Post: #1 Title: قصص من الدنيا؛ وبعض حكاوي... Author: عبدالمنعم الطيب حسن Date: 06-11-2020, 06:44 PM
من كل شدرة غنا؛ ساحاول ان احكي حاجات ذات مدلول ومنفعة وفوائد للقاري وساحاول ان اختصر مع الواتساب دا الناس الكلام الكتير ما بتدوروا
نبدأ ............. سكنت في ايام الجامعة مع حللي؛ ومن لم يتعرف على حللي فقد فاتته امنية كانت شقتنا ملتقى ابناء العمال من عطبرة وسنار واولاد المغتربين من الخليج والبحرين وابناء الهامش من كل بقاع البلد الطيبة وناس نضاف برضو بجونا المهم مرة جوا طالبات اخر ترطيبة وبدوا يحكوا في قصص لما ابوي كان سفير في لندن وقصص عن لندن ومتحف الشمع ذاتو ولما مشينا اجازة كندا وقصص عن كندا وروعة شعبها وقصص عن جزر الكناري والبراري في سهول المكسيك وجنوب افريقيا وقصص عن اليابان ياخ اتفه دولة كانت الصين وانا قاعد اشرب في الونسة شراب المهم في زميلة كدة فطنت لوجودي وصمتي وشرابي وسالتني انت يا منعم ساكت ليه احكي لينا عن دول زرتها وذكرياتك فيها قتا ليهو والله يا جماعة الدولة الوحيدة الزرتها في اجازة نص السنة هي ليبيا تنفع !!
يتبع...
Post: #2 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-11-2020, 07:49 PM Parent: #1
ما دمنا في المنصورة هاكم دي ونحن برالمة جداد وجيرانا طالبات معانا في الجامعة اها جونا وعزمونا لحضور حفلة راس السنة في شقتم واكدت زميلتنا في الكلية الدعوة المهم من عصرا بدري استحميت ومشيت بدري وبراي قبل الشباب الساكنين معاي في الشقة خفت البرالمة تقول شنو!! المهم مشيت والجماعة لسا ولا اتغدو حتى اتاريها راس السنى بتدا حوالي الساعة 12 ليلا واحد زميلي في السكن فقدني قال البرلوم الخفيف دا تلقاهو مشى الحفلة فعلا دق باب الطالبات ولا دخل حتى وقال عاوزني المهم طلعت معاه قال لي دا شنو يا عربي يا متخلف حد يمشي لحفلة راس السنة ستة الا حتة مساء بالغت المهم مشينا الشقة وارتحت والساعة 11 ونص مشينا كلنا يلا بدات الحفلة وكان اول سؤال اي زول يحكي يحتفل وين السنة الفاتت ومع منو يا زول ناس حكوا ابوظبي وعندك عمان والعمارات وتونس ياخ ابسط مدينة كانت كوستي وكل الاحتفالات مع الاهل والاسرة اها لما سالوني انا جاوبت بصراحة والله يا جماعة انا اول مرة احتفل براس السنة وما عارف ذاتو الناس بتحتفل والسنة الفاتت زي الوكت دا يا نائم يا في النادي لكن المؤكد اني كنت في واوسي التي ما غادرتها الا الى هنا ههههههههها
Post: #3 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-11-2020, 08:43 PM Parent: #2
في العصريات امشي مع ابوي للزراعة او بالاحرى الحق به اشتغل شغلانات خفيف كابن مزارع حتى المغرب نحلب بقرتنا ونمشي البيت مرة كان بكرة ابوي عندو موية في الطماطم اها قال لي جهز كم لبقة استعدادا للموية بكرة اللبقة هي ان تغلق بالتراب الموية من الجدول الرئيسي وتوجها نحو جدول فرعي يسقي بعضا من سرابات وعندما تتملي السرابات تغلق وتفتح الموية في الجدول الرئيسي ليذهب لجدول فرعي ويروي سرابات وهكذا فكنت اقفل واعمل لبقة لكل جدول فرعي جاء جار ابوي في الزراعة وصاحبو وقال لي توقف الشغل طوالي دا امل اكتر من اللازم خلي ابوك بكرة اعملا ابوي بسمع الكلام قال لي خلاص وقف وقفت وانا ما رضيان عشان عاوز اساعد ابوي وبكرة الصباح بكون براهو وهو كبير في السن المهم امتثلت ووقفت عمنا اخد كلمتين تلاتة مع ابوي ومشى ابوي طوالي اداني الطورية وقال لي واصل وسالته ليه قبيل وقفتي قال لي يا ولدي دا اسمو جبر الخواطر الراجل تدخل ولو ما عاوز اكسر خاطرو انت ترتاح شوية وهو بفوت وبعد دا تواصل.... جبر الخواطر قيمة انسانية وسودانية عظيمة من يومها وحتى الان احاول الا اكسر خاطر زول؛
جبر الخواطر ياخ حاجة سمحة
Post: #4 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-11-2020, 09:07 PM Parent: #3
Quote: وقال لي توقف الشغل طوالي دا امل اكتر من اللازم خلي ابوك بكرة اعملا
عمنا دا كان وكت القصة كان في مطلع الستينات من عمره المديد متزوج اكتر من سيدة وبلا اطفال؛ وابوي علق على كلام الامل دا وقال لي فيما ما معناه عمك دا بتكلم عن الامل الزايد وهو لي هسا بفتش للعرس وعاوز الذرية عمنا دا تزوج فعلا بعد الكلام دا امكن باكتر من 10 سنوات وفعلا رزق باطفال جميلين والله انا بعد ما جوهو الاولاد رجعت من برة وسجلتا زيارة مخصوص للسلام عليه في بيتو برا لابي كونه صديقه الحميم وتهنئته بالاطفال الحلوين الذين جاءوا على كبر عمك بعد تعب عرفني ما زال مبسوطا عمنا دا ويضحك سن سنين تعال يا محمد وامش يا احمد المهم لا معنى للحياة بلا امل امل راجيهو لي باكر امل وبدر
Post: #5 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-11-2020, 09:19 PM Parent: #4
وبمناسبة الطورية مرة ابوي الظاهر شاف شغلي معاه فيهو كسل شوية قال لي:امسك في قلمك دا قوي طوريتنا دي ما بتقدر عليها هههههههها ........................ سبب التعديل: تعديل الكلمة البعد قلمك دا من كويس ل قوي اتذكرت انو ابوي قال لي قوي وليس كويس فعدلتها عشان المصداقية وكدة
Post: #6 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-11-2020, 09:30 PM Parent: #5
وبمنسبة القلم لاحقا ابوي غير رايو ودعاني للعمل لكن ما بالطورية مشيت مصر وانا بعد برلوم وجيت السعودية عمرة ورجعت السودان وجبتا لابوي ريحة ون مان شنو وعراريق رهيفة وجلاليب وعمم وجزمة كشف وعصرت مصاريف لابوي في ايدو المهم بعد كم اسبوع قتا ليهو ياحاج انا مسافر علي العديلة يا ولدي وين ماشي قتا ليهو مصر للقراية قال لي يا زول هوي مصر ان بتمصر فيها امشي السعودية دي محل القروش ولكن يا ابوي لسا عندي قراية رد سريعا القريتو دا كفاية خلاص ................ الغريبة مشيت مصر وقعدتا 4 سنين عاشم الحب والثورة ورجعت تاني السعودية عمرة بعد التخرج ونزلت في نفس شقتنا القديمة مع اصحابي الخريجين الكنت نازل معاهم قبل نحو 4 سنوات وما زالوا يقول لي عبدالمنعم البرلوم ............. الامل سمح
Post: #7 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-11-2020, 10:20 PM Parent: #6
اشتغلنا عمل اضافي هنا في الرياض انا وصاحبي عبيد مع واحد صاحبنا وحبيبنا وتاخر في اعطاءنا المبلغ المتفقين عليهو بعد انتهاء المشروع وفي الايامات ديك توفت فجاة ابنته الكبيرة حزنا عليها شديد وبعدا بكم شهر سالتا عبيد يا زول قريشتنا العند فلان صاحبنا خبرا شنو رد عبيد حاسما: الموضوع دا تنساهو خالص ما ممكن ياخ تكون علي الزول دا اتنين نحنا والدنيا ................ عبيد حكيم
Post: #8 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-11-2020, 10:30 PM Parent: #7
الشكلة دورت في النادي بين شابين اصحابنا واهلنا احجزك احجزك حجزناهم انا في فريق مع مجموعة ماسكين واحد والتاني عاد بعيد شوية بهدوا فيهو شباب تانيين قوم في مجموعتنا واحد بائخ قال لي الولد بتاع الشكلة: قوليهو اتا اختك مش حملت من خطيبا وكانت في شاعة زي دي مدورة في الحلة الولد بتاع الشكلة طوالي اتلفت للبائخ وقال ليهو: والله ما بقولو كدة دي شكلة بسيطة بكرة بتنتهي لكن الكلمة الزي دي عمرا ما بتروح
تصدقوا الزول دا لحدت هسا هو ذاتو ما عارف انا مصاحبو ليه ..................... قيمة انسانية عظيمة من صاحبنا البسيط .............. شعب معلم
Post: #9 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-11-2020, 10:44 PM Parent: #8
اشتركنا ديانا نحن تلاتة اخوان اخونا نزل السودان وشغال في الدينا وكانت الفكرة هي ان يدفع منها مصاريف البيت الكبير وفعلا كم شهر بسلم ناس البيت مصاريفم شوية كدة بقت تجي تلفونات من السودان للمصاريف للبيت الكبير خلاص رجعنا نرسل المصاريف بعد سنة سمعنا ان دينتا تحولت لحافلة كلمت اخوي الكبير وهو غير شريكنا وباركتا ليهو الحافلة الجديدة هههه وقتا ليهو زولك دا ما بشاور مش عندو شركاء برضو اخوي الكبير قال : شوفو الحافلة دي لو بقت رقشة زول يجيب خبرا ول اتكلم عنها تاني ماف خلاص الموضوع يتقفل على كدة وفعلا اتقفل على كدة والحافلة ذاتا راحت وبقت الخوة راسخة .... اسرة حكيمة
Post: #10 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-12-2020, 00:24 AM Parent: #9
استاذي المرحوم معتصم محمد علي معتصم كيمياء قال لينا في اول حصة في فصل المتنبي في اولى ثانوي في مدرسة الجيلي الثانوية... يا شباب شدو حيلكم خريج الثانوي يا دوبك بشتغل كمساري في بصات ابورجيلة الاخطاء الصغيرة بنغفرا ليكم والكبيرة ما بنتوقعا منكم والزمن دا بدور بسرعة فوق تخيلاتكم شدوا حيلكم واقروا جامعة ليست للوظيفة فقط ولكن لتوسيع المدارك خلوا طموحكم عالي ولا ترضوا بانصاف الحلول اقابله متقطعا طوال الفترة منذ تخرجنا من الثانوي في النصف الثاني من التمانينات وحتى 2017 هو من الجزيرة اصلا ولكنه اتخذ الجيلي وطنا ومنزلا قابلته اخر مرة في مدرسة ثانوية خاصة في المصفا وهو مديرها وتوفي بعدها فجاة بشهور ولكن تظل كلماته واستاذته تنير الدروب لكثير من تلامذته على امتداد الوطن .............. استاذي العظيم
Post: #11 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-12-2020, 05:08 PM Parent: #10
مرة بفتش لحاجة في البيت لحظة لقيتا تلفظت بكلمة مخلة بالاداب العامة الغرفة كانت فاضية ما انتهيت من كلمتي الا وابوي في وشي وسمع الكلمة خجلت وعرقت وغلبني اتصرف ابوي قالي بكل هدوء الدنيا انتا ما متوقع اجي داخل ولو شفتني ما قتا الكلمة دي؛ اعتبرني ما سمعتها لكن ما تعود لسانك على الكلام الزفر كان ذلك وانا بعد صبي حتى تاريخه لا اقول لي كلمات مخلة خلاص لساني ابا النوع دا تب ...... ابوي استاذ عظيم
Post: #12 Title: Re: قصص من الدنيا؛ وبعض من حكاوي... Author: Emad Ahmed Date: 06-12-2020, 06:59 PM Parent: #11
تحية واحترام أخي منعم
متابعة بمتعة لجزالة ذكرياتك
ياريت تتحفنا بصور لتلك الايام الخوالي
لو أمكن ذلك ..
تقديري
Post: #13 Title: Re: قصص من الدنيا؛ وبعض من حكاوي... Author: Arif Nashed Date: 06-12-2020, 08:13 PM Parent: #12
حضور ومتابعة.
Post: #14 Title: Re: قصص من الدنيا؛ وبعض من حكاوي... Author: muntasir Date: 06-12-2020, 08:28 PM Parent: #13
دائماً هي تلك الأشياء الصغيرة التي تحدد ما سنصبح عليه مستقبلاً شكراً منعم
Post: #15 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-12-2020, 11:52 PM Parent: #12
Quote: تحية واحترام أخي منعم
متابعة بمتعة لجزالة ذكرياتك
ياريت تتحفنا بصور لتلك الايام الخوالي
لو أمكن ذلك ..
تقديري
هلا عمدة تحياتي لمرورك العطير ياخ شرفتني وشرفت البوست يا كبير عارف والله فكرة الصور دي فكرة جهنمية خلاص حا ارفع صورة ابوي لخصوصيتها وندرتها فهو يلبس العراقي والسروال الطويل والتوب في اي مناسبة شيخ عرب هكذا كان يفعل كبارنا للاسف الشديد اللبسة دي كادت تنقرض يلبسها الان فقط اخوي احمد رفعه الله فهذه فرصة لحفظ الصورة جبتها توا بعد مداخلتك من قروب الاسرة ابي عاش قرابة المية عام وتوفى مطلع التسعينات فهذه صورة من الزمن السمح ياخ لما كنت اشوف ابوي التوب الابيض الجميل والمركوب والعصاية ليتكي عليها وهي برضو من تمام اللبس كنت اسعد اي ما سعادة ولروحه الطاهرة المطمئنة الف هناء وسعادة
Post: #16 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-13-2020, 02:36 AM Parent: #15
هلا ياعارف شرفت البوست ياخ البوست مفتوح للاعضاء لكتابة اي قصة او موقف مؤثر وفيه مفارقة وحكمة وعمق ...... في نادينا في الحلة عمنا فيصل اكبر موظف في الحكومة ونهاية الدوام بعتل عيش سكر فحم اي حاجة شغل عضلات وكان وقتها كبيرا المهم شاف اتنين من تجار السكر ماشين علينا مرتاحين وجلاليبم نضيفة قال قولته الشهيرة: والله في ناس في الدنيا دي عايشين بالفكرة بس؛
Post: #17 Title: Re: قصص من الدنيا؛ وبعض من حكاوي... Author: جلالدونا Date: 06-13-2020, 06:52 PM Parent: #16
سلام عبدالمنعم مع انك مشاكلنى لكن الحاجة السمحة بتعجب برضو فوق و متابعين
Post: #18 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-13-2020, 07:34 PM Parent: #17
يا سلام عليك يا منتصر ياخ
Quote: دائماً هي تلك الأشياء الصغيرة التي تحدد ما سنصبح عليه مستقبلاً
فعلا ملاحظتك عميقة كلمة واحدة قد تاثر في تغيير مجرى حياتك للابد كلمة محفزة ............... والكلمة المسيخة برضو ممكن تكون دافع للابداع ................ صاحبنا في مكة يحكيي انه مشى لخاله المرطب لاستلاف مية جنيه لاتمام تكاليف العمرة خاله قال ليهو انتا هنا نجحت شنو عشان تمشي كمان السعودية انت كمساري وحا تبقى كمساري في باظي دا للابد المهم صاحبنا دبر المية 100 جنيه وجاء عمرة واتوفق بعد سنتين رسل قروش لاهلو اشتروا بص بنفس المواصفات وهكذا بعد كم سنة اشترى بكسي برضو قاعد لما تم 7 سنوات قنا ليهو ياخ انت رطبت شديد ارجع لاهلك امك وابوك مشتاقين ليك وعندك بص وبكسي قال: والله لكل ما اتذكر موقف خالي دا معاي بديها سنة لسا طمعان في الزيادة
Post: #19 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-13-2020, 08:19 PM Parent: #18
Quote: سلام عبدالمنعم مع انك مشاكلنى لكن الحاجة السمحة بتعجب برضو فوق و متابعين
جلال يا حبيبنا كيفك ياخ سلام وشوق الله عالم مشاكلك شنو ياخ دا نقاش عادي ليهو سنوات وبعدين مرت مياه كتيرة تحت الجسر وفوقه ايضا اتنصر شعبنا بازالة رموز الطغيان وما زال يحفر عميقا لردم المغتغتين وفاضين وخمج والثورة مستمرة وسننتصر وترجع الدروشاب وتراني جمبك ممكن تمشي برجليك وصديق عمري بيتو في الدروشاب ...... وين صاحبنا ود المدير ياخ ليهو التحايا وطول الغيبات اكيد جائي بدرر وغنائم ..... عمنا فيصل الفوق دا مرة في النادي جاب طحنية وعيش كمية من الفرن القريب من النادي وشلة الكوتشينة اكلت وعرقت وساله صديقه يا عم فيصل من اين لك هذا؟ قال مشيت لاولاد خالتي الكوزين ديل سلفوني 10 الف واضاف: مغفلين ومغفلين دي شجعت ماو الذي سال عمه؟ بترجعم يا عم فيصل رد سريع: ارجعم من وين؟؟ واضاف: هم ضاربم فيهن حجردغش ........... اكل تورك واحتفظ بالتصنيف لزولك
Post: #20 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-14-2020, 03:15 PM Parent: #19
عمنا قريب الله رجل متقدم في السن يعيش وحيدا ومحبوبا ومسالما مرة لظرف ما جارو لقاها بالليل يتحاوم في حوشو ياعم قريب الله اخبارك الجابك شنو بالليل تتحاوم لم يقدم عمنا قريب اجابات مقنعة مسكه صاحب البيت من يده وقال ليهو: ياعم قريب الله تمشي معاي للشرطة، امسكك ول بتمشي معاي ساهي؟ عمك قريب الله رد: الضمان المسوك فصارت مثلا ................ كنا في الثانوي يقابلنا عم قريب الله في السوق ويسالنا نفس السؤال عارفين يا اولاد الدنيا دي زي شنو زي شنو يا عم قريب الله ينبسط يجلس ويخلع مركوبه ، يتحرر المركوب والرجل كليهما؛ يشير لمركوبه الحر ,يجاوب سعيدا: زي مركوبي دا
............. فلتة زمانو يقول بعضهم انه مجنون انا متاكد هو اعقل من كلهم .................. ولكنها الدنيا
Post: #21 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-15-2020, 00:39 AM Parent: #20
أمي عليها سلام فقدت باكرا الولدا والولدا وفقدت الاخت ولاحقا زوج البنت والزوج والاب ولكنها ظلت سنديانة صلدة ومتماسكة، اسفنجية... تمتص الاهات ولا تقهر كانت امام الاحزان جبل جبل من الصبر والصمود والحكمة وعندما توفت امها جدتي ذهبت للتعزية من مهجري لموطني فالسيدة كانت بمثاسبة امي هي فعلا امي كانت تقول لي بركة بطني الشافتك قبال عيني وجدت امي غير تلك التي عرفتها مثالا للصبر والايمان والقوة وجدتها يلفها حزن عميق حاولت ان تتماسك ولكن كان الحزن يطفح كل ساعة على محياها الجميل وتغيرت وظل الحزن على والدتها يتملكها تماما رغم انها كانت في حوالي السبعين من عمرها كان عمري امي؛ اما جدتي فقد تعمقت في عقدها العاشر وربما تجاوزت المية عام ولكن تظل الام اما حدثني لاحقا اخواتي ان والدتهن ما ان تسمع بوفاة في الحلة والا تبدا البكاء من البيت تبكي امها وتظل هكذا في مكان العزاء تبكي امها وظلت حزينة حتى لحقت بها في تمام صحتها وجمالها ولكن هدها الحزن وقتلها الفراق بعد سبع سنوات من غياب امها المرير سبع سنوات عجاف حزني على امي مثل حزنها على امها بل اكتر كونها عاشت مع والدتها زهاء السبعين عاما وربما اكثر وانا تقريبا نصف المدة وكونها لم تفارقها ابدا طوال السبعين عاما حتى الفراق الاخبر انا لم ابلغ العشرين بعد، والا وغادرت امي ووطني وظللت هكذا بين مجيء وغياب حتى غادرت الوسيمة وغابت للابد واظلمت دنياي ساكَن دمي هم
.................. هذه الوسيمة من تلك الاوسم
Post: #22 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-15-2020, 04:55 PM Parent: #21
فوق
Post: #23 Title: Re: قصص من الدنيا؛ وبعض من حكاوي... Author: محمد على طه الملك Date: 06-16-2020, 07:40 PM Parent: #22
فوق عديلك انت دا .. ما تسكت.. اسلانج يعني شنو ؟ يللا افتح.
Post: #24 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-17-2020, 04:22 PM Parent: #23
Quote: فوق عديلك انت دا .. اسلانج يعني شنو ؟ يللا افتح.
هلا بالحبيب محمد طه الملك تحياتي يا اصيل قلنا نطلع شوية من المود بتاع السياسة الصعب دا شكرا لمرورك العطرِ واهلنا قدموا من الشمال ديار المحس قبل مئات السنين ولكنهم مازالوا يتمسكون اعتقد اسلانج بلغة المحس تعني حاجة كدة غايتو في المركب قد تكون الشراع او ربما المجداف او الدفة وامكن الهلب وزي الشراع كدة هههههها كل الاحتمالات وواسي يترجمها اهلنا يا نجم واخرا اتفقنا انو الترجمة لها النجم الساطع
Quote: ما تسكت..
راكبين مرة في حافلة المغرب من بحري وماشين الحلة الحافلة جلها بنات جامعيات يتكلمن كلهم بصوت واحد واحد دكتور عصام والمحاضرة وفطرنا ليك وزملينا محمد وصاحبنا يسن البقرا احصاء والقانون دا صعب والعجب لمحاسبة المهم في اعمامك اتنين راكبين في الحافلة ومتضايقين من كلام الطالبات الكتير دا عمك واحد منهم نهر البنات هوي يا بنات اسكتن صدعتن بينا عمك المغيوظ التاني رد قائلا: السكات حليلو
..................... حليلا الاصبحت ذكرى
Post: #25 Title: Re: قصص من الدنيا؛ وبعض من حكاوي... Author: محمد على طه الملك Date: 06-17-2020, 08:32 PM Parent: #24
اهو طلعت من اندينا .. كنت ناوي اجي ادق ليك خروج من الجزيرة عندي سؤال شاغلني برضو .. الشيخ إدريس ود الارباب أبو فركة .. كل البجيب سيرتو بقيف عن ود الارباب .. ياريت لو بتعرف او كباركم بعرفوا تتموا لينا الاسم كامل رباعي .. عندنا جدود ضايعين مننا .. قالوا اتشاكلوا مع ولاد عمهم وفرتكو سواقيهم ورحلو .. هسه لمينا في احفاد احفاد واحد منهم .. قالوا هم الصغيروناب احفاد شيخ الزين صغيرون.
Post: #26 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-17-2020, 09:21 PM Parent: #25
Quote: كل البجيب سيرتو بقيف عن ود الارباب ..
عمي السيخ يحسب شجرة عائلته الشيخ حسن عبدالقادر بشيري ... .... .... .... الشيخ ادريس ود الارباب تف البحر خلاص بعد الشيخ ادريس ود الارباب تاني مافيش حاجة ولاحظت ان اهلنا كلهم يكتفون بالوصول لجدهم الشيخ ادريس ودالارباب هسا انا رجعت للنت طبعا الاسم اكيد معروف عندنا كتب يا رجل
إدريس بن محمد الأرباب بن علي بن إدريس بن فلاح. والدته صليحة بنت الشريف أبودنانة . من قبيلة المحس
Post: #27 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 06-17-2020, 10:37 PM Parent: #26
شهوري الاولى في الرياض كنت شغال مدرس خصوصي، اها جاني طالب بعيد وما عندي غير حق الذهاب بالمواصلات العامة من سنتر البلد لحدت بيت الطالب ولا عندي حق الرجوع، توكلت ومشيت، وصلت بيت الطالب وجاني ابوهو ودا امر طبيعي خاصة في اول حصة يشوف ويطمئن على الزول الحا يدرس ولدو ربما سنوات وهذا ما حصل مع الطالب لحدت ما تخرج من الجامعة وكان وقتها في تانية متوسطة، المهم ابو الولد السعودي بعد تعارفنا وقال لي خلاص شهر بكدة ياخ قربت اطير من الفرح لانو لو سالني كنت قتا ليهو نص المبلغ دا، ولسا، ما تكونوا نسيتو انو في جيبي مافي ولا هللة والمسافة بعيدة؛ تصدقوا الراجل دخل ايدوا في جيبو وطلع 500 ريال وقال لي اتفضل يا زول دا عربون؛ وشد حيلك مع احمد هو شد حيل لكن، الله يستر ما ينقطع بس؛ رجعت بي ليموزين واشتريت عشاء بروست للعزابة معاي في الشقة وحولت 100 ريال لامي؛ وقربتا افتري ههههههه
Post: #28 Title: Re: قصص من الدنيا؛ وبعض من حكاوي... Author: جعفر محي الدين Date: 06-18-2020, 04:24 AM Parent: #27
شكراللتطواف في محراب التجارب الثرة يامنعم استراحة ضرورية في زمن الكورونا لكن بالغت مع رأس السنة
Post: #35 Title: Re: قصص من الدنيا؛ وبعض من حكاوي... Author: جعفر محي الدين Date: 06-18-2020, 07:13 PM Parent: #27
شكراللتطواف في محراب التجارب الثرة يامنعم استراحة ضرورية في زمن الكورونا لكن بالغت مع رأس السنة
Post: #37 Title: Re: قصص من الدنيا؛ وبعض من حكاوي... Author: جعفر محي الدين Date: 06-19-2020, 12:49 PM Parent: #27
شكراللتطواف في محراب التجارب الثرة يامنعم استراحة ضرورية في زمن الكورونا لكن بالغت مع رأس السنة
Post: #146 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 09-28-2022, 09:53 PM Parent: #22
اب
Post: #95 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 07-25-2020, 07:47 AM Parent: #8
فوق
Post: #31 Title: Re: قصص من الدنيا؛ وبعض من حكاوي... Author: Khalid Abbas Date: 06-18-2020, 09:36 AM Parent: #3
Quote: جبر الخواطر ياخ حاجة سمحة
ياسلام فعلا حاجات بسيطة لكن بتوريك نسبة الذكاء والحكمة واصل متابعين
Post: #200 Title: Re: قصص من الدنيا؛ وبعض من حكاوي... Author: عبدالمنعم الطيب حسن Date: 10-23-2023, 02:47 PM Parent: #2
Up
Post: #29 Title: Re: قصص من الدنيا؛ وبعض حكاوي... Author: عمر السلمة Date: 06-18-2020, 07:40 AM Parent: #1
السلام عليكم ورحمة الله وبركاته والله فعلاً حكاوي فيها الكثير من العِبر والدروس ياخ الدينا دي ممكن بكل بساطة الناس تعيشها .. لكن نقول الله غااالب .. ** قبل كم سنة قابلت اخوك في حي المؤنسية او قرطبة ما متذكر في بيت زميلنا *** وكمان عمر علي الفكي اخ وزميل دراسة في جامعة الجزيرة تحياتي
Post: #30 Title: Re: قصص من الدنيا؛ وبعض حكاوي... Author: Ahmed Yassin Date: 06-18-2020, 09:17 AM Parent: #29
يا سلااااام يا ابوحسن ياخ انت مدهش. حقيقي مدهش .. صراحة الواحد البوستلدات الزي دي بخاف يعلق عشان ما نخرب جمال الحكي ولا نقطع متعة القراءة مرة واتنين وتلاتة .. على القراء واحدة من قصصك . كمثال للاثر السلوكي والنفسي البتتركوا ظاهلنا ( شكلة النادي .. واحد قال قول ليهو اختك ... ) فرفض والشكلة دي اصلا حتنتهي بعد ساعة او يوم او سنة ولكن ( الكلام الشين) حيظل للابد محبة كبيرة في قلبي
Post: #32 Title: Re: قصص من الدنيا؛ وبعض حكاوي... Author: محمد عبد الماجد الصايم Date: 06-18-2020, 10:15 AM Parent: #30
يا سلام يا منعم .. حكاوي طاعمة والله ..
متابعين بدون هرجلة من الناس ديلاكـ
Post: #33 Title: Re: قصص من الدنيا؛ وبعض حكاوي... Author: جمال ود القوز Date: 06-18-2020, 10:31 AM Parent: #32
روعة يا منعم .. سردك جميل جدا لانه واقعي
أسي آنج آرتي : جزيرة ماء الحياة .. اللام دي ربما أتت تخفيفا .. إسلانج : أداة خشبية يتم وضعها في رقبة التورين للمحراث غايتو نحن عندنا بنقول ليه إسلايم - أو إسلام تخفيفا ربما اللفظ النوبي القديم إسلانح وتم تخفيفه كذلك .. ربما .. الناس الأقوى مننا في الإنداندي زي عمدتنا الملك.. والارتاوي الرائع علي عبد الوهاب ربما يفتونا في الاسم أكثر .. لكن هو نوبي دي ما دايره ليها شيل بطاارية .. أغلب سكان الجزر كانوا من الرواسيه المحس .. حتى في مناطق جنوب دنقلا .. وطلعوا من الجزر في البر الغربي بعد الفيضانات التي أغرقت الجزر وحاصرت سكانها قديما .. الكبار منهم لازالوا يجيدوا اللغتين .. أما الأجيال الصغيرة فحدهم الدنقلاوية وما فالحين فيها شديد برضو ..
