديه الجعافره الاخ كمال حسن السيد والاخ عبدالعال حسن السيد وهم متخصصون فى بيع الاحذيه الجلديه المراكيب من كل نوع عايز مركوب اصله ولا مركوب فاشرى ولا اى نوع من المراكيب
وتلف شمال تجد نفسك امام سوق الصياغه والذهب دكان ناس اولاد الهادى موله ودكاكين ناس تبيدى ناس موسى تبيدى وفائز تبيدى
وتمشى قدام شويه فى الناصيه تجد دكان الاخ على عوض عبدالرحمن حنين متخصص ملابس ومستلزمات اطفال ماركات عالميه تمشى قدام شويه تجد محلات بيع مستلزمات وتركيب الستائر
لو لفيت يا دخيل يمين تجد محلات بيع البسكويت والحلوى وتجد محل الاخ عباس البشرى والاخ الامين حمد وفى الزقاق محلات العم عوض عبدالرحمن حنين وجوارهم محلات الاخ حسين احمد زين العابدين وهناك تجد محلات الاخوه جمال حسن ابوالعلاء تخصص اوانى منزليه
تتطلع من الزقاق ده وتدخل يمين تجد دكان التيمان لبيع كل نواع البخور وهناك تجد محل العم سعيد ابو جربو وفى المحل تجد الاخوه عاصم وعادل سعيد
طيب يازول يامرض القلت امدرمان ماعنها اسياد خلينى ادور بيك وتاخد جوله فى امدرمان لقيت ما راسك يوجعك عشان تعرف انو امدرمان عندها اسياد
طيب اظن كدة نمشى نشوف ناس امدرمان نزيدك من الشعر بيت
هل بتعرف ناس مدراس الاحفاد وجامعه الاحفاد ديل اول ناس فتحوا مدرسه ياجاهل فى رفاعه عائله بابكر بدرى وهم الان فى جوار استاد المريخ الاخوه المرحوم الدكتور اشرف محمد بدرى والاخ المهندس ايمن محمد بدرى والاعمام الطيب بدرى وقاسم بدرى ومحمد بدرى وناس شوقى بدرى وفى الحله ديك تجد بيوت العمراب ناس مجدى العمرابى وفريد العمرابى وناس الاخ الغالى فى لبييا الان الوجيه محمد سعد خليل واخوه خليل محمد سعد خليل
ولما تمشى شويه على جهه استاد المريخ تجد جنب الخور ناس الرشيد قنديل وناس عبدالعظيم على خوجلى وناس وسامه حدوب وناس العرضه كمال سعيد وناس محجوب عوض حسين اصحاب مستشفى عوض حسين وناس الشيخ حسن ابوسببيبه وناس الاخوه عصام حسن الفكى وعبدالله حسن الفكى وناس عصام ابوشبيبه وناس دكتور عائد ولاننسى الاخ عماد باجورى وكمان الاخوه محمد نجيب الصادق واحمد الصادق ومحمد سعيد الصادق
والله حاقد على امدرمان كل ما اقول خلاص اكتفى اتذكر زول
من ناس امدرمان اصحاب الراى والفهم
ناس الثورات وبطريقه عشوايه بتعرف
ناس الامين النو ولو بتعرف ناس يعقوب دؤاد اورسليم ولا بتعرف ناس ابوادريس حمد ناس بدرالدين بوادريس وعماد وعصام ولابتعرف ناس العم توفيق مصطفى ناس الاخوه نادر ومجدى وجلال وعاطف ولا بتعرف اولاد العم محمد خليل ناس عبدالمنعم والريح وصلاح وجمال واسماعيل وخليل محمد خليل
وهل بتعرف اولاد العم جعفر عمر ابنعوف الاخوه بدرالدين جعفر ومحجوب وازهرى وياسر والمرحوم طارق
وهل عمرك سمعت بى ناس عمك محمد عثمان البرقدار ابو ناس الفاضل وعبدالمنعم البرقدار ولا سمعت بناس العم عبدالرحمن والد ناس عفيفى وكمال ولا عمرك سمعت بناس العم حمزه والد ناس النجاشى ولا عمرك سمعت بناس ابوشوه وناس الاخ محمدنور ولا ناس العم عبدالمجيد ولا ناس العم مهدى والد الفاتح مهدى ولا عمرك سمعت بناس ابوشريعه ولا عمرك بتعرف محطه عرمان وناس دكان حسن الحلاق فى بيت ناس كمال وعثمان موسى عبدالرزاق ولا بتعرف بيت ساتى ناس عادل ساتى وناس بيت ناس الاخ محمد الزبير والعم الزبير ولا بتعرف بيت حاج ابكر وبيت ناس المرحوم احمد الياس ولا بتعرف بيت ناس دوليب ولا بيت ناس الدكتور الرشيد وواخوه ابجد اولاد مصطفى امين
وامشى بيك شارع محطه مكى وانت ماشى على السوق من صننيه مكى هل بتعرف الاخ عادل الشوافعه ولا التوم الشوافعه ولا عمرك شفت محل ومعرض الفنان التشيكليى عابدين الشوافعه وهل زوجاتكم مشوا كوافير حاج فيصل كان من اظرف ناس امدرمان واغترب بقى فكى لفريق الشعب فى الشارقه مع الاخ الظريف محجوب عبدالقادر الضب وهل بتعرف اخوان الاخ الضب الاخوه ماجد عبدالقادر
وهل برضو بناتكم مشوا كوافير عادل الشوافعه ولا لابسوا جزم من دكان طه المطبعجى ولا الشفع بتاعنكم اشتروا لعب اطفال وعجلات من دكان الاخ نيكولا فوتو نيكولا
....يا " ياحاقد على امدرمان اكيد ما اظنك جلست يوم في قهوه يوسف الفكى ...وعمرك ما انتظرت الباص في محطة الاوسطى زمن التلفونات الكول بوكس فيها ...ولا ركبت تاكسى طرحه من المحطه الاوسطى حتى الخرطوم ...ولا نزلت من البص ابورجليه وكان عندك كارني تركب بيهو البص طول اليوم والاسبوع لمده شهر وسعرو فقط 25 قرش
...وما عمرك شفت ولا سمعت بى ماكينات سنجر للخياطه والعم عثمان مكى مدير سنجر انذاك العم عقمان مكى والد الاخوه المرحوم ضابط الشرطه الانيق مكى عثمان مكى والاخوه مصطفى عثمان مكى ولا عمرك ركبت عجله رالى ام اسدين من دكان صالح خضر ولا اظن كنت عارف انو فى محل ريحه مشهور بتاع الاخ المرحوم عاطف سعد الشيخ ولا فكرت تشتترى قميص من دكان العم محجوب باشرى والد الاخوه فيصل وعزالدين باشرى
ولا اظن فى حياتك لبست جزمه من باتا ولا ابوسلامه ولا بتعرف بخت الطوخى ولا اشتريت قماش من دكان عباس رشوان ولا من دكان قمر للاقمشه ولا دكان موهوب من الاخ محمد الزبير واكيد ما اشتريت قماش من دكان الطيبن بتاع ناس الاخوه حسين حوجلى ومحمد خوجلي وسراج خوجلى ولا اشتريت قماش جلالبيه تترون يابانى ابوثلاث تفاحات من دكان العم حامد عبدالحفيظ الحواتى ...ولم تسمع ولم تصلي فى جامع السوق وكان فيه اجمل اصوات منهم الاخ الغالى فيصل محجوب باشرى واكيد يازول لم يزاملك احد في مدرسه وروضه ست فله ...
