يا حليلن

04:46 PM December, 27 2023 سودانيز اون لاين
أبوذر بابكر-
مكتبتى
رابط مختصر

(adsbygoogle = window.adsbygoogle || []).push({});من اشد واكتر مفردات عاميتنا السودانية حنية ورقة
مفردة يا حليل
وبتسحدم بمعنيين اتنين قراب من بعض
الأول بمعنى ودلالة الشوق والحنين والفقد لشئ ما او شخص ما او حدث ما
والتاني بمعنى التعاطف او إظهار المؤازرة او التعبير عن الوقوف بجانب شئ او شخص ما برضو

ويمكن كمان تجي للتعبير عن الحنين وافتقاد زمن معين والتحسر عليه زي ما قال عبيد عبد الرحمن في "حليل زمن الصبا"

في حين انه اسماعيل حسن في "اسفاي" استخدم المفردة في التحسر علي الكان بهدي الغير صبح محتار يكون هداي
وعبد المنعم عبد الحي مع شدو ابو داود في "يا حليلن دوام بطراهم"
كرس كل المعنى في الشوق والحنين للناس البطراهم

وبرضو العبادي تأبط نفس المفردة وهو بشتاق لرياضه الغناء واليانعه وهزاره الغناي الصداح

يا حليل رياضنا الغنا
صداح هزارنا الغنى

اما "يا حليلن" الأنا جاي ليها هسه فهي في الفقد الشديد لي ناس كانو هنا ذات جمال وذات لقيا وذات معنى
وفجأة لقيناهم مافي كانوا صرحا من جمال فهوى
فاسقني واشرب على اطلاله
واروي عني طالما الشوق روى

مع الاعتذار لروح ابراهيم ناجي وترتيل ام كلثوم
عشان لخبطنا ليهم "اطلالهم"

-يتبع-

ويا حليلكم
يا حليلك انت براك
الكابلى فى قصيدة مهدى فرح

والله يا أميرة

حاولت كتير جدا وفتشت عشان القى مصدر الكلمة
وجات من وين
ما قدرت القى اي إفادة

وكيف دخلت في عامية السودانيين
خصوصا في مناطق الوسط والشمال

حليل زمن الصبا الماضي

حليل ارض الجزائر والمراكب والطنابير الترن

حليل ناس امنة
يا حليللي يا شريري

الغريبة الاماراتيين بيستخدمو كلمة حليل بمعنى مشابه

العراقيين عندهم كلمة شعبية بتحمل معنى التازر والتعاطف

بيقولو

خطية

عوافي يا محمد

ايوا فعلا
اغنية "حليل الراحو" لقريبك الشاعر النوبي سليمان عبد الجليل
تجسيد حزين جدا للفراق والوداع ومن بعدهم الأشواق

الأغنية اتعملت بعد تهجير النوبيين من وادي حلفا ومشيهم لأرض البطانة وباقي الأماكن

لكن بالجد احترت جدا في مصدر المفردة

لدرجة بقيت بتخيل انها جاية من واحدة من لغاتنا السودانية الكتيرة
زي ما في مفردات كتيرة جدا دخلت في العامية العربية وبقت شائعة

الناس ال يا حليلن

زول جميل اسمه

عمر الفاروق

كان انسان كامل الدسم الجمالي

ممتع ومفيد ومريح وهو بنضم عن الكورة
من جهات كاتالونيا ومدريد
ومن نواحي بافاريا والأراضي المنخفضة جغرافيا والعالية كرويا وفنيا
نزولا جنوبا لغاية لومبارديا وتورينو ونابولي
ثم عبورا للمانش لملاقاة الأنجلوسكسون اسياد ومخترعي الكورة في الكوكب
مانشستر بفرعيها الاتنين
وليفربول نواحي الميناء
ومعمعة لندن كلها بس تشيلسيها وتوتنهامها وارسنالها الخ الخ

ثم عودة للبلد
العرضة بي شمالها الأزرق وأبيض وجنوبها الأصفر واحمر
وميدان عقرب وليق الخرتوم عموم

ويجي ينضم ليك تاني عن
محمد احمد عوض وكيف انه كل واحد في الكورس والشيالين المعاهو
ممكن براهو يطرب الحجر، فما بالك بمحمد احمد عوض ذات نفسو

ويحكي ليك عن صلاح محمد عيسي لغاية ما تشم ريحة ضريح سيدي قريب الله ابو صالح

وتاني يونسك بي قهوة القصيرية وشارع الشوام وسوق الموية
فيترائى ليك وش عمك جورج مشرقي