واصل يا منعم متابعنك ..
Post: #34 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-18-2020, 03:26 PM Parent: #33
Quote: شكراللتطواف في محراب التجارب الثرة يامنعم استراحة ضرورية في زمن الكورونا لكن بالغت مع رأس السنة
هلا بالاستاذ جعفر شرفت البوست والله احكي ليك حكاية ركبنا حافلة المغرب من الجيلي ووجهتنا بحري مالك الحافلة وسايقا في نفس الوكت من الجيلي يعني ود المنطقة وبعرف اسودا وضبعا وناسا وكنت عريس باين الحنة اي راكب يركب جديد يعاين ويتاكد بالحنة في ايدو اليمين وينبسط كدة السودانيين ينبسطون للعريس والعرس يلا شوية كدة جاء فريق كامل عاوزين يركبوا لحد السقاي 15 كلم او اقل وهم شباب وما حا يدفعوا؛ حتى مافي جيوب يشيلوا فيها الفلوس اردية كورة بس الكمساري رفض السواق قالو خليهم يركبوا ركب الشباب شماعتن واحسوا بالانتصار على الكمساري سالتهم بس يا شباب اوعى تكونوا مغلوبين؟ رد واحد بصوت منخفض: غالبين والتاني تجاهل اجابة اخوهو قال: والله يا عريس مغلوبين1-صفر لكن كان معاهم الهواء والحكم المهم جو من المرح بدأ يتسرب للحافلة.. شوية كدة نزل الفريق وتنسمت الحافلة من الزحمة في سيدة كدة كبارية (كما يقول الفاضل سعيد) وروحا حلوة استلمت الحافلة وحكت:ان الحرامي تلب علي بيت حاجة كبيرة وساكنا براها الحاجة صحت الحرامي قاليها: هسسسسسس ياحاجة الحاجة ردت: هس عاد كيفن في بيتي يا ولدي!!! يا ولدي دي كهربت الحرامي وكهربت الحافلة وركابا (والكمساري ذاتو تابع القصة طبعا في العادة الكمساري لايتابع لانو القصص بتاعة الركاب لانها كتيرة) واصلت السيدة الحكي؛ اها ذاب الجليد بين الحرامي وست البيت ؛ كما ذاب بين ركاب الحافلة والحرامي ذاتو قعد على طرف سرير فاضي جنب الحاجة وكلمة يا ولدي دي كسرت الرجل وقال للحاجة والله تاني ما اتلب بيت ولا اسرق حاجة قاليك في النهاية الحاجة قالت ليهو: شيل ليك حاجة بِسَيْطة كدة ما ترجع فاضي رفض الرجل ان ياخد شيئا من الحاجة وغادر بالباب هذه المرة.... بعد شوية واحد عمل شكلة قال فوتوني محطتي بعد تعب اقنعناه ينزل والمسافة قريبة والحافلة ترجع تاني للمحطة بتاعك القريبة صعبة وانت شاب واصلا تكلمت بانك نازل متاخر المهم نزل يطنطن بعدا ناديت الكمساري وقلت ليهو: انا نازل في المؤسسة الايه؟ المؤسسة المؤسسسسسة اوعك تفوتني اهو كلمتك من بدري عشان بعدين ما تقول ما كلمتني ومتاخر وبتاع طبعا كنا تونا في االسقاي والباقي من المؤسسة اقلاها 30 كلم الكمسار استغرب شنو المحطة البنبهو ليهو من هسا دي المهم الكمساري قال للعروس: العربي دا اقبضي فيهوشديد ما تخليهو براهو بروح في البنادر دي ههههههههها
................ في الحافلة كل الركاب احباب
Post: #36 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-18-2020, 10:46 PM Parent: #34
Quote: ياسلام فعلا حاجات بسيطة لكن بتوريك نسبة الذكاء والحكمة واصل متابعين
شكرا خالد عباس للمرور، في تالتة ثانوي بعد امتحانات الشهادة السودانة لفينا نحن دفعة واصدقاء جبل اولياء لاصدقاءنا هناك، وقعدنا في بيت كل صديق يوم اي اسرة مشينا ليها ضبحولينا واكرمونا غاية الكرم في جبل اولياء ديم البساطاب وفي الحلة الجديدة وفي ايد الحد وفي السلمانية وكان البرنامج كالاتي كل واحد يقول بكرة المجموعة معاي وبعدها فلان حدد وحجز بعدها السفر لعد بابكر والجيلي وواوسي بما فينا اولاد الجبل وحلة بابكر شرق النيل الوحيدة النمنا فيها كلنا كمجموعة صالون فخيم واسع واسرة يا ما اما في الجبل وواوسي والجيلي اولاد اي حلة يتونسوا ويغادروا ليلا لبيوتهم وكل المجموعة جاءت الجيلي وواوسي وكانت لفة طويلة المهم في كل بيت نقيل ونبيت ونستانس وقد يدور الوست نهارا والعصروبالليل نمشي النوادي ونلعب كرة طايرة ووست اي بيت ضبيحة يا رجل انبسطتنا واتنونسنا وقربنا نسمن هههها المهم في واحد لافي معانا المناطق دي كلهم ومستلم الونسة والتنظير اها باختصار ما وجه اي دعوة للقروب مع انو وضع اسرته الاقتصادي احسن من اي اسرة زرناها لكن الفسل دا كعب ياخ تصدق لسا الاصدقاء ديل متواصلين كلهم لا منعنتنا الظروف من التواصل لا فرقتنا محنة الا صاحبنا دا انقطعت علاقتو بالشباب والغريبة بلاقيني كتير ويحاول ينعش العلاقة ويستانس معاي طبعا انا كزول( قديم) بمشي معاه الزول دا قد يكون عندو اصدقاء اخرين واسرة واحباب انا لا اكرهه ولكنه ليس صديقي ......... معظم السودانيين ان لم يكن كلهم كرام وبشيلوا فوق الدبر والدم ولكن النوعية دي موجودة في السودان،
الصفحة دي الاصعب تحريرا في نهايتا وترنتي عديل كدة لكنه ملمح من الحياة لابد من المرور عليه شكرا خالد .................... الفسالة بطالة
Post: #38 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-19-2020, 05:23 PM Parent: #36
Quote: السلام عليكم ورحمة الله وبركاته والله فعلاً حكاوي فيها الكثير من العِبر والدروس ياخ الدينا دي ممكن بكل بساطة الناس تعيشها .. لكن نقول الله غااالب .. ** قبل كم سنة قابلت اخوك في حي المؤنسية او قرطبة ما متذكر في بيت زميلنا *** وكمان عمر علي الفكي اخ وزميل دراسة في جامعة الجزيرة تحياتي
مرحب عمر السلمة نورت البوست نعم اخوي حسن الطيب حسن يعمل في حي قرطبة وعمر علي الفكي حبيبنا وصديقنا وعمر دا يسكن في اجمل منطقة في واوسي تصدق ليس بينه وبين النيل الا ضفته انت في البيت تشوف الموية وطبعا الخضرة والنسيم العليل يا سلام ياخ واحد طويل جدا من من اهل عمر خطب بت طويلة من حلتنا واحد ظريف من حلتنا لاقى العريس قال ليهو: اسمع عاوز تعمل فرريق كرة سلة ول شنو
شكرا عمر
Post: #39 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-19-2020, 06:41 PM Parent: #38
Quote: يا سلااااام يا ابوحسن ياخ انت مدهش. حقيقي مدهش .. صراحة الواحد البوستلدات الزي دي بخاف يعلق عشان ما نخرب جمال الحكي ولا نقطع متعة القراءة مرة واتنين وتلاتة .. على القراء واحدة من قصصك . كمثال للاثر السلوكي والنفسي البتتركوا ظاهلنا ( شكلة النادي .. واحد قال قول ليهو اختك ... ) فرفض والشكلة دي اصلا حتنتهي بعد ساعة او يوم او سنة ولكن ( الكلام الشين) حيظل للابد محبة كبيرة في قلبي
هلا اخي احمد يسن شاكرا لمرورك الكريم نورت البوست
خصمي في تالتة متوسطة، يعتقد انه رجلا... مع انه مازال طفلا بعد؛ انا في تانية ثانوي، ما أطوِل عليكم، تعاركنا في التمرين، ركلست مع بعض اقراني في ذات الميدان، وقعدنا نتونس، كنت قد نسيت موضوع الشكلة التي لتوها، لكن زولي الظاهر ما كان قد نسى، مشى بيتهم البعيد عن الميدان، وجاب عكاز ابوهو المضبب، ونحن في غمرة ونستنا جاء الولد، وقبل ان يصلنا انذرني قائلاً : يا زول استعد انا جيتك... وقفت مع الشباب الموجودين، على حيلي، الولد لا يحتاج لاستعدادات ذات بال، فهو اصغر مني عمراً، وحتى عندما كنت في عمره، كنت اطول منه، فهو قصير القامة خفيف الجسم وقتها؛ لا اتذكر عميقا التفاصيل حول نهاية الشكلة التي كانت سريعة، فواضح ان الحجازين هم اقراني، سرعان ما سيطروا على الولد والعكاز المضبب، لم اكن مندفعا في الشكلة، فالولد اصغر مني، وكنت ارى المسالة برمتها عيب، كان يمكن ان يغدر بي، ولكنه لم يفعل... اكبرته حينها، وما زلت لا ادري، ان كان صديقي خضر الشيخ ادريس، يتذكر المسالة، لم نتخاصم ابدا، ولم نتذكر هذه القصة ابدا خلال ونساتنا الطويلة الجزيلة، الممتدة لاحقا؛ عندما تلاحقت الكتوف، ولصديقي خضر التحية، اينما كان.....
Post: #40 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-20-2020, 07:32 PM Parent: #39
Quote: يا سلام يا منعم .. حكاوي طاعمة والله ..
متابعين بدون هرجلة من الناس ديلاكـ
هلا محمد الصائم نورت البوست يعلم الله وابهجتو بضحكتك الصادقة من الاعماق ههههها الجماعة البهناك مهرجلين هرجلة شديدة عشان كدة شتتناها ليهم ههها تاني خلاص قيقراوي بس المهم شوف المرفق التحت كتبو زميلي من الثانوي وصديقي في الحلة اقراهو
Quote: عوض ود فطين المكي استاذ منعم لك التحيه...مبدع في استدعاءو تداعي المعاني والعاطفه متي شئت...ولعل ذلك امتداد طبيعي ورافد لشلال الابداع الذي يجري في اسرتكم الكريمه من نباهه..وشغف بالعلم والمعرفه..والشعر الذي انعكس في سلوك افراداسرتكم...والنظره التفاوؤليه ..والاستماع باللحظه وبما هو متاح من مباهج الحياة..وجبر الخواطر ..هو مالمسناه خلال استمتاعنا بالتعامل معك عن كثب..قيل أن والدكم شاعر مجيد...اكد لنا هذه المعلومه...اراك تذكر كثيرا ذكرياتك بمصر..ولعلها لها الاثر الكبير في تكوين شخصيتك...وتخلق ماتؤمن به من افكار ومعتقدات..لكن لم تتعرض لذكريات وقصص..السعوديه..عموما لك التحيه ...ومتابعنك...ملاحظه بسيطه تداعي الذكريات وشلال العاطفه في حكاويك طغي علي اللغه
و وبعدين حا اجيب ردي عليهو لاحقا تسلم يا وسيم وتحياتي للجماعة بهناك خليك قريب ما تبتعد
Post: #41 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-20-2020, 08:54 PM Parent: #40
هذا ردي لصديقي عوض ابراهيم عناية محمد ود الصائم كما وعدت في المداخلة اعلاه وكل الاخوة والاحباب وكل من تورط في هذا البوست ووصل هذه الصفحة
(هلا عوض صديقي واخوي عارف في مسالة لغة الكتابة دي ما قاعد ابذل فيها جهدا كبيرا ولا صغيرا بكتب هكذا عفو الخاطر بكتب مباشرة من الكيبورد للصفحة وما قاعد اراجع خالص الا الاخطاء الاملائية الفادحة للسرعة في الكتابة ودائما اركز على الفكرة او الموضوع او ما اود توصيله لذلك تظل اللغة وسيلة لتوصيل الفكرة وليس غاية في حد ذاتها ومرات اكتب بدارجية قحة لانو المقام هكذا كتاباتي اقرب للونسة في ضل ضحى والدنيا جمعة او انت راكب المواصلات ماشي للبلد او في اي مناسبة اجتماعية تجمع الاهل والاصدقاء وبتونسوا هذه مصادري للكتابة اكتب لهم وعنهم وبهم وبلغتهم نعم ابي شاعر مجيد كتب شعرا مترع بالانسانية وصفاء تلك الايام بدت في جمعه من افواه الحفظة واتمنى تدوينه وحفظه هذا تراث اعظم من ان يضيع بل ان الاشعر من ابوي هو عمي شيخ ادريس فهذا الرجل فلتة زمانه اتمنى برضو التدوين لهذا العظيم الغريبة نحن الابناء المباشرين لابوتنا الشعراء لم نقرض الشعر كما يفعل ابواتنا عدا محمود اخوي والاغرب ان الجيل التاني من الاسرة اولاد اخواننا واخواتنا شعراء مجيدين امين وعارف واسامة ونسيبة والدكتورة ريان وبدرالدين الامين واحتمال في تاني بس ما بلغونا)
Post: #42 Title: Re: قصص من الدنيا؛ وبعض حكاوي... Author: Hamid Elsawi Date: 06-20-2020, 10:27 PM Parent: #41
سلام عبد المنعم و شكراً لهذا الابداع سمعت بالأخ حللي و محمد جعفر من المنصورة وأيضاً من أصدقائي المهندس عمر محمد عمر و أظن كنا هناك في نفس الوقت درست بجامعة الاسكندرية و لكن طفشت منها و رجعت للثانوي مرة أخري و أكملت بجامعة الخرطوم من القصص اللطيفة هناك اليك هذه القصة التي نشرتها في بوست مجاور
المكان مدينة الاسكندرية الزمان في بداية حياتي الجامعية شقة متواضعة نعيش بها نحن 5 طلبة ... دخلنا محدود بالكاد يكفي مصاريف الشهر من ايجار وأكل وشراب. عمل المطبخ كان موزع بيننا حسب جدول المحاضرات الاكل كان عبارة عن فول و عدس و بطاطس كوسة بامية بدون لحمة. صديقنا في السكن قال عندي ليكم مفاجأة و كانت عبارة عن ملاح نعيمية بي لحمة مفرومة و طعمة شهي جداً. لكن كان الإحتجاج انه ده ح يخرب الميزانيه لكن اكتشفنا انه صرف قروش أقل من المحدد له و قال ده ملاح إقتصادي جداً. و شاع خبر هذا الملاح الاسطورة لدرجة انو بقينا نعزم زملاءنا في الجامعة للبروتين الحيواني المحرومين منه. تحدثت مع بعض زميلاتي عن هذا الملاح الإقتصادي و الشهي و كانت عندهم رغبة شديدة في التعرف علي كيفية طبخه لكن زميلنا كان حريص علي إخفاء الخلطة السحرية. بعد ضغط و الحاح شديد مني أخبرني بانه بشتري بيف معلب زي الساردين و التونة و يقوم بطبخه بالبصلة و يضيف اليه الويكة و ان علبة البيف رخيصة جداً. و عرفت شكل العلبة. فضول الزميلات و الحاحهم كان شديد لدرجة انو مشينا الدكان عشان أوريهم علبة البيف دي قدر ما قلت ليهم بتشبة علبة التونه و مكتوب فيها بلوبيف الا انهم أصروا أن نمشي الدكان و أوريهم ليها. عموماً ذهبنا و عندما أشرت اليها لم أسمع غير سجمي سجمي سجمي ووووب عليكم و كلام من هذا القبيل أصبت ب صدمة شديدة جداً .... و لكن زالت الدهشة عندما علمت بان هذا النوع من الاكل صنع خصيصاً للقطط و الكلاب.
تحية لكل زوار البوست
Post: #43 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-21-2020, 03:24 PM Parent: #42
جمال ودالقوز تحياتي خليك قريب يا حبيب ساعود
Post: #44 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-21-2020, 03:32 PM Parent: #43
الاخ العزيز حامد الصاوي تحياتي
Quote: حللي
اقرا هذا الكلام كتبته قبل نحو سبع سنوات عن صديقي احمد حللي
Quote: قبل التوغل ، بعد الاذن ... كلمتين في الخاص ، لصديقي هذا ... لو قدر له ، وتورط حتى هذه الصفحة
( هي تحية لك ارقرقها كالمسك ينفح من تامورك العطر ان رضيت بها ارفعتني فوق السماكين بل في هامة القمر وان زللت-وكم من منطق زلل-فاغفر لملتمس عفوا ومعتذر)
هاله من الاشراق هذا الرجل ، ليست كنار المجوس ، تضيء لساعة وتموت ... ولكنها هالة الحب ، من المهد الي اللحد تشع ... هو هدوء البحر عند شروق شمس ....هو اشتعال الشمس في ميلاد عرس حسب درويش ....
بين هدوءه ، وعند الاشتعال لايترك لك فكاكا ، مشرقا دائما ..... لم ارى في حياتي كارزيما بهذا التجلى سوى هنا ، كنا نسيمه القديس ... عالي الانسانية ، وهيطها ؛ اقل قصة فيها تراجيديا ، ممكن يصدع ويتوتر ... واي مشكلة عندو لها حلا .....
عشت مع الرجل مواسم الفرح كلها ؛ ولحظات الحزن الحزين جلها ؛ جمعتنا شقة واحدة ، سنينا عددا الاتنين فقط ... ولم يكن الشيطان ثالثنا... راسا لراس ... فيس تو فيس.....
حتى انني تحفظت ، ان اكتب عنه ، خوفي من الا اوفيه حقه .... فالرجل اكبر من أي كلمات ..... واخاف ان تنحاز عاطفتي ، فتضيع الحاجات ؛ صديقي ، واحبه بلا تحفظ .... تصدقوا كنا نخبي عنه الماسي ، ونائبات الدهرحولنا ... لا نريد ان نوتره ، وعندما يعلم شكلة ليها ضل ... ويلاحق ، ويستلم الامر ، لا يفرض نفسه ، ولكن تقدمه الاريحية ، والانسانية ... وينطلق ، لا يلوي ... ... ويحلها ... ....... كانت شقتنا ، ملتقي الطلاب ،والطالبات ... ابناء العمال ، من عطبرة وسنار ... ابناء المغتربين ، من الخليج والبحرين ... ابناء المهمشين ، من دارفور والدمازين ... حتى ناس من هناك بجونا ؛ ونحن المحسوبين بجاي .......... اختلفنا مرة ، وانا الغلطان ، وسامحني كام ... وكأن شيئا لم يكن ، وبراءة الاطفال دائما ، في عينيه ................................... عندما يغني بخاف اسال عليك الناس ... تسري طمانينة عجيبة وسط الحضور .... يعزف على العود ، كمحترف ، تعلمه في سجنه السياسي ... الرجل مهموم بقضايا الشعب ... ليست لديه ، انصاف حلول ... دائما في العلالي................
ملاك يداعب احلام العذارى ... والمسحوقين ... عنوان للوفاء ... حلم تشاهده العيون في ساعة صفاء ... يحب زهر البنفسج .... يحب اللون الابيض .... برزخ بين السهل والتل .... وفي افقه تصدح الكناري ، والنجم انيق .... و.....
Post: #45 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-21-2020, 04:12 PM Parent: #44
حامد الصاوي الاخ العزيز كتب سمعنا ب
Quote: محمد جعفر
من المنصورة هاك مكتوبي عنه في بوست في المنصورة كانت لنا ذكريات
Quote: يعد الدكتور محمد جعفر محمد الفاضل، واحدا من أكفأ واندر واشجع والطف؛ السياسيين الذين قدمتهم الحركة الطلابية بمصرا العظيمة، وقد شرفتني الظروف ان اعمل مع الدكتور محمد جعفر وجها لزميل، فعندما كنت برلوما، كان الدكتور على وشك التخرج، فلرجل طاقة جبارة للعمل المتواصل؛ فهو يخرج من اجتماعات الخلية، ليدخل اجتماعا لمكتب المجال، وبعدها ربما اجتماع المركزية، ثم اجتماعات اللجان السياسية التي لا تنتهي الا لتبدأ، والرجل متحدثا رئيسا في معظم الندوات التي تقيمها التنظيمات السياسية في المنصورة، وكادرا لا يشق له ركن؛ في الجمهورية من مدن القناة حتى مدن الصعيد، حتى اسكندرية كمان وكمان؛ وفي القاهرة له حضورا طاغيا ومحببا ومحبوبا... للرجل كاريزما لا تخطاءَها العين ولا الاذن، ولا العقل؛ وله جماهيره في كل مدن الجمهورية؛ لقد شهدت بعيني الدكتور محمد جعفر يخطب في الطلاب عز المطر عز البرد، لا الطلاب غادروا؛ ولا هو سكت حتى تم موضوعه... للرجل طاقة للعمل جبارة...ولم تجزله جماهير المنصورة، فقد خرجت المنصورة على بكرة طلابها وطالباتها، بكيزانها، وديمقراطييها، بانصار سنتها، وفلوترييها، باتحادييها وحزب امتها... كلهم خرجوا وجاءوا لمحطة القطار في وداع محمد جعفر محمد الفاضل، حتى ان المصريين الموجودين في المحطة استغربوا جدا ، فقد كان الوقت صباحا؛ وقد تجمع كل السودانيين في زمان ومكان واحد لوداع واحدا من الرموز المنصورية، وسواق القطر استغرب والكمساري، وربما القطر نفسه... شكرا لطلاب المنصورة الاروع؛ مرة تحدث الدكتور الصادق حسن قائلا: ان لديه ارقام عندما تصل ال13 سيموت كل السياسيين السودانيين، واولهم محمد جعفر، هذا الكلام قبل ربع قرن من الزمان، يبدو ان الرقم اللعين ال13 لم يكتمل، الدكتور محمد جعفر محمد الفاضل؛ ما زال بخير، وجي يرزق، يربي اولاده في هدوء وسكينة، له التحايا والتقدير في اي ارض وتحت اي سماء، وله نرفع طواقينا فوق ومعاها عممنا، فالرجل اسطورة وقامة واستقامة؛ واجمل ما يكون... شكرا ياسر؛ وكل من مر من هنا...
Post: #46 Title: Re: قصص من الدنيا؛ وبعض حكاوي... Author: Hamid Elsawi Date: 06-22-2020, 06:10 AM Parent: #45
Quote: اقرا هذا الكلام كتبته قبل نحو سبع سنوات عن صديقي احمد حللي
العزيز عبد المنعم يبدو أن دفتر مذكراتك فيهو الكثير و المفيد نتابع معك في هذا البوست الرائع ... كثير من تفاصيل الحياة الصغيرة تتلاشي و لا يدرك معناها الا من يتمنع ب حصافة شديدة.. لقد لفت نظري هذا البوست لتفاصيل محفورة في الذاكرة و يجب ان ندونها في الورق ... لك الشكر
Post: #47 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-22-2020, 02:07 PM Parent: #46
Quote: لقد لفت نظري هذا البوست لتفاصيل محفورة في الذاكرة و يجب ان ندونها في الورق ...
نعم اتذكر غالبا تفاصيل التفاصيل؛ حول اي موضوع او نقاش او حكاوي؛ منذ طفولتنا الباكرة تلك التي عشناها بين حقل وجدول حتى كهولتنا اللاحقة تلك التي ما زلنا نكتوي بنيرانها في مغترباتنا امنياتي عودة كل طيورنا المهاجرة لاوكارها الحنينة وكل منا يحلم بالرجوع لوطن القماري؛ هذا الامر احيانا يزعجني كون ذاكرتي بها تفاصيل التفاصيل لاشياء لم تكن مهمة ابدا الحاجات المفيدة بحاول اسكبها هنا لعلنا نستفيد منها ذكرى وشجن وذاد
Quote: كثير من تفاصيل الحياة الصغيرة تتلاشي و لا يدرك معناها الا من يتمنع ب حصافة شديدة.
هنا نحاول ان احول ما اره مفيدا من ونستنا وحكاوينا وققصنا من روح المشافهة لريحان التدوين وهو امر به ارق وشطط كوننا تعودنا على الاستماع اكتر من القراية ام دق كمتلقين والعظيم محمد ابراهيم نقد قال محفزا على الكتابة والتدوين قال فيما معناه ليس القراية ام دقن ولكنها الكتابة
Quote: العزيز عبد المنعم يبدو أن دفتر مذكراتك فيهو الكثير و المفيد
اووووه انها رحلة عمر يا صديقي منذ طفولتي الباكرة وقد قلت لصديقي انني اتذكر ميلاد اختي التي اعقبتني بنحو تلاث سنوات مفتخرا بذاكرتي القوية فقال لي :عادي وانا بتذكر لما كنت برضع هههههههه
Quote: نتابع معك في هذا البوست الرائع ...
خليك قريب يا حبيب
Quote: لك الشكر
ولك مثله وزيادة تسلم يا هندسة
Post: #48 Title: Re: قصص من الدنيا؛ وبعض حكاوي... Author: محمد عبد الله الحسين Date: 06-23-2020, 08:14 AM Parent: #47
الاخ عبدالمنعم سلامات الليلة كنت فاضي شوية من الصباح أو بصراحة كنت مشغول و مهموم من حاجة شاغلاني بعد الشر عنكم أجمعين..
فدخلت جذبني العنوان أصله بحب الحكي و الذكريات..
دخلت لقيت مش كمية حكي و ذكريات بللا كميات حنين و انسانيات و أخلاق و حاجات تشعر الزول بالارتياح..
طبعا كمان ذكريات أيام الدراسة الجامعية خاصة لمن درسوا في مصر ذكريات عزيزة وغزيرة بالجوانب الفكاهية والتندّر...
..............لأنه الناس كلها كانت واحدة وبسيطة..و جاية من بيئات بدوية أو شبه بدوية (حتى ناس الخرطوم ذاتهم)..
المهم واصل ونحن متابعين ومستمتعين..
• من واوسي بعرف واحد كان مدرس اسمه محمد الحسن ..حتى نحن بنسميه (واوسي) اغترب في الامارات...
بس ما عارف هسه وين..بلبس نظارات نظر و أخضر اللون و نحيف جداً..
• تاني زميل لنا بالاستثمار الزراعي توفي قبل سنتين أو تلاته اسمه دكتور السر(زراعة) –السر حسن أحمد ..
كان بيطلقوا عليه من أيام الجامعة عليه السر انيرجي(ENERGY) لأنه كان سمين أو متين رحمه الله و غفر له..
- سؤال جانبي: هل كل سكان واوسي محس؟؟أول مرة أعرف المعلومة دي..
زي عندي صديق من أبوحليمة كنت بزوره فيها فعرفت إنه معظم أهل ابو حليمة شوايقة..
Post: #49 Title: Re: قصص من الدنيا؛ وبعض حكاوي... Author: محمد عبد الماجد الصايم Date: 06-23-2020, 11:23 AM Parent: #48
حبابك يا واوسي مرة تانية .. ومتابعين
قلت فوق :
Quote: (جبر الخواطر قيمة انسانية وسودانية عظيمة من يومها وحتى الان احاول الا اكسر خاطر زول) ..
ودا كلام جميل جدا .. لكن العارفو إنكـ لمن تقعد في التاتشر بتكون صعب خلاص
Post: #50 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-23-2020, 09:02 PM Parent: #49
Quote: الاخ عبدالمنعم سلامات
الاخ الاستاذ محمد عبدالله الحسين حبابك الف ياخ
Quote: كنت مشغول و مهموم من حاجة شاغلاني بعد الشر عنكم أجمعين..
ربنا يسهل عليك ويخفف اتمنى ان تكون الامور وقد عدت بخير يا صديقي
Quote: دخلت لقيت مش كمية حكي و ذكريات بللا كميات حنين و انسانيات و أخلاق و حاجات تشعر الزول بالارتياح..
تسلم ياخ قلنا نطلع شوية من المود بتاع السياسة الما بنتهي دا وطبعا جزء من رسالة المنبر انو ملتقى السودانيين يحكون فيه ذكرياتهم وامالهم وطموحاتهم شكرا الباشمهندس بكري لهذا الصرح العملاق
Quote: طبعا كمان ذكريات أيام الدراسة الجامعية خاصة لمن درسوا في مصر ذكريات عزيزة وغزيرة بالجوانب الفكاهية والتندّر...
يا سلام على مصر وعلى طلبة مصر وعلى دراسة مصر غايتو انا شخصيا لو لم ادرس في مصر لكانت قد فاتتي أُمنية ياخ تجربة مكتملة الالق والانطلاق وكانت وستظل شريطا اخضرا براقا وجميلا بذكرياتا وناسا وفترة تظل حية في دواخلنا لولاها لاحترقنا...
Quote: المهم واصل ونحن متابعين ومستمتعين..
