والي ولاية نهر النيل يطرد قوي اعلان الحرية من الولاية.

08:39 AM December, 29 2023

سودانيز اون لاين
محمود الدقم-England
مكتبتى
رابط مختصر

شاهد الفيديو من منصة اكس.
👇👇👇👇

يعني لو انت رجل أو امراة من منسوبي قحت ومن الولاية ومن القبيلة داخل الولاية، يا تطلع يا التووج، ولو حدثت التصفية الجسدية لمنسوبي قوي اعلان الحرية والتغيير المركزية ابناء نهرالنيل في المنطقة، حتما ستكون حرب اهلية داخل القبيلة الواحدة والاسرة الواحدة بالولاية...يا سلام علي عقلية الفلولي عندما يحدث له انهيارات عصبية...

يبدو ان الحملة العنصرية والتطهير العرقي اخذ منحي خطير جدا بولاية نهر النيل
حيث بدأت حملات الدفتردار الانتقامية، بالولاية من الانتقام من ابناء غرب السودان المتواجدين في مناطق التعدين بنهر النيل لاكثر من ١٠ سنوات ، علما ان الضحايا لا يد اهم ولا كراع في الهبل الكيزاني الذي بدا منذ ٣٠ سنة..
حيث تم حرق خيام وممتلكات واليات تعود لابناء غرب السودان لاسباب عرقية واثنية عطفا علي فيديوهات نشرت في ال ٢٤ ساعة الماضية علي منصة اكس.

ول أبا محمود الدقم

الفلول ظنوا أنهم يحسنون صنعاً. في المناقل، المتحدث بأسم الحملة الشعبية قال: أي زول مندس سوف يتم ذبحه، ليس تهجيرهم أو طردهم.


بريمة

سلام ود ابا..المثل بقول الحداث ما سواي، نفس الرغي والهري كان بقول فيه اللواء المسؤول عن تجنيد المستنفرين بمدني وقري الجزيرة، بمجرد ما وقع في يد الدعامة بقي يقول بصراحة انا ما مشيت الميدان، انا ما عارف،لكن، وينبغي، وحتما، وكنا في صلاة الصبح...وبقي يورجغ علي الفاضي.. بذلك لا حل غير توقيع السلام والخروج من هذا النفق شكرا

قولوا واي

Quote: قولوا واي

توفيق الحكيم، الشعب السودانى كله قال واي .. أنت المرقك في قاهرة المعز شنو؟ .. النار المشتعلة يا ول أبا توفيق تطفيها بتقليل وقود إشتعالها .. أعزل المواطن وقود الحروب من هذاه الحرب .. وأحصرها في المتحاربين فقط ومن ثم الأستنفارات الشعبية هى صب مزيد من الزيت في النار المشتعلة .. مسألة قتل الناس علي أساس الهوية هى جريمة حرب ..
ما تشوف فورتكم بتاعت "علوق الشدة" التى قالها د. طارق كيجاب .. لا تفيد. قال لناس الجزيرة من بين ألف قرية لا يوجد واحد من الألف من أبنائكم في سلك الجندية .. إحصائية مهبطة حتى للشمال .. وهذه الأحصائية عرفها العنصري عبد الرحمن عمسيب، قال المشكلة في الجندي المحارب لأنه لا يدين لنا بالولاء، فهو من مناطق الهامش وأماكن الجنجويد، فعبد الرحمن عمسيب يقترح أن يتم تجنيد أبناء الشمال الخالصين في الحملة الشعبية وحينما يقومون بالحرب، يحاربون بمعزل عن الجندي في الجيش الخائن .. دي أسمها واي كبيرة.