.يا دخيل هل مره حضرت المولد النبوى لما كان فى حوش الخليفه فى امدرمان
وهل اكلت من سوق الزلعه فى المولد سلطه روب وهل ركبت طوطحنيه ما اظن "هل فرِد يوم " وانت في المولد ....ووين !!؟...في ميدان البحيره هل شفت خيمه الانصار حيث يتلو راتب المهدى ولا دخلت خيمه الساده الاسماعليه ولقيت النوبه مسخنه وهناك شيخ غرقان فى الذكر وهل شفت الاخوه والاعمام ناس الطريقه الاسماعليه ناس الاخ الاستاذ ايوب عابدون وناس العم عوض عبدالرحمن حنين وناس الاخ اسماعيل عابدون وناس اولاد السيد مولى كرار وناس دكتور برعى ....كيف ياغريب تقول كلامك القاطعو من راسك الفاضى ده وتقول زي ما دايِر انو العاصمه امدرمان وبحرى والخرطوم ماحقت زول انا هنا بتكلم عن ناسى ناس امدرمان وانتظر ناس بحرى وناس الخرطوم ماقصروا قاموا بالرد عليك
هل يوم جيت مارى ببابه عبدالقيوم والتى من زمن المهديه ولا عمرك شفت الطابيه المقابله النيل التى احتمى بها جيش المهدى وكان من خالها يضرب مراكب وسفن الانجليز المستعمرين
وهل قرات فى التاريخ عن موقعه كررى التى خاضها انصار المهدى فى جبال كررى فى امدرمان والتى استبسل فيها الانصار وقيل فى هذه المعركه كيف بالسيف تحدى المدفع وكررى تحدث عن رجالا كا الاسود الضاريه خاضوا اللهيب وشتتوا كتل الغزاة الباغيه
وهل تعلم ان هولاء شهداء كررى مازالت جثمانهم واجسامهم بعد كل هذه السنوات لم تاكل اجسادهم الارض لانهم شهداء ماتوا من اجل لسودان الذى اردت ان تدنس ارضه الطاهرخ يادخيل انت ومن معك من المرتزقه ومن عرب الشتات فان كان الانجليز اهل الامبرطزريه التى لتغيب عنها الشمس لم يقدروا ولم يستتطيعوا الصمود امام السودانين والانصار الشجعان وحاربوا المدفع بالسيف فكيف يا عديم الراى والفهم سوف تستطيع احتلال السودان
الخرطوم بي اهلها وامدرمان بى اهلها بى ناسا
قبل انسى ها سمعت بالشخص الظريف وعلم من اعلام امدرمان الاخ
الهادى نصرالدين واسم الشهره الهادى الضلالى وهو احد اشهر ناس امدرمان رجل موسوعه فى معرفه الناس وخاصه ناس امدرمان واسر امدرمان العريقه وومكن تسال عن اى زول من ناس امدرمان والهادى يخبرك بانو الزول ده ابوه منو وجدو منو وامو منو وحتى الحبوبه يعرف
اهل امدرمان عن ظهر قلب ووصل درجه من معرفه ناس امدرمان انو لو فى زول عندو منسبه زواج يوم كتب كروت الدعوخ زمن كان الافراح افراح فى الزمن الجميل كانت ترسل كروت الدعوه لكل المعارف والاهل والاصدقاء داخل العاصمه وخارج العاصمه وحتى الدعوه توصل لكل المعارف فى الاقاليم والمدن المختلفه ياحليل الزمن الجميل
الهادى نصرالدين كان رجل نكته سريع البديهه ورجل ساخر جدا وعاده ما يكون اى فرح او ترح يوميا هو فى المجاملات من افراح واتراح ويكون فى الافراح والاتراح هو الذى يخفف على اهل العزاء من الحزن بتعليقاته الساخره والظريفه
من القصص الظريفه جدا عن الهادى نصرالدين انو مره كان فى عزاء عند الانصار ناس المهدى فى ودنوباى وطبعا الهادى نصرالدين انصارى وكان الهادى فى خيمه العزاء فساله احد الشباب وقال للهادى ووين انت الايام دى ما ظاهر فقام الهادى قال ووين انا اظهر فى البلد البقى ماعندها وجيع دى والسائل قال للهادى تقصد شنو انت يا الهادى فرد عليه الهادى ياخى السودان دة من الاستقلال اى زول حمك السودان من امدرمان ولا من الخرطوم اه شوف عبود بنعرفه ولسه فى ولدو دكتور عمر ابراهيم عبود اه جاء بعدو ازهرى اه ولدو محمد اسماعيل الازهرى موجود فى بيتهم فى امدرمان وكمان الاميرلاى عبدالخليل برضو ولدو امير عبدالخليل موجود واه كمان جعفر نميرى ما عندو اولاد لكن اخوه عبدالغفار موجود فى بيتهم فى ودنوباى قام فى اللحظه ديك البشير جاء ودخل فى الصالون وبعد فتره جاء البشير مغادر بيت العزاء قام وواحد من ناس الانصار عايز يضحك البشير وحكى للبشير القصه قام البشير قال للهادى معقول يالهادى الكلام ده ما عيب منك قام الهادى قال للبشير والله ياريس انا ما قصادك انت انت ما جعلى معروف من حوش بانقا والله لو جاتكم مصيبه نركب بصات شندى ونوصلكم لكن عليك الله ياريس ابراهيم ايدام ده لو حصلت ليهم مصيبه نطلع ليه فى ياتو جبل قام البشير قعد يضحك وغادر بيت العزاء
المهم البشير حكى القصه لى ايدام وكان مع ايدام ابراهيم شمس الدين قام ايدام وابراهيم شمس الدين رسلوا ناس الامن عشان يجيبوا الهادى من بيتهم فى ودنوباى المهم الهادى ذهب من ناس الامن وهناك فى مكاتب ناس الامن كان موجود ايدام وابراهيم شمس الدين قام دخل عليهم الهادى قام ابراهيم شمس الدين ساله قال ليه اسمك منو الهادى قال ليه الهادى نصرالدين قام ابراهيم قال ليه الهادى الضلالى ولا الهادى نصرالدين قام المهم قالوا امشى انتظر بره وبعد كم ساعه قاموا سالوا الهادى كم سوال المهم نظام تحقيق وشويه مماطله وتانى قالوا طيب انتظر بره المهم ثالث مره ابراهيم شمس االدين قال للهادى اه تانى بتتكلم فى ناس الجبهه قالم الهادى بسرعه رد عليه وقال ليه والله تانى فى الوضوع ما اوصل الجبهه اتوضى من النخره ولى تحت عليك رحمه الله الاخ المبدع الهادى نصرالدين
طيب ياغريب ويادخيل سوال بالله عليك قبل كده
هل سمعت بفتوات امدرمان زمان ناس حيدر قطامه ، ،.....الم تسمع بالبطل يسن خالد في رفع الاثقال ، ولا الحاج منقزا ،ولا احمد ادم مبروك
وعل عارف انو فى امدرمان تمه تكوين اول فريق جودو فى نادى الربيع امدرمان وكان من اوائل الناس من قاموا بتاسيس هذه اللعبه الاخ المرحوم عبدالباقى عجب سيدو والاخ حسن كديس والاخ ابن حى الهشماب طلب عباس وبعد كدة تمه فى نادى الرابيع تكوين اول فريق كارتيه وكان من الذين اسسؤا لهذه اللعبه الاخ البطل العالمى هاشم بدرالدين والاخ المرحوم سامى محمد على والاخ عماد عباس وكلهم كانوا من اوائل من تعلم الفنوان القتاليه الكارتيه وكلهم عاشوا خرج السودان فى امريكا
والبطل العالمى هاشم بدرالدين هو احد ابناء امدرمان الذين احترفوا اللعبه فى اليابان حتى صار بطل العالم وفتح اول مدرسه كارتيه فى ابوظبى
امدرمان مدينه معطاه وفيها كل المواهب وكل العلماء وكل لاعبيه الكره وشتى انواع الرياضه والعلم وليس هناك مدينه اخرى فى السودان كان لها نصيب الاسد فى الشعراء والفنانين ولاعبيه كره القدم والعلماء والوزراء ومن حكموا السودان من الاستقلال وحتى الان...