خليك قريب يا حبيب لساتي مِطَوِلـْ
Quote: • من واوسي بعرف واحد كان مدرس اسمه محمد الحسن ..حتى نحن بنسميه (واوسي) اغترب في الامارات...
بس ما عارف هسه وين..بلبس نظارات نظر و أخضر اللون و نحيف جداً..
نعم قريبنا استاذ محمد كان استاذا للغة الانجليزية وهاجر باكرا للامارات وهو من شخصيات واوسي اللطيفة وله كتابات جد ممتعة في النت ما زال يعمل بالامارات، ومبسوط جدا طبعا المعلومات دي كلها سماعية انا لم التقي بالاستاذ محمد احسن ابدا؛ فهو هاجر ونحن تونا ولم نتصادف بعدها ابدا؛ ولكني سمعت عنه كل خير....
Quote: • تاني زميل لنا بالاستثمار الزراعي توفي قبل سنتين أو تلاته اسمه دكتور السر(زراعة) –السر حسن أحمد ..
كان بيطلقوا عليه من أيام الجامعة عليه السر انيرجي(ENERGY) لأنه كان سمين أو متين رحمه الله و غفر له..
يا سلام ياخ الدكتور السر حسن احمد واحدا من انبل اهل واوسي واكثرهم وطنية وارتباطا بالمنطقة واهلها توفى فجاة وكان في اجتماع مع اخرين بقصد انشاء جامعة في المنطقة وبكاهوا اهل واوسي الكريم بقدر حبه للبلد والناس له الرحمة فقد ترك وراه سيرة عطرة البركة في اسرته الكبيرة والصغيرة وهي اسرة مشهود له بالعلم وقبله التهذيب والاحترام...
Quote: - سؤال جانبي: هل كل سكان واوسي محس؟؟
اهل واوسي جدهم الشيخ ادريس ود الارباب وهو من اهل المحس من الشمال
Quote: زي عندي صديق من أبوحليمة كنت بزوره فيها فعرفت إنه معظم أهل ابو حليمة شوايقة..
اهل المنطقة شمال بحري على ضفة النهر شرقها معظمهم نزحوا من شمال البلاد هجرات قديمة اهل ابوحليمة لهم امتدادات في منطقة فداسي الحليماب في الجزيرة ................ تحياتي يا زول يا سمح
Post: #51 Title: Re: قصص من الدنيا؛ وبعض حكاوي... Author: محمد عبد الله الحسين Date: 06-24-2020, 06:11 AM Parent: #50
عبدالمنعم صباح الخير شكرا على ردودك اللطيفة... بالله كتر لينا من ذكريات أيام الدراسة في مصر... كل الدنيا في الثمانينات كانت حلوة و الأسعار رخيصة و غول الرأسمالية لم يطل برأسه بعد.. - ذكرت إنه محمد الحسن واوسي بيكتب في النت..
Quote: نعم قريبنا استاذ محمد كان استاذا للغة الانجليزية وهاجر باكرا للامارات وهو من شخصيات واوسي اللطيفة وله كتابات جد ممتعة في النت
بالله دلّني عليها عشان أشوف لو في طريقة اتواصل معاه.. - تسلم يا ذوق
Post: #52 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-24-2020, 05:31 PM Parent: #51
محمد الصايم تحياتي
Quote: لكن العارفو إنكـ لمن تقعد في التاتشر بتكون صعب خلاص
ههههها داك تاتشر القصف بتاع الواتساب اصلا الواتساب غير فهو اقرب لمشاكسات الاصدقاء ومعظمه نيران صديقة تصيب بعض الاصدقاء وهنالك التجاوزات كون المساحة اضيق الاحتكاك اقرب وكلهم مية والنشيطين عشرة وكل قصف مركز في السياسة ومرات في رايش في اللحم الحي ردا على تفلتات والسياسة غالبا حادة وما فيها جبر خواطر وبرضو شتتناها ليههم حفاظا على ود الاخاء ياخ وخوفا من الكلمة الجارحة البتمرق غصبا لكن على المستوى القريب والتعامل اليومي والطويل تجدني زول كيوت(فيصل محمد صالح) بس واحب الناس ياخ ودمعتي من يوم ما ماتت امي بقت قريبة اجد نفسي وسط اللمات رغم اني لا اتحدث كثيرا ولكني استمتع وفي واوسي نتلم كل الاهل والجيران وزملاء الابتدائي ولاحقا ونضحك لمن بهناك ونديها موية وتدينا طراوات وبرضو مقصر الظل الاجتماعي ومتقوقع قليلا وكل وكتي الفاضي احاول ان اوزعه بين الطيب وفاطمة الكائنة يمينك تحياتي يا زول 💋❤
Post: #53 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-25-2020, 06:55 PM Parent: #51
Quote: بالله دلّني عليها عشان أشوف لو في طريقة اتواصل معاه..
الاخ الاستاذ/ محمد عبدالله
ليك علي لفة خفيفة واجيبلك عنوانو زط ابشر اخوي
Post: #54 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-26-2020, 07:50 PM Parent: #53
القصة دي وانا في الابتدائي عديل كدة يعني زمانِك شديد امكن سنة 1980 او حولها جاءت ام سلمة وهي طفلة اصغر مني كلمت ناس بيتنا انو كمال وقمر غرقوا في البحر طوالي اخوي الكبير تحرك نحو البحر وانا مشيت معاهو وكنت متخيل انو الزول البغرق ما معناها مات ولكنه غرقان حا يلقوهوا وامكن يعاقبوهوا وانتهى الموضوع على كدة تاكدت مع الموت لما شفت اخوي بشيل في الفاتحة مع اهل الشهيدين وشفتا ناس ببكوا سنة 2010 او نحوها تزوج صاحبي صلاح اخو الشهيد قمر وصيت صاحبي ان جاءه طفل ان يسميه قمر وبعد 9 شهور ويومين بالضبط جاء ولد وسماهو صلاح قمراً بعد فترة باركت الولد لصلاح وسالته عن اسمه ضحك صلاح وقال لي بقيت نساي يا فردة الولد سميناهو قمراً على حسب اقتراحك قمر الان في رابع ابتدائي او نحوها ومريخابي متعصب زي ابوهو وعمو كوري
Post: #55 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-27-2020, 01:36 AM Parent: #54
هبطت المنصورة حافظا لكل اغنيات محمد الامين ووردي وجزءا مقدرا لصلاح بن البادية وزيدان وعبدالعزيز المبارك وزيدان وسيد خليفة وملقط روائع من هنا وهناك لفنانين سودانيين مبدعين ومكتفي ومتبشع يقوم يجيني ابراهيم النعمة الحي وقاعد دا وعضو هنا في المنبر يكتب باسم ابراهيم النعمة بالانجليزي يجيني شايل شريط لمصطفى سيد احمد وفيهو اغنية لمحتك يا زول اسمع وحا تنبسط وهو جنس انبساط عاد من يومها خلاص صار مصطفى سدرة منتهاي وجيلي وجاء وكت حفظنا فيه كل اغنيات مصطفى التي تصلنا وكان ابراهيم يجمع الروائع ويحتفظ بالاغنية حتي يحفظها ويجي يغنيها لنا لابراهيم صوت عذب وبعداك يفك المسجون ونسمع الشريط جلبتا ليك من بلاد الله البعيدة صنوف من الوجد الملح قتا القاك والسمح كتا اصطاد في الظهيرة من مناقير الكلام بوصلات سكك الاغاني ولما الاقي اللون ادسو لما يغرس فيني حسو لملقاتك هدية واتفقد الرعش المعبا في ايدي وبعد داك بقينا نفتش لشعراء ابوالسيد من يحيى فضل لعاطف خيري لمحمد شمو لمريخا لحميد وللقدال للمفردة الجديدة والفن الجديد لاحقا صار مصطفى رفيقنا في ليالي العمرة في مكة والمدينة وجدة ولاحقا في ليالي الاغتراب في الرياض والدمام واستراليا وكندا وفي السودان واليمن وليبيا وفي بانكوك الفتية احكي عن جيلي شاركنا المشاعر والظلم والجوع شاركنا الحب والثورة وحب الوطن اعنقد انه في تلك السنوات القاحلة كان مصطفى هو المعادل الموضوعي للترابي كان هو العز والكرامة والشموخ والوطنية الحديث عن مصطفى يطول وقد اعود تاني كون مصطفى كان هو الخلفية لكل حركاتنا وسكناتنا نلف نلف ونلف وفي النهاية نرجع نستكين مع مصطفى ونحلم بالحرية والديمقراطية وعودة الوطن هذه الاغنية اول من سمعتها للاستاذ قبل استمعت غدار دموعك والسمحة قالوا مرحلة ولكن تظل لمحتك هي نفطة التحول الكبرى في انععطافي نحو مشروع مصطفى الثقافي برمته استمتعوا بلمحتك
Post: #56 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-28-2020, 10:39 PM Parent: #55
لما جات فطومة دي للدنيا(صورتها في البروفايلي دا) كنت وما زلت الاسعد بها على الاطلاق كانت امي تقول يارب تجيك بنية وانت بتحب الاطفال كتبت لصاحبي يوم الولادة جاتنا البنية السندسية حلاوة لبن كلم مرتو قاليها ناس منعم جاتم بت وسموها سندس هههههها المهم امها تعبت شديد لحطة الولادة واصلا الولادة مرهقة اها انا شفتها منهارة من الارهاق ومن التعب ومن الاعياء وطبعا هي مدام حضرتي وانا حافظا وعارف البرضيها شنو بحكم العشرة اها قلتا ليها:- ولا يهمك يا اميرة بكرة فاطمة دي تبقى ليك اخت وصديقة ورفيقة انهارات سحابات الحزن من وجه الام الجميلة.... واختفت سمات الارهاق وعادت ملامح الهدوء والسكينة والارتياح تلف وجهها الوسيم؛ وسرحت تحلم بان تصبح فطومة كبيرة الان الحمد لله فطومة صارت اساسية في المطبخ مع امها وعندها ابتكارات وطبخات وحلاويات بتعملا من النت بس بتطلب حاجات غالية وما معروفة زاتو كتير هههههها لكنها فنانة ورسامة وبتترنم وايدها طاعمة وحنينا ونفسا حلو واجمل هدية من رب كريم فطومة على وشك الولوج لمرحلتها المتوسطة وشاطرة في الدراسة
Post: #57 Title: Re: قصص من الدنيا؛ وبعض حكاوي... Author: امتثال عبدالله Date: 06-29-2020, 04:41 AM Parent: #56
وانا كمان يا عبد المنعم بقول ليك زي ما قال ليك جلالدونا ،،، مع انك شاكلتني قبال كده بدون اي سبب ،لكن الحاجة السمحة بنقول سمحة وحكاويك طاعمة بالجد وتجبرنا نجيب بنابرنا ونقعد بدون كلام ،،، ومتابعة لصيقة ،، اوسكار ولا شك ....وحركت لينا المياه الراكدة في المنبر العام واديته حيوية ونشاط،،، والله يديك الصحة والعافية ويبعد عنكم الكرونا ،،
Post: #58 Title: Re: قصص من الدنيا؛ وبعض حكاوي... Author: محمد عبد الماجد الصايم Date: 06-29-2020, 07:41 AM Parent: #57
اللهم آمين يا امتثال ..
..
يخوانا منبر بكري دا بقى يجيب قداديم؟ شايف واوسي (لقب منعم) مادي لي قدوم !!
Quote: تحياتي يا زول 💋❤
Post: #59 Title: Re: قصص من الدنيا؛ وبعض حكاوي... Author: إدريس محمد إبراهيم Date: 06-29-2020, 01:51 PM Parent: #58
سلام عبد المنعم وضيوفه ....
حقيقة أسلوبك جميل وسلس ويشجع على القراءة ... وقصص جميلة من الواقع بسرد ممتاز ....
لي قدام يا زول ... وعارف يا منعم لو واصلت في هذا النحو ممكن ده يكون مشروع كتاب ممتع للغايه ....
مع خالص ودي وتقديري ،،،،
Post: #60 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-30-2020, 06:51 PM Parent: #59
Quote: وانا كمان يا عبد المنعم بقول ليك زي ما قال ليك جلالدونا ،،، مع انك شاكلتني قبال كده
هلا امتثال نورتي البوست متين الكلام دا والله ما متذكر ولا في ذهني اي حاجة زي دي؛ عموما لك التحايا وكل الود
Quote: الحاجة السمحة بنقول سمحة وحكاويك طاعمة بالجد وتجبرنا نجيب بنابرنا ونقعد بدون كلام ،،، ومتابعة لصيقة ،، اوسكار ولا شك ....وحركت لينا المياه الراكدة في المنبر العام واديته حيوية ونشاط،،، والله يديك الصحة والعافية ويبعد عنكم الكرونا
شكرا يا امتثال على الكلام المشجع والسمح نحاول ان نستذكر قصص وحكاوي وحكم تاتي من افواه البسطاء مصحوبة باليقين وبالسمؤ وبالتواضع وهي جليلة وعميقة نوثق من الذاكرة وعندما ياتي الصدى مثلما كتبتي تكون ساعة الهناء والحبور تحياتي يا بتنا السمحة وهاك هذه القصة من اهلنا الطيبين على ضفة النهر؛ النهر العظيم
عمر صاحبنا؛ جاءته فرصة للدراسة في مصر؛ ولكنه في الاجازة يرجع مزارع ابن مزارع اهلنا في الجروف بعد ان يحصدوا المحصول الرئيسي في الموسم الشتوي ؛ نفس الارض يزرعون عليها عيش ريف يسمونه القنقر(يمة قنقري وين)كما تساءل ذلك المعتوه؛ المهم هو ذ ذاته ولان دورة حياته قصيرة وتكون التربة المحصود منها المحصول لتوه ما زالت رطبة وندية فيعدولنها خفيفا بالطواري وينثرون حب القنقر الذي هو الفشار قبل ان ياخد نار ينثرون الحب على امتداد الارض؛ ولان الطيور قريبة ومتحفزة تاتي لتاكل من البذور الجاهزة لاخفاء البذور تحت الارض ياتون بغصن شجرة ضخم ويضعون عليه احجار او طوبات يسمونها التقَّال وهي موضوعة على غصن الشجرة ويلفون بها على البذور المبثورة لتوها فتتغطى بالتراب اللين وتقل فرصة ان تاكلها الطيور القريبة صديقة المزارع اها صاحبنا عمر بمجرد ما يبعد من ابوهو يرمي الطوبات والتقال فيصير غصن الشوك خفيفا ولكنه لا يغطي البذور بالتراب اذن مافيش نتيجة ابوهو البعيد يعرف بحكم الخبرة ان الحركة بتاعة ولدو سريعة معناها رمي التقال فيقول قولته الشهيرة: يا عمر هووووي خت التقال ما تلف ساكت في الفاضي فاصبحت مثلا في حلتنا يُقال ان فلانا رامي التقال ولافي ساكت في الفاضي؛ وعندما جيت للغربة اكتر من صديق وصاني خت التقال وركز ما تلف ساكت في الفاضي وتجينا ساكت فاضي؛ ههههه
Post: #61 Title: Re: قصص من الدنيا؛ وبعض حكاوي... Author: Amira Hussien Date: 06-30-2020, 09:08 PM Parent: #1
يا سلااااام إبداع وقصص جميلة فيها عبر وفهم ، من القريتيم اكتر من مرة قصة المتشاكلين والواحد فيهم رفض يقول كلام ما جميل عن أخت التانى والتانية لما كنت بتفتش على حاجة ولقيتا واتلفظت والوالد سمعك وأداك درس فى غاية الاهمية ، أسوأ شى فى الدنيا الكلام الشين والالفاظ القبيحة ،
Post: #62 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-01-2020, 09:24 AM Parent: #61
Quote: يخوانا منبر بكري دا بقى يجيب قداديم؟ شايف واوسي (لقب منعم) مادي لي قدوم !!
محمدالصايم يا حبيب يا مرمووووغ تحية من هنا لحدت بتنا التي هي على وشك الامتحانات بالتوفيق يارب؛
خليك قريب انا اصلي ممهول مرتين؛ ومع الكورونا دي البوست ممتد بس نلبس الجونتيات وصابييييها هنا بستفيد من لابتوب الشغل من بعد، المنزلي قاليك نسرق الخط ونرش ذكريات وحكاوي القهاوي طبعا حضرتي حركتي تقيلة وبجي في الحفلات كاخر معزوم، رمضان قبل القبل الفات حضرت منو جزء في السودان اها معزوم فطور في الفكي هاشم على بعد اكتر من تلاتين كلم اتحركت بالعربية صاحبي شايل فطورو ماشي على الشارع قال لي حلل الصيام وامشي عطلونا ناس الشارع يقيفوا قدام العربية؛ ويصروا ننزل المهم وصلنا على قريب التراويح هههههها بموت في الابري الاحمر الحلو مر ياخ وبشربو عادي كدة بدون الموسم حتى المرة دي عانيت؛ المطارات مقفلة عمي وزوجته اول مرة يسافروا ويركبوا طيارات جوا حج عمك قالي الحاجة دي ويقصد زوجته اتفلهمت علي في المطارات دي فلهمة شديدة رجعت الحلة تحكي دخلونا المجارك ومرقونا من المجارك ود بتها قال ليها والله يا حبوبة هسا لو سموها المجارك كان قلتي الجمارك هههههه المهم خليك قريب قريب دنياي قريب الله الجعلي قريب فرت غريب والغربة اقصى نضال
Quote: اها جايين في الذكريات، التي هي صادقة، ونبيلة...نبيلة عبيد ولسا في قصص وحكاوي من القلب للخاطر للشارع الشارع المليان غلب دقست قوافلو مع السراب رابط جليد الهم سعن محزوم خشيمو من الصبر راجى السحاب.
لسا ونص وخمسة
Post: #63 Title: Re: قصص من الدنيا؛ وبعض حكاوي... Author: جمال عبد الناصر محمد Date: 07-01-2020, 10:55 AM Parent: #62
قريبين يا منعم كالعادة نستمتع بحكاويك عارف : كل من يقرأ هذه الذكريات يجد نفسه في قلب الحدث أكثرنا مر بهكذا تجارب ومثل هذه القصص الندية قصص الجروف والطيور قصص الأجداد والجدات والآباء والأمهات والأخوة والأخوات قصص لأصدقاء قصص السفر والدروس قصص القرية ودروبها وبيوتها واسرارها استدعى يا منعم بما لك من ملكة السرد استدعي ماضينا كلنا ذكرنا بمرتع الصبا وأيام الشباب بسقط اللوى .. بين الدخول وحومل ..
Post: #64 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-01-2020, 06:25 PM Parent: #63
Quote: سلام عبد المنعم وضيوفه ....
حقيقة أسلوبك جميل وسلس ويشجع على القراءة ... وقصص جميلة من الواقع بسرد ممتاز ....
لي قدام يا زول ... وعارف يا منعم لو واصلت في هذا النحو ممكن ده يكون مشروع كتاب ممتع للغايه ....
مع خالص ودي وتقديري ،،،،
الاخ العزيز الاستاذ ادريس محمد ابراهيم
شكرا يا حبيبنا على الكلام البخلي الزول يعضي كيبوردو حياة الشعب السوداني بشكلها الاجتماعي الوهيط دا تخلق مدارس ومدارس للتعلم ننحاول ان نلتقط الحكمة من الحكاية ونستفيد منها لاحقا دا ادب الشارع العريض وانا احاول اكتب احيانا واكتتب شعبي غالبا انهم الابطال الحقيقيون، ومتاكد ان القاري الذكي (وكل السودانيين اذكياء) سيلتقط الاشارة ان اعيتني العبارة او فشلت في توصيلها او توظيفها؛ قاليك يا ادريس المساطيل عملو ندوة عنوانها نجيب محفوظ ولَّ ما نجيبو هههههههها تحياتي يا زول يا امير
Post: #65 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-02-2020, 02:26 PM Parent: #64
Quote: يا سلااااام إبداع وقصص جميلة فيها عبر وفهم ، من القريتيم اكتر من مرة قصة المتشاكلين والواحد فيهم رفض يقول كلام ما جميل عن أخت التانى والتانية لما كنت بتفتش على حاجة ولقيتا واتلفظت والوالد سمعك وأداك درس فى غاية الاهمية ، أسوأ شى فى الدنيا الكلام الشين والالفاظ القبيحة ،
مرحبتين وهلا اميرة حسين نورتي البوست شكرا لحضورك وفعلا المجتمع بشارعه العريض وباي من مراكز احتكاكه الكتيرة والشعب السوداني اجتماعي بامتياز عشان كدة المدرسة متنقلة معاك في السوق وفي البيت وفي المناسبات وفي كلِِ شوفي القصة يا استاذة اميرة عمنا حسن زول سوق اولادو في ايبيا رسلو ليهو قروش عشان يشتري حافلة كاستثمار للاولاد ولمصاريف الاسرة في البلد الصعبة دي قالهم بلحيل استلم الفلوس وختاها في اخر ركن في البيت وبلغ زوجته فقط وام الاولاد بمكان القريشات كاحتياطي لاي ظرف طاري المهم عمنا طوال بدأ سرا في رحلة البحث عن بيت وفعلا لقى بيت ممتاز وسعرو قدر القروش المعاهو طق طرق لم يتردد لحظة واشترى البيت وعمل اجراءات نقله باسمه في ظرف زمني بسيط واولاده ما زالوا يتسألون عن الحافلة المهم بلغهم انه اشترى بيت الاولاد انبسطوا للبيت ولكنهم تسألوا وين الحافلة يا ابوي رد عمنا بكلمتين قصار ولكنهم مليانات قال ليهم:- انا حاجة بِتَنْقَلِبْ اصلي ما بشتريها ................ نظرية عمنا طلعت صاح البيت ذاتو لاحقا فكوهو لبيتين للولدين الرجعو من ليبيا هسا ماشاء الله اخر ترطيبة في البيتين الملك في المدينة محل عملهم بعد الرجوع من الاغتراب؛ ............... الحافلة جافلة العقار راحة بال
Post: #66 Title: Re: قصص من الدنيا؛ وبعض حكاوي... Author: امتثال عبدالله Date: 07-02-2020, 06:23 PM Parent: #65
"" العقار راحة بال" " اجمل حكمة سمعتها هذا الشهر،،، فعلا العقار راحة البال ،،،، اجمل شئ تكون ساكن في بيت ملك،،،وتريح بالك من ازعاج صاحب العقار ،،وين الايجار ..وين الايجار!!! تكون ساكن في بيتك الملك تكون مرتاح البال ،،،اما انت بتاكل شنو ،،،وعندك سيارة ولا ما عندك ...غير ذات اهمية //الاولوية للبيت ،،،،الملك،،،وطبعا استثمار مضمون ،،،مافي شك،،،
Post: #67 Title: Re: قصص من الدنيا؛ وبعض حكاوي... Author: Amira Hussien Date: 07-02-2020, 07:56 PM Parent: #65
الحافلة بالجد جافلة والاب حكيم ومعلم .......بداية حياتى الزوجية كنت أسكن شقة مؤجرة وأمتلك عربة وكذلك زوجى والدتى رحمها الله فى لحظة وضوح قالت لى العربات طعما شنو من غير بيت ......وفعلا حسيت بيهم بدون طعم الى ان بنيت البيت الحمد لله .....ياريت اولادنا يسمعوا كلامنا كما كنا نفعل
Post: #68 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-03-2020, 03:46 PM Parent: #67
الاخت امتثال
Quote: "" العقار راحة بال" " اجمل حكمة سمعتها هذا الشهر،،، فعلا العقار راحة البال ،،،، اجمل شئ تكون ساكن في بيت ملك،،،وتريح بالك من ازعاج صاحب العقار ،،وين الايجار ..وين الايجار!!! تكون ساكن في بيتك الملك تكون مرتاح البال ،،،اما انت بتاكل شنو ،،،وعندك سيارة ولا ما عندك ...غير ذات اهمية //الاولوية للبيت ،،،،الملك،،،وطبعا استثمار مضمون ،،،مافي شك،،،
الاخت اميرة
Quote: الحافلة بالجد جافلة والاب حكيم ومعلم .......بداية حياتى الزوجية كنت أسكن شقة مؤجرة وأمتلك عربة وكذلك زوجى والدتى رحمها الله فى لحظة وضوح قالت لى العربات طعما شنو من غير بيت ......وفعلا حسيت بيهم بدون طعم الى ان بنيت البيت الحمد لله .....ياريت اولادنا يسمعوا كلامنا كما كنا نفعل
شكرا الاخوات امتثال واميرة شكرا لكما لرفد البوست بالافكار والتجارب والفكرة الاساسية من البوست هو ان نستفيد من التجارب والحكاوي والقصص وما فيها م حكم وتجارب وخيارات حتى لا نقع في نفس الاخطاء اول حاجة عملتها في اول سنين اغترابي ان بنيت بيت حقي في حوشنا الكبير وانا بعد عمرة بدون فيزا عمل رسمية بيت عادي زي بيوت ناس الحلة ماشاء الله الان اجمل اوقاتي اقضيها فيهو خاصة بعد ان كبرت الليمونات واثرت واصبحت الحديقة ملاذي غالبا من شراب الشاي الصاح حتى المغرب بكون قاعد فيها ومرات اغفو في منتصف النهار تحت اشجاري الظليلة وبعدها طوالي اشتريت بكسي وطبعا البوكسي في منطقتنا مهم استمعت به طوال عشرة سنوات ولكن بعد الزواج زادت الطموح لقطعة ارض في العاصمة امكن في المستقبل نحتاج ليها لدراسة الاولاد وكدة بكسيني دا كان بشتري قطعتين في بحري عام 2000 وبعته سنة 2010 وزدت على ثمنه مرتين عشان اشترى قطعة في بحري يعني بعد ما كان بشتري قطعتين رجع واشترى 1/3 قطعة ولكني لست ندمان فقد استمعت بالعربية وانبسطت بيها وركبتا فيها امي وديتا البكيات والاعراس وزيارة اخواتها وصديقاتها وكانت مبسوطة وهي تقول عربية ولدي اجمل لحظة في حياتي على الاطلاق عندما تكون امي راكبة معاي وثالثنا الحب ونحن نتنقل في حلتنا من بيت عرس لزيارة لعزاء فرحة امي لا تقاررن باي قطع ولا حاجة مادية مهما غلت فامي غالية وفرحتها ورضاها انار لي كل الدروب الظلمة وكانت دعوتها دائما قشة ما تعتر ليك يا ولدي؛
Post: #69 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-05-2020, 00:37 AM Parent: #68
عمنا عركي مشهود له بالجدية والحزم والكلمة الواحدة؛ والقرار السريع والنهائي يعمل سائقا لعربيته التجارية؛ ويعمل معه اخونا الاكبر الفاتح يعمل معه مساعدا في اللوري دا؛ ودائما المساعد بركب فوق في التندة بتاعة العربية والفيها صندوق اسمه صندوق الزوادة وفيه الحلة بزوادتا كلها وشنطة المساعد دا برضو معاهم فوق وطبعا المساعد كان من ضمن مهامه تزبيط الحلة؛ يخيم السواقين ويجتمعوا ياتوا بالاكل الجاهز من الحلة وياكلون؛ يبدو ان اخانا الفاتح قد تعب من حكاية الحلة دي؛ وتظبيتا كل يوم... فقرر ان يثقبها ويرميها في الخلاء دا .... وقد فعل!!! عمنا عركي ماعارف القصة دي نادى: الفاتح الفاتح الحلةالحلة رد الفاتح من تندته: الحلة قدينااها يا عمنا قال عمنا عركي جملة واحدة ولم يزد: تعال لي نازل بشنطتك؛ القدا الحلة المكنة بقدها....
Post: #70 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-05-2020, 05:03 PM Parent: #69
مشينا رحلة انا وصاحبي مع اهلنا بالعربات التجارية لبورسودان؛ ونحن بعد صبية ولكن تلك قصة اخرى؛ المهم السواقين والكماسرة كلهم من الحلة وواهل؛ في بورسودان يتجمون في ميدان منخفض كدة؛ يستخدمونه كمواقف معلومة للجميع منذ سنين طويلة؛ لحين ايجاد شحنة والرجوع تاني وكانت جل ونستم نحن امبارح نمنا في كسلا واليوم وصلنا بورسودان ونحن نمنا في القضارف ونحن نمنا في جبيت ونحن في الفاو وهكذا عمك سواق معاهم زهج من الكلام المكرر قال حكمة: هوي البنوم في في القضارف و لَّ في فرنسا بجي ينقطع في الحفرة دي؛
Post: #71 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-06-2020, 05:30 PM Parent: #70
عسمان شواكيش صاحبنا وفردتنا؛ وروحو حلوة؛ فجاة كدة في ايام االعرس الجماعي؛ قرر اعرس؛ هيا يا عسمان العرس دا عاوز قروش وعاوز بيت وانت اباطك والنجم؛ وووو يسمع كلامنا كلو ويقول الله بتمو اهااا في الاول كان طموحو عالي؛ بدأ بخطوبة بنات متعلمات ومدرسات؛ وياخد الشواكيش عادي؛ وتقهرشوية شوية ولم يعد يتشرط المهم انثي واهلا طيبين؛ نلاقيهو ايام الخطوبات اها يا عثمان ما اتوفقت يقول بطيبته كلها: لسا والله؛ لكن ما قنعنا؛ انا بفتش وابوي بفتش ههههها نحن نقول ليها غايتو انت ميزتك الوحيدة انك شاب؛ تاني يخربك... ويزيد هو: وضراعي اخدر وخدَّام ساهي لي الله سيدي وطيب يا جماعة... صاحبنا عثمان اتوفق وتم العرس مع الجماعة واخدت الحياة دورتها؛ مرة جانا في النادي مكشر يا شواكيش مالك؟ والله يا جماعة المرة دي زعلت ولملمت شفعا العصر دا ومشت اهلا يا زول كيف الكلام دا تلقاك عملت حميل ونمت بالمصاريف عارفك اقتصادي والقرش دا ان وصلك تاني ما بتفكو باخوي واخوك اوعك تكون مِقصِّر معاها ومع اولادا في اكل وشراب رد قائلا: افو والله ما مقصر معاها باي حاجة والله لحدت الطحنية دي بجيبا ليها ............. محمد ولدو الكبير على وشك انهاء مرحلته الثانوية؛ ومرتو ذاتا ما بترضى في لقب شواكيش دا...