بريمة

Quote: يعني لو انت رجل أو امراة من منسوبي قحت ومن الولاية ومن القبيلة داخل الولاية، يا تطلع يا التووج، ولو حدثت التصفية الجسدية لمنسوبي قوي اعلان الحرية والتغيير المركزية ابناء نهرالنيل في المنطقة، حتما ستكون حرب اهلية داخل القبيلة الواحدة والاسرة الواحدة بالولاية

حرب أهلية بسبب القحاتة؟!
هم القحاتة كلهم في السودان عددهم كم؟!
القحاتة مجرد إنتهازيين وطُلاب سُلطة، ما عندهم مانع يحكمهم حميدتي أو البرهان، بس المهم يديهم فتات من كيكة السُلطة

Quote: يبدو ان الحملة العنصرية والتطهير العرقي اخذ منحي خطير جدا بولاية نهر النيل حيث بدأت حملات الدفتردار الانتقامية، بالولاية من الانتقام من ابناء غرب السودان المتواجدين في مناطق التعدين بنهر النيل لاكثر من ١٠ سنوات ، علما ان الضحايا لا يد اهم ولا كراع في الهبل الكيزاني الذي بدا منذ ٣٠ سنة.. حيث تم حرق خيام وممتلكات واليات تعود لابناء غرب السودان لاسباب عرقية واثنية عطفا علي فيديوهات نشرت في ال ٢٤ ساعة الماضية علي منصة اكس

الخبر دا تلفيق وكذب، مافي زول من غرب السودان ح تجيهو عوجة في ولاية نهر النيل
مشهود تاريخياً بأن أهل نهر النيل ناس أصالة وكرم، وعندما كفر المهدي المسلمين بقايا الأتراك و المصريين في كل أرجاء السودان،
وقف أمير ولاية نهر النيل آنذاك محمد الخير وهو قد كان شيخ المهدي وقال للمهدي ديل مسلمين وليسوا كُفار،
وسمح لبقايا الأتراك والمصرين بالإقامة في ولاية نهر النيل، وكل من دخل ولاية نهر النيل فهو آمن.
راجع مذكرات فوزي باشا

الفيديوهات يا نذير موجودة علي منصة اكس "تويتر سابقا" ادخل التايم لاين السوداني وشاهدها لو عايز تصل للحقيقة.
وهنالك اعتقالات بالجملة لابناء غرب السودان في عطبرة، بحاول اراجع المنصات واجلب لك الادلة و لاثبت لك ولغيرك هذه المعلومات، غير الدعوات التي تنادي بطرد ابناء غرب السودان فورا من نهر النيل..منصة اكس تعج بهذه الفيديوهات
فمحاولة كسر عنق الحقيقة والقدسانية وتغطية الشمس بغربال ما عادت مجدية في زمن السايبر

وفق اي منطق اخلاقي وقانوني تصادر حرية وحياة شخص مختلف معاك فكريا؟
عندك دليل انو اسماء في قوي اعلان الحرية والتغيير قالوا نحن مقاتلين دعامة طوالي تسلم اسماء للجهات القانونية، لكن تطردهم فهذا يعني ان الفلول فشلة وهم اصلا فشلة ملاعين.

Quote: فمحاولة كسر عنق الحقيقة والقدسانية وتغطية الشمس بغربال ما عادت مجدية في زمن السايبر

يا حبيبنا الدقم،

هدفك وهدفي وهدف أي زول ذو ذوق سليم ما عايز يحصل استهداف لأي بشر بناءً على الهوية، متفق معاي؟
طيب أؤكد ليك إنو ما ح يحصل استهداف لأي من أبناء غرب السودان في ولاية نهر النيل،
كل اللي حصل شافع أهبل نزل فيديو وقال ح يستهدف الدهابة في ولاية نهر النيل
ورد عليهو ود أبوك رد مُفحم، وقال حتى الشافع دا ما من ولاية نهر النيل من الأساس
لكن،
هذا لا يعني أن نتجاهل هذا الموضوع الخطير، ويجب أن يصل لحكماء ولاية نهر النيل من إيقافه،
لأنها عملية قبيحة ومدانة ولا تشبه أبناء نهر النيل الأصيلين.

محباتي واحتراماتي

شكرا علي التوضيح لكن حوادث الحرق حدثت وفق الفيديوهات التي شاهدتها عند نفس صاحب الحساب وغيره
علي منصة اكس..
نعم ينبغي أن تتوقف الحرب الان، وينبغي محاكمة من اطلق شرارتها الاولي، ومن سرق ونهب واغتصب، شخصيا اتمني حضور لجان دولية للتحقيق في هذه الجرائم علي ان تشمل كل اطراف النزاع

نقلت إلى
علي خطي التوتسي والهوتو:حرق خيام وتدمير اليات لابناء غرب السودان بولاية نهر النيل.