ومن اشهر شباب امدرمان عازفين فرق الجاز عازف الجيتار حيدر ابوعبيده ولا عازف الدرامز ياسر شوقى ولا عازف الجيتار سليمان ابوغالب ولا عازف الاورغن محجوب مصطفى شقيق الفنان صلاح مصطفى ولا عازف الجيتار شاكر عبدالرحيم ولا عازف الاكرديون سليمان اكرد ولا عازف الكمان الحبر سليم والقائمه تتطول الاف المبدعين والعازفين والملحنين والفنانين والممثلين
من اظرف الكوميدين فى السودان الاخ ابن امدرمان محطه مكى شارع السوق الممثل الظريف السميح فتحى بركيه
يحكى السميح الكثير والمضحك عن نفسه
من اجمل ماقال فى مره كانوا فى قعده مع ناس وواحدقال والله يا السميح تجيب زول اشنا منك والله اديك عشرين جنيه زمن العشرين جنيه كانت راتب موظف قاوا السميح ركب تاكسى ومشى جاب اخته وكسب العشرين جنيه
ومره قالوا فى حراميه اثنين عايزين يسرقوا بيت ناس السميح وواحد طلع فى الحيطه وواحد جنب الحيطه الفى الحيطه نزل فى البيت وشاف السميح نائم فى سرير واخت السميح نايمه فى سرير تلب بره البيت بسرعه قال للحرامى التانى يازول قول بسم الله الرحمن الرحيم تلبنا لينا فى بيت شياطين
وقال مره فى امراه كبيره قالت والله عادت شناتك كملت الحلاه
...هل مره يا مرتزق وبادخيل في يوم دقشك" عرقله بوكس" وانت خاشي " تسري منزل " في سينما الثوره الحاره الرابعه !!؟يت الاخ
ولايوم قابلك الاخ عبدالرحمن على ولد عمك على الزول المسمى عليه محطه ماسوره على فى الحاره الرابعه وكان الاخ عبدالرحمن على زول شجاع ما بهاب اى زول وكم تعارك مع صعاليق الثورات
وهل يا زول فى مره لقيت الاخ الضابط القيافه محمد عثمان سنتر الزول الظريف والنظيف وكان سكن الحاره الرابعه جنب كشك الليمون بتاع الاطرش فى الخور الفاصل بين الحاره الرابعه والسابعه
وبالجد هل يوم لقيت الاخ الصديق الفنان نادر خضر عليه رحمه الله لقد كان نجمه تزين سماء امدرمان كانت مثال للطيبه والمجامله والظرافه
وكان زول راقى يلقاك بترحاب ويفارقك وتعلو محياه الابتسامه
واتذكر عندما شرفنا فى المري\ديان فى قيدومه شقيقى فيصل عبدالرحمن لقد كانت القيدومه كرنفال فى ايام الزمن الجميل وتغنى فيها الاخوه الرائعين نادر خضر والخالدى وبكرى المغربى والمبدع ياسر عبدالوهاب وفرقه تيراب الكومديا والفنانه جوليا لقد كانت ليله لاتنسى ابدا
طيب يا دقلو يامسكين هل عمرك دخلت فى امدرمان السينما ولا حتى بتعرف اسماء السينمات
هل سمعت عمرك بدكان احمد ودالترب فى الشهداء والد ناس عمر وحذيفه وجارهم طوالى المرحوم العم عوض كوج وتمشى فى نفس الشارع تجد بيت ناس الاستاذ مصطفى وفى نفس الشارع بيت ناس العم المرحوم عباس نديم والعم عبدالكريم نديم بيت ناس كمال نديم وهناك تجد اجمل فول وزبت سمسم معصره فى دكان العم المرحوم احمد المصرى والعم احمد المصرى كان اشهر بقاله فى شارع الدكاتره الحالى وتمشى فى شارع الدكاتره شويه اتجاه سوق امدرمان فى الومن الجميل نادى الخريجين وكل الناس المثقفين من وجهاء امدرمان بقياده الزعيم الازهرى وتجد كل اطياف الناس من احزاب مختلفه لكن يجمع بينهم حب امدرمان والسودان وهناك الليالى الثقافيه والليالى الغنائيه والليالى الشعريه والليالى المسرحيه وكل الوان الطيف تجدهم فى نادى الخريجين
وفى نفس المنطقه كانت بقاله جورج مشرقى اليونانى الاصل حيث انواع الابان المستورده والزيتون اليونانى والسجاير الفاخر المستورد وزيت الزيتون البكر وفى نفس الشارع تجد شركه ردايو افؤيقيا فى الناصيه وكل ماتريد من اجهزه كهربائيه وغسالات وتلفزيونات ومسجلات فى نفس الشارع وانت ماشى على المجلس البلدى تجد قهوه يوسف الفكى ذلك المقهى الذى كان فى الامسيات يمثل سوق عكاظ السودانى ومن الممكن ان يكون مثل ليالى المربد التى يتبارى فيها الشعراء من كل فج عميق وقهوه يوسف الفكى تجد فيها تقريبا كل الفنانين والعازفين والملحنين وتجد فيه فطحاله الشعراء ناس سيد عبدالعزيز وعبدالرحمن الريح وكل الشعراء وهناك تجد الفنانين كل منهم فى تلهف ان يكون محظوظ ويكون من نصيبه قصيده من هولاء الشعراء المعروفين

طيب ياناس امدرمان الاصلين منو منكم تماول وجبه العشاء عند موسى نفخو فول العم موسى نفخو كان منافس لفول احمد سعد وطبعا المسافه بينهم لاتتعدا عده امتار
فى نفس المنطقه ودنوباى ولكن كان العم موسى نفخو منافس خطير طبعا ممكن تمشى اى وقت فى الليل وتجد الفول المصلح والمدنكل والعيش البلدى السخن بالطاوله
اجمل مافى الموضوع انو كل من موسى نفخو واحمد سعد كل منهم له ناس وقروبات وشلل يتلقوا تقريبا يوميا عشان يتنالوا وجبه العشاء مع بعض وهذه هى امدرمان الجمليه فى كل شى
اه بحكى ليكم عن فول الجان عليه رحمه الله طبعا الجان ده زول ابداع وظريف وبعمل فى الفول عمايل لخبطه كده عجيبه الفول مع البيض وطعميه
وطرشى وتوم وفول وجبنه وبيكون قدامو كم صحن مع بعض وعارف كل صحن سيدو منو و عايز شنو بالضبط وفى الحساب برضو زول خرافى
بيكون عارف كل زول شال صحن فول حسابه كم وكان الجان من المشاهير فى امدرمان بخفافه الدم واطلاق النكات وزول فى كل وقت تجده هاش وباش كان محل الجان فى ودنوباى فى الميدان
جوار جامع الانصار
منو منكم زمان اكل فول وطرشى من حشمت النقادى
جوار بيت اسماعيل الطهار طبعا كمان فول حشمت ده ليه طعم تانى والله اول شى حشمت عندو كل شى كميه فى اوانى كبيره الطعميه و البيض المسلوق و الطرشى