Post: #72 Title: Re: قصص من الدنيا؛ وبعض حكاوي... Author: Ahmed Yassin Date: 07-07-2020, 05:00 AM Parent: #71
اخونا سابل راجع من امدرمان للخرطوم بعد زيارة طبيب الختان ..ومعاه ابنه لابس الهلال على جبينه والحريرة في ايده، واقف في الاشارة جاء ولد صغير شايل ( فوطة) بيمسح بيها الزجاج الامامي للسيارات، وياخد الفيها النصيب. واخونا اول ما شاف الولد جا مسرع ناحيته رفع ايده باشارة ( قف) ظن انه جاي يمسح قزاز عربيتو، لكن الولد مشى وقف ناحية زجاج الباب الايمن مكان ما يجلس ابنه المختون.. وابتدأ يأشر ويخبط برفق وبسرعة وبالحاح ان ينزل الزجاج . واخونا مطنشو. والولد مصر ويلح وينظر برجاء ناحيته ويأشر باشارة ( دقيقة بس) استغرب للموقف وفي النهاية نزل القزاز الولد بحماس قال موجها حديثه لابن صاحبنا ( مبروك يا عريس) وبسرعة رمى (٥) جنيه في حجر ( ابنه) وابتعد مسرعا اذهل الموقف صاحبنا وعايز ينزل يشكر الولد الاسمر الجميل صاحب الابتسامة البيضاء الناصعة وعمره ما اتجاوز عشرة سنوات، الذي اختفى في الزحام وهو يحمل فوطته لان الاشارة فتحت والسيارات في الخلف بدأت تطلق ابواقها.
Post: #73 Title: Re: قصص من الدنيا؛ وبعض حكاوي... Author: Khalid Abbas Date: 07-07-2020, 10:16 AM Parent: #72
Quote: حديثه لابن صاحبنا ( مبروك يا عريس) وبسرعة رمى (٥) جنيه في حجر ( ابنه) وابتعد مسرعا اذهل الموقف صاحبنا وعايز ينزل
الناس البسيطة فيهم طيبة وشهامة عجيبة الدنيا عندهم ساهلة والمال بلا قيمة
Post: #74 Title: Re: قصص من الدنيا؛ وبعض حكاوي... Author: أمير قناوي Date: 07-07-2020, 01:48 PM Parent: #73
ياخي كلامك جميل، يدخل القلب بدون استئذان. اسلوبك رائع. تعطى الحكمة بكلمات بسيطة. يبدو انك تعملت وتشربت بالادب من الوالد (رحمه الله) أكثر مما تظن. واصل وسنتابع. لك التحية على هذا البوست الموفق.
Post: #75 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-08-2020, 04:07 PM Parent: #74
Quote: قريبين يا منعم كالعادة نستمتع بحكاويك عارف : كل من يقرأ هذه الذكريات يجد نفسه في قلب الحدث أكثرنا مر بهكذا تجارب ومثل هذه القصص الندية قصص الجروف والطيور قصص الأجداد والجدات والآباء والأمهات والأخوة والأخوات قصص لأصدقاء قصص السفر والدروس قصص القرية ودروبها وبيوتها واسرارها استدعى يا منعم بما لك من ملكة السرد استدعي ماضينا كلنا ذكرنا بمرتع الصبا وأيام الشباب بسقط اللوى .. بين الدخول وحومل ..
اوووووو حبيبنا الاديب الاريب جمال عبدالناصر تحياتي يا زول يا سمح نعم حياة السودانيين تتشابه كون المصدر واحد والظرف المحيط واحد؛ والبيئة والمشية ذاتا وقدلتو واي حلة فيها محجوبا وفيها فاطنة بت محمودا وفيها زينا وعرسو وفيها ود ريسا..... بل يا جمال ان المشاعر الانسانية واحدة قرات مائة عام من العزلة كانما الحكاية تحصل في المجتمع السوداني؛ مكتوبك هو لب البوست ورسالته الاساسية ان يجد كل منا نفسه في ذات القصص والحكاوي والحكم انا مصور فقط وناقل لحكاوي المجتمع وقصصه واحكامه ويظل الواقع اعمق واروى؛ متاكد ان القاريء الذكي سيعبر نحو لب الفكرة ان غلبتي العبارة؛ ولم اوفق في توظيفها اعتمد على القاري الحصيف الذي ما خذلني يوما شكرا يا جيمي؛ للمشاعر الصادقة ونبيلة؛ اختم بهذه القصة الصغيرة معانا موظف هندي كبير في السن؛ كان ماشي قدام من المواقف للمكاتب؛ مفروض يلف يمين ولكنه واصل كنت امشي خلفه بمسافة تهبشك غنوة واناولك كاس المهم تباطت في المشي قتا اشوف عمك دا ماشي وين بالصباح دا وصل الي جالون زبالة ووضع علبة عصير وغتايا ولف متوجها نحو المكتب مشي مسافة ١٠٠ متر ربما ليرمي الزبالة في مكانها في الغالب انا ارمي البواقي في اقرب مكان فاضي من اليوم داك اكبرت عمك دا وبقيت احتفظ بالبواقي بعد الاستعمال وارمي بها في مكبها الحياة مدرسة نتعلم كل يوم لا نتكبر على التعلم تحياتي تاني واحترامي يا جيمي يا فنان....
Post: #76 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-08-2020, 10:01 PM Parent: #75
Quote: اخونا سابل راجع من امدرمان للخرطوم بعد زيارة طبيب الختان ..ومعاه ابنه لابس الهلال على جبينه والحريرة في ايده، واقف في الاشارة جاء ولد صغير شايل ( فوطة) بيمسح بيها الزجاج الامامي للسيارات، وياخد الفيها النصيب. واخونا اول ما شاف الولد جا مسرع ناحيته رفع ايده باشارة ( قف) ظن انه جاي يمسح قزاز عربيتو، لكن الولد مشى وقف ناحية زجاج الباب الايمن مكان ما يجلس ابنه المختون.. وابتدأ يأشر ويخبط برفق وبسرعة وبالحاح ان ينزل الزجاج . واخونا مطنشو. والولد مصر ويلح وينظر برجاء ناحيته ويأشر باشارة ( دقيقة بس) استغرب للموقف وفي النهاية نزل القزاز الولد بحماس قال موجها حديثه لابن صاحبنا ( مبروك يا عريس) وبسرعة رمى (٥) جنيه في حجر ( ابنه) وابتعد مسرعا اذهل الموقف صاحبنا وعايز ينزل يشكر الولد الاسمر الجميل صاحب الابتسامة البيضاء الناصعة وعمره ما اتجاوز عشرة سنوات، الذي اختفى في الزحام وهو يحمل فوطته لان الاشارة فتحت والسيارات في الخلف بدأت تطلق ابواقها.
شكراحبيبنا Ahmed Yassin
اليك هذه القصة البسيطة كان يسكن معنا في مكة ونحن بعد عمرة صديقنا عبدالباقي الشايقي جاء والده عمنا الشايقي (وهذا اسمه كناه به اباه لصداقة مع احد اهل الشمال) جاء عمرة وخلص العمرة وقعد معانا فترة المهم عمنا الشايقي راجل لطيف خلص العمرة وقعد يونس فينا وكنا كلنا في عمر اولاده ولده عبدالباقي اشترى طاقتين قماش جلاليب وفصل بمقاسه عشرة جلاليب وكنا قد استغربنا ليه زول يشتري لابيه عشر جلاليب (كل خمسة تتشابه) والجلابية تطبق جمب الجلابية وزالت دهشتنا عندما طلب من احد الشباب قلما وقال له اكتب في جيب الجلابية الداخلي اول جلابية عبدالله ودحسن تاني جلابية فلان ود فلان وهكذا قلنا له باقي جلابية واحدة يا عم الشايقي هذه لن نكتب عليها اسما هذه لك فسكت ولا نعرف ان كان قد اقتنع بكلامنا ام ساكتلو فوق راي بعدها باسبوعين او نحوهما قال لنا عمك الشايقي ياناس هوي انا بعد دا مسافر حاولنا ان نقنعه بان يستريح شوية ود فرصة في مكة وبتاع قال لينا خلاص ان غرضي قضيتو تب والنوم دا ما بقدر عليهو ( تجاوز الستين وقتها من عمره المديد) انا هناك بشتغل يوميا في سوق خضار حلة كوكو وبرجع اخر اليوم بزاد كتير لبيتي؛ ولي كم ناس محتاجين في الحلة وما عندهم مصدر دخل ........... #وطنا_ الباسمو_غنينا_ورطنا
Post: #77 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-09-2020, 04:46 PM Parent: #76
Quote: الناس البسيطة فيهم طيبة وشهامة عجيبة الدنيا عندهم ساهلة والمال بلا قيمة
شكر حبيبنا
Khalid Abbas
في سوق الجيلي في رجل يبيع طعمية؛ وسندوتشات طعمية للطلبة؛ محل صغير يعمل فيه اكتر من عشر شباب ومزحوم زحمة مبالغة من الطلبة؛ طلبة الثانوي بالذات؛ يشترون سندوتش طعمية رغيفة ومعاها 3 او ربما 4 طعميات وبس خلاس؛ ولاحظت اي طالب يرمي 1000ج ثمن السندوتش في كرتونة كبيرة جمب عمك والعندو خمسة براه يفك ويشيل الباقي؛ ويركب الصف في الجهة المقابلة؛ عمك صاحب البوفية لا يتدخل ابدا في عملية الفلوس دي زحمة خلتني اسال اخوي عن السبب بتاعا شنو؛ قال لي: شفتا الراجل دا اي طالب عندو ما عندو يشيل سندوتش؛ بعد الطلاب بكرة يدفع الفين ولو ما عندو يدفع متى ما توفر ولو ما عندو خالص خلاس انتهى؛ سالت بعض الطلاب من وفوق لفوق اكد لي المعلومة والتي هي معروفة لكل ناس السوق.... علمت انو عمك دا ممن البوفية دي عمل بيت طوابق في الجيلي ذاتا؛ وعربية فخمة...
شفتا كيف
# شعب_عظيم_في_دولة_تافهة
Post: #78 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-10-2020, 04:44 PM Parent: #77
Quote: ياخي كلامك جميل، يدخل القلب بدون استئذان. اسلوبك رائع. تعطى الحكمة بكلمات بسيطة. يبدو انك تعملت وتشربت بالادب من الوالد (رحمه الله) أكثر مما تظن. واصل وسنتابع. لك التحية على هذا البوست الموفق.
دكتور أمير قناوي شكرا اخوي على الكلام المشجع والمحفز؛ ما حا اتجمل ولكني ساقول الحقيقة مداخلتك اسعدتني ايما سعادة؛ سحبتني؛ ابرقتني وارعدتني ثم امطرني بهجة وفرحا وحبورا؛ عارف انو ردة الفعل لكلماتي البسيطة التي اكتبها عندما يكون كما ذكرت هذا امر يشجعني على المواصلة في البوست؛ رغم الجو السياسي الكؤود والمحبط وخيبة امل ام الشهيد والثائر وكل الشعب في الوجه الجديد كونو الانجازات على الارض صفر؛ رغم التضحيات العظيمة للشعب العظيم في ثورته الاعظم؛ بل المعاناة زادت؛ وكادت الحياة ان تتوقف في بلدي الطيب؛ باهله ورغم صوفيتنا كشعب واصلا نحن طلباتنا ما كتيرة؛ عاوزين موية نضيفة؛ ورغيفة؛ في متناول اليد لجهة الوفرة والسعر؛ وعلاج لمريضنا الفقير اصلا؛ وتعليم لاولادنا وبناتنا؛ وكباية شاي احمر كب تسع اما لو بلبن اسكت كِب؛ وفنجان قهوة بشمالو يسوى الدنيا بحالو... ولابأس من كهرباء تنير لنا الطريق وحكومة رشيدة تدير لنا مدخلات البلد بنزاهة وبقومية؛ وبحيادية؛ وشفافية... وحاكم قلبه على الشعب وليس اعداء الشعب... نحن لا نبحث عن رفاهيات واجازات وفسح وراحات؛ مع انو من حقنا؛ ولكننا شعب مطالبه بسيطة ونومة في حوشي الفسيح في واوسي وانا استنشق الهواء الطلق وملايتي تهبب من عصرا بدري؛ لا تعادلها نومة في اي مكان اخر في العالم؛ وما انا الا من غزية!!! مع انه مطالبنا من شدة بساطتها اصبحت ثوابت لدى معظم شعوب الارض؛ الارض الطيبة... في مصر يا امير كانت خطيبة زميلنا في الجبهة الديمقراطية والمهتم بالسياسة جدا قد سافرت للسودان؛ ورجعت بعد شهر تقريبا وجينا كلنا ونحن المهتمين بالشان السياسي جينا نسال عن الحاصل بالبلد لزولة هبشت الارض ورجعت لتوها وسالناها اهااا السودان كيف؟ اجابت: حر حررررر شديد احبطتنا الاجابة ونحن نتسم حال البلد المعروف لنا مطلع التسعينات الميلادية.... ذكرت لك هذه القصة لانو واحد زملينا قال لي ياخ البلد مقلوبة وانت المهموم بتحررها وحريتها وسلاما وعدالتا تحكي في قصص وذكرني بقصة البنية اعلاه ما يشجعني على الاستمرار في البوست هو كلمات رقيقات مثلما ذكرت؛ واستفادت القراء من الحمكة الشعبية التي تتناثر هنا وهناك في ثنايا البوست؛ ونوع من التغير؛ هو كمان ما ممكن يكون المنبر كلو حمدوك... معليش طولت عليك؛ كمغترب عندي كان احساسا انو الناس في السودان بستغلوا المغترب؛ مشيت اصلح العجلة في بنشر في الطريق للحلة؛ وكان معاي اخوي الاكبر.... صاحب البنشر ذكر رقم قتا ليهو لا كتير نزلت المبلغ صاحب البنشر وافق صلحت الكفر دفعت المبلغ حسب الاتفاق اخوي شايفو تم الباقي بين ما دفعت وما ذكره صاحب البنشر في البدء اعطاه البنشرجي في ايدو.... وكنت قد اتفقت مع عربية توصلني من المطار لبيتنا بي 950 الف جنيه وكان صاحب العربية قد طلب مليون وصلنا البيت ارتحنا وشربنا موية وعصيروشاي اصر اخوي على السواق ان يرتاح شوية واحتمال في كرامة رفض صاحب العربية فهو على راس العمل وراجع المطار تاني كلمتا اخوي بالاتفاق دفع ليهو المليون طق اهاااااا من الوكت داك بقيت ما بخش في اي مفاوضات حول الاسعار ما يطلبه البائع لسلعته اعطيهو اياه وانا مبسوط وهو مبسوط انا من غزية؛ تحياتي لك ولكل من وصل القراءة لهنا سلاااام
Post: #79 Title: Re: قصص من الدنيا؛ وبعض حكاوي... Author: امتثال عبدالله Date: 07-10-2020, 07:45 PM Parent: #78
قرأت قصة الرجل الذي يبيع الطعمية في سوق الجبلي للطلاب وعرفت معنى أن تكون سوداني ... وعرفت عظمة الشعب السوداني ...وما عارفة كنت حاعمل شنو اذا ما كنت سودانية..وانتمي لشعب السودان العظيم ...
Post: #80 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-10-2020, 09:55 PM Parent: #79
Quote: قرأت قصة الرجل الذي يبيع الطعمية في سوق الجبلي للطلاب وعرفت معنى أن تكون سوداني ... وعرفت عظمة الشعب السوداني ...وما عارفة كنت حاعمل شنو اذا ما كنت سودانية..وانتمي لشعب السودان العظيم ...
بتنا المحترمة امتثال عبدالله
تحياتي؛ الشعب السوداني؛ لاينفك يدهشك في اي تصرف وسلوك؛ ودي بتميزنا كشعب وتظل بصمة خاصة بنا؛ كاننا نولد بها؛ وبالتاكيد ورثناها ونورثها لاطفالنا جيل بعد جيل؛ سمعتنا الطيبة في الخليجمن كرم وشهامة وامانة؛ وعز نفس فوق لاي تصور... نحن الجيل اللاحق لقيناها قاعدة وراسخة من اوائل المغتربين؛ ساحكي لك قصة هنا وقصتين في مداخلة لاحقة؛ القصة الهنا حكاها لي عمي حجازي الذي عاش هنا في الخليج دهرا وما زال يربي في هدؤ وصمود احفاده واحفاد احفاده في حلتنا؛ قاليك الشيخ الكبير مع اصحابو وقد راهنهم على عزة نفس السوداني الذي عمل معه عشرات السنين؛ وكان الوقت مغرباً ناداهو قائلا: يا عم محمد صالح انت اشتغلت كتير وكبرت في السن عاوزين نعمل ليك خروج نهائي بكرة تجيب اقامتك عشان اجراءات الخروج النهائي... عمك ولا كضب ولا فكر ولا تردد اخرج اقامته من الجيب الامامي كانما يحتفظ بها قريبة لامر جلل كهذا؛ ومد الاقامة القريبة للشيخ قائلا: وبكرة ليه؟ دلوكتي مالو!! ..................... ساعود بقصتين اخريين تدل على عظمة هذا الشعب السمح وسريعا
Post: #81 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-11-2020, 12:48 PM Parent: #80
Quote: قرأت قصة الرجل الذي يبيع الطعمية في سوق الجبلي للطلاب وعرفت معنى أن تكون سوداني ... وعرفت عظمة الشعب السوداني ...وما عارفة كنت حاعمل شنو اذا ما كنت سودانية..وانتمي لشعب السودان العظيم ...
شكرا امتثال عبدالله نادر صاحبنا لزم؛ يعول اسرة ومدارس؛ يعمل سواق في امجاد؛ اتفق مع صاحب العربية انه يعمل منذ سنوات باي عربية ويقيف امام مستشفى بحري ويوصل الناس الكان عندهم شخص منوم في المستشفى لقراهم او بيوتهم في بحري وحولها باتفاق مرضي ماديا له؛ ولكنه في المقابل اي جثمان يوصله حتى بيت اسرته بدون اي مقابل لو موافق خلاص ولو عندك مانع دا مفتاح عربتك؛ وكانت فلسفته في ذلك انو هذه الاسرة فقدت احد افرادها ليس من الحكمة اخذ مبلغ مالي لتوصيل جنازة فتاملي!!! واستمر سنوات يؤدي هذه الوظيفة بهذه الاريحية ومرتاح جدا ومبسوط تحول الان لقيادة شاحنة ولكنه ما زال يحن لمناخات تلك الايام العطرة .................. اختي ساكنة في الحاج يوسف اذهب لبيتها منذ انا طالب بالمواصلات طبعا... المهم ايام العرس بالليل كدة ماشين ليها معزومين عشاء وراكب عربية عاد ما عريس؛ المهم وصلت المكان ولكن تهت من الدخلة بالعربية لحدت البيت؛ ولكني في الارية سالت ولد في تاشرته كدة في اولى ثانوي يا ولد تعال بتعرف بيت ناس فلان نعم؛ طيب وصف لي؛ لالالا اركب معاكم لحدت البيت؛ يا ولد كيف الكلام هسا الدنيا ليل؛ وانت صغير ما تمشي بعيد من بيتكم اصر الولد وفتح الباب وركب قلت ليهو يا ابني ليه التعب دا قال: المسافة قريبة وبرجع سريع وانا فرحان لو ما قضيت واجب صغير زي دا حياتي ذاتا معناتا شنو؟ ..... بالحرف الكلام الفوق دا قالو الولد دا
Post: #82 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-13-2020, 10:46 PM Parent: #81
محمود اخوي مع الخالدين، غاب من كان في مقام الاب، من كان يونسنا بلطيف الحكاوي، وكنا نسهر حوله عندما ياتينا من اضوبان حيث بيته واولاده مع اعمامنا هناك ولكنه لابد ان ياتي في الحلة دائما وكثيرا؛ خاصة خلال حياة والدنا؛ وخلال التلاتين عاما الاخيرة من وجودي خارج البلد؛ حضوره حتمي حال عودتي في اي اجازة ونكون تلك الايام موعودون بسهرات في البيت الكبير مع اخواته، قلبي مع اخواته فتحية وعشة ومريم وبخيتة، لابد انهن اليوم يتقطعن من الحزن العميق... فالرجل اساسي في مجلسهن طوال العمر،،، له الرحمة بقدر انسانيته ولطفه، توفي اليوم بواوسي التي ولد بها نهاية التلاتينات الميلادية، وعاش بعيدا عنها اكثر من ثمانين عاما وعاد اخيرا؛ ليموت فيها.... هذه الدنيا انما تتناقص من اعماقها؛
Post: #83 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-14-2020, 00:23 AM Parent: #82
صورة محمود اخوي.....
Post: #84 Title: Re: قصص من الدنيا؛ وبعض حكاوي... Author: osama elkhawad Date: 07-14-2020, 02:42 AM Parent: #83
أهلا منعم
اتذكر مرة في نقاش حول السرد هنا في هذا المنبر، استشهدتُ بمقطع لك..
الجميل انك تسرد بانتقاء واضح، اي كل ما يعطي قيمة حياتية.
تحدّثتَ عن المنصورة وكتبتَ "حللي" هل قصدك "حُللي" ؟؟؟ واظنه من اعضاء المنبر.
أنا كنت في المنصورة لشهور وقابلت هنالك طلاب اعزاء منهم المثقف الكبير حتى في ذلك الوقت: صلاح قاسم.
وكنت قاعد مع ابن عمتي وصديق الطفولة الراحل المقيم: خالد أحمد الخضر.
واصلْ، مع خالص التقدير والود.
مع خالص الود.
Post: #85 Title: Re: قصص من الدنيا؛ وبعض حكاوي... Author: Ahmed Yassin Date: 07-14-2020, 03:33 AM Parent: #84
اللهم ارحم محمود وتغمده بواسع مغفرتك وادخله جنتك
Post: #86 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-14-2020, 11:29 AM Parent: #85
Quote: أهلا منعم اتذكر مرة في نقاش حول السرد هنا في هذا المنبر، استشهدتُ بمقطع لك.. الجميل انك تسرد بانتقاء واضح، اي كل ما يعطي قيمة حياتية.
مرحبتين استاذنا اسامة الخواض اننا نحاول ان نخرج ونستنا الحميمة في الدكانين والجخانين في الحافلات والركشات في بيت العرس وبيت البكا في اسواقنا وفي جلساتنا التي تكتسب حميميتها من تجمعاتنا ولماتنا احاول ان اخرجها من اطار المشافهة لتاطير التدوين من المؤانسة للكتابة الكتابةام دق كما قال العظيم نقد ها نحن نحاول ونسعد بمداخلات من قامة مثلك ...........
Quote: تحدّثتَ عن المنصورة وكتبتَ "حللي" هل قصدك "حُللي" ؟؟؟ واظنه من اعضاء المنبر.55
نعم انه holloly زميل المنبر وكان قد عاد بعد ترحيله ايام النميري عاد ليكمل تعليمه وتخرج مهندسا مدنيا لا يشق له مطار.... حللي تخصص مدنية مطارات
Quote: خالد أحمد الخضر.
يا الله على خالد وسيرة خالد😥 فقد جاءنا في المنصورة مطلع التسعينات وكنا اصلا في جمعية اصدقاء مرصى الكلى فقد كان عدد كبير من السودانيين ياتي للعلاج مجانا في مركز الدكتور غنيم فكنا نستقبل القادمين ونسهل لهم الطريق حتى الوصول للمركز جاءنا صديقي خالد برفقة اخته وقريبه علي وتمت العملية بعد شهور ورجع السودان وبعدها بسنين بلغني صديقي عبدالله احيمر بوفاة خالد فخزنت عليه حزن السنين له الرحمة بقدر انسانيته ونضاله وفضله شكرا استاذ اسامة كل الود تحياتي
Post: #87 Title: Re: قصص من الدنيا؛ وبعض حكاوي... Author: osama elkhawad Date: 07-14-2020, 05:27 PM Parent: #86
أهلاً منعم قلت سيدي:
Quote: جاءنا صديقي خالد برفقة اخته وقريبه عليو تمت العملية بعد شهور ورجع السودان وبعدها بسنين بلغني صديقي عبدالله احيمر بوفاة خالد فخزنت عليه حزن السنين له الرحمة بقدر انسانيته ونضاله وفضله
علاقتك الجميلة بالجميل الراحل المقيم خالد، ستجعلك من أهم الناس* في نظري في هذا المنبر.
كن بخير وعافية، وسارداً رائعاً لسيرتك الذاتية ..
*الحاضر يكلّم الغائب: منعم خط أحمر !!! هههه
Post: #88 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-15-2020, 02:58 PM Parent: #87
Quote: علاقتك الجميلة بالجميل الراحل المقيم خالد
المرحوم خالد صديقي من خلال كوننا كنا مجموعة من الطلاب نتابع حالات مرضى الكلى القادمين للمنصورة وتوثقت علاقتنا لاحقا واصبحنا اصدقاء كان يجمعنا حلم ان يكون السودان اخصرا ويكون وطن العز والكرامة لاهله الطيبين وجاءت سيرتك فقد كنت _ومازلت_ معجبا بك وبكتاباتك في الصحف وباشعارك المختلفة، وحدثني عن مشروع الجزيرة حيث يعمل وعن معاكسات الكيزان للمزارعين وللموظفين والاداريين الوطنيين،،، وكانت فرحتنا عظيمة عندما رجع الينا في المنصورة ليودعنا بعد ان عمل العملية في القاهرة وتحسنت صحته وكسب وجهه بريق الصحة والعافية وانبسطنا، ولكن السنين عادت واحبطتنا لاحقا، له الرحمة يا له من رجل نبيل يضحك كطفل ولا يحمل فب اعماقه الا المحبة،
Post: #89 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-16-2020, 09:46 PM Parent: #88
دخل عمي الشيح حسن على لجنة الانتخابات؛ في حلتنا لانتخابات مجلس شعب نميري وساله استاذنا علي عمران عن عمره، فاجاب عمي ان عمره خمسين سنة فضحك الاستاذ علي واللجنة لانو قبل فترة جاءهم الحسن الشيخ حسن وقال انه عمره خمسين عاما وقال له استاذ علي ياعم الشيخ زيدا شوية لانو قبل شوية ولدك الحسن قال عمرو 50 سنة رد عمي الشيخ: الحسن علي كيفو لكن انا 50 دي ما بزيدا ساعة .... صاحبنا ظل واقف في ال38 سنوات وسنوات اعترف في جلسة صفاء انو طوَّل خلاص في ال38 دي يا جماعة انا من الليلة وصلت 39 ...... صاحبنا الموظف السعودي قال ان والده ظل يقول انه في ال55 قبل ان يتوظف معانا قبل نحو سبع سنوات ...... الحاجة الدكتور سالا عمرك كم يا حاجة؟ قالت 40 الدكتور سألا تاني: ود ولدك يا حاجة قالت نعم كتب 65 سنة ....... الكُبُرْ دا زول بدورو مافي، .......... الاطفال فقط يذكرون عمرهم الحقيقي؛
Post: #90 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-18-2020, 02:56 PM Parent: #89
خلال التمانينات ذهب عبدالوهاب اخوي للعمل في العراق؛ في عز حرب الخليج!!! ضمن مئات الالوف من السودانيين؛ بعضهم ما زال في العراق؛ ولكن ذلك موضوع اخر... المهم اخوي اشتغل في مكان يزوره مئات السودانيون يوميا؛ ومعه عمك عراقي كبير في السن؛ ساله اخوي: يا عم علي واولادكم بالجبهة؛ بالله جية السودانيين دي هنا ما ورطة؟ اجاب عمك سريعا لابد ان السؤال وقع ليو في جرح: والله ورطة ونص اضاف لها وهبة لاحقا كلمة وخمسة...