لا وشنو
العجب لما يقص ليك قصص ناس فريق العرب

من عبد العزيز المأمون واخوه ميرغني لاحقا
تسمع همهمة سيد وونسة عبيد الما معيون
وعبد الرحمن الريح، البحر الواسع
لغاية الدسوقي قيرب آل أبو حسبو
ثم التاج مصطفى القادم من ربي سيدي احمد الطيب وعبق امرحي
مع ابتسامة ابراهيم عوض عبد المجيد
ابسمي يا ايامي
بسمة الزهر النامي

والجابري سيد الاسم

والله يا حليلك يا عمر الفاروق

بالله مش يا حليلو ؟

تحياتى وسلامى أبو ذر والجميع~

*يا حليل السودان (شوقا) ويا حليل الشعب السودانى (تعاطفا من الحصل عليه)

*دايما استعمل العبارة دى (بالوراثة 😀) وتأتى الىّ سريعا فى حالة السؤال عن الغايبين
*السعوديون يستعملونها ايضا -تحية ولطفا وكمان للإطراء

تحياتي يا هدى

الشوق والتعاطف
ياهم رفقة ال "يا حليل" الأوفياء

كلما جات يا حليل مباشرة بجي معاها الحنين والتعاطف والشوق

يا حليل السودان الحقيقي
مش القبل أربعة أو خمسة سنين
لكن القبل 89
89 عام الرمادة الحقيقي وعام الغضب الالهي الوقع علي السودان

لكن
كل اول ليه آخر

ومهما استطال البلاء أكيد بجي بعده البهاء والنماء واللقاء والصفاء

يا حليل كلمة صميمة في عمق دارجيتنا الحنينة
يا ريت نعرف مصدرها

سلام ،، الزول السمح
يا حليلنا كلنا
يا حليلي ما عرفت حتى من وين بردوا على البوستات
قولوا للنيل ضفة ضفة
وللعشيات لما تصفى

# مفاجأة مش؟

الرحمابي؟

لا اله إلا انت
سبحانك اني كنت من المشتاقين

ما اظن في دعاء يتقال غير كدا

والله ما مصدق
ولا في اكتر أمنياتي تفاؤلا
اشوفك تاني والقاك

تعرف
قبل كم اسبوع وقبل أرشفة المنبر
وبرضو هديا بالحنين والاشتياق للناس السمحين
كتبت موضوع هنا وسميتو "تساؤل"
وفيه سألت عن كل الرفاق
ناس معزتنا الما بنريد غيرن
الرحلو خلونا
ياااااا حليلن

وانت كنت والله في نص وقلب القائمة

ليه كدا ياخ ؟

كلكم تفوتو وتخلونا للايام

وهنا برضو كمان
انت في البال والخاطر
واكيد كنت جاي اناديك واكورك ليك
مستصحب معاي كل أيامنا الندية وبهيه

بجيك راجع تاني
لانه في اللحظة دي
وانا بين مصدق وما مصدق
زي ما قال حسن السر في مدينة الهادي الجبل

النعاس غلب
كأنه بحاكي في الشوق الغلب

وعلي بال ما اجيك

انت برضو

قولوا للنيل ضفة ضفة
وللعشيات لما تصفى
طوف بالحلة
لفة لفة
وكلم الحبان جميع
بالحكاوي البينا الفة
بالغناوي الفرهدت
وسط القلوب
موال وزفة
بالمعاني السمحة ديك
الاينعت افراح وعرفة

في زول تاني ياااا خليلو

اسمه تمبس

وباللاتيني
tmbs

الشهير بعلاء الدين يونس

من نواحي الموردة

الله يطراه بالخير كان مترع بالفرح المشع والجمال المضيئ

من حيث اتيته يأتيك خراج جماله
في كل شي وأي شي

كان في زول سمح

عبد المنعم سيد احمد

الحصاحيصا - فرع كندا

أبو ذر
تحيات وود
شوية حوامة في الانترنت طلعت بالآتي
يا حليلو في السودانية كما في المغربية تقال للشفقة على شخص ما اوعندما يكون غائب او مسافر و تقال للشخص عندما يتعرّض لأمر محزن أو مؤسف
في اللهجة الجزائرية كما في السودانية كلمة حليل تعني مسكين وكلمة حليل موجودة أيضا في اللهجة الشحرية العمانية و المهرية اليمنية
في التونسية: يا حليلو بمعنى مسكين تقال للشخص عندما يتعرّض لأمر محزن أو مؤسف وأيضا يَاحْلِيلْتُو بمعنى ما أجمله و يَاحْلِيلِتْهَا بمعنى ما أجملها
عبارة ..ياحليلي..في السودانية وفي الجزائرية تستعملها النساء للتعبير عن شيئ ما ..كالفرح بالطفل الصغير إذا عمل شيئا جميلا وما شابه ذلك.
يا حليلي أيضا هي كلمة ليبية تستخدم عندما تدهش من شيء سواء كان محزن او مفرح
ياحليلك في الخليج تقال للاشخاص اللذين نحبهم ونعتبرهم طيبين