طبعا تخصص لانو الطرشى تخصص النقاده فى السودان وغايتو من لم ياكل من فول حشمت يكون نص عمره ضاع
المحل بتاع حشمت طبعا ما زول بياكل فى المحل بتشيل الفول سفرى والله ياحليل امدرمان وناس امدرمان
ونحن نتجول فى امدرمان الجمليه لابد من المرور على شارع الدومه حيث كانت شجره الدومه تتوسط الشارع وهناك بالقرب بيت ناس الشيخ الصادق عبدالله عبدالماجد كانت الشحره معلم من معالم امدرمان حيث كانت تقيم اسره الشيخ الصادق عبدالله عبدالماجد اتذكر منهم ابناء المرحوم العم صابر عبدالله عبدالماجد الاخوه سمير وامير ومنير ونصير والاخوه ياسر خوجلى وهشام خوجلى والاخوه فخرى موسى والمرحوم امير موسى وفيصل موسى
وهناك فى نفس المنطقه منزل ناس المرحوم عصام شرفى وال شرفى واسره الاخوه عماد عباس المقيم فى امريكا وواخوه
ولا عمرك مشيت لبخ ابوروف وشفت زريبه الفحم وشفت اولاد ابوروف الزمن داك بلعبوا كره قدم كل زول احرف من التانى ناس عبدالمنعم خشبه وناس صلاح ابوروف وناس اولاد الرفاعى الاخ الظريف عبدالحليم الرفاعى وناس صلاح بشرى ولابتعرف حوش ناس الحكومه ولا بتعرف بيت ناس وسامه انس ولا جيت ماشى بجنب بيت ناس عادل السمانى ولا كنت يوم ساكن فى حله ناس خالد جادين ولا اكلت من حلاوة الخال محمداحمد قرشى ولا عمرك ممكن تشوف الزول الراقى النظيف اخلاق ولبس الرائع فتحى ابراهيم عيسى وهل بتعرف ولا عمرك سمعت بسوق الشجره وناس النصرى وناس محمدعثمان محجوب وناس عمك محمد عبده وناس المطبعجى ناس الاخ طه على المطبعجى واحمد المطبعجى ودكتور طارق على المطبعجى المقيم فى راس الخيمه الامارات منذ عشرات السنوات ومن اشهر الاطباء فى راس الخيمه وناس صلاح نمر الشيخ ولا ناس المهندس هاشم نمر الشيخ وناس بيت المال هل عمرك ممكن تكون سمعت بناس بيت المال وناس سوق ام سواقه وناس الاخوه عزام الدعيته ولا الاخ معاويه الدعيته ولا الاخ عبدالله الدعيته وهل عمرك اشتريت قماش جلابيه من ناس عمك الامين الصافى والتحيه من هنا توصل الى الاخ عمر الامين الصافى المقيم فى لندن
ناس بيت المال ولا فى عمرك شفت بيوت ناس المادح فى الملازمين ولا جيت مارى العصير بجوار حديقه مدرسه الاهليه العامه جنب بيت ازهرى
كانت حديقه بيت ازهرى حديقه ملتقى الاصدقاء فى امدرمان وكان هناك مطعم ظريف متخصص فى الفول المدنكل وكنا كثيرا ما نذهب ونعلب فى الحديقه فى العصر
بحكم ان الحديقه كاانت قريبه من منزلنا تبعد فقط امتار وكنا نقطف منها بعض الزهور خاصه زهره الياسمين طيبه الرائحه
ياربى تكون عمرك شربت ليمون من كشك عمنا حسن قرشى جوار المجلس البلدى امدرمان كشك العم حسن ده كان من معالم امدرمان الظريفه حيث كان العم حسن قرشى يبدع فى عمل الليمون المعصور باليد واتحدى اى زول يكون شرب من العم حسن قرشى ويقول فقط شرب كبايه فقط لازم لا بد على الاقل كباتين اوثلاث ومرات اربعه اتذكر كان كوب الليمون فى عام 1975 فقط خمسه قروش عليك رحمه الله وبركاته العم حسن قرشى مازال طعم ليمونك المعصور بحنان وحب اهل امدرمان مذاقه فى الحلق وفى الجوف ينزل بردا وسلاما
ولا عمرك وقفت فى بازار الاحفاد جنب المجلس البلدى امدرمان واكلت من الدكان الكان فى كورننر مدرسه الاحفاد الثانويه بنات اكلت باسطه كعب الغزال الطيبه المذاق وكنا مرات نعمل شيرنق ونشتترى صننيه كامله بتاعت كعب الغزال بحوالى جنيه اتخيلوا كيف كانت الدنيا فى الزمن الجميل
وما اظن تكون اكلت ايس كريم فى عماره محمد حسين فى البدروم تحت واتونست مع المرحوم مجدى محمد حسين وصديقه الزول القيافه الاخ المرحوم طارق بابكر وقد توفى الاخوه طارق بابكر ومجدى محمد حسين فى حادث حركه موسف فى شارع الاربعين عليهم رحمه الله
طبعا ايس كريم البدروم فى عماره محمد حسين ده كمان قصه تانيه كنا بعد المدرسه يوميا بعد اكل باسطه كعب الغزال وشراب ليمون العم حسن قرشى نذهب الى عماره محمد حسين وننزل فى البدروم وهناك اجمل ايس كريم بتاع فانييلا وشكولاته ومليك شيك والله كنا لانغيب عن المدرسه يوم حتى لا نفسد البرنامج اليومى بتاع شراب الليمون واكل باسطه كعب الغزال واكل ايس كريم عماره محمد حسين كانت لنا ايام مازالت اطراها ياليتها عدنا وعادت الايام
واكيد وانت صغير ولا كبير اتصورت فى استوديو الوداى وصورك الهادى ولا عم عبدالله كان استوديو الوداى مشهور فى امدرمان فى بدايه شارع ابوروف من ناحيه سوق امدرمان وكان الاستوديو عباره عن زفه الوان وتجد صور الكثير من الاطفال الحلوين مكبره وصور بعض مشاهير الغناء وكره القدم وكمان تجد صور بعض العرايس وده كلوا نوع من الدعايه للاستوديو
وبسالك ياحاقد وكل الحاقدين هل زول منكم شرب شاى لبن مقنن عن عم احمد ابوشنب وكان العم احمد متخصص فى الشاى المقنن والشاى الاحمر مع نكهه النعنناع الذى يعدل الكيف والمزاج
اتذكر كنت يوميا بعد المدرسه اذهب للوالد عليه رحمه الله وبعد تناول وجبه الغذا اذهب لقهوه العم احمد ابوشنب واشترى الشاى للوالد ومن معه من الاعمام الذين يعملون معه فى المحل واشترى لنفسى كبايه شاى لبن مقنن واشترى بسبوسه من حلوانى خيرات وكان برنامج ثابت تقريبا كل يوم نفس الشاى والبسبوسه كانت ايام سعيده ربى مناى تعيده كانت الدنيا بخير وطيبه