Post: #91 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-20-2020, 02:33 PM Parent: #90
مشينا نحن اربعة طلاب لزيارة صديقنا في قرية في ضواحي الخرطوم المهم وصلنا البيت وصاحبنا مشى التمرين رسلوا ليهو يجي استقبلنا اخوهو الكبير بكامل الاريحية والليمون البارد وكان يلبس عراقي بلدي وكان عداد الكهرباء موصل ولكن التوصيلات الداخلية مفصولة فتكلمنا بالانجليزية ونحن نلعن عدم الكهرباء واسرفنا في الاستياء المهم جاء صاحبنا وعرفنا باخيه المهندس الكهربائي خريج جامعة الخرطوم والمغترب بالامارات لسع خجلانين لاحقا اعتذرنا لصاحبنا قال اخوهو ما زعل لانو كنا طلبة لسانا صغار وقال انجليزيتنا هردبيس ساكت ههههههههها ......... لاحقا في القطار ونحن ماشين مصر قطعنا بالانحليزي برضو عن عمك كبير شوية معانا في السفرية لم يرد ابدا.... لنكتشف لاحقا انه عاش ٢٠ عاما في امريكا وانه ماشي مصر اجازة وبعدها لبريطانيا بلد الانجليزي ذاتو ليعود بعدها لمنزله في قلب الخرطوم... القصة الدخلتنا في اضافرينا انه استمر في التعامل مع بانسانية عالية،،، سلام
Post: #92 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-21-2020, 08:13 PM Parent: #91
قبل سنوات قليلة كنت اسكن في بيت له باب خارجي لكل المبني، الباب الخارجي هذا به حوش بعيدا عن موقع الشقق، وكان معي محمد ولدي وقد خرجت لمشوار قريب ونسيت ان اخذ معي المفتاح والتلفون واصبحت وولدي بالخارج، تصادف ان عمنا سوداني ساكن مع عزابة جيراننا في الحي، وعلاقتنا لا تتجاوز سلام عليكم وعليكم السلام، المهم قتا لعمك يا استاذ بالله ممكن تلفونك اكلم المدام ترسل الولد يفتح لينا الباب رحب عمنا بالفكرة باريحية السودانيين المعتادة، واسالني عن الرقم، وانتظر الجرس، لتكون المفاجاة ان الرقم خطا كرر الرقم تاني بعد سالني وكررت نفس الرقم وطلع برضو خطا عمك زعل شديد، وبدأ مستغربا كيف الواحد ما حافظ رقم مرتو وعندهم اولاد وما معروفة الظروف وانا مصر الرقم صاح ونتصل تجي رسالة تاكد ما الرقم الصحيح وعمك خلاص فاض بيهو وبدا متوتر شديد ومستغرب من السوداني الما حافظ تلفون زوجتو دا ولا شك انو حسب حسابات شتى وعمك رفض يمشي شقتو رغم محاولاتي باقناعه، سياتي جار لنا في اي لحظة ويفتح الباب، عمنا مصر ينتظر وقال لي عديل الحاصل شنو بالضبط هل الاوضاع العائلية مستقرة ههههها وانا احلف انو مافي الا الخير المهم فجاة كدة اتذكرت انو دا رقم قديم وتم اغلاقه بواسطة الاتصالات، واستبدلناه للمدام برقم جديد وحكيت القصة لعمنا واتصلت بالرقم الصحيح سرعان ما جاء احمد وفتح لنا الباب... ورايت فرح الدنيا في وجه عمنا الطيب،
Post: #144 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-02-2021, 11:41 PM Parent: #92
اب
Post: #93 Title: Re: قصص من الدنيا؛ وبعض حكاوي... Author: Amira Hussien Date: 07-22-2020, 04:42 PM Parent: #1
الرحمة والمغفرة للراحل محمود والعزاء لكم وللاسرة متابعين
Post: #94 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-23-2020, 03:43 PM Parent: #93
شكرا يا اميرة نجيكم في الافراح تحياتي .......... شاب في حلتنا بغني لينا في مناسبات الحلة وصوتو عادي لكن حافظ وبفك الحيرة والناس بتنبسط مع الايقاعات الافريقية الحارة.... المهم قابلته بعد سنوات ووجدته يعمل سائقا في حافلة، وسالته ليه خليت الغنا قال لي: الشعب السوداني ما بقدر الفن والفنانين، في سري قلت: الشعب السوداني تطير عيشتو...
Post: #96 Title: Re: قصص من الدنيا؛ وبعض حكاوي... Author: ابوحراز Date: 07-25-2020, 02:20 PM Parent: #94
مثل هذه البوستات تغسل شوارع الروح والقلب مثلما تغسل الامطار نوافذنا ورغم اننا من الجيل الذي يتهم بانه يتمترس في الماضي وليس بإمكانه الخروج عن هذه الدائرة من الانفصام لكن للماضي اجنحة احيانا يحملك عبر هذه الاجنحة لتتنفس بعمق نتنفس عبقا وتاريخا ومكانة انا ياسيدي مهووس بالامكنة ويظل المكان عندي محفورا في كل خلايا الذاكرة ويترك ندوبا وثقوبا ليس من السهل ان تنتهي بل يعجز كل اطباء التجميل عن إعادتها إلى ما كانت عليه جميل جدا ان تدخل الى دهاليز البوست على هيئة رجل وتخرج منه على هيئة كتااااب كتااااب ملئ بشتى العلوم والمعارف الإنسانية حكاوي رائعة تجعل الهواء النقي يدخل الى رئتيك بسهولة
هجمة مرتدة يا اخي لم انس وانا طفل صغير ان امي كانت تاتي بي مساءا الى جدي ومن ثم تاتي كل قريباتنا لنفس الجد وكل واحدة تقول لنا جدكم حا يحكي ليكم حكاوي عشان تنوموا والجد والله قصصه كانت تدخل بالاذن اليمنى وتخرج باليسرى لانها مكررة وحفظناها عن ظهر قلب لكن الطريف في الموضوع إنه هو الذي ينام قال عشان تنوموا قال !!!
اذكر انه حينما مات عليه الرحمة والمغفرة كانت جيوبه منتفخة وسعدنا ايما سعادة بالورثة التي ستغير حياتنا تماما ولكن بعد حضور الامام وإخراج ما في الجيب اتضح ان ذلك يسمى (راتب الامام المهدي)!!! يعني ما كنا نتوقعه قريشات طلع ادعية انا لله وانا اليه راجعون بالله شوف مدى زهد هؤلاء الناس يموتون وفي افواههم دعاء وفي قلوبهم دعاء وفي جيوبهم ادعية !!!!
Post: #97 Title: Re: قصص من الدنيا؛ وبعض حكاوي... Author: ابو جهينة Date: 07-25-2020, 03:59 PM Parent: #96
واصل يا عبدالمنعم
متابعة لصيقة
Post: #98 Title: Re: قصص من الدنيا؛ وبعض حكاوي... Author: Ahmed Yassin Date: 07-25-2020, 04:32 PM Parent: #97
ابوحراز والله اشتقنا لك ولكتاباتك
Quote: اذكر انه حينما مات عليه الرحمة والمغفرة كانت جيوبه منتفخة
Post: #99 Title: Re: قصص من الدنيا؛ وبعض حكاوي... Author: Ahmed Yassin Date: 07-25-2020, 05:12 PM Parent: #98
قال لصاحبه انا شنو كمان انت قايل انا بنى آدم ؟ تعال احكي ليك الحصل عشان تاني ما تقول لي انت وانت اتصلت علي ست الشاي الانا بعرفها وقالت لي انا شاكة في زبائن شكلهم مروقين وبلعبوا كورة الظاهر يمرعليهم واحد راكب موتر وكل مرة يعطيهم ورقة وبتسمعه يقول ليهم دي مطلقة وفي مرة يديهم ورقة صغيرة ويقول دي راجلها متوفي .. ومرات دا رقم طالبة في الجامعة. وغضبت غضب شديد وبحكم عملي في (الامن) والبحث قررت اني اراقب اولا المصدر وهو (صاحب الموتر) وقضيت اسبوعين اراقبه ومتابعه . تتخيل اكتشفت شنو من مراقبتي لي صاحب الموتر وتتصور وصلت لى شنو ؟ اصلا ماحتصدق اتضح لي ان الولد دا يتردد على منزل امرأة فاضلة في الحي وانها ترسل ارقام ( مساعدات) يعني كل اسرة محتاجة عندها رقم وتفاصيل احتياجاتهم وليس ارقام تلفونات مع الشاب صاحب الموتر لاسر متعففة وظروفهم الاقتصادية لا يعلم بها الا الله , وان المجموعة البتتسلم الارقام دي زملاء واصحاب وهم البقدموا مساعدات في السر للاسر المتعففة دي عن طريق المرأة الفاضلة في الحلة والمساعدات البتصلها هي من تقوم بتوزيعها والولد صاحب الموتر بقوم بالعمل دا لوجه الله
Post: #100 Title: Re: قصص من الدنيا؛ وبعض حكاوي... Author: امتثال عبدالله Date: 07-25-2020, 07:04 PM Parent: #99
القصة بتاعة عمكم العجوز المسافر معاكم في القطر وقطعتو فوقه بالانجليزي واكتشفتو انه عايش في أمريكا ٢٠ سنة.. نفس القصة حصلت لينا هنا ولكن بالعكس نحن قطعنا بالعربي ....وان شاء الله بحكي ليكم الحكاية لحين ميسرة ومسرة.. وقتنا بقى ضيق ...مشغولات مع العروسة وبنجهز للسفر ....والسفر في زمن الكرونا قطعة من جهنم ...
Post: #121 Title: Re: قصص من الدنيا؛ وبعض حكاوي... Author: حسن محمد عمر Date: 08-20-2020, 01:15 PM Parent: #100
ماشاء الله بوست دسم أخونا / عبدالمنعم وضيوفك الكرام سرد جميل يفك الزهجة مع الظروف والتقلبات التى تحاصرنا من كل الإتجاهات أسأل الله العلي القدير أن يمن علينا بالأمن والإستقرار وأسمح لى بالمشاركة فى الذكريات الحلوة دي وأبداها ليك بأول سفرة لي إلى مصر بداية الثمانيات كانت إقامتى مع أقرباء لنا بمنطقة تسمي عابدين قريبة جدا من قصر عابدين المهم مع العصاري كدة نزلوا الشباب من البيت يلعبوا كرة فى الحارة وأنا ضيف بتفرج شوية كدة دوروا شكلة وقاموا إتنين منهم ( مصريين ) يتقابضوا وباقى الشباب مواصلين فى اللعب الوضع ماعجبني قلت فى نفسى أحجز بينهم ودخلت أقابض فيهم جاء واحد من شبابنا قال لى بتعمل فى شنو قلت ليهو ماشايف ديل عايزين يتضاربواقال لى ماتشتغل بيهم شوية كدة ويتصالحوا نقة بس فعلا بعد دقايق كدة واصلوا لعبهم أيام جميلة قضيتها بمصر ومنها للعراق سنوات الدراسة والمواقف الطريفة التى لا تنسى وللحديث بقية إن شاء الله
Post: #133 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-30-2020, 12:25 PM Parent: #100
اب
Post: #135 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-11-2021, 04:09 PM Parent: #100
اب
Post: #107 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-29-2020, 02:37 PM Parent: #99
كتب احمد يسن
Quote: تتخيل اكتشفت شنو من مراقبتي لي صاحب الموتر وتتصور وصلت لى شنو ؟ اصلا ماحتصدق اتضح لي ان الولد دا يتردد على منزل امرأة فاضلة في الحي وانها ترسل ارقام ( مساعدات) يعني كل اسرة محتاجة عندها رقم وتفاصيل احتياجاتهم وليس ارقام تلفونات مع الشاب صاحب الموتر لاسر متعففة وظروفهم الاقتصادية لا يعلم بها الا الله , وان المجموعة البتتسلم الارقام دي زملاء واصحاب وهم البقدموا مساعدات في السر للاسر المتعففة دي عن طريق المرأة الفاضلة في الحلة والمساعدات البتصلها هي من تقوم بتوزيعها والولد صاحب الموتر بقوم بالعمل دا لوجه الله
شكرا احمد يسن وهاك القصة دي من حلتنا؛
ع . ح . ر
اواخر التمانينات غادرنا في وقت متقارب ، هو الي ابوظبي ... وانا الي مصر ؛ رجع مليان قندرانيات ، رجعت مليان هموم ، وذلك موضوع اخر ... يا هو زولنا القديم ذاتو ، القندرانيات دي ما سوتلو الحبة ... فقط ذادته عطاء وكرم وانسانية ... كلمني من اثق في حديثه ، ان الرجل دا بطل صفحتنا دي ... رابط ماهية رسمي ، لخمس اسر من الاقارب حسبا لي واحدة واحدة ... يوم تلاتين من الشهر ، تصل للجماعة حتى لو كان برا الحلة ... الغريبة رمضان الفات دا كلو معاها ، ما جاب لي سيرة ... فرحت فرحة يتيم يوم العيد ، باللبس الجديد اليوم داك كلو انا ممتن ومبسوط ، ومازلت ممتليء غبطة ... الدنيا دي بخير ، والناس الزي ديل هم الحافظين التوازن ، وتماسك المجتمع والدنيا الان صيف جمرة ، قحطا قمطريرا ... حدثني اخر قال : صاحبك دا يمر بالصدفة قريبا من بيت زيد من الاهل ، يالله البيت محتاج ترميم مع الخريف القرب دا .. بصمت ياتي البناء والبشيل الطوب ، والاسمنت ، وبكرة يتفاجى اصحاب البيت ، بالترميم النزل من السماء دا .... الله ما كريم ... يعاود المرضى ، ويمد يد المساعدة بشويش حتى لا يراها الاخرون ... في صمت يمد ، ويعصر ويغادر ، وكان شيئا لم يكن وبرأة الاطفال في عينيه ، قبل العيد يعاود الاهل ، وقبل ذهاب بنت الجيران للجامعة والمدرسة تلقاهو قريب ، ويطول الكلام عن خير الرجل ، وصمته ولابكلم حتى اصدقائه ، في ناس انناس .. صاحبنا دا كمان امانة مو وناس ، وحكاي، والنكتة في طرف لسانو ، والشغل دا خلو ساهي ، عادي يبيت مع القندراني في الورشة ، نسيت ان اقول : ان القندرانيات ماشة زايذة ، الارزاق دي زي الماسورة بتاعة الموية ، اكان فتحتها ، بتنبهل ، ولو كمان قفلتها ، بتنحسر ، الزول دا الليلو برا ، كما قال النور يوسف تزوج مرتين ، وما شاء الله ، وشيهو ملان ....
وقلبو كمان
Post: #127 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-31-2020, 07:51 PM Parent: #99
اب
Post: #101 Title: Re: قصص من الدنيا؛ وبعض حكاوي... Author: ابوحراز Date: 07-26-2020, 07:11 PM Parent: #98
شكرا من القلب اخي احمد يس تجدني اكثر اشتياقا لكل قبيلة سودانيز ولكنها مشغوليات الحياة فرضت علينا ان نبتعد قليلا وان نطل ما بين الحين والآخر لقد اتخذت قرارا بتقديم استقالتي من العمل بوزارة الشؤون البلدية والقروية بالمملكة والاستقرار بالسودان قبل الجائحة بايام واتمنى ان اكتب عن تجربتي رغم انني حتى اللحظة اعيش في مراحل التجربة الاولى وعلى كل مغترب حينما يعود ان لايتسرع وان يظل متفرجا لمدة لاتقل عن ستة اشهر ومن بعدها ينطلق ويتوكل على الله ناسف ان غيرنا البوست عن مساره
Post: #102 Title: Re: قصص من الدنيا؛ وبعض حكاوي... Author: Ahmed Yassin Date: 07-26-2020, 07:53 PM Parent: #101
ابوحراز
Quote: تجدني اكثر اشتياقا لكل قبيلة سودانيز ولكنها مشغوليات الحياة نأسف ان غيرنا البست عن مساره
الشيخ حسن قال لتلاميذه (يا أبنائي من لم يستطع منكم زيارة الحجاز فليزر “أبوحراز” ) حباب يوسف أُحباب شرق البيدرك للمضيق في لمحة برق دا طبعا الشيخ يوسف ابشرا حتى اسمك له وقع جميل ومريح للنفس وانت يا (ابوحراز) لقينا عندك صفا النفس والكتابة السهلة البتشدك وخفة الظل المابتتوصف وكم يا ما كم اسعدتنا الله يسعدك وين ما تقبل وانت ذاتك تجسيد رائع ومثال لموضوع البوست الفيهو دروس حياتية وعبر و ويا سيدي بكل جمالياتك التي تعطيك بعدا ثالثا
Post: #103 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-26-2020, 11:50 PM Parent: #102
Quote: مثل هذه البوستات تغسل شوارع الروح والقلب مثلما تغسل الامطار نوافذنا ورغم اننا من الجيل الذي يتهم بانه يتمترس في الماضي وليس بإمكانه الخروج عن هذه الدائرة من الانفصام لكن للماضي اجنحة احيانا يحملك عبر هذه الاجنحة لتتنفس بعمق نتنفس عبقا وتاريخا ومكانة انا ياسيدي مهووس بالامكنة ويظل المكان عندي محفورا في كل خلايا الذاكرة ويترك ندوبا وثقوبا ليس من السهل ان تنتهي بل يعجز كل اطباء التجميل عن إعادتها إلى ما كانت عليه جميل جدا ان تدخل الى دهاليز البوست على هيئة رجل وتخرج منه على هيئة كتااااب كتااااب ملئ بشتى العلوم والمعارف الإنسانية حكاوي رائعة تجعل الهواء النقي يدخل الى رئتيك بسهولة
حباب ابوحراز، حبابك الف ياخ... نورت البوست؛ وجملته وقمرته؛ حتى انهال ضوءه تماما تمام اكتمال الكتابة ينير اقبية الخفايا؛ وينتمي لفاكهة الفرح ياخ (ويدهش الفصول لموسمين) عندما رايت نور اسمك يلمع في اخر مداخلة؛ اعدت تهيئة نفسي والمكان؛ انتظرت خمس دقائق لاستيعاب الموقف؛ تماما كما فعلت بورصات العالم حال اندلاع حرب الخليج اغلقت ابوابها نصف ساعة لاستيعاب الموقف والتطورات؛ واعددت لنفسي كاسة شاي وكترت الهبهان؛ وبعضا من هيل؛ واوقفت الدخول على المنبر من الجوال؛ وسخنت لابتوبي الموخمج؛ وقرات كتابة مرة ومرتين وتلاتة ما حا اكضب عليك؛ كان مكتوبك اجمل تقريظ تلقيته في الاسافير منذ نحو عشرة اعوام؛ اسعدني ما اجادت به خاطرتك؛ ايما سعادة؛ ودا الكلام البخلي الزول يعضي كيبورته ونواجزه؛ وكل حاجة جواي انتعشت؛ وفرحت ايوة فرحت من القلب والخاطر صبابة... فانت يا ابوحراز كاتبي المفضل قرأت كل ما كتبت في المنبر؛ وعندما يلمع اسمك في اي بوست افتح البوست طوالي وكلي ممنون بمتعة شديدة واستمتع فعلا بالمكتوب ولم تخذلني ابدا ولم تخذلني مرة انت كاتبي المفضل في المنبر؛ وانت ممن يضج المنبر بذكراهم؛ نحتفي بحضورك الوريف ونفتقدك حالما الغياب سرا وعلانية؛ شكرا لبكري ابوبكر ان جعل لقاء الرائعين امثالكم ممكنا... شكرا ليك ياخ شكرا كتير والله وانا زيك ابن الامكنة؛ اثير للمكان وما زلت اتردد على مدرستي المتوسطة في الجيلي تلك التي فارقتها مطلع التمانينات؛ احن لبيتنا القديم؛ وتُكُلْ امي بلداياته؛ ورائحة طعامها اللذيد ما زالت تعانق فوادي؛ وشاي صباحاتا الندية وريحة النار ياخ وقطعة خبرة قليلا وحرف كسرة غالبا احن لمناخات غرفة ابوي تلك المبتلة دوما بماء ابريقه الحريف وريحة الارض المبلولة لتوها وطرف المصلاية انها ريحة الوقار والصلاح والتقوى ريحة ابوي ياخ يوم كسرنا غرفة ابوي لنبني مكانها غرفة احدث بكيت ايوة بكيت اذا اعدنا بناء الغرفة فمن يعيد لنا ريحة ابوي الذي يلمى المكان باريجه الفواح؛ ويفيض... اجمل لحظاتي حياة كنت اقضيها لاحقا بعد ما اغتربتا واتفلهمتا اجمل لحظاتي كنت اقضيها براكوبة امي حتى ان عشة اختى تحتج على اسم الراكوبة وتسميها استراحة هههههها اختفت راكوبة امي مع التطورات في خريطة بيتنا ويوم ما جيتا ولقيتا مافي انفجرت في نوبات ما زلت احن لمكان امي وراكوبة امي ورائحة امي وقوتها وحكاويها وخفة روحها ودمها؛ ان امي وتضحكني من جوة القلب تلك سدرة منتهاي اذن.... اذا اعدنا بناء الاستراحة؛ فمن يعيد لي امي... ساعود لاعلق على باقي مداخلتك عزيزي ابوحراز وساختم هكذا فجأة لانها من الاستحالة انهاء مشاعر انسابت شلالات على الورق... واختلطت فيها المشاعر وايه الدنيا غير لمة ناس في خير او ساعة حزن...
Post: #104 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-27-2020, 08:34 PM Parent: #103
ابوحراز ساواصل في طقس احتفالي بالعزيز ابوحراز.. فليمثله تضرب اكباد الكيبوردات؛ والطبل انشده... قلت لصديقنا ذهبت لصديقنا المشترك في مدينة تبعد عن محل اقامتنا حوالي مية كيلو؛ قلت له لقد ضربنا اكباد الابل... قالي بالله جاب ليكم كبدة ابل هههههها قتا ليه آاااي
Quote: هجمة مرتدة
القصة دي حكاها لي عمنا بنفس التفاصيل... انا ناقل امين فقط امين زكي؛ اميين محمد امين؛ امين دنيايا... المهم عمك قال ضرب لي اخوك فلان؛ اخوي دي جيل ورانا شديد؛ واميركي عديل كدا. اخوي فلان ضرب لابوه انو عاوز يعؤس بت سودانية ولفتاتا غزال ومقيمة مع اسرتها في ارض الاحلام يا جميل واصحى عمنا قال لي قتا لاخوك موضوع زي دا ما بنفع بالتلفون رسل زيارة سريع؛ وجاءت الرسالة وعمنا اطمن شوية وضرب اكباد الطائرات هذه المرة واصبح مع ولدو فلان الولد ساق ابوهو للاسرة؛ الابو قعد معاهم مسافة ساعات، من اجل التعارف ورجع مع ولدوا قال للولد البت دي ما عاوزا ليك؛ تعال نعرس ليك بنات اعمك بالصف اخونا دا اصر وابوهو اصر المهم في النهاية الاب قال للولد اسمع انا ما بقعد في مجلس العرس دا وما رضيان... ورجع بعد فترة الحلة... الولد عرس رغم رفض ابوهو للخطوبة ولكنه عرس بعد خمس سنين عاشتم القصة؛ واربعة اطفال حلوين وملظلظين اخونا دا اتصل على ابوهو يابا ان عاوز اطلق المرة دي الاب تاني يا ولدي موضوع موضوع زي ما بنفع بالتفون لا تتخذ اي قرار ورسل زيارة سريع وجاءت الزيارة؛ وعمل نزل مع ولدو في البيت الذي اصبح اسري تظلله رياحين اربع اطفال متتاليين ابوهو قالو عارف يا ولدي لو المرة دي بتصبحك بقة وبتمسيك بدقة تتحمل بس بعد دا طلاق مافي انا ما بقعد في مجلس طلاق لم اقعد في عقده المهم اخر كلام طلاق مافي وانا ما عافي منك لو طلقت المرة دي ...... الولد ما طلق وعادت المياه تجري بفضل حكمة الاب والاطفال ما شاء ما زالو في حنان اسرتهم المكتملة عايشين ومبسوطين وكمام زادو....
كان عمه الشيخ يقول ان سمع ان فلانا طلق فلانة يقول فلان دي غلطان هو قبل ان يسمع الحيثيات؛ والدفوع والتبارير
Post: #105 Title: Re: قصص من الدنيا؛ وبعض حكاوي... Author: امتثال عبدالله Date: 07-27-2020, 09:19 PM Parent: #104
وعمه الشيخ ده هو الصاح،،،رجل حكيم بمعنى الكلمة ...
Post: #155 Title: Re: قصص من الدنيا؛ وبعض حكاوي... Author: فرحات عباس Date: 01-24-2023, 07:28 AM Parent: #98
بشيري يا برلوم يا نبيل ... ما عرفتا البوست دا إلا اليوم ... الزمن السريع الكاسح .. القاسي أحيانا يجعلنا نتخطى مواضع جميلة ما كان لنا أن نتخطاها لو كان يمشي الهوينى غير فزع ولا مهموم ... قبل كم يوم قرأت بوست بعنوان عبد المنعم الطيب رفاعة .. يتحدث عن فنان من أولاد دلوت القريبة من رفاعة .. وعلق أحد المتداخلين أن المدعو عضو معنا بالمنبرر .. قلت في مداخلتي .. إن العضو عبد المنعم الطيب في المنبر ليس هو ذلك الفنان .. إلا أنه ذو نضم جميل بطعم الغناء .. أو هكذا قلت .. صديقي اللذيذ ..... سعيد جدا أن أكون في الصف العريض الطويل للمتابعين لهذا البوست الرائق.
Post: #245 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-11-2024, 10:15 PM Parent: #98
نسيبه هلا بتنا الجميلة نسيبة، حبوبتك سيدة عظيمة جمعت المجد بين ضفتيه، تحملت فقد الاعزاء .. وتجملت بتربية اليتامى، فكانت عنوانا للامومة عريض ومكانا رحبا... جدك الطيب ودبشيري اسم على مسمى، طيبة وضحكة وونسة وكاريزما، وخفة دم وروح وقلب.. لم اره يوما غاضبا او شايلا من احد او مخاصما احد.. كان نسمة مشغولا باسرته الكبيرة، وباخوانه وباسرته الصغيرة وباولاده وبناته واحفاده.. كانت سعادته لاتوصف عندما ياتي اعمامنا اخوانه من ام ضوبان، كنا موعدين بسهرات فجدك رملي واحمد المادح، وعلي والشيخ ادريس، وابنائهم الكبار.. فهم اصحاب مجالس واسياد انس وفكاهة وشعر وحكم.. اما 💖 عمي الشيخ فكان يشرف بيت اخيه كل يوم جمعة غالبا.. وكان يعطيني مصروف خاص، يغمت لي قرش او ام قرشين او شلن ومرات ريال عديل.. اشتري منهم غالبا في التو واللحظة حلاوة حربة وكرملة، والباقي لبكرة في فطور المدرسة.. هؤلاء قوم بركة في بركة وطيبة في طيبة عمي الشيخ يكبر ابوي بحوالي ٢٥ عاما ولكنهم اصدقاء واحباب واشقاء.. عندما داهم عمي الشيخ مرض الموت، اخذ ابي فردته البيضاء قطع(الدامر) وقعد جمب اخوهو لم يفارقه لحظة طوال ٤٠ يوما.. لم يعد للمنزل خلالها.. حتى حضرته الوفاة وكان منه قريبا قرب الروح.. كان ذلك في عام ١٩٨٤م وكنت وقتها طالبا بالثانوي.. ابقوا على عشرة على لحمة الاسرة الكبيرة فانتم خيار من خيار.. واختنا هدى في مقام عشة ومريم واسيا وبخيتة وتوحة..💕 كل الحب للاسرة الكبيرة الممتدة.. الاسرة عزوة في هذا الزمن الصعب..
Post: #246 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-11-2024, 10:22 PM Parent: #245
Quote: نسيبه هلا بتنا الجميلة نسيبة، حبوبتك سيدة عظيمة جمعت المجد بين ضفتيه، تحملت فقد الاعزاء .. وتجملت بتربية اليتامى، فكانت عنوانا للامومة عريض ومكانا رحبا... جدك الطيب ودبشيري اسم على مسمى، طيبة وضحكة وونسة وكاريزما، وخفة دم وروح وقلب.. لم اره يوما غاضبا او شايلا من احد او مخاصما احد.. كان نسمة مشغولا باسرته الكبيرة، وباخوانه وباسرته الصغيرة وباولاده وبناته واحفاده.. كانت سعادته لاتوصف عندما ياتي اعمامنا اخوانه من ام ضوبان، كنا موعدين بسهرات فجدك رملي واحمد المادح، وعلي والشيخ ادريس، وابنائهم الكبار.. فهم اصحاب مجالس واسياد انس وفكاهة وشعر وحكم.. اما 💖 عمي الشيخ فكان يشرف بيت اخيه كل يوم جمعة غالبا.. وكان يعطيني مصروف خاص، يغمت لي قرش او ام قرشين او شلن ومرات ريال عديل.. اشتري منهم غالبا في التو واللحظة حلاوة حربة وكرملة، والباقي لبكرة في فطور المدرسة.. هؤلاء قوم بركة في بركة وطيبة في طيبة عمي الشيخ يكبر ابوي بحوالي ٢٥ عاما ولكنهم اصدقاء واحباب واشقاء.. عندما داهم عمي الشيخ مرض الموت، اخذ ابي فردته البيضاء قطع(الدامر) وقعد جمب اخوهو لم يفارقه لحظة طوال ٤٠ يوما.. لم يعد للمنزل خلالها.. حتى حضرته الوفاة وكان منه قريبا قرب الروح.. كان ذلك في عام ١٩٨٤م وكنت وقتها طالبا بالثانوي.. ابقوا على عشرة على لحمة الاسرة الكبيرة فانتم خيار من خيار.. واختنا هدى في مقام عشة ومريم واسيا وبخيتة وتوحة..💕 كل الحب للاسرة الكبيرة الممتدة.. الاسرة عزوة في هذا الزمن الصعب..