الأستاذ النبيل أباذر
تحياتنا وسلامنا من القلب
فتحت " طاقة" شجن ومعزة في زمن ممحون ومحزون
ولكل الأحبة وأصيحاب الكرم وأهل النافلة السمحة:
( يارمال حلتنا زولا كان بآنسك ياحليلو)
والكوني الفرجوني :
((وافر الكيل ؤتلْب الشّيل ؤخير العامَّة
صادق القول ؤمونة العول ؤنوم الهامّة
حِليل حسّان حليل ذاتو ونفايلو التّامَّة
حلاّل عُقدة الحِجَن الوّراهِن طامّة)
وودقدال العجيب:
(البوب لي السلَّفن فوق الخضارة قبايلو
وحليلو البِطبع الزين والخبيت بي نفايلو)
وعمنا شيخ جامع؛
(هسّاعه وين بزراية النوراب؟
ناس سالم حليلهُن وناس علي الهاقناب)
(يا حليل زمن البكسرولو الرَّباعي هِجار
حليل زمن أب سبيب يا حليل زمن عصَّار)
وإن أزعفتني الذاكرة شاعرنا المجذوب:
(يام الجزيرة يا حليله
أيام الضريرة يا حليله
الخمر مطفأة مضيئة
عميت منا البصيرة
ضحكنا وبكينا
جاء الصباح بالأعذار)
ومن غنا توية؛
(حليل دوري ودهر نيلو
المابرد المسيخ جيلو)
وماتنسى المنفلة بت جلي في مناحة شقيقها موسى:
( حليل موسى ...
ياحليل موسى)
وماأروع ودالطاهر وكأنه يرثي زمننا هذا:
طاهرابِك زمنهم ولاَّ دوب ياحليلو
الحردانه عاجَّه وليمو بتشاشيلو
طيبين النفوس المِن بلاك بشيلو
زمَّالهم مِسيكِر فوق ربايط شيلو)

حبيبنا العبيد الطيب

وعليك السلام والمحبة

دائما تسعدنا بي جيتك
وتبهجنا بي حضورك

ودائما تجي وايديك اللتنين مليانات
لامن تدفر الباب بي كراعك اليمين

وتحل علينا سهلاً ونبعاً ونهلاً

طريتني برضو مربع امحمد احمد عوض الكريم ود اب سن
الحاردلو

يـا حْلَيلِكْ قِبيَلْ وكْتاً بانَقَيرْ عِـنــــــدِي
جُمالي مْشَنْكِتاتْ ويخدِمَنْ الفي شَنْدِي
بَعَدْ ما بْقِيتْ مِفَلِّسْ وعادِم الجَرَقندِي
يا مَعَشُوقه يا مْتَينْ نِتْقَلِدْ في الهِندِي

يتحسر على الحال والمآل

ختيت التشكيل في الكلمات والحروف
عشان المعنى والمقصود يتفهم

باقي ناسنا الهسه ديل متل نضمي الحاردلو دا
بتوارى ليهم زي الهيروغلوفي

عوافي يا عبد الله
وكل خضرة التحية

ومشكور كتير علي البحث والتقصي

ناس معزتنا مبنريد غيرن
رحلو خلونا
يا حليلن

تقريبا كل الدلالات والاستخدامات للمفردة متشابهة في مجتمعات مختلفة فيما بينها
اضافة للسودان

برضو لا يزال مصدر وأصل المفردة اللغوي مفقود

الزاكي عبد الحميد

واحد من الروافد النميرة

من حيثما أتيته
يأتيك بالسقيا والنماء والإخضرار

سلمى الشيخ سلامة

تبلدية مورقة
تطرح وتهب الفن وجماله

و

محمد على طه الملك

إنسان شاسع البهاء
ناضر الحضور

هشام شيخ الدين

من بناة ومؤسسي هذا المكان

كان حضورا زاهيا
ومعنى باهيا

حياك الخالق يا صديقي
اينما كنت

فإنا وايم الحق
صرنا نشكو قلة الفئران في بيتنا

REEL

هكذا اسمت نفسها بالريل

وكانت عنوانا للزمن الجميل
والحضور النبيل

د. هيام هاشم

لك كل مافي العطر من تحية
وكل ما في السلام من اخضرار

بلة الفاضل

الشاعر

لا نزيد نعتا او صفة غير الشاعر

اذ ليس اجل او اعلى من ان يكون المرء شاعرا

عماد عبد الله

كل الجمال