ولا زول منكم اتحداه انو يكون اكل زبادى عمنا يعقوب الكان فى بيت شيخ عجب فى حى الشهداء العم يعقوب كان من اصول يقال انها اصول يهوديه ولكن هناك مقوله انه من اقباط مصر العم يعقوب كان رجل ضخم الجثه يلبس الميرله ورجل ابداع فى النظافه وكان يصنع الزبادى بطريقه تخليك تشتتهى الزبادى وكان لديه عدد من الثلاجات لحفظ الزبادى وللمبالغه كان على الاقل يببع فى اليوم 500 كاس من الزبادى وكان دثيق فى عمله نظيف الملبس والمحل فى غايه النظام وكان رجل مثقف جدا يناقش الجيران فى السياسيه وفى كره القدم وفى شتى ضروب الحياه وكان دقيق فى المواعيد فى فتح واغلاق المحل يوميا
الله اعلم وهل فى زول منكم اشترى دواء ولا صرف روشته من صيدليه وددراو ابدا من دكتور علم الدين الشبلى ولا لقيت فى الصيدليه اظرف شباب امدرمان الاخوه دكتور مكى اسماعيل ولا فضلى اسماعيل ولا الرائع الدكتور محمد اسماعيل قيلى من كتب اجمل قصيد الحلمنتيش زى
قال تسمح؟
و كيف يا الحلوة ما بسمح؟
أصابعي العشرة تكتب ليك
و قلبي أبقيه إستيكة
عشان بس للغلط يمسح
يذوب بين أصبعين حلوين
يتوه وسط السطور يسرح
و لمن تنتهي الكلمات
يخش الشنطة في منديل
و نمشي القهوة نتفسح
-------
و صار عاشق يطيع سحرك
يجيب الفانتا شان أمرك
تختي الشنطة في حكرك
وقلبي الدايش وسط منديلل
يسكلب ساي يقول يا ليل
و جوة الشنطة يتمرجح
و ترجعي تاني يا الحلوة
و أكون راجيك هناك مصلوب
أشوف الناس طشاش في طشاش
و أقرأ سطوري بالمقلوب
-------
تقعدي
و أعاين ليك.. تغمضي إنتي
تعايني لي.. أغمض أنا
و أعاين ليك.. تغمضي إنتي
تعايني لي.. أغمض أنا
نعيد الكرة من أول
و أعاين ليك.. تغمضي إنتي
تعايني لي.. أغمض أنا
و أعاين ليك.. تفري البسمة
تضوي سنة
-------
أحك راسي
و أبلع ريق
و أتنحنح
و أجر الكرسي لي قدام
و أرجعو تاااني و أتزحزح
و أقول للسمحة لو تسمح
ممكن كلمة في زاوية؟
تقول بسمح
-------
تقوم السمحة تتلمم
و تتبسم
و أنا أتراجف. و أتخمخم
و أقوم أفرح
و أدق الجيك
و أطق روري
و أرمي الكرسي.. أوبس سوري
و أقع في الجنبي.. أوبس سوري
و أدقش الماشي.. أوبس سوري
و جنب السلم.. أوبس سوري
-------
هناك في الزاوية نتقعد
و أستغفر.. و أتشهد
و أشيل أنفاسي.. و أتنهد
و أقول ليكي
والله
و غايتو الزول
و الحاصل
و في الواقع
و ما عارف
هه ما قادر أقول ليكي
-------
تقول لي
هي يا دا
و فيها شنو
و معانا منو
و يخسي عليك
و قول يعني
هه ما تخجل. و تتعقد
-------
أنا أتعقد؟؟؟
أجر الكرسي
أزيد الخمسة تدليكة
و أقول ليها
وبي صوتا ندي و رايع
يفيض رقة و موسيقى
من فضلك
و أترجاك
ترجعي لي الإستيكة
عليك رحمه الله وبركاته اناء الليل واطراف النهار اخى الغالى دكتور وداسماعيل كان رجل خفيف الظل مضحك ابداع فى كل شى فى الرزانه وفى الهدواه وفى كل شى
ولا لقيت فى الصيدليه فى الاماسى الحلوه الزول الظريف دكتور احمد بابكر العشا الذى كان من اوئل من نصب فى نادى الصيدله فى الخرطوم كان الرئيس للنادى واتذكر قصه طريفه كان دكتور احمدبابكر يعمل فى شركه ادويه فى الخرطوم واعطوه سياره بيجو 304 جديده كرت وفى المساء جاء الينا فى صيدليه وددروا وقال للاخ امين غسال العربات عليك الله يا امين زبط العربيه دى المهم الاخ امين غسال العربات ابدع فى غسيل العربيه الجديده وخلص وجاب المفتاح للدكتور الاخ احمد بابكر وقال والله يادكتور العربيه بقت زى صحن الطلس الجديد المهم كنا ماشين مع الدكتور احمد بابكر قاعه الصداقه لحضور شاهد ما شافش حاجه لعادل امام عندما عرضت فى الخرطوم وفجاه فى الكبرى فرمل مجروس ودخل دكتور احمد بابكر من الخلف فى المجروس وتهشمتت مقدمه السياره وتانى يوم الدكتور احمد بابكر قال لى الاخ امين والله عنيك حاره عملت حادث واتكسرت السياره وحالتك بعين واحداه لان الاخ امين مان لديه مشكله فى العين الاخرى قال ليه يعنى لو بالعننين الاثنين مان متنا ولا شنو وضحك الجميع
ولا شفت الاخ الجميل عبدالعزيز الصاوى ولا لقيت فى الاماسى الحلوه الاخ الدكتور عزالدين
ولا فى يوم صليت فى جامع ناس الصديق ارو ولا جامع الضرير ولا جامع النحاس ولا جامع السوق الكبير ولا جامع الانصار فى ودنوباوى ولا جامع ابوروف جوار بيت ناس العم محمد عبده ولا جامع ابوروف جنب زريبه الفحم جوار ناس دكتور صلاح بشرى ولا صليت فى جامع الانصار جنب بيت الخليفه ولا جامع الملك فيصل فى العرضه ولا جامع النو فى الحاره الثامنه ولا جامع انصا السنه بتاع الشيخ ابوزيد حمزه فى الحاره الاولى
الشيخ ابوزيد حمزه رحمه الله عليه كان اظرف انسان فى السودان كان رجل دعوه من طراز لايمكن ان يجود السودان بمثله
كان اى زول ماقدر يحصل صلاه الجمعه فى الثورات يذهب الى مسجد انصار السنه فى الحاره الاولى ويجد الشيخ ابوزيد مازال فى الخطبه
كنت كثيرا ما اذهب الى مسجد الشيخ ابوزيد فى الحاره الاولى واكون قد ذهبت لزياره منزل الاخ الغالى هيثم فواد قدوره وطبعا الاخ هيثم زول ظريف جدا وانصار سنه وعندو نكته ظريفه فى واحد قال ياهيثم فواد قدوره انت كنت مسيحى واسلمت ولا شنو لانو الاسم غريب شويه والاخ هيثم زول مضحك جدا وكان جار الشيخ ابوزيد حمزه وعندو قصص كثيره مع الشيخ ابوزيد حمزه من القصص الظريفه
حكى لى الاخ هيثم فواد انو ايام ازمه البنزين جماعه انصار السنه كان عندهم سياره بوكس وكان هيثم بمشى يوم صرف البنزين يكب البنزين