وكلام الوالي لا يصب في تاجيج الفتنة؟
مولانا شايفك مايل كتير علي جهة اليمين 🤩 ما تعمل حادث قاتل؟؟

Quote: يبدو ان الحملة العنصرية والتطهير العرقي اخذ منحي خطير جدا بولاية نهر النيل حيث بدأت حملات الدفتردار الانتقامية، بالولاية من الانتقام من ابناء غرب السودان المتواجدين في مناطق التعدين بنهر النيل لاكثر من ١٠ سنوات ، علما ان الضحايا لا يد اهم ولا كراع في الهبل الكيزاني الذي بدا منذ ٣٠ سنة.. حيث تم حرق خيام وممتلكات واليات تعود لابناء غرب السودان لاسباب عرقية واثنية عطفا علي فيديوهات نشرت في ال ٢٤ ساعة الماضية علي منصة اكس.

محمود
انت يا زول قاعد تولعى فيها بدون وعي
يا اخي العملوه اهلك في دارفور اكبر من التطهير العرقي
عملت شنز عشان توقفوا ما انت واقف مع القتلة
وعاجبك البعملوا فيه ناسك

Quote: انت يا زول قاعد تولعى فيها بدون وعي يا اخي العملوه اهلك في دارفور اكبر من التطهير العرقي عملت شنز عشان توقفوا ما انت واقف مع القتلة وعاجبك البعملوا فيه ناسك

قتل المدنيين مدان اخي المنصوري غض النظر ما اذا كان الضحية من الشرق او الغرب او الوسط والشمال..
عملت شنو، كتبنا هنا انو دا انتهاكات مرفوضة،، وغير مقبولة..

Quote: قتل المدنيين مدان اخي المنصوري غض النظر ما اذا كان الضحية من الشرق او الغرب او الوسط والشمال.. عملت شنو، كتبنا هنا انو دا انتهاكات مرفوضة،، وغير مقبولة..

يا محمود
نحن ممكن نعمل نفس الشيء ونعمل كوبي اند بيست لمداخلتك دي حندين ونجري ندعم الجيش كده كويس؟
الادانة ليست كافية زعماء القبائل عندكم ممكن يوقفوا العبث ده
وتبقى الحرب بينكم وبين الفلول فير

Quote: وكلام الوالي لا يصب في تاجيج الفتنة؟ مولانا شايفك مايل كتير علي جهة اليمين 🤩 ما تعمل حادث قاتل؟؟

مداخلتي نزلت في البوست دا بالخطأ
المقصود البوست التاني
علي خطي التوتسي والهوتو:حرق خيام وتدمير اليات لابناء غرب السودان بولاية نهر النيل.

كلام الوالي مدان تماماً بالنسبة لي لما فيه من دعوة للعنف وبث للكراهية.

تسلم مولانا علي التوضيح..

لكن يا محمود إنت بوستك دا ذاتو ملولو
فوق العنوان "والي ولاية نهر النيل يطرد قوي اعلان الحرية من الولاية."
وتالت مداخلة ليك بعنوان " حرق وتدمير خيام وممتلكات ابناء دارفور وكردفان بمناطق التعدين نهر النيل. (Re: محمود الدقم)"
وتاني عنوان المداخلات قلب "Re: حرب أهلية؟!"

ياها لولوة الدعامة ذاتها: مرة مع البشير، مرة مع البرهان، ومرة كمان مع الديقراطية والدولة المدنية.

مضمون البوست يا مولانا يقودك الي التفريعات اياها
وايضا خطي واضح، لا برهاني ولا حميتاوي، ولا غيروا
وتااااني كل من ارتكب انتهاك في حق الشعب السوداني يتحاكم داخليا وخليجيا واوروبيا واميريكا
نقطة علي السطر.