Post: #250 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 12-22-2024, 05:40 AM Parent: #98
فوق
Post: #241 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-16-2024, 01:12 PM Parent: #97
اب
Post: #106 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-28-2020, 09:53 PM Parent: #96
كتب ابوحراز
Quote: بالله شوف مدى زهد هؤلاء الناس
هؤلاء قال عنهم الطيب صالح في ما معناه يعمرون طويلا كما شجر السيال والسلم؛ رغم قسوة الطبيعة وجور الحكام لانهم لا يسرفون في الحياة؛ عاش ابي عليه سلام زهاء المية عام وقد تزيد وكان قنوعا مبسوطا لا تحس عليه اثر السنون ولا التطلع؛ راضي و سعيد وكان يردد دوما: احمد الله بجناي وبعشاي؛؛ ............. استاذنا ابوجهينة شكرا لمرورك مواصلين خليك قريب ............ صديقي العزيز احمد يسن جائي لك يا فنان ويا انسان...
Post: #108 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 07-31-2020, 01:14 AM Parent: #106
كل عام احبابي واصدقائي والقراء اصدق اصدقائي الكرام.... والمتابعين وجميعا، وكل من وصل لهذه المداخلة اقول لكم العيد مبروك عليكم والسنة الجاية ربنا يحفظكم ويحقق امانيكم ويجي العيد ويلقاكم تامين ولامين والسودان وقد تجاوز المحن واستقر وطنا للسماحة والحب وكل الاغاني الممكنة، اتمنى ليكم متعة ممتدة، مع اللحوم الممتعة انا كائن لحمي، اكل المرارة، وام فتفت والكمونية دي خلاصة الخروف، واموت في اللحم الشية، والمحمرات، ولا بد لي من كاتولة مركزة من الشربوت، لا اوصيكم اضربوا اللحمة ضرب من لا يخشى القاوت، عيد لحيم، تحياتي، وتصبحوا على وطن النجوم وضاح ووسيم،،، __________________ الثورة مستمرة و سننتصر
Post: #109 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-01-2020, 01:19 AM Parent: #108
بمناسبة عيد اللحم بعض نصائح حتى تصل المتعة مداها تجنب الشحوميات عموما، وتجنب الهُبر من اللحوميات والقطع الكبيرة ما امكن... وثق دائما ان احلى اللحم ما حاور العظم... واماميات المذبوح دوما فايتة الخلفيات بمسافات، لجهة الطعم والهشاشة والدسامة، كل ما تقدمت في المذبوح احلوا.... النيفة ما اطعمها للاكيلة الحرفاء اليوم لم يسلمني الجزار راس خروفي زعلتا شوية اعداده في الغربة مضني،، وبعدين مشيت، المهم الشطوط والليمون والبصل الابيض اساسي اذا واجهتك حرارات في الاخراجات هنا وهناك، جراء الشطوط الحريفة فعليك بالنصيحة الذهب التالية بس خت موية في الفريزر او بيبسي او شربوت او اي مشروب وخليه بارد شديد واشربه بعد الاكل مباشرة الشربة بالرمدة، وللخايفين من النزلة بشرط السكر موزون عليهم بحجر حجرين من الطحنية دي،،، برضو فعالة،، لابد من الكاتول بالعدم فسن اب كما يقول طيوبي صغيري،، ولمن يعاني من داء الملوك استخدم الحبة فليس كل الايام عيد لحمة كنا يقول الراسخون في القاوت،، المرارة ما اطعمها ولو اخدت شلهبة بالنار فهي اطعم، وتظل الكمونية سيدة المائدة هذه الايام،، ومن لا يحب الكمونية فقد فاتته متعة المتعة، والشاي الاحمر بالهبهان وبالقرنفل المغلي مع الموية وسكر يتم الكيف...
ههههههههها لا تتخيلوا انني نهم، فانا في الغالب غير متطلب، وغير متبرم... لم اطلب ابدا في حياتي تجهيز طعام خاص،، اكتفي بالموجود، وانبسط به.. وآكل واقش شنبي... واتفكفك،، تحياتي،،
Post: #110 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-02-2020, 07:47 PM Parent: #109
ماشين السيرة، والبص امتلأ حتى فاضت جوانبه، صاحبنا عسمان شواكيش جاء متاخر كعادته، وما لقى مكان حتى للوقفة، بقى رقَيِّقْ وانحشر جمب اصحابو، والوقفة صعبة في الحتة الضيقة، المهم قام راح قاعد فوق كرعين صاحبو عادل، استقر وانبسط شوية اتلفت لصاحبو عادل قائلا: اسمع هوي اوعى يكون في ضميرك في حاجة.... ههههها
Post: #111 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-04-2020, 04:14 PM Parent: #110
ولدين شباب من الاعراب اهلنا، ويبدو انهما متخاصمان،،، قاعدين مع شلة بنتونس في مناسبة، وكان الجو بشائر خريف... وقبايل عيد فتمنى احد الولدين الاعراب مية كبش سمين يبيعهم في العيد القرب دا ويركب طوالي بكس ٨١ العرابي التاني قال: ان شاء الله ربنا يديني مية مرفعين جعانات شديد، ياكلن المية خروف القبل شوية ديل كل ذئب يقوم بكبشو،، الاعرابي التاني زعل يا حاسد يا راصد والشكلة دورت، حجزناهم وما زلنا نضحك هههههها،
Post: #112 Title: Re: قصص من الدنيا؛ وبعض حكاوي... Author: ابوحراز Date: 08-06-2020, 01:35 PM Parent: #111
معاينة زواج ذكية و(غتيتة)في نفس الوقت كنت اود ان احتفظ بهذه المشاركة في بوستاتي لكنني احببت أن أهديك لها في بوستك الجميل متنازلا في نفس الوقت عن كل حقوق الملكية الفكرية علها تكون عيدية تضيف ولو نكهة بسيطة لبوستك الخالي من الكولسترول والذي لايحتاج الى اي توابل ولا حتى عدس الوابل قال اطعم عدس قال قريب لنا توفت زوجته منذ عام وكان من المفترض أن يتزوج في هذا العيد وجد له أحد أصحابنا امراة في غاية الجمال والله (حلبية ) تغلب هيفاء وهبي ٨/ صفر امراة في الأربعينات ومديرة بنك شهير كان شرطها الأساسي مقابلة الزوج في مكتبها وبعد الاتفاق على الشروط بإمكانه أن يزورهم في المنزل لإكمال الترتيبات الأخرى عمنا لديه بدلة سفاري وجزمة بنية رائعة وتهندم جيدا وتعطر وحينما وصلوا للبنك اتصلوا عليها وكان مكتبها في الطابق الثاني وصفت لهم المكتب وقالت لهم انا في انتظاركم وخرجت من مكتبها كي تكون في استقبالهم خارج المكتب وبالفعل صعدوا بالسلالم ووصلوها وسلمت عليهم وادخلتهم مكتبها وكاد قرايبنا أن يغمى عليه حينما شاهدها على الطبيعة الا أنها صدمتهم وقالت لهم المعاينة انتهت بعدم القبول !!!! عارف السبب شنو ؟؟؟ بت اللذين دي كانت تراقبهم وهم يصعدون على السلالم شافت السيد العريس ثلاثة مرات يتكيء على السلالم ويأخذ نفس عميق ومن ثم يواصل !!! طرشق العرس طبعا بسبب صعود الدرج
هجمة مرتدة لعجايز سودانيز عاوز تعرس مرة ثانية لازم تتأكد من اللياقة البدنية اعمل فحص للجهاز التنفسي وتحسبا لاي ظروف اخد ليك جكة في الهواء الطلق قال بدلة سفاري قال !!!!
Post: #113 Title: Re: قصص من الدنيا؛ وبعض حكاوي... Author: Ahmed Yassin Date: 08-06-2020, 02:32 PM Parent: #112
اهههههههههههه الله يسعدك يا ابوحراز انت كدة شجعتني احكي الموقف الخاص الحصل لي في اللياقة البدنية دي
Post: #114 Title: Re: قصص من الدنيا؛ وبعض حكاوي... Author: السر عبدالله Date: 08-06-2020, 06:35 PM Parent: #113
عبد المنعم الطيب جزاك الله خير....قاعدين نقضي مع البوست الظريف لحظات ممتعة مع الحبس الإجباري... ومنتظرين قصتك مع اللياقة البدنية ... ابو حراز ما تغيب كتير....حكاياتك بنتابعها وبننتظرها بشوق...
Post: #115 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-07-2020, 04:24 PM Parent: #114
ابوحراز دي بوستيك ياخ؛ كلما تعثر تنفحه العبير فينتعش شكرا لوجودك هنا الذي طالما اسعدني واسعد الكثيرين خليك قريب يا حبيب لا عدمناك،،،
Quote: معاينة زواج ذكية و(غتيتة)في نفس الوقت
العروسة هنا محظوظة وشفتا ومديرة بنك ياخ ما بتتمقلب، كما حصل لبتنا او اختنا في القصة ادناه التي حكاها لي صديقي محمد الهادي، وقال انه يعرف العريس مع وقف التنفيذ دا عريس خلا، ورقاد واطة الى قصة ابجيقة دا المهم تم ترشيح فتاة لهذا الرجل وتم التعارف بينهما وزمن الخطابات المكتوب على غلافها قابل للكسر اكيد جوة فيها صورة، رسلي صور رسل صورة، صورة التخرج ياخ الشعر كيف والوسامة والعضلات والجهاز التنفسي كلو تمام، الصورة دي قبل اكتر من عشرين عاما حسوما، وتمت المراسم، والعروس في المطار مشى لاستقبالها عريسنا واختو وزوجها، وسلمت عليها الاخت وظا عريسك يا فلانة الف مبروك والهناء والسعادة وتغلبيهو ب.... التفت العروس ورأت كهلا متهدل المنكبين مكترش البطين صلولع، في نهاية اربعيناته المجيدة يرفل وفي عمر ابوها، كانت تتامل ان ترى شابا مفتول العضلات، مليان الشعرات، قوي البنية، غير منهار ومتماسك ووسيم وتلاتيني انهارت عروستنا التي لتوها، انهار عالمها واحلامها، وصرخت باعلى صوتها ولم تصافح يد العريس الممدودة من زمن تغلبيهو بالعيال امسكت بها اخت العريس واحتضنتها لتهدي من روعها، اتلم السودانيبن مفتكرينو عزاء وبدو في الانسحابات، وحلفت الا ترجع بطيارتا دي، المهم كما يقول محمد الهادي بعد اسبوعين من مكوثها ما بين المستشفى وشقة اخت العريس ولاحقا شقة قريبتها رجعت البنت لاهلها، وقد تحصلت على لقب مطلقة بلا ذنب جنته سوى احلام من جانبها واكاذيب وزيف ودسدسة وغتغيت من جانب العريس التعيس،
Post: #116 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-09-2020, 01:35 PM Parent: #115
أحمد امين وينك يا موسيقى، منتظرين حكايتك مع اللياقة البدنية، والجهاز التنفسي،،، ............... عادل عبدالله صاحبي شديد، من زمن خاطب وبتجيهو خطابات في مكة قابلة للكسر برضو، اشترينا اقامات، كل الشلة عن طريق عادل دا في الرياض، فهو اول واحد من الشلة دخل الرياض، هسا اتطور ومشى عفيف،، المهم عادل مشى من شقتنا بتاعة العزابة بشيلتو زول عرس، وعرس طب وانبسط،،، مشينا نجيبو من المطار، بعربية عم اسامة الله يرحمو، انا ومحمد الطيب ود عم عادل وود خالتو،، واسامة دا جيلنا لكل لانو عم الجماعة ديل فصرنا نقول له عم اسامة انا صاحبم كلهم،،، محمد اكترنا لطفا ومنفلت،،، وفي لفة المطار مكتوب هدي السرعة،، محمد قال بالله يا عم اسامة هدي السرعة هسا عادل دا تلقاهو قراها هُدى،، بعد ٩ شهور انجب عادل وهدى بنتا سماها امل كما كان مخطط قبل الزواج بعد سنوات جاءت امل الرياض، ثم رحلوا المدينة حوالي ٧ سنوات ورجعوا، مشينا نسلم امل بقت كبيرة وفي المدرسة سالتها يا امل بتعرفيني، قالت لا والله ياعم قلت ليها،، يا بنتي والله انا بعرفك مما كنت مجرد فكرة،، امل تخرجت من الجامعة وعلى وش زواج،، ......... في المنصورة سالت صديقي النعمان جمعة يا نعمان ان طولت في البلد دي قال لي: والله انا من زمن يوسف دا كان كيس بس يوسف دا كان يلعب جمبنا في اجتماع الجمعية العمومية،، ولد زميلنا وزميلتنا التي ما زالت طالبة وقتها، ،،،،،،
Post: #117 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-11-2020, 02:53 PM Parent: #116
صاحبنا من ايام الدراسة حتى اغترابه الحالي، مازال عجولا متعجلا، المحاضرة الساعة ٨ تلقاهو من ستة الا حتة لابس ومشنط وشارب الشاي، ومتاهب للخروج، يا وهم حرس الجامعة بكون ما داوم، المهم عجلة من امها، يكون متوترا ودائما كان الريح تحته، يخاف من الزمن، ويقول لو عرستا عقب التخرج هسا ولدي كان اتخرج، ونفرض اتخرج يعني شنو؟ طبعا صاحبنا عرس في الخمسين طق وعندو طفل، المهم شفقة من امها، قريبات دي زرته ما زال شفقان طب، كنت ادرس طالبا سودانيا، في تالتة ثانوي، هو التالت في الترتيب ابوهو مهندس ومغترب ومرطب اخوانا الاتنين الاكبر يدرسوا طب في امريكا عديل كدة، الاصغرين في الثانوي برضو والمتوسطة الكلام قبل حوالي ٢٠سنة، كان عمك دا متوتر شديد كل يوم بعد الحصة يونسني ياخ انا لو تزوجت عقب تخرجي طوالي كان هسا اولادي كلهم اتخرجوا، لا حولااااا المهم الاولاد كلهم تخرجوا وعرسو واستقروا في امريكا،،، عمك ذاتو هسع في الواشنطون دي سي،،، قابلت صاحبي مضهب، في شمبات العصر وفرحت للقائه وضمنتا ونسة ممتعة للحلة وين ما شي يا زول سالني صاحبي،،، الحلة وانتا ذاتك ماشي الحلة مفروض، حلة شنو فيها شنو، ومستعجل ليه، المهم اقنعني انو نرجع بحري تاني ونتغدى في مطعم الخيام، وناكل خشاف،، ولما تحججت بمسالة الزمن قالي حكمة ما زالت نبراسي: ما تخلي الزمن يسيطر عليك، تملك زمنك، تحكم فيهو تسعد بساعاتك كلها، ( ما مضى لا يعاد، والمؤمل غيب، ولك الساعة التي انت فيها) لا تضيع زمن حر وجميل وماثل ولايف بزمن فات وروح، وزمن جائي، وزمن لسا،،، ،،،،،،،،،
Post: #118 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-13-2020, 08:03 PM Parent: #117
اخر الاحزان،،،، كل آل بشيري ومن يمهمه الامر، ومن يحزنه،،،، غاب اليوم فجأة، محمد احمد الطيب الشيخ بشيري، ولد اخونا البتمم كيفنا، وبكمل مجلسنا، محل فرَّتْنا وونستا وضحكتنا، محمد جيلنا، حافظ قصص كبارنا وحكاويهم، وذلك لطول عشرته لجده لامه وجده لابيه،اعمامي ياخ،،، (محمد دا انا خالو وعمو وهو القمر)،،، ولطول عشرته لجده عم والده ووالدته، ابوي، واولادهم واحفادهم،، وهم اهل شعر وحكايات، واسياد مجالس، ولمَّات،،، محمد ضحوك ووقور، وتقي،وسمح وبسام العشيات، لا تمل الجلوس اليه، غادر اليوم بدون حتى من كلمة وداع،، مسختا علينا ام قرفة ياخ، وتلك المشاوير الحنينة، وتلك الديار الفيها ريحة عقابنا وعربنا،،،، طويل الحزن عليك يا اكتر من حبيب،
Post: #119 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-15-2020, 08:22 PM Parent: #118
Quote:
المشاركة الأصلية كتبت بواسطة عكــود مشاهدة المشاركة سلام منعم، قصة مشابهة لخطأك في رقم المدام.
أنا أعتمد كثيرا على ذاكرتي في حفظ الأرقام حتى صارت عادة وهواية، ونادرا جدا ما تخذلني ذاكرتي مهما كان الرقم طويلا.
مرة أولادي سافروا السودان وجوني أولاد اهلنا زيارة في الشقة وكان يوم خميس. أخدوا ونستهم وهم طالعين عزمتهم نمشي نتعشى سواء في مطعم معروف. البناية كان فيها ماكينة صراف آلي وعادة بسحب منها. لمن نزلنا مشيت الماكينة عشان اسحب مبلغ. ادخلت البطاقة ومفروض ادخل الرقم السري المكون من أربعة وال انا بستخدمو من سنين. يا الرقم السري ده ما قدرت اتذكرو خالص في اللحظة ديك، قدر ما حاولت أبى يجيني خالص.
ناديت واحد من الشباب على جنب، اتسلفت منو مبلغ ومشينا المطعم. قعدتي في المطعم، اتذكرت الرقم السري.
صراحة كان موقف محرج، انقذني منو صاحبنا.
تحياتي هلا العمدة تحياتي هههههههها خليني انظِّر شوية،،، مع ناس حلتكم ديل، اكيد ونستكم كلها عن حلتكم ورمالا ونيلا ونخيلا، وانسانا الطيب الجميل لاشك انكم عشتم مناخات واجواء تلك الحلة التي (يحفها النيل ويحتويها الخصيب)، فتخلصت انت يا عمدة من الخليج وملحه، وحلقتا هناك،، رجعت القهقري للبساطة هناك، وتخلصت من الملح وموية الملح، ومن ارقامها وبنياتها، وفجاة عاوز فلوس من الصرافة وكلياتك ما زالت بهناك تسبح، عقلك الباطن معلق في القرير، فكيف له ان يتذكر ارقام الغربة، وكبدها، ومكابداتها،،، ومرات كتيرة العقل الباطن يرفض الواقع وينكره، ويتمسك بالماضي،،، زميلتنا اتوفى والدها الاستاذ في اليمن، وجاها الخبر في الجامعة وطبعا كنا ندرس في مصر، المهم والله انا لما عرفت الخبر انتحيت جانبا وبكيت ايوة بكيت هي بنته الكبيرة، مع ظروف السودان وغايتو،،، المهم مشينا للعزاء لقينا البت عادية جدا، بل انها لم تبكي اباها ابدا، وقالت للاصدقاء الودوها المطار انها ذاهبة لمقابلة والدها،، المهم مشت وبكت مع اهلها بكاء السنين وقلبها وعقلها استسلم للواقع وامن به،، رجعت حزينة واعتزلت كل المجتمع، ولا تظهر الا في عزاء،،، وتاني تختفي.. الغريبة في السودان تتعامل عادي،، قاليك لو نسيت حاجة لا ترهق نفسك بمحاولات تذكرها،، انسى واتعشى فجاة كدة من تلاليب الذاكرة تقفز، يسمي العلماء هذه اللحظة بلحظة الاستبصار،،، المهم، اكيد ضيوفك انبسطوا من المشاوي، لكن لو اكلوا قراصة بملوحة، او عصيدة بتقلية لكانت متعتهم امتع،، سلِّم عليهم، جملة،،
Post: #120 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-18-2020, 06:21 PM Parent: #119
احمد اخوي،،،الرحيل المر،، تاني قام واحد جميل من اخواني مات، ....... يا منايا حومّي حول الحمى واستعرضينا واصطفي كل ّ سمح النفس بسّام العشيات الوفي الحليم َ العف كالأنسام روحًا وسجايا ...... غادرنا قبل ساعات احمد اخوي الوسيم الفهيم، البقسم العدم، البشيل فوق الدبر والدم، ،،،، فقدنا في ظرف شهر رحمة احمد الطيب الشيخ بشيري واخوها محمد احمد الطيب ود بشيري، ومحمود اخوي واليوم احمد اخوي وما نقول الا ما يرضي الرب، وان لفراقكم لمحزنون وانّ لفراقك يا احمد الطيب لمحزنون،، ،،،،، قام الكي اجدد تاني وهو لم يبر بعد،
Post: #122 Title: Re: قصص من الدنيا؛ وبعض حكاوي... Author: Amira Hussien Date: 08-20-2020, 04:56 PM Parent: #120
لهم الرحمة والمغفرة ولكم احر العزاء وربنا يصبركم
Post: #123 Title: Re: قصص من الدنيا؛ وبعض حكاوي... Author: Ahmed Yassin Date: 08-20-2020, 05:56 PM Parent: #122
Post: #124 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-22-2020, 12:16 PM Parent: #123
Quote: ماشاء الله بوست دسم أخونا / عبدالمنعم وضيوفك الكرام سرد جميل يفك الزهجة مع الظروف والتقلبات التى تحاصرنا من كل الإتجاهات أسأل الله العلي القدير أن يمن علينا بالأمن والإستقرار وأسمح لى بالمشاركة فى الذكريات الحلوة دي وأبداها ليك بأول سفرة لي إلى مصر بداية الثمانيات كانت إقامتى مع أقرباء لنا بمنطقة تسمي عابدين قريبة جدا من قصر عابدين المهم مع العصاري كدة نزلوا الشباب من البيت يلعبوا كرة فى الحارة وأنا ضيف بتفرج شوية كدة دوروا شكلة وقاموا إتنين منهم ( مصريين ) يتقابضوا وباقى الشباب مواصلين فى اللعب الوضع ماعجبني قلت فى نفسى أحجز بينهم ودخلت أقابض فيهم جاء واحد من شبابنا قال لى بتعمل فى شنو قلت ليهو ماشايف ديل عايزين يتضاربواقال لى ماتشتغل بيهم شوية كدة ويتصالحوا نقة بس فعلا بعد دقايق كدة واصلوا لعبهم أيام جميلة قضيتها بمصر ومنها للعراق سنوات الدراسة والمواقف الطريفة التى لا تنسى وللحديث بقية إن شاء الله
شكرا للاصدقاء حسن محمد عمر و السر عبدالله تحياتي وخليكم قراب،،، .......... اميرة و احمد يس اشكركما للتعزية، واخر الاحزان يارب،،،
تحياتي للجميع، ساعود،
Post: #125 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-23-2020, 10:38 PM Parent: #124
انور وانوار تلامذتي بدرسم خصوصي في مكة، تلاميذ لطيفين وارواحم حلوة، لا اشعر باي ملل في حصتم، مرة انوار والدتها ندهت ليها واعطتها، كيك للاستاذ الذي هو حضرتي، البنية اللطيفة جابت الكيكة وختتا، وقالت لي يا استاذ امي كريمة، تجيبلك الشاي والقهوة والتمر والكيك، دا من غير الفلوس يا استاذ، حكيت القصة دي لصاحبنا العريس لتوه وعروسته الجميلة، وقمنا بعد فترة عزمناهم عشا وبعد العشاء والونسة قالوا ماشين، اصرينا ان يمطو السهرة زيادة، كعادة السودانيين،، فقالت العروس: والله عندي عدة مردومة، ومكوة غيار الراجل دا، وصمت فترة واضافت ضاحكة: دا من غير الفلوس يا استاذ...