والاخ هيثم رجع زى المغرب وكان واقف مع الشيخ ابوزيد حمزه وكانوا بشطفوا فى البنزين فى جركانه من البوكس قام جاء سكران ماشى وسكران شديد من ناس الحله وشاف شيخ ابوزيد ومعاه هيثم وهيثم بشفط فى البنزين قام قال للشيخ ابوزيد وان السياره سالت باى ذنب شطفت
فى اللحظه ديك شيخ ابوزيد وهيثم ماتوا من الضحك وشيخ ابوزيد قال ليه روح ربنا يهديك يازول وكان رجل فى غايه العطف والموده واللطف
وهل فى زول منكم يا مرتزقه اكل سندونش طعميه مع سلطه اسود ولا سلطه روب ما اظن ممكن يكون حصل ليكم الشرف ده انو اكلتوا من الخاله بت الفضل التى كانت تجلس قدام طابونه العم حسن عبدالباقى فى شارع عبدالله خليل كنت اتذكر الخاله بنت الفضل امراه كبيره فى السن مكافحه تاكل لقمه حلال من عرق الجبين وكانت بتعمل سندونشات نوعين فقط طعميه مع سلطه روب ولا طعميه من سلطه اسود ولكن شى عجيب والعيش البلدى السخن من مخبز العم حسن عبدالباقى
ولا يوم اتعيشت من الخاله بت اللول التى كانت قريبه من بيت ناس الاخ جمال حلمى وعزالدين حلمى وكانت بتعمل سندونشات طعميه وفول شى خرافى الله
وهل يابشر انتوا فى زول منكم اشترى رغيف بلدى من طابونه حسن عبدالباقى وبعد كده العم حسن عبدالباقى عمل العيش الكانبتعمل فى قوالب النيكل وكان ابداع عليه رحمه الله العم حسن عبدالباقى التقيته اخر مره فى الحج عام 1994 عليه رحمه الله
ولا فى زول من اهلكم شاف طاحونه العم جعفر
فى عبدالله خليل ابوناس صهيب وكباشى وامين جعفر عازف البيز جيتار المعروف من امهر العازفين على البيز جيتار وطوالى بطلع حفلات مع كما ترباس
من القصص الظريفه جدا تحكى عن العم جعفر انو مره الكهرباء قطعت عن الطاحونه فقام العم جعفر بمحاوله ان يستدين خمسه جنيهات من الاخ صاحب البقاله ابن عمى طه محمداحمد احمدنور واعتذر له الاخ طه محمداحمد انو لايملك المبلغ فذهب العم جعفر الى العم حسن عبدالباقى لكى يستدين منه المبلغ فاعتذر له ايضا العم حسن عبدالباقى والعم جعفر راسو ضارب وراجع وجد الزول الظريف عبدالله رمز العيون طالع من الزقاق بتاع بيت ناس مولى السيد كرار وشاف العم جعفر قال جاى من وين ياجعفر اخوى قام العم جعفر قال ليه القصه بتاعت الكهرباء وطه وحسن قام عبدالله رمز العيون فتح الشنطه بتاعته كان عندو شنطه بدررعه فى ايدو وطلع عشره جنيه وقال للعم جعفر امشى رجع الكهرباء بخمسه جنيه وخلى الخمسه جنيه الثانيه مصاريف والله كمان ماترجع العشره جنيه فقام العم جعفر قال قولته المشهوره والله يا عبدالله رمز العيون انت فيك الخير والبركه
طيب من منكم شال رغيق سخن من طابونه عمنا البخيت واظرف زول فى الطابونه عم بليو وطابونه العم البخيت عليه رحمه الله كانت فى جوار بيت العم امين الطاهر الشبلى وطبعا كان من اعز الاصدقاء فى امريكا الاخوه المرحوم زكريا البخيت والاخ محمد البخيت
هل فى زول شرب شعير ولا اكل ايسكريم من برعى المصرى طبعا محل برعى المصرى كان فى البدايه فى شارع ابوروف قصاد محل حلوانى خيرات فى نفس الصف الفيهو محل الفاكهانى ناس العم جادو وبعد ذلك انتقل المحل الى شارع ابورف قصاد بيت ناس العم احمد العبادى فى الكونرر بتاع الشارع البوديك بيت ناس الاخ اللواء احمد مكاوي
كان برعى المصرى ملك شراب الشعير بلا منافس وايضا ملك الايس كريم وكان شراب الشعير بنكهه روح الموز شى ابداع والله
ولاعمرك اتعرفت على ابن ابوروف الشاعر محمد المكى ابراهيم من كتب اكتوبر الاخضر باسمك الظافر ينمو على الغابه والصحراء وهل سمعت بالشاعر احمد محمد صالح من قال انا الاغرونى بالجنه جعلت غراهم سنه لما نالوا مرماهم جفونى وقالوا حبى جنون وهل سمعت بكل شعراء امدرمان وديل فقط شعراء الاغانى الحديثه وديل كتبوا اجمل الاغانى التى كم اطربت الناس فى السودان وحتى فى الدول الجيت منها كل الناس الحاقده على امدرمان وما اكثرهم
أحمد محمد صالح (السودان)
أسامة عثمان عوض الكريم
إسحاق محمد الخليفة شريف
التجاني حاج موسى
الحبر يوسف نور الدائم
السر قدور
الصادق الرضي
الطيب العباسي
الطيب عبد الله
الناصر قريب الله
النور عثمان أبكر
الهادي آدم
بشرى الفاضل
توفيق صالح جبريل
جعفر محمد عثمان خليل
حاج الماحي
حسن إبراهيم الأفندي
حسين عثمان منصور
حيدر إبراهيم علي
خالد أحمد المصطفى حسين
سيد أحمد الحردلو
سيف الدين الدسوقي
عبد الرحمن الريح
عبد الرحيم أبو ذكرى
عبد القادر الكتيابي
عبد الله إبراهيم موسى
عبد الله الطيب
عبد المنعم رحمة
عبد المنعم عبد الحي
عبد النبي عبد القادر مرسال
عثمان بشرى
عثمان محمد هاشم
علي أحمد الرفاعي
علي الكوباني
علي عبد القيوم
مبارك المغربي
مبارك بشير
مجدي النور
محجوب شريف
محمد السني دفع الله
محمد المكي إبراهيم
محمد المهدي المجذوب
محمد سعيد العباسي
محمد عبد الحي
محمد عبد القادر كرف
محمد عثمان عبد الرحيم
محمد عثمان كجراي
محمد علي أبو قطاطي
محمد محمد علي
محمد ميرغني
محمد ود الرضي
محمود ميسرة السراج
محي الدين فارس
مختار دفع الله
مصطفى سند
معاوية نور
معتصم فضل جلابي
هاشم صديق
يوسف عيدابي
يوسف مصطفى التني
اه سوال تانى ليك يادخيل هل سمعت بملكه جمال امدرمان فى الزمن الجميل
عزيزه ادم منديل ملكة جمال السودان
التي غنى لها (عبيد عبدالرحمن) و (سرور) اغنية (آه من جور زماني).. (أفكر فيه وأتامل).. (حليل زمن الصبا).. ( ذكراك سمير روحي).. (غزال البر).أما أغانيها من سيد عبدالعزيز، فهي: (يا مداعب الغصن الرطيب).. (أنَّة المجروح).. وأغنية (يا بنت النيل) وهي بطلة اغنية “ظبية المسالمة” و “غزال المسالمة” واغاني أخريات من اغاني الحقيبة