Post: #126 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-26-2020, 06:26 PM Parent: #125
(المشاركة الأصلية كتبت بواسطة بابكر مخير  العمر!!! المشكلة أنهو واقع مرير ومصير حتمي وثقيل بشكل) ................ منور البوست والله يا استاذي الدكتور بابكر، العمر يا صديقي يمشي في تضاد مع غريزة البقاء، ياخ كلهم يتهربون للوراء، اي معرفة مع شخص لي تسمح بالمزاح، وجاءت ظروف فيها عمر يقول عمرو مثلا خمسة واربعين سنة، امازحه قائلا اكيد انها خمسة واربعين سنة صافية من غير الجمع والسبت والعطلات الرسمية، ويضحك، اعمل في مجال احيانا فيهو سؤال عن العمر، حتى لا احرج من يتناقش معاي بريحو في حنانو، واقول ليهو مواليد كم في الاقامة، واضيف االناس مرات بتطلع شهادة تسنين اكبر من عمرا يرفع الحرج مباشرة ويذكر عمر الاقامة ويؤكد انه مكتوب غلط، المغتربين هم اكتر الشعب احساسابالعمر، الضاع يا ولدي هدر الف، مغترب جديد بحسب باليوم، صاحبو قال ليهو هنا بنحسب بالسنة ما باليوم، كدة حا تتعب شديد،، مع التقدم في العمر، الزمن بجري سريع،،، ياخ المتوسطة ديك والله سلت روحنا سل،،،ههههها هسا عادي سنتين تلاتة ستة الا حتة تمر سريعا رهابا رهابا، طبعا دفعتك واولاد الحلة ما بتقدر تزوغ منهم، صاحبنا ودفعتنا ونديدنا لقيتو منقص عمرو سنتين قالا قدامي ودافع عنها وانو خشا المدرسة صغير وانو هو اصلا ما دفعتي قتا ليهو يا زول انا مواقف اتا اصغر مني بسنتين، لكن اتا عارف وانا عارف والله عارف انو الكلام دا ما صاح، ههههها، صاحبنا دا ما بصوم ونحن ما عندنا مشكلة لكن عامل فيها صائم، مرة صاحبنا وصاحبو عندو سكري، لقاهو بياكل في الكنيسة في بحري وخات تلفونو قدامو ومتوسب، صاحبنا السكري، جاب طلب فولو وقعد وراهو ورسلو رسالة كتب فيها: ما تكتر الشطة،،،،
Post: #128 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 09-05-2020, 07:05 PM Parent: #126
مجاهد زميلنا من كلية الاداب، ومن الدلنج برضو، يوم سالته يا شاب، هل هنالك امطار ياما، في الدلنج ؟ (لا تنسى ثقافتنا مصرية) الامطار وضعها كتير في الدلنج، هل الدلنج مطيرة ماطرة، ضحك الرجل، واستعدل في جلسته، وقال عبارة واحدة تعبر من الكومنتات الفشيخة بدليل كوني حافظا منذ اكتر من تلاتين سنة، قال:
ياخ ميكائيل اساسا من الدلنج، هههههها، بالمناسبة شفتا مجاهد دا قبل فترة قليلة في التلفزيون بفتي، طبعا ما حضرتا البرنامج كوني ما قاعد استمع لاي فتاوي، من اي كائن كان،
Post: #129 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 09-11-2020, 11:23 PM Parent: #128

الشمارات، كما يقول جيل اليوم، ويسميها اهل الجزيرة عنكوليب الكلام، وشعبيا معروفة بالقطيعة، وهي تكاد تكون غريزة، كل الشعوب تحبها، وما اجتمع اثنان منسجمان والا كان زميلهم موضوع الشواء،، في مجال العمل اكتر تفشيا، الكل يتبرع بشمارات ليتقرب من المسؤول،، المهم مرة قاعد في راكوبتنا مع اخواتي وكلنا بنقطع فوق واحدة، الواحدة دي في نص القطيعة جاتنا زيارة ووقفت في نص الراكوبة، والقطيعة مستمرة، ياخ البنات ديل تقول اصابهن العمى فجاة، حاولت انقذ الموقف، وقتا ليهم هوي فلانة دي بتسلم عليكن، فجاة انتبهن وبالغن في الاحتفاء بها،، شوية مشت، وفكن الضحكة المكتومة من زمن فلانة دي بتسلم عليكم، وقال اختي الحكيمة: اخر الزمن دا باب السترة بقى مخلع الزول تكون بتقطع فوقو تلقاهو واقف فوق راسك،، يسمع نص القطيعة،،، ......... انتشرت مؤخرا ظاهرة القطيعة فوق اقاربك من الدرجة الاولى، عادي واحد من الحلة يجي يقطع ليك فوق اخوك،، مرة واحد حاول يعملا معاي ثبتو في اللحظة بعد كم يوم لقيتو وقد اشاد بي في المجالس،،
Post: #130 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-10-2020, 05:43 PM Parent: #129
في مصر جاء مهندس سوداني ومغترب، قال عاوز يعرس بنت مصرية، المهم لقى العروس وجاءت امو واخواتو من السودان للمنصورة ليحضروا العرس، في طالبة ديل اهلا اها عزمتنا، يوم العرس بعض الطلاب وبعض الطالبات، حضرتي كنت من الضُمُن، اول مرة نشوف العريس واهلو، اثناء الحلفة يوزع اهل العروسة زجاجات الكوكولا على المعازيم، بعض الشباب يتخاطفون زجاجات الكازوزة، ويشربوا فيما ما بينهم، ام العريس واخواته، لما شافن المصريين في بعض يوزعون، ويتخاطفون فيما بينهم بدأن ياخذن ويتخاطفن زجاجات ويوزعن على الطلبة، والطالبات ،،الدم بحن، حضرت عرس في حلتنا بعد طول اغتراب، والعشاء كان سفرة، خيم صمت رهيب على مجموعتنا في السفرة،، لقيت نفسي بتونس براي، اها قدامي الفول قعدت آكل في فولي داك
وصديقي الانتيم زعلان، ويلكد فيني وانا مستغرب، مرة قالي اكل ياخ زي الناس، حاولت ولم اوفق، شايف زحمات، وايادي تتطاقش، رجعت لفولي، حيث كنت تقريبا براي، بعد الاكل صاحبي ميت من الضحك، يا زول انتا اكلت شنو، فول شنو ياخ،،، الناس دي اولا بتهجم على اللحمة ثم الصلطات، ثم الطابيخ، والخشاف والتحلية، الفول دا اكلت فيهو براك، يا مغترب يا تعبان، ههههههها
Post: #131 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-16-2020, 04:29 PM Parent: #130
واحد من حلتنا- ما صاحبي - لكن مستغل حكاية انو المغترب اي ونسة بتنفع معاهو، لذلك كل ما ارجع اجازة يقابلني ويحكي نفس القصة، طوال اكتر من عشرات السنوات يحكي لي ذات القصة، سميته سرا رجل القصة الواحدة، بيضة ديك ياخ، الاغرب انو القصة تافهة جدا، وبائخة بوخ شديد، والله انا كل ما يبدا فيها اتوتر، ولكن لاني ضيف، بجامل، في الزول لحدت ما تخلص المكرورة الملل، اخر اجازة، لقاني في فرقة ولحسني القصة ذاتا للمرة الالف، بصراحة فاض بي كلمت قريبي بالمعاناة دي، بعد ما خلصت صبيبي مع قريبي وحبيبي، اشوفو ليك يكشْوِل في نعلاتو وقال لي عن اذنك، يا زول مالَك قطعتا الونسة ووشيك اتغير قالي ماشي للتافه دا الفَّها معاهو،، ضحكت واثنيته عن الذهاب، مع وعد مني ان لا اتونس مع الاستغلالي دا تاني، خلاص ياخ من انا طالب نفس للقصةالبايخة دي، معقولا ياخ، الدنيا دي ملانة قصص، لساتي ما قدرت افهم ليه كدا، قتا اكلمكم امكن الاقي تفسير، سلملم،
Post: #132 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-17-2020, 10:39 PM Parent: #131
عمنا فيصل، وصديقنا حمد، وحبيبنا علي، التلاتة اولاد دفعة، وحلتنا، عمنا فيصل وحمد موظفان ميريان، دفعتهم علي تاجر، وعندو مداخيل ومعاهو نقد واصول وهارت كرنسي، جميعهم، يسكنون في حلتنا،،القصة التالية على لسان عمنا فيصل قال: عصرا هالك واقفين في مواصلات الحلة في بحري انا وحمد اخوي دا،، لانعلم لا ندري الا الكامري المكيفة تدق البوري، ويطل وجه صاحبنا علي مناديا: فيصل حمد تعالو، ومشينا اركبو ركبنا، ماشين الحلة نعم يلا بنا ما زال عمنا فيصل يحكي، اتاريها حلتنا قريبة كدة قربنا ننوم مع التكيف ولكن منعتنا الونسة والجوع من النوم، توشك صاحبنا دخل البيت، شوية جابت الشغالة الاثيوبية صينية مليانة لحم ودجاج، وشية وكبدة وكسرة ولا مدينا ايدنا عليها انا والكاشف اخوي، انملينا تب، شوية تسحب الشغالة الصينية وتاتي باخرى بها فواكة وعنب وتفاح، وبسبوسة وخشاف، وعصير منقة وجوافة موز بلبن، وجاء الشاي المنعنع وحلو،،، اترعنا زين، مع الصالون المكيف والتغذية الجيدة، شوف عيني صاحبي حمد عينيهو بقن حمر، باختصار واصل عمنا: صاحبنا بعربيتو رمانا جنب بيتنا لا ايد لا كراع، اجرجرت ودخلت البيت رقدت في السرير بملابس العمل، المرة قالت لي اسوي ليك اكل اضاف: والله لو بقدر اقوم كنت اديتا كف،،،
Post: #134 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 12-15-2020, 02:02 PM Parent: #132
حكت مريم اختي الكبيرة، انه ومعاها مجموعة من بنات الحلة صاحباتها، ذهبن يكفرن للبنات اللائي وقد رسبن في امتحانات الشهادة الثانوية ذات مارس ماسك كتف ابريل، قالت:- والله البنات كلهن لقيناهن زعلانات ويبكن، الا نفيسة بت الماحي، لقيناها تاكل ليها في بتيخ،،،
Post: #136 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-05-2021, 05:45 PM Parent: #134
Quote: قبل نحو ربع قرن من الزمان، كنت عاوز اعمل حمام بلدي في بيتي الجميل، في حلتنا، وقد قررت ان يحفر العمال الحفرة في منتصف حوشي من الناحية الشرقية، جاءت الوالدة عليها سلام، وقالت ان المكان دا غير مناسب خالص، يا ولد في زول بحفر حفرة محل ونستو ونومو خليها هناك واشارت للركن الجنوبي الشرقي حيث بيت اخوي، في ساعتها تم تغيير المكان لاقصى حدود حوشي في جزءه الجنوبي الشرقي، وفعلا اكتمل، وعملنا لاحقا فاصل مع اخوي، في كل الجزء الجنوبي من حوشي، وعملنا بابين للحمام واصبح مشتركا، منذ ذلك الزمان ما زال هذا الحمام يخدم الاسرتين، طبعا قبل خمس سنوات اتفلهمتا كمغترب مشلهت وعملت سايفون لاولادي حيث يعانون من الحمام البلدي، اخوي برضو عمل حمام تاني قبل اقل من سنة، وما زال هذا الحمام بعيدا يخدم كل من اراد ان يكون بعيدا في لحظات الخلاء الوالدة حكيمة ياخ، كانت اخر من يقرر، وقرارا الكمدة بالرمدة، يمة سلام ياخ ومشتاقيين،، والله شوقنا دخاخين دخاخين، __________________
Post: #137 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-10-2021, 08:05 AM Parent: #136
Quote: خالي رتش مان يوم اخد لفا على كل نساء الفريق، ورشا كل حاجة بمية الف، تحكي لي امي وقالت لي لما وصلني سلم واتونس ولما جاء ماشي قاليها ياحاجة انتي عندك تلاتة اولاد في السعودية فما محتاجة، وتضيف امي انها كانت مفلسة تلك الايام، واولادا التلاتة كل واحد طاعن الارض، ومصهين وتاكِل المهم قالت لاخوها مستورة والله، هههههها وبعد ما مرق اضافت البقولوا سمين يقول آآآمين
Post: #138 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-11-2021, 07:32 PM Parent: #137
Quote: شلة اصحاب من حلتنا، مشوا الفرن جابوا الرغيف وغشوا بقالة عصام اشتروا طحنية ملفوفة في جريدة، ومشوا الخور، رملة باردة يستانسوا، وياكلوا، جاء صديقهم متاخرا، ادوهوا رغيفة، وواحد ناولو باقي الطحنية القليلة، بجريدتا قائلا:- هاك قلع في الكتابة دي اتعشى.....
Post: #139 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-16-2021, 03:39 PM Parent: #138
Quote: عمنا عبدالرحمن موظف معانا في ذات الشركة، الحقيقة انا موظف معاهم، فقد جيت ولقيتو في الشركة الاقدمية يجب ان تُحترم، المهم جاءت المناسبة وقال لييا منعم انت عمرك ٤٠ سنة، النصيحة انبسطتا ما اكضب عليكم ههههها ولكن يا استاذ!!! احمد ولدك مواليد كم، احمد مهندس اتصالات على راس العمل، قال لي مواليد ٨٠ عمنا استدرك قال لي خلاص انت عمرك ٤٢.... شكرت الاستاذ، وغادرت هسا يقوم يغير رايو كمان،،، القصة دي ليها شهور....
Post: #140 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 04-24-2021, 03:08 PM Parent: #139
Quote: كان سعر البتيخة في حدود ٥٠ سالت البائع عن السعر، شافني مغترب وقال يغشني قال الواحدة بمية، طلبت ٢ واديتو ميتين، استلم البائع المبلغ تحيط به حسرة عظيمة قبل ان نتحرك سألني اخوي الاصلن مستغرب في القصة من بدايتا، ليه تشتري بالضعف، قتا ليهو عشان البائع دا يموت بالحسرة كونه لم يقل ان البتيخة بالف للمغترب المغبي دا،
Post: #141 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 05-15-2021, 00:59 AM Parent: #140
Quote: شفت الدكتورة عشة السعيد وكانت في زيارة للسفارةالسودانية، يوم ٢٧ ابريل دا، ولما جاءت جمبي قلت ليها: ابقي عشرة على المباديء والثورة يا دكتورة، وانا واقف في صف الجوازات للتجديد،، وقفت، والتفت وقالت: حاضر يا ابني ما توصي حريص،، انبسطتا مرتين مرة لابني، واخرى لحاضر ما توصي حريص، ...
اكيد استقالتها دي لو تاكدت تكون اتأثرت بالوصية بتاعتي،،💪
Post: #142 Title: Re: قصص من الدنيا؛ وبعض حكاوي... Author: قسم الفضيل مضوي محمد Date: 05-15-2021, 07:07 AM Parent: #141
. تحياتي الحبيب منعموف وعساك من عواده :) زمن ياخ ما اتقابلنا في جخانين المنبر .. المهم ياخ امسحا لينا في وشنا .. واصل يا حبيب ..
Post: #143 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 05-15-2021, 05:31 PM Parent: #142
Quote: تحياتي الحبيب منعموف وعساك من عواده :) زمن ياخ ما اتقابلنا في جخانين المنبر .. المهم ياخ امسحا لينا في وشنا .. واصل يا حبيب ..
٢٠٢٠ سنة صعبة على صعيد غياب اعزاء وعلى صعيد تورط الوطن في مزيدا من الفشل، وعلى صعيد تعطل العمل، وانسياب الحركة، ٣ شهور سدة في البيت، وصلنا مراحل من القلق الارق والتلاتة البعدا بنص ايقاع ونص حركة مع كامل الالتزام بالاحتياطات، التلاميذ لم يذهبوا لمدارسهم لمدة عشرة شهور،،، كلنا نعيش في عمق الازمة بطريقة مختلفة،،، نرجو السماح لعدم متابعة البوست لفترة قد تطول فكلنا في الهم كرونا،، والدنيا مجنونة،،
........ اوووو، حبيبي قسم، وحاط الله شوق الشوق من هنا لعندكم، اعلاه بعض الاسباب، لبعض غياب... وتاني شغلتنا اموالنا واهلونا، وفيسبكنا وواتسنا، عن المشاركات الراتبة في المنبر، والاهم للغياب هو ان المشاركات والبوستات دائرية ياخ مش مخفزة، وغياب حاتمنا بنانا سبانا احب طرفو الكحيل، برضو ساهم المهم البوست دا قديم آتيه من آن لتأن ابثه بعض حكاوي، وافرح عندما يلمع اسمك الحبيب اخر البوست شكرا حبيبي.. وخليك قريب،
Post: #145 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-04-2021, 03:57 PM Parent: #143
واحد اتعرفتا عليهو في النت، وسالني، وووو ....و .. وصل مرحلة اتخرجتا متين؟ ٩٢ قاوم زِعِل شديد 🤣🤣🤣🤣🤣 ياخ تزعل ليه انت ول انا الاتخرج ٩٢ .... ومالا ٩٢ عيبا لي، هي كدة لو بيدي الامور اكون لساتي ما اتخرجت، ....... سوداني هنا سالني متزوج طبعا عندك اولاد اي كم عمر اكبرهم كلمتو زعل برضو ...... سوداني سالني ليك كم سنة هنا كلمتو ودردقني كتير لقاني ما عملت حاجات في السودان زعل برضو ...... سوداني ركب معاي في الطريق سالني دي عربيتك لا عربية الشركة زعل برضو ........ انتوا ياجماعة الناس دي لما بتزعل من الاجابات، بتسأل ليه طيب؟ 😳...
Post: #147 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-12-2023, 01:56 PM Parent: #145
اب
Post: #148 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-12-2023, 02:20 PM Parent: #147
Quote: واحد من حلتنا كان معانا هنا، قرر يمشي السودان وجاءني مودعا حاولت اثنيه خاصة وانه مرطب مع محامي شهير ولما راى محاولاتي قالي اسمع يا صاحبي انا جيت اكلمك واودعك ما جيت اشاورك،، ههههههههها المسالة محسومة، ساعود لافصل ... تحياتي للحضور الباهي لونو، الوضاح وجميل،،،
Post: #149 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-12-2023, 02:28 PM Parent: #148
وهذه بعض تفاصيل عن صاحبي المحامي الفوق دا
Quote: صاحبي وصديقي محمود دا من جيلي قدامنا بساعات في ثانوية الجيلي، درس الحقوق وعمل محاميا اغترب كم سنة عمل بيت في الدروشاب، مكتمل وفاضي وغير مؤجر، ولا عاوز،، وقرر فجاة الرجوع عندو بيت في الحلة وكان يعمل مدرسا اثناء الدراسة واستمر بعدها سنوات يعمل مدرسا ومحاميا، المهم اغترب ورجع في ذات وظيفته معلما بالمدارس الابتدائية، في الشيخ عبدالقادر، يعمل ويسكن في الشيخ علي يمشي مسافة اربعة كلم ومثلها في الاياب، بقى سمح وناير ومرطب وزوجتو برضو مدرسة جمب البيت، المهم الروقة ظاهرة في عينيهو، عندهم بنات توأم في الثانوي قالي لما يدخلوا الجامعة بمشي اقعد معاهم في الدروشاب ولما يتخرجوا برجع الحلة وقد ابيع بيت الدروشاب،،،
..... الناس تدير حياتا بطريقة مختلفة وموحية صديقي نموذج ناجح اعتبره، ومستقر ومرتاح،،
Post: #150 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-14-2023, 02:01 PM Parent: #149
Quote: مشينا اشترينا غويشة دهب الغويشة غالية، واصلا انا زهجان. اليمني بتاع المحل سالني من اسمي عشان يكتب الفاتورة كلمتو كتب دندون الطيب ههههههههها ياخ معقول بالله من الله ما خلقك لاقاك واحد اسمو دندون، اليمن ابرد شعب في العالم قالي الاسماء ما كتيرة ياخ...
Post: #151 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-14-2023, 02:25 PM Parent: #149
مكرر
Post: #152 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-16-2023, 07:40 PM Parent: #151
Quote: صاحبنا كتب في ما معناهو كلام ود الرضي،، بالله شوف البنات ديل الكبرني وسمحن رد عليهو واحد في نفس البوست كاتبا:ده زي القال للممثلة سمية الخشاب ( وين يا خشب لما كنا نجارين ) كان ابي عليه سلام ينسجم مع اغنية حليل زمن الصبا الماضي وحليل زمن العشوق راضي بصوت ترباس،،
Post: #153 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-19-2023, 05:46 AM Parent: #152
Quote: مرة فاتتني الطيارة في ناس في الحلة شمتو وانا راجع الحلة وكنت مدخنا في المطار الزول الاشتريت من ٢ علبة سجاير برنجي اديتو واحدة قتا لي رجعا محتاج لفلوس قعدت يقلب فيها اجي ساعة!!!، قتا ليهو: في احتمال تكون مزورة؛ ما اشتريتا منك قبل شوية بالفين هات الف!!! اداني الالف وصلت الحلة ناس سمعت بيْ جيت راجع فرحوا،، شفتا اختي منزغمة مارقة عرفتها ماشة للخليفة رجعتها؛ قتا ليها: الخليفة علاقتو شنو كمان بالطيران المدني كمان.!! مدير امن المطار من حلتنا؛ رجعني بعربية خاصة مع تلفون لزول هناك ماشي معاي لحدت باب الطيارة،، وصلت جدة في نفس اليوم مشيت الفندق؛ حجزت للرياض بكرة؛ واجرتا عربية من المطار؛ وقربتا امشي عمرة ههههههها
Post: #154 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-22-2023, 06:13 PM Parent: #153
Quote: محمد ولدي في الثانوي، اليوم كنا برانا قتا ليهو: عااااارف يا محمد! رد سريعا: اي اي عارف🤣🤣
Post: #156 Title: Re: قصص من الدنيا؛ وبعض حكاوي... Author: فرحات عباس Date: 01-24-2023, 07:58 AM Parent: #154
بشيري يا برلوم يا نبيل ... ما عرفتا البوست دا إلا اليوم ... الزمن السريع الكاسح .. القاسي أحيانا يجعلنا نتخطى مواضع جميلة ما كان لنا أن نتخطاها لو كان يمشي الهوينى غير فزع ولا مهموم ... قبل كم يوم قرأت بوست بعنوان عبد المنعم الطيب رفاعة .. يتحدث عن فنان من أولاد دلوت القريبة من رفاعة .. وعلق أحد المتداخلين أن المدعو عضو معنا بالمنبرر .. قلت في مداخلتي .. إن العضو عبد المنعم الطيب في المنبر ليس هو ذلك الفنان .. إلا أنه ذو نضم جميل بطعم الغناء .. أو هكذا قلت .. صديقي اللذيذ ..... سعيد جدا أن أكون في الصف العريض الطويل للمتابعين لهذا البوست الرائق.
Post: #157 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-25-2023, 05:54 PM Parent: #156
فرحات عباس الزول دا يا جماعة صديق العمر ومشيت بيتم في رفاعة.. على حافة الاستاد؛ وعلى ضفة البطانة؛ وقابلت والده العظيم عمنا الباشمهندس عباس فضل المولى الذي سمى ولده فرحات تيمنا بالرئيس الجزائري فرحات عباس؛ لتاخذ الايام دورتها ويذهب ذات الفرحات ليدرس القانون الدولي في الجزائر ولقبته الدفعة بالرئيس... شفتو الزول دا واصل كيف؟ لروح عمنا عباس فضل المولى الهناء والراحة في الاعالي... ومن زمن نحن عزابة ونحلم بالزواج؛ وحتى الان من زمن دنا بنته الجميلة الطالبة الجامعية الان كانت مجرد فكرة؛ وسكنا سوا سنينا عددا؛ ولما تحب صديق السكن فا الابداع في حتة دي والروعة له؛ ليست لك. فرحان صديقي ومن القلائل جدا الذين احبهم.. وارتاح بقربهم ونضحك من الاعماق خلال اكتر من تلاتين عاما لم تزيد العلاقة الا صلابة... فرحان لا جاء يوم شكرك يا ترس... ... بالنسبة للفن فرحات دا حافظني من زمن وردي وعركي وطغيان حضور مصطفى الطاغي لكني قديم من زمن الحان الخميس مع معتصم فضل وانت السماء بدات لنا وزيدان ياخ والشفيع وووو ... عيييك عوالم باذخة ...............................................................................
Quote: بشيري يا برلوم يا نبيل ... ما عرفتا البوست دا إلا اليوم ... الزمن السريع الكاسح .. القاسي أحيانا يجعلنا نتخطى مواضع جميلة ما كان لنا أن نتخطاها لو كان يمشي الهوينى غير فزع ولا مهموم ... قبل كم يوم قرأت بوست بعنوان عبد المنعم الطيب رفاعة .. يتحدث عن فنان من أولاد دلوت القريبة من رفاعة .. وعلق أحد المتداخلين أن المدعو عضو معنا بالمنبرر .. قلت في مداخلتي .. إن العضو عبد المنعم الطيب في المنبر ليس هو ذلك الفنان .. إلا أنه ذو نضم جميل بطعم الغناء .. أو هكذا قلت .. صديقي اللذيذ ..... سعيد جدا أن أكون في الصف العريض الطويل للمتابعين لهذا البوست الرائق.
Post: #158 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-27-2023, 12:08 PM Parent: #157
Quote: فريق الشعلة هو الاساسي في حلتنا منذ سنة 1964 م ، في منتصف التمانينات كنت نائب الرئيس، عملنا فريق تاني اللهيب بناء على طلب الرابطة في المنطقة، فاصبح لحلتنا فريقين في الرابطة عثمان صاحبي ودفعتي ولاعب اساسي في الشعلة، المباريات في ميدان الرابطة وسط المنطقة.... في مباراة فجاة قعد يشجع في اللهيب يا عسمان شنو ياخ،، وكان واقف جمب احد اقطاب فريق اللهيب وعندو عربية، وولدو يلعب في اللهيب، ولدو اسمو هشام.. سالتوا ليه تخون الشعلة، ياعسمان؟ قال هو القطب دا (ود ملاح) عندو عربية وبرجع معاهو الحلة،، لما تسوي ليك عربية، بشجع شعلتك دي هههههها،
Post: #159 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-27-2023, 12:53 PM Parent: #157
Quote: فريق الشعلة هو الاساسي في حلتنا منذ سنة 1964 م ، في منتصف التمانينات كنت نائب الرئيس، عملنا فريق تاني اللهيب بناء على طلب الرابطة في المنطقة، فاصبح لحلتنا فريقين في الرابطة عثمان صاحبي ودفعتي ولاعب اساسي في الشعلة، المباريات في ميدان الرابطة وسط المنطقة.... في مباراة فجاة قعد يشجع في اللهيب يا عسمان شنو ياخ،، وكان واقف جمب احد اقطاب فريق اللهيب وعندو عربية، وولدو يلعب في اللهيب، ولدو اسمو هشام.. سالتوا ليه تخون الشعلة، ياعسمان؟ قال هو القطب دا (ود ملاح) عندو عربية وبرجع معاهو الحلة،، لما تسوي ليك عربية، بشجع شعلتك دي هههههها،
Post: #160 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-29-2023, 05:57 AM Parent: #159
Quote: المشاركة الأصلية كتبت بواسطة النور يوسف محمد مشاهدة المشاركة سلاااااااااااااااام يا منعم ـــــــــــــــــــــــــــــــــــــ
ياخى فكرة البوست ده عجبتنى مرات كده فى حكاية ما بتكون اكتملت ، ولو ما دونتها بتروح ،
فالظاهر على حا ( اشف ) الفكرة واعمل لى بوست اكتب فيه ما تيسر الى حين
اخبارك والدنيا معاك مرحبتين النور حبابك الف، انا كويس، اقع واقوم،، اخوك بتذكر اي لقاء، حوار، نكتة بسمة همسة تعليق ولو، منذ طفولتي الباكرة، لو جاءت المناسبة بتذكر الحدث المشابه لها، وهذا ما قاعد افعله هنا في هذا البوست، ...... خذ راحتك استاذ النور، ياخ والله اكتر حاجة فارساني ان وطنيين امثالك بالاغتراب، وعلاقات الشعب يتصدرها الدهماء الاغبياء الرعاع.. تسلم اخوي، ..... بالمناسبة ما توصلني للمسؤول عن التامين في شركتكم، بس وانا بتم الباقي، اخوك مندوب مبيعات محترف، تحياتي، زمان سالتا هندي عن اسبلنق كلمة ومعناها، الهندي قال تشتغل وتتعلم انجليزي، دحين هسا نكتب حكاوي وقصص ونبيع تامين ههه
Post: #161 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-31-2023, 07:13 PM Parent: #160
Quote: البت كلمت خالتا بانها سوف تتزوج وان تاريخ الزواج حددناهو في شهر خمسة الجائي دا، خالتا المغتربة هنت وباركت وطلبت من بت اختا الاثيرة تاجيل الزواج حتى شهر ٧ عشان نحضر... البت ردت لا حولا ياخالة، معقولة بس شهر سبعة لا لا، شهر سبعة دا انا بكون حامل🤣🤣🤣
Post: #162 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 02-02-2023, 05:32 PM Parent: #161
Quote: واحد في حلتنا مراهق شديد شاف بت جميلة استحمت لتوها وطلعت ببشكيرها تقطف موية الحمام في الشارع العريض تلكأ صاحبنا حتي اكملت القطف ودخلت بيتهم واغلقت باب الشارع وراها وصل صاحبنا محل الموية المقطوفة لتوها وجثا على ركبتيه المراهقتين، وتكرف العبيرا،😳😳 ولانه صاحبي فقد كنت اموت من الضحك لتصرفه الغريب والمفاجي، وسالته وان احث فيه على القيام من هذا الركوع وقد طال يا زول الحكاية شنو، ياخ وكت ما لاقيت اللحم الله لا بمنعنا من ريحتو وريحة شوربتو 🤣🤣
Post: #163 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 02-03-2023, 10:49 PM Parent: #162
Quote: افتراضي الخليفة في حلتنا ، متصدر حل الاشكاليات بين الاهالي، بعدين في مشكلة في الميدان بتاعنا بتاع الكورة.. ومجتمعين الشباب واعمامك، المهم الايام ديك كان عاضيني كلب ماخد ١٠ حقن مع مراقبة الكلب، بمشي كل يوم اطمئن على صحة الكلب، عند جيرانا، الايام الاخيرة قربتا اسوقو معاي البيت. وكان من ضمن العلاج موية باردة في باقة المهم الخليفة قال لي كيف تشرب قدامي، قتا ليهو شنو شنو دي موية ما عرقي، الخليفة زعل كلم ابوي،، ... اولاد الحلة اي زول اتناقش معاهو يقولو ليهو بهنا ليفة وبهنا ليفة عندك كلام مع اللفاها مع الخليفة🤣🤣
Post: #164 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 02-06-2023, 07:29 PM Parent: #163
Quote: هههها مرة جمب البوستة في شارع المزاد بحري؛ ركبت وعاوز انزل قصاد سوق بحري مسافة بسيطة، المهم الحافلة شاحنة فل ركبت كراع في الحافلة وكراع في الهواء... وجمبي الكمساري قتا ليهو شوف انا نازل هنا في سوق بحري،،،قهوة العمال ديك! الركبة دي اوعاك تكون دايرلك فيها قروش،؟ ضحك الكمساري شديد، وقال لي معفي ياخال؛ وصلت!! دخلتو كم جنيه في جيبو .. وقتا ليهو ديل ليك خاصات؛ ما تديهن الجلابي دا.. قال لي عليك الله ما تدخل معانا المزاد، 🤣🤣🤣 قتا ليهو اول مرة البلف؛ يعزم ليهو راكب مشوار.. ضحك تاني،
Post: #165 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 02-08-2023, 06:47 PM Parent: #164
Quote: صاحبنا كلم ود اخوهو -المسافر للسودان- يشوفو ليهو زميلتم ويخطبا ليهو، المهم ود اخوهو برضو صاحبنا وبدا يلمح، البت بتعرف الخطيب، بعد شوية الخطيب سال ود اخوهو وقال ليهو بالله نضارتا كيف،، ود اخوهو طوالي عمل خط رجعة، وقال لي ياخ النضارة دي يعرفوها كيف، ههههههها، العم في سن ود اخوهو، المشى اجازة ونحن هنا في الغربة، البطالة... البت اخدت خبر ولكن موضوع النضارة لم يدعم الوسيط وخلاهو يتوقف؛ بعد فترة البت رسلت خطاب لصاحبنا الخطيب انها ارتبطت،، شفتا الخطاب البت خطاطا خلاص، انا قتا ليهو البت الخطاطة تلقاها نضرة شديد... قالي اسكت يا تافه...
Post: #166 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 02-11-2023, 07:13 AM Parent: #165
Quote: زمان في الثانوي عاملين حفلة وداع لطلاب الثوالث، كنت في تانية، الحفلة كبيرة فيها حمد الريح، وعييك، اللجنة الفنية برئاسة المدير نفسه وبها خيرة الاساتذة وطلاب كنت من بينهم، المهم قبل الحفلة بدقائق ناداني المدير وقال لي ابدو لم يكن هنالك اي برنامج معد، ولا الحبة، المهم اداني المكرفون وصعدت المسرح والحشود كثيفة الجيلي داخلية،، المهم مسكت المكرفون ولمحت الاستاذ م البدوي استاذ التربية الاسلامية فقدمته للافتتاح ووهو صاعد للمسرح اعطيته المايكرفون وهمست في اذنه بالله يا استاذ خفف عليك بقصار السور كانك بتصلي بجماعة سرا، .ضحك الاستاذ كما لم يضحك من قبل وقرا سورة قصيرة وبقى صاحبي حتى مغادرتي المنطقة.. المهم البرنامج كان مرتجل ونجح يبدو ان سلق البيض والارتجال والمكرر وفاضي وخمج وراثة سودانية،، ليس هنالك جديدا،،
...... دولة كاملة تتضارى وراء المغتربين الفقارى تسقط بس
Post: #167 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 02-13-2023, 05:41 AM Parent: #166
Quote: صاحبنا عندو محل في المصفا ماجرو لواحد عاملو مطعم، كل يوم بجي صاحبنا يطمئن على الدكان ويفطر ويرجع الحلة وبكرة يجي وهكذا، بعد تلاتة شهور المستاجر طلب منو تخفيض الايجار بنسبة خمسين% ول دا مفتاحك،،
Post: #168 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 02-15-2023, 08:33 PM Parent: #167
Quote: صاحبي كضاب شديد شغال عسكري نفر قال مودنوا بعثة امريكا تصدق مشت فيني الكضبة وكنت ادرس في مصر ارسلت جواب لصاحبنا المشترك ان يرسل لي عنوان العسكري دا في امريكا، صاحبي قال في سرو وكلمني لاحقا الزول دا-يقصدني- اتلحس والله شنو، قعد العسكري ستة شهور في الخرطوم -الزول مو في امريكا- لكن خلالها بعض الشفوت من اولاد الحلة شافوهوا في فتاشة ههههها المهم جاء الحلة اخواتو قعدن يبكن كان لابس بدلة قال اشتراها من واشنطون دي سي صاحبنا المشترك قالي والله البدلة دي معلقة في دكاكين سعد قشرة بالهبل... دفعتنا من اولى لخامسة وعاد لقيتو نكرني حطب وقال وراي بسنتين في المدرسة، اخر مكنة رافعا قال درس اداب في جامعة الامام المهدي،. ناضجين يلحقنا ويفزعنا المهدي الامام وخاصة ان جامعتو بتستوعب طلاب ناضحين درسوا لحدت تانية متوسطة بالقديم 🤣🤣🤣
Post: #169 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 02-18-2023, 07:44 AM Parent: #168
Quote: افتراضي قصبة منصح الوادي المخدر درو منصح الوادي هو الجزء الاعلى من الوادي وليس داخله انما طرفه حافته، وهو بمثابة التقنت عند اهل الزراعة التقنت بصلته او طمامته او باميته او ثمرته بتكون اكبر واجمل واحلى كونها بتشرب نز، اها مثلها بقصبة المكان الاخصب في الوادي وبالتالى تكون انصح وانصع واكتر اخضرارا وازهارا،، وازدهارا اصلا الوادي كله خصيب بدليل ان قشه مخدر معناها المطر كان قريب، والاجواء بديعة... ... الدِرْ: نوع من الحشائش المفضلة لدى الحيوانات العشبية نوع طري وهين ولين؛ اقرب للسعدة ولكنه اقصر وزاحف ومنتشر
Post: #170 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 02-26-2023, 08:21 PM Parent: #169
Quote: شفت الدكتورة عشة السعيد وكانت في زيارة للسفارةالسودانية، يوم ٢٧ ابريل دا، ولما جاءت جمبي قلت ليها: ابقي عشرة على المباديء والثورة يا دكتورة، وانا واقف في صف الجوازات للتجديد،، وقفت، والتفت وقالت: حاضر يا ابني ما توصي حريص،، انبسطتا مرتين مرة لابني، واخرى لحاضر ما توصي حريص، ...