طيب هل قرات مجله الصبيان وعمك تنقو والرسام الفنان شرحبيل احمد و لا مريت بسوق المورده واكلت سمك من شعيب ولا من عوضيه وتكون محظوظ يا زول يا ولد دقلو ومن معك من المرتزقه لو كنت من ناس ومواليد امدرمان كان وانت طفل وانت مريض عالجك الدكتور فواد عبده ولا فى زول فيكم امو اتعالجت عند دكتور ابراهيم الحضرى ولا دكتور ابراهيم المفتى ولا عندك فحص دم وفحص ليك الفحيص العم مكى والد علاء الدين مكى ووسامه مكى ولا انت كبير وعيان كان عالجك للكسور الفيك قبل الموت كان عالجك دكتور خواجه فى حى العمده ولادكتورعبدالمنعم الشفيع اخصائى العظام البروف الذى لديهم حيى كامل فى امدرمان اسمه حى الشفياعه وهل فيكم زول كان عندو حاله نفسيه ورقد فى التجانى الماحى فى امدرمان ولا اتعالجتو بالموسيقى مع الفنان عبدالعظيم حركه اولوفيكم زول اتكسراى كسر فى العظام رجعت الكسر الخاله بت بتى قدرت ترجع ليكم الكسر بالجبيره
وتعال افسحك فى النيل هل شربت مويه النيل ولاشميت الهواء تحت كبرى شمبات ولا فى نهار رمضان الحار قيلت تحت الكبرى بتاع شمبات الذى غرق فيه خيره شباب امدرمان زى السر دؤاد عليه رحمه الله ولا اكلت ليمون وجوافه من مزراع السيد عبدالرحمن التحت الكبرى بتاع شمبات ، ولا رميت سناره من فوق كبرى شمبات ، وانا بحلف انو ما حصل ليكم ولا هل حضرت حفله فى صاله الريفيرا ولا عمرك سمعت بى اشهر القابلات ، الخاله الشول خيرى ،ولا حاجه وزنوا الدايه وديل كلهم اشهر القابلات فى امدرمان واغلب علماء ومشاهير امدرمان اتولدو على يد هولاء الفاضلات
..ياحليل امدرمان وناس امدرمان ..... ولا فى يوم من عمرك مشيت عصرية في دار الرياضه امدرمان وشفت الموت الاحمر بين قريق ابوروف وبيت المال وناس كلبو وعلى صمغه وشرف وهل فى دار الرياضه اكلت تسالى عمك ابوشنب الشايقى طبعا لا و لا شفت عمك كاك ولا شفت ولا شريت شاى فى دار الرياضه ولا فى الليل مشيت حفله فى العباسيه وغنى فيها العندليب الاسمر زيدان ابراهيم وسط الزهور متصوروجهه الصبوح ومنور
وهل سمعت زيدان ابراهيم بغنى للكابلى فيك يامروى شفت كل جميل
وهل فى يوم اى خميس قعدت فى حديقه المورده ولا الجندول وكان معاك الاصحاب ومعاكم زول عامل فنان وبعزف فى العود ويغني اغانى الزمن الجميل
ولا زول بقول فى نكات وهل شفت اولاد امدرمان فى الهلال والمريخ ناس كمال عبدالوهاب دكتور الكره السودانيه وناس عزالدين الدحيش الحريف وهل كنت بتلعب فى رابطه المك عبيد ولا فريق نجوم افريقيا فى الحاره الثامنه زمن عماد ابوادريس وجمال عباس وخالد حمورى وخالد قاقرين
هل شفت يوم دكتور هاشم عجيب الحفيان ابن ودنوباى والمقيم الان فى ايرلندا وهو طيبب خريج جامعه الخرطوم وكان ان احرز اجمل هدف فى مرمى الهلال وفاز فريق ودنوباى على الهلال بهدف دون مقابل والقصه الطريفه انو الاخ دكتور هاشم عجيب قبل مايلعب فى فريق ودنوباى كان قد ذهب مع احد الادراين من نادى الهلال عشان يتمرن ويلعب فى فريق الهلال ولكن لم يجد الترحيب والمهم سجل فى فريق ودنوباى وفى اول مباراه ضد الهلال احرز الهدف الوحيد فى مرمى الهلال وكان نجم المباراه بلا منازع وسال عنه مدرب الهلال وقال لبعض الادراين الزول ده جبتوا من ووين الله ابداع وعرف انو الدكتور هاشم عجيب كان عايز يسجل فى الهلال ولكن لم يجد الترحيب وفات على الهلال لاعب لقطه زى الدكتور هاشم عجيب
ولا لقيت الرائع ابراهيم عوض وغنى ليك تذكار عزيز ياقلبى شايلوا جرح اليم
وهل عمرك شفت الانيق الرائع ابراهيم عوض بكامل اناقته وهندامه زمان وكيفيه تسريح الشعر حتى كانت هناك شقه شعر وتسريحه اسمها تسريحه ابراهيم عوض ذلك الانسان الفنان الكريم وقد حكى لى الفنان ابراهيم عوض بانه اول من حمل المايك فى ايده
من لبس الساعه بيده اليمنى قبل انصار السنه وكان السبب انه كان لديه ساعه ماركه عالميه وكانت الكتينه بتاعت الساعه من نيكل وسبب له النكيل حساسيه فى اليد اليسرى وقام احد اصدقائه فى سوق امدرمان وقام بصناعه كتينه من جلد ولبس بعد ذلك الفنان الرائع ابراهيم عوض الساعه بيده اليمنى حتى فارق الحياه عليه رحمه الله وبركاته
ولا سمعت اشعار الصديق سيف الدين الدسوقى لما قال سألت الشاعر الكبير الصديق العزيز سيف الدين الدسوقي الذى ساله احد الاصدقاء من حى العرب ان كان لا يزال يسكن في منزل أسرتهم بحي العرب فقال له انه رحل حين ضاق بهم المنزل والحال إلى منزل شيده قرب جبال المرخيات وارتجل هذع الكلمات الرائعه
ولكني رحلت معي صغاري
إلى غرب المدينة في الحدود
عواء الذئب نسمعه نهاراً
وصوت الجن ليلاً بالنشيد
وأنفاس الجبال لها بخار
جهنم في الممات وفي الوجود
حياة ليس للشعراء فيها
هناءات من العيش الرغيد
أنا أم درمان تسكن في عروقي
فكيف أعيش في قفر وبيد
وغيري في الضفاف لهم قصور
تلوح مع الحدائق من بعيد
ويكون عمرك كلوا ضاع انت ومن معك من المرتزقه لانو لم تسمع عن محمداحمد عوض لما يغنى ويقول ابوي يا يابا ماتقول ليه فى الحاره السادسه الثوره كان لديه كشك او مطعم صغير فيه الذ واروع كوراع
كدى سوال هل إنتا بتعرف سوق الشجرة ...حي المظاهر ...والكبجاب ...وحي السيد المكي وفريق ريد وفريق المسالمه وهل كنت بتسمع الفريجونى وهو يغنى ويقول امسيتو كيف ياملوك امدر !؟!
برضو هل عمرك تسمع بى حى العرضه وامبده والفتيحاب وابوسعد والمهندسين وحى الروضه وحى المهندسين والسلاح الطبى وسلاح الموسيقى وحى السوق وحى العرب
وهل درست الابتدائى فى بيت المال ولابيت الامانه ولا الهجره ولا ابوروف ولا مدرسه المورده وهل كان الاستاذه الاجلاء استاذ شعيب فى بيت المانه الابتدائيه ولا سيداحمد الغول ولا الفاضل ولا صديق مولى كرار ولا درست الثانوى العام فى بيت الامانه ولا النهضه ولا درست الثانوى العالى فى الموتمر ولا محمد حسين ولا الاهليه ولا حتى الاحفاد ولا بيت الامانه و استاذتك استاذ شداد ولا كرف ولانورين ولا عوض حسن احمد مدرس اللغة الانجليزيه ومن كتب الاتذكرين صغيرتى ولا درسك استاذ حمزه ابوحنك ولا استاذ حسين الامام ولا استاذ معروف
وهل لعبت فى الدوره المدرسيه مع احرف ناس ممكن يكونوا لعبوا فى المدراس فى ام درمان
فطحاله المدراس الكان فيها كل لاعبى الهلال والمريخ والمورده كان فى بيت الامانه ابرهومه ابراهيم عبدالعظيم حماده وعصام عشرى وحمدى العرضى وكموله وحمورى وسامى عزالدين ومصطفى سيماوى وابوبكر سيماوى وعبده الشيخ ومعاويه كرتيه والعدد الهائل من لاعيبه كره القدم عطيه حسن ومجدى سنتر ونحله والحريف عبدالمنعم الصياد الرائع شرحبيل
طيب سوال ليكم ياال دقلو وكل المرتزقه هل فيكم من شاف وشاهد مباراه بين الهلال والمريخ فى الزمن السمح زمن كاسات الدهب قبل ماتسرقوا الدهب
ومنو فيكم شاف ناس الهلال من زمن سبت دودو حارس الهلال ومنو منك شاف صديق منزول وجكسا والدحيش وعلى قاقرين وزغبير وقاسم الحاج وفوزى المرضى وكسلا والريشه وعلى عبدالقادر وابوالعز وقله
ومن فيكم شاف لاعبيه المريخ
عبدالعزيز عبدالله حارس المرمى والسر كاوندا وسليمان عبدالقادر وعزالدين خورشيد وفيصل الكورى والفاضل سانتو وسامى عزالدين والدكتور كمال عبدالوهاب وجقدول ومعتصم حمورى وعبده الشيخ وقرعم ومنصور رمضان وفيصل العجب
ومن فيكم شاف لاعبيه المورده ناس الصياد والتوم العاتى وشرحبيل
وسوال تانى يامرتزقه هل بتعرف فى امدرمان اغلب من كانوا على يدهم بدايه ناس فرق الجودو والكارتيه الاخوه عبدالباقى عجب سيدو والاخ حسن كديس والاخوه بطل العالم هاشم بدرالدين وسامى محمدعلى والكثير من ناس مركز الربيع والاخ عماد عباس ولاخ طلب عباس
...يا حليلك يا "دلاقينو" ...ما خشيت معانا...سينما العرضه والفليم الهندى من اجل ابنائى وانت الان دخلتنا بعملتك السوداء دى فليم هندى
ولا شربت معانا "لبن مقنن فى كليه الزراعه شمبات ولا سمعت ابوعركى ومحد الامين وومحمد وردى فى الميدان الشرقى فى جامعه الخرطوم "
يا حليلك يا " مسكين " انت امدرمان والعاصمه بتعرف ليها شنو...!!!؟؟
لم تحضر حفلات عقد الجلاد ولا استمتعت بغناء الرائع الجميل الاستاذ مصطفى سيداحمد ،،... لم تتذوق شاى قهوه يوسف الفكى قصاد سينما امدرمان كان لما يجوا المرتزقه الزيك ديل ووالواحد يصفق معناه انت من خارج امدرمان وجاى طاشى ساكت ومافى زول ولا جرسون بشتغل بيك
طيب هل بتعرف محل جورج مشرقى واشتريت منو زيتون يونانى ولا جبنه مضفره ولا سجاير كنت مستورد ده بعد السماء منك ولا حتى فى الخيال ...

غلبة حنينة لامدرمان فى هذه الايام القلائل فكتب ...

وتاني نغني لي أم درمان
وتـاني نـغـنـِّي لـي أم درمـان ..
ولـيـهـا نـدوزن الألـحـان ..
وكـان عِـشـنـا الـعـمـر كـلـُّو
قـضـيـنـا نـقـيـسـا بـالـمـيـزان ..
نـلـقـى ام در هـي أم الـدنـيـا
مـا بـتـزَعـزَع الإيـمـان ..
ومـا بـنـلـقـى الـبـديـل والله
إلا فـي جـنـّة الـرضـوان ..
****
سـلام يـا ام در بـعـد غـيـبـة
سـلام الـعـاشـق الـولـهـان ..
واصـلـو الـغـيـبـة مـهـمـا تـطـول
بـنـرجـع تـانـي لـلأوطـان ..
نـبـِـل أشـواقـنـا جـوَّه الـنـيـل
نـقـابـل نـاسـا بـالأحـضـان ..
نـقـول لـيـهـم صـبـاحـكـم خـيـر
وفـوق الـعـافـيـة تـلـقـو أمـان ..
****
قـدُرْ مـا قـالـو قـُبـَّـالـنـا
وقـدُرْ مـا قـلـنـا بـي تـحـنـان ..
مـا بـنـوفـيـكـي حـقـِّك يـوم
فـيـك إتـجـمـَّـع الـسـودان ..
إنـتـي أصـالـة الـتـاريـخ
وانـتـي مـنـارة الأزمـان ..
وانـتـي الـفـيـكـي كـلـّو نـفـيـس
بـيـوتِـك وطـيـبـة الـسـكـّان ..
****
إنـتـي جـمـعـتـي كـل الـنـاس
وجـبـتـي حـضـارة الإنـسـان ..
فـيـكـي الـعـالِـم الـدارس
وفـيـكـي الـرائـع الـفـنـّان ..
فـيـكـي الـعـامـل الـكـادح
وفـيـكـي الـخـلـوة والـقـرآن ..
وفـيـكـي بـنـاتـنـا زي الـفُـلْ
وفـيـكـي وفـيـكـي بـرضـو كـمـان ..
****
بـوقـِّع لـيـكـي إسـمـي هـنـا
واخـتِـم لـو طـلـبـتـي بـيـان ..
واحـلِـف بـالـكـلام الـقـلـتـو
لا زوراً ولا بُـهـتـان ..
بـحـبـِّك وافـنـى فـي حـبـِّك
حـدود الـقُـدرة والإمـكـان ..
وتـسـلـمـي يـا صـبـاحـي أنـا
واسـلـم لـيـكـي يـا ام درمـان ..
****
الفاتح حمدتو

حبيبنا مصطفى تحياتى يا جميل
يا سلام عليك على الدوام تأتي بقبس من الآمال
في ظلام
صدقني انت نوع فريد

وأصل يا جميل

شكرا لك مصطفى نور على هذا الجهد المقدر
وشكرا لك على كل نصائحك للسودانيين المقيمين في مصر ..
و يا ريت نتحصل على نسخة من هذا الكتاب القيم عن أم درمان العاصمة القومية
والله يديك الصحة والعافية

علي عبدالوهاب عثمان
السر عبدالله
الاخوه الافاضل اسال الله تكونوا بخير وكل الاهل ورمضان مبارك على الجميع والكتاب قادم اليكم قريبا