اكيد استقالتها دي لو تاكدت تكون اتأثرت بالوصية بتاعتي،،
💪
Post: #171 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-01-2023, 09:19 PM Parent: #170
Quote: كنا جزءا من هذا النزوح في تلك الفترة، نحن الطلاب السودانيين بمصرا، الخريجون كان ينظم لهم رحلات عودة للوطن، في فترات سابقة،، وبمجرد مجي الانقاذ صار الطالب منهم لا يرجع للوطن، لا يعود باعلى الدرجات العلمية واغنى التجارب الثورية، ولكن يركسل منتظرا، سفرا واغترابا وهجرة، والطلاب عموما بحكم تجربتهم السابقة في مصر اقدر على سنين الانتظار في مدن الجمهورية، فكانوا يسكنون مع زملاءهم ويتقاسمون اللقمة وطبق الفلافل والسرير، وقد وصلت طلائع اصدقاءنا الي امريكا وكندا واوربا واستراليا البعيدة.. ومعظمنا ذهب للسعودية عمرة وزوغة فهذه بلاد طيبة واهلها قوم كرام.. وتلك قصة اخرى قننوا اوضاعهم لاحقا.. ذهبت معتمرا للسعودية وكانت سعادتي لا توصف عندما ارسل ١٠٠ ريال لامي لزوم رغيفة وكهرباء ودواء.. تجربة طلاب مصر في عمق التراجيديا تلك، بالله يا صديقي لا تنسانا من عكس الصورة، تحياتي يا فنان،، شخصيا كنت اقرا كل كلمة كتبتها في تلك الفترة وخاصة زكرياتك مع الفنان حسين شريف، فانا شغوف بالكتاب وبالمكتوب وبك. القراءة شغف كما ذكرت انت في بوست سابق، ودي الذي لا تعلم... ..... من كتابة لي في بوست طلال عفيفي، عن مصر كقبلة للمطرودين من جنة المشروع الحضاري في التسعينات الحزينة، الطولت مشوار سفرنا..
Post: #172 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-04-2023, 12:41 PM Parent: #171
Quote: افتراضي غاب الفارس السمح، ولدنا وحبيبنا البتمم كيفنا، ومجلسنا بعذب الحديث، رغم سنه الغض، ولكنه كبير بعقله، وبانسانيته، تجده دوما ساعة الحوجة كانبل اولاد البيت، قدامي وهميم، يضبح ويسلخ، يوزع الروح الحلوة، والابتسامة المطبوعة على وجهه الصبوح، الصباح،، تفرغ لخدمة والده وممارضته، وشاله على كتفه للحمام، ويضعه على المقعد المتحرك، وياتي به للبيت الكبير ليستانس مع اخواته، واخوانه، ويظل يوانسه ويضاحكه بالساعات... يبث الطمانينة في الاسرة الكبيرة الممتدة، وسيم وكليم وحبوب.. اخذ من ابيه الوسامة، اللطف والظرف الكاريزما، وقضيان الغرض، ومن جده اخذ الطيبة والحكمة، الصمود والكرامة، ومن الانسانية اخذ اعطر ما فيها الحب، لم يقل لي ابدا اسمي مجردا ولكنه يقول: يا عمي ويكتفي.. ويسلم علي بالقبلات على جبيني، وبالاحضان الحميمة، يا ولدي اللطيف، ضوء البيت، ولا بقولوا لُو اعمل كدة، ولكن تتقدمه الاريحية، الفهم، والارحام والتي لها حافظ عظيم،، نفتقده اليوم ونحن اكتر ما نكون حوجة له، ولكنها الاقدار، انه ابني وابن اخي الحبيب..
الطيب احمد الطيب حسن بشيري
Post: #173 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-07-2023, 11:35 PM Parent: #172
Quote: افتراضي دخلت على امي في غرفتها، شفتا صاحباتا معاها، عاوز ارجع، نادتني امي تعال يا ولد سلم على خالاتك ديل!! رجعت مباشرة على امي، ومديت لها ايدي للسلام، يا الله سلمت على، ههههها وعاوز ارجع تاني، قالت هوي هوي يا جنا،. يا المغبي خالتك دي مادا ليك ايدا، سلم عليها، سلمت على خالتي، ومش متاكد سلمت على كل الخالات ديل، ول فطيت بعضهن، ... لمبتي بتبق .. 🤣🤣🤣🤣🤣
Post: #174 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-08-2023, 03:14 PM Parent: #173
Quote: في يوم المرأة العالمي.. 8مارس؛ التحية والتجلة والتقدير لكل نساء الارض قاطبة وهن يفعلن المستحيل من اجل غدا مشرق لهن ولاسرهن ولمجتمعهن.. التحية للمرأة السودانية وهي تتقدم الصفوف في الثورة ككنداكة اصيلة من اجل الحرية والسلامة والعدالة.. التحية لكل عاملة ومعلمة وست شاي وست كسرة وزارعة ومكافحة من اجل ان تعيش واسرتها في كرامة؛ من ذل السؤال والاستغلال؛ تحية خاصة للكواكب المنيرة *فاطمة ابوعركي؛ سيدة نساء الارض قاطبة الوسيمة الفهيمة الكليمة معلمتي الاولى وملهمتي؛ ما انا الا بخا من بستانها العطير.. * محاسن حسن السمحة الباسلة؛ رفيقة الدرب الطويل؛ التى تناضل يوميا من اجل تربية اطفالنا في غربة صعبة..لها كل التقدير والاحترام والحب.. * اخواتي اسيا؛ مريم؛ بخيتة؛ عشة؛فتحية الاخوات سكر نبات احبهن؛ انهن اعظم امانيي؛ ظلال وقد اجدبت الدنيا؛ كل الود والاحترام.. يطول عمرهن الخصيب... *فاطمة الطيب بنتي توتا بعضا مني؛ التي تسهر الليالي ديدنها التوفق وكانت الاولى هذا الفصل؛ لها التحايا والهدايا والحب؛
والتحية لكل الانسانية في كفاحها المستمر من اجل الحب والسلام والرفاهية .. وتحية خاصة لك قارئي العزيز يا من تورطت ووصلت هذه المرحلة من الرسالة؛
Post: #175 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-15-2023, 01:46 PM Parent: #174
Quote: ياالله ياخ.. ... اشتغلت عام دراسي كامل سائقاً لحافلة مدرسية تقل تلاميذ صم من منازلهم لمدرستهم الابتدائية والعكس؛ وغالبا الاب او الام او كليهما صم. كنت انزل امام كل بيت، واطمئن على جلوس كل تلميذ في مقعده، واقوم باغلاق الباب، واتحرك لمنزل اسرة اخرى.. كنت سعيدا بالعمل مع هؤلاء مرتفعي الهمم، اخر يوم عمل؛ كل اب اسرة انتظرني امام الباب... وكان وداعا حارا وصامتا ومصحوبا بدموع لم انسى هذا ابدا رغم مرور السنون ان يودعك اطفالا صم بدموع، وانت مجرد سائق لحافلتهم الخيرية، لابد انهم حسوا بتعاطفي اللامحدود معهم ومع اسرهم، واهتمامي الشديد بكل تلميذ من صعوده للحافلة وحتى رجوعه ودخوله منزل اسرته بصحبة كبير من الاسرة واحكام اغلاق باب منزلهم..
Post: #176 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-25-2023, 00:49 AM Parent: #175
Quote: صاحبنا جاب صورة ود اخوهو، قال دي صورتي لما كنت صغير، الجماعة قالوا ليهو: ياخ لمن انتا اتولدتا في الجزيرة ابا، كاميرا يصوروا بيها الصادق المهدي مافي..
Post: #177 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-27-2023, 08:08 AM Parent: #176
Quote: رمضانيات-1 صاحبنا المرحوم محمد حسن احمد؛ الله يرحمو ويوسدو الباردة؛ محمد كان مصابا بمرض السكر؛ يحكي انه في مطعم في بحري ذهب للفطور واخذ طلبه؛ وشاف صاحبنا داك ماف داعي لذكر الاسماء العامل فيها اكبر صوام هههههها يضرب في الفول والكبدة؛ وفاتح جوالو يقرا في الواتساب براحة من غير ان يراه جلس في الكرسي الوراء ضهرو وارسل رسالة واتساب: اسمع يا فلان ما تكتر الشطة... 😂😂😂
Post: #178 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-28-2023, 01:12 AM Parent: #176
Quote: رمضانيات-1 صاحبنا المرحوم محمد حسن احمد؛ الله يرحمو ويوسدو الباردة؛ محمد كان مصابا بمرض السكر؛ يحكي انه في مطعم في بحري ذهب للفطور واخذ طلبه؛ وشاف صاحبنا داك ماف داعي لذكر الاسماء العامل فيها اكبر صوام هههههها يضرب في الفول والكبدة؛ وفاتح جوالو يقرا في الواتساب براحة من غير ان يراه جلس في الكرسي الوراء ضهرو وارسل رسالة واتساب: اسمع يا فلان ما تكتر الشطة... 😂😂😂
Post: #179 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-28-2023, 07:00 PM Parent: #178
Quote: رمضانيات-2
صديقي الاثير ايام الخطابات؛ وقد سالته: كيف عامل مع السيد رمضان؛ رد كاتبا: رمضان عندكم هناك في السعودية مع الترطيبة والجداد والعصيرات والمكيفات؛ هنا حر يفسخ؛ فطور عصيدة ملاحا في الريف؛ وبليلة عيش ريف؛ وعشاء تعبان؛ وحلو مر مر وحار ومسيخ!! الله زاتو ما أمر بالهلاك ياخ... نحاول نعوض السنة الجاية؛ ان تحسن الاقتصاد.،. 😂😂😂
Post: #180 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-30-2023, 07:31 AM Parent: #179
Quote: تسلم حبيبنا الدكتور بابكر... بصراحة احاول ما استطعت ان اكتب الحكاية كما حصلت لما كما اتمنى؛ خاصة وان معظم ابطال القصص في مجال النت او قريبين؛ يعني كدة ول كدة بتأفش بتأفش هههههه زمان ايام المنتديات كنت بديها موية شوية شديد؛ بحيث لا يغير من السياق العام؛ محفظا على بيئة الحكوة واتساقها؛ وكما قال عبدالوهاب صاحبي ذات زنقة انو منعم دا كاتب يعني بِزَوِّد.. بس هسا مع الفيس تراجعنا من الموية وبقينا نبيع صافي نبع لحظتو غالباً.. وبحاول اعيش لحظة الحكاية تاني وانقل تفاصيلها دون تدخل من جانبي؛ فانا اقرب لاكون راوي اتحين دوما واحاول ما استطعت ان اروي بصدق مهما جنح؛ اوغل مسافرا مع الاصيل... واعتقد دوما ان الواقع اكثر ابهارا من اي خيال.. .. لا اكذب عليك هنالك الكتير من المسكوت عنه؛ احاول ان اتجاوزه لانو في حاجات كدة تموتها بيها بس.. لا تحكيها لاي كائن؛ كان عند اي منا؛ وسبب تاني يجعلني لا اركز على المسكوت عنه لاعتبارات انو الممكن كتابتو وحكايتو كتير.. وتسعفني ذاكرتي بتفاصيل التفاصيل؛ وفي اخراجها لحيز التدوين راحة لي؛ وسلوى ونشوة.. تماما زي الرسام تكون اللوحة مرتشة بالضباب في مخيلته؛ وما ان يفرغها على الورق حتى تستعيد زاكرته نضارها وقد خفَّت الحمول.. فالذكرى للانسان عمر ثان؛ وكنت اري وجه ابي وقد تهلل واشرق بالبريق وعاد اكثر شبابا ووسامة وسعادة؛ وهو يسترجع ذكرياته مع اخوانه واصدقائه على حافة حدود البطانة حتى عمقها ونواحي الهوج.. تسلم يابا..
Post: #181 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 03-31-2023, 11:17 AM Parent: #180
Quote: رمضانيات-3
في حفل زواج صاحبنا عبدالوهاب العبيد عثمان؛ الذي كان في عمق رمضان..الحفلة عظيمة والفرح عم الحضور وفاض؛ حتى تدفق في الشوارع المجاورة... و غني الفنان ياريت يا ريت ياريت تقرب اكثر الشباب والشابات من بعض..وغابوا في الفرح والنشوة والسعادة التي يشيعها الغنا دوما.. واحد واقف جمبي قال: يا هوي رمضان! رد عليهم راقص في طرف الدارة المهججة: رمضان مين؟ رمضان زايد ههههها وتوغل داخل الفرح الجماعي الفرح العريض..
Post: #182 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 04-02-2023, 07:17 PM Parent: #181
Quote: رمضانيات-4
في مكة؛ وفي شقتنا الديمقراطية.. صاحبنا عاطف مصطفى الزين كان يلعب الشطرنج حتى السابعة صباحا في نهار رمضان؛ مع صاحبنا الفنان محمد جعفر؛ واختلفوا واحتد النقاش.. وتوقف اللعب والتزم كل منهما سريره في غرفة بها حوالي سبعة شباب؛ شوية عاطف ولع سجارتو قصبة وقد استمخ؛ خلصها طفاها ونام.. صحيتو الساعة ستة للفطور اثناء الوجبة قلت له هامساً: اليوم دا عاد ممكن تكون جعان او عطشان لكن خرمة مافي؛ ضحك عاطف فارس في امريكا البعيدة له كل الحب والشوق من حاصف لقاصف...
Post: #183 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 04-04-2023, 07:22 PM Parent: #182
Quote: رمضانيات-5
صاحبنا عبدالوهاب اشقر؛ جاب الفتوة بتاعة الازهر التي اباحت للطلاب الافطار ايام الامتحانات وجاب معاهو فول وفلافل وكورس الفيزياء عشان يذاكر ونمشي للامتحان شقتنا كانت جمب الكلية.. وتصادف ان تواجد معنا اشرف علوم خشا معانا في السندوتشات وسوينا الشاي... اها جات زميلتنا وجارتنا لقت الشباب بضربوا سالت حللي اشرف دا عذرناه عشان مسيحي لكن الجوز دا مالم؟ قاليها اساليهم سالتنا مالكم؟ رد اشقر: انا مريض بالكلى؛ ومنعم دا صاحبي حا يتبرع لي بكلية. 😂😂😂
Post: #184 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 04-05-2023, 08:39 PM Parent: #183
Quote: رمضانيات-6
في عقابيل المرحلة المتوسطة؛ صادف رمضان العطلة المدرسية التي هي موسم العمل لطلاب ذلكم الزمان الثمانينات يا مجيدة؛ كنا نعمل طُلب نصحي ستة الا حتة واصلا بنكون نمنا تلاتة بعد سهرة جامدة في نادينا العريق.. نمشي نشتغل لحدت الساعة واحدة ومن الملطم للبحر نجلبق لحدت الساعة ستة ونرجع منهكين من العطش؛ وكنت اثناء ساعة الافطار لا آكل اي اكل نهائي اشرب بس موية مطلق وليمون وابري احمر وابيض.. وبس اذكر ان والدي عليه سلام في برزخه الوضيء كان في غلبة معاي في الشراب الما بروى معاهو دا؛ وكان يمسك كاس الشراب من يدي اغفله وارجع تاني انشرب..واستغل فرصة انشغاله مع اقرانه بصلاة المغرب واستمرأ الشرب.. وارجع الصينية البيت واكل لقمة بعد فترة وامشي النادي.. فقط يوم الجمعة اكل مع الفطور.. كانت مبالغة كان ممكن اتوفى من العطش؛ وكان ممكن افقد سوائل.. لكنها العناية الالهية غطتنا من هول العطش وانا وشلتي من الُطُلَبْ.. وكانت مسالة الصيام دي لينا نعتبرا رجالة عديل؛ وكنا نري ان الفطور عيب.. يا لذكرى تلكم الايام ياخ هسا تذكرتها عطشت 😂😂😂
Post: #185 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-04-2023, 02:43 PM Parent: #184
Post: #186 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-04-2023, 02:49 PM Parent: #185
Quote:
- عين السِيد بِتْزيد - (اشارة عبدالدايم اخوي في اخريات الإجازة، عن حال شديراتي المسميهن انا حديقة، في بيتي الكائن بواوسي الشيخ عبدالقادر،) وقد راى ان الليمونات، وقد زادت اخضرارا وليمونن، والسَمَرة والسيالة خضرا وميالا.. والسدرة سدرت، والقرض حتا.. حتى النيمات وقد تكاثف ظلها.. والقمريات وودابرق، ومرتو.. الطير كله استكان وبنى اعشاشا، وقد وزع له محمد وفاطنة الموية هنا وهناك.. واصلا الجدول طوالي ماشي، حرفيا معظم الإجازة بكون قاعد تحت الشديرات ديل..عنقريبي الهبابي، وجوالي والشبكة تحت الشدر فل اوبشن.. وكم كرسي وكتبي وجرائدي.. ومرات اغفو.. بي شوق عظيم لتلك الأنحاء..
Post: #187 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-05-2023, 00:48 AM Parent: #186
Quote: رمضانيات-7
في سجن ترحيل مكة؛ وفي نهار رمضان جابوا دفعة مرحلين، بينهم مصريين..جلس جمبي عمك مصري.. وكان زعلان شديد؛ المصري قالي: مسكوني جمب الحرم قالوا عليْ شحات باله شكلي شكل شحاتين؛ -حاشاك والله ياشمهندس؛ دا انت بيه؛ انبسط المصري لكلامي - قال شحات قال دا انا عندي مصانع وشركات؛ يشوفوا التذكرة برضو دي درجة اولى معقول الشحات يجي طيران وبدرجة اولى كمان.. تذكرتي على مصر للطيران الدرجة الاولى.. وفي نص كلامو معاي طلع علبة سجائره واشعل والله ماني صائم لهم قال شحات قال انا شحات؛ دا حنا اللي بنشحد.. والناس مقامات برضو لا يكون الدخان بزعجك يا زول -لالا خد راحتك يا هندسة، 😂😂
Post: #188 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-06-2023, 10:56 PM Parent: #187
Quote: رمضانيات-8
حدثني زول صحبي وما بكضب فقال: ساهروا حتى قريب الصباح في حفل صاحبهم المشترك؛ وتولوا ضيافة المعازيم حتى اخر صفرة؛ وما تعشوا تلك الليلة ولا تسحروا؛ وصحوا بدري بدري عند ناس العرس وغادر ستة الا حتة العرسان نحو كسلا الوريفة؛ وتوجه صحبي وصديقه نحو مطعم الكنيسة النابض في قلب بحري؛ وقابلا قوم كثر جالدين وضربا الكبدة والعدس.. وشربا الشاي ودخنا.. في جو من الالفة والتسامح؛ وفي طريقهما للمواصلات لمحا مزيرة مندية فذهبا وشربا كوزين باردين وجاءت فتاة وراءت الشابين يشربان وكانت تحمل كيس سكرا . واستغربت للشابين الذين يطلعان التمساح من البحر ؛ وفي وسط استغرابها حب احدهم ان يخفف عليها خلعة اكتشاف افطارهما فقال لها السكر دا في رمضان ما قالو غالي يا غالي؛ فضحكت البت ولوحت لهما بشنطتها وهي تضحك.. واصل صديقي الما بكضب انه ركب مواصلات منطقتهم وان الكمساري شم ريحة السجارة؛ وزعلان عمل ويعاين ليهو ومستغرب وصاري وشيهو؛ وقال قَرّب ما يرجع لي الباقي؛ وكل مرة يحمر ليهو.. وختم: الكمساري يحمر لي وانا بعد كل حميرة بديهو دشوة .. 😂😂😂
Post: #189 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 08-09-2023, 07:43 PM Parent: #188
Quote: والله يا منعم نجاة دي ملالة بس احياااا انا.. عبدالرحمن دا كب.. محمد على دا اطيب زول الخالة نفيسة دي فسلة شديد.. وعمر خواف.. ديل كلهم ناس من حلة صديقي منتصر القابلتو هنا في الغربة..منتصر يتحدث معي وكأني بعرف الناس ديل، وكاني من حلتم التي لم اراها ولم اسمع بها الا عندما التقينا هنا على ضفة الصحراء.. في الاول استغربت، لاحقا مشيت ولما كانت تجيهوا خطابات،، كنت بسالو عن بعض الناس والتطورات، لاحقا جدا كان يمرر لي الخطابات، وامرر ليهو خطاباتي.. .... وظل يونسني هنا على مدى السنين عن ناس حلتم، وبقيت احب البحبهم واكره البكرهم، وعموما هو بكره معظم ناس حلتم والحلال المجاورة...😂😂😂 .. كلو زي دا . المهم
سف وقارن كما يقول صاحبنا عبدالله ود البوش .. البوست دا مهداه لودالبوش، الذي غادر بيته في جبرة،، واستقر في بيته الجميل في غرب الجزيرة صقيعة سلامة . كل الحب للحلوين هناك وبرضو مهداه للصديق العزيز عبيد حسب الرسول الشيخ في قرية بريبيرة ريفي المناقل...
Post: #190 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-12-2023, 10:21 PM Parent: #189
Quote: رمضانيات-9 عمنا العوض من المزارعين المشهود لهم بالفَلاحة؛ في زراعة الشتويات وخاصة الطماطم ومحصول طماطمو من الدرجة الاولى؛ وكان يتاجر في شتلات الطماطم؛ فيبيعها جاهزة لبعض المزارعين الذي لا يزرع (مسمسم)الذي هو زراعة بذور الطماطم لتصبح شتول فتُقلع ويُعاد زراعتها اها لاحظ المزارعين انا الشتول التي يشترونها من عمنا العوض نوعها ومحصولها وانتاجها اقل من ذات الانتاج في مزرعته؛ فاستنتج المزاعون انه ربما يزرع مسمسم من نوع رخيص للسوق واحر من نوع جيد يزرعه هو.. فسمى المزارعون لاحقا الطماطم التي لا تنجح بانها تيرابا من العوض حتى ولو ناثر بذورها المزارع بنفسه، يقولون هكذا كنوع من التندر والفكاهة.. كلمت بالقصة دا صاحبنا في الدراسة Hafiz في ونساتنا للطويلة الجزلة في تلكم الايام الخصبة.. ايام الامتحانات نمشي نجيب المحاضرات المصورة من زميلنا عمر الذي يحضر المحاضرات ويصور من اول الدفعة؛ المهم مرة امتحان زاكرناه من مذكرات صاحبنا عمر المصورة وما ظبط معانا اها حافظ قال لي: المذكرات الذاكرنا منها دي تيرابا من العوض
Post: #191 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-13-2023, 04:21 PM Parent: #190
Quote: رمضانيات-10 ايام المتوسطة؛ عندي عجلة فيليبس حمراء.. وكنت احيانا امشي بيها المدرسة.. كما هو حال جيلي آنذاك؛ المسافة لمدرسة الجيلي المتوسطة حوالي 7 كيلو ذهابا ومثلها في الإياب؛ ومعظم الاوقات نركب المواصلات.. مرة بالليل مولع اللمبة الخارجية بتاعة الحوش واصلح في عجلتي ساكت... سالني اخوي الكبير عبدالدايم بكرة ماشي المدرسة بالعجلة ولا شنو؟ اجبت: والله حسب الظروف الامكانيات والزمان والمكان والمُلابسات... علق عبدالدايم: بالله شوف الولد دا فلسفتو؛ ما تقول ماشي بيها ولّ ما ماشي بيها ساكت!!😂😂😂
Post: #192 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-15-2023, 05:58 AM Parent: #191
Quote: رمضانيات-11 جدي ابوعركي؛ كلامو مختصر وشوية. ممزوج بالسخرية..له مقدرات فائقة على القفلة الحراقة.. او الكومنت الفشيخ بلغة جيل هذه الايام.. *احد جيرانه علق قائلا انو -فلان صديق العمر لجدي- ما شفناهو في العزاء دا العزاء لاخو جدي والجار يقصد اثارة جدنا ليعلق ولم يخذل جدنا الشعب - فلان دا وصل قبالك انت الجار؛ وقعد تلاتة ايام والله كلمتك دي حقو تمصمص خشمك منها *عثمان ترتوس يهبش تحت اللحاف في سرير في غرفة جدنا الخاصة لقى صابونة حمام كبيرة؛ فعلق عثمان - الصالونة شني جدنا - الهباشة شني * اهلنا لايركبون على ضهر الحمارة الوالدة لتوها اكراما للعشرة؛ ويقولون ان ضهرها ليِّن.. جدنا سائق حمارتو الوالدة حديثا؛ ومعاها دحيش صغير وكيوت وينطط... قام واحد شليق سالو - جدي الدحيش دا لقيتو وين؟ - لقيتو واقع 😂😂😳
Post: #193 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-17-2023, 08:56 PM Parent: #192
Quote: رمضانيات-12 كنت في طفولتي وصباي احفظ اي عنوان بازر في جريدة او كتاب او مجلة احفظه واظل اردده لايام بصوت مسموع ومرات بلحنو كمان؛ اظل هكذا حتى يعتر لي بنط عريض آخر احفظه وهكذا اذكر انني حفظت الكلام ادناه بالنص ورددته لفترة (السودان جزء من الجزيرة العربية لولا تطفل البحر الاحمر) واذكر انني زعلت من البحر الاحمر المتطفل دا اكتشفت لاحقا ان هذا العنوان الحفظتو ليس خطا فقط ولكنه ساذج.. وحفظت بيت المتنبي الشهير (افدي ظباة فلاة ما عرفنا بها مضغ الكلام ولا صبغ الحواجيب حسن الحضارة مجلوب بتطرية وفي البداوة حسن غير مجلوب) قبل ان افهم معناه لاحقا وفي المنصورة حفظت 32 تجربة فيزياء مكتوبة باللغة الانجليزية دون افهم معظمها استعدادا لامتحانات العملي.. وحفظت كذلك(انا آه من الكوميديا المصرية) وذات مرة ناس البيت بتكلمو عن اي نوع من الطعام تفضل؟ اسيا اختي قالت مضوي اخوي دا بحب اكلة إسما الكوميديا المصرية 😂😂😂
Post: #194 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-18-2023, 10:20 PM Parent: #193
Quote: رمضانيات-13 في المنصورة وفي شقتنا الكائنة بحي ستوتة الشعبي الذي يسميه عنكبة (عمق المدينة)؛ حيث المدنية في ابهج تجلياتها.. كنت بذاكر في البلكونة وشقتنا تقع في زقاق ضيق يا دوبك يمرر الناس والمهمات؛ طفلتان مصريتان شقتيهما متقابلات كلتاهما في بلوكانتها.. تتساءلان بالالغاز واحدة قالت للتانية: حاجة تشوفيها ما تشوفكش تسمعيها ما تسمعكش اجابت الاخرى: الهواء ردت السائلة باستغراب: هو الهواء انتي بتسمعي كلامهم كانت زميلتنا اشواق احمد عبدالقادرساكنة في الدور الارضي في عمارة عمنا فاروق العندو مرسم في الارضي في عمارته هذه يرسم ويشكل بالجبص وكان رجلا لطيفا.. وكنا نسكن بالدور الاول انا وعنكبة البرلومين.. وفي السطوح يسكن عم فاروق واسرته عم فاروق قال لاشواق ذات مرة: انو عبدالمنعم دا من المدينة؛ لكن ابراهيم دا واضح انو من الارياف.. هههها اشواق قالت ليه بالعكس.. منعم الريفي وابراهيم ود الجزيرة الحوش؛ عمنا فاروق عندو بت في الابتدائي لطيفة وروحا حلوة معظم الوكت قاعدة مع اشواق تحت تذاكر او تتونس.. مرة امها نادت عليها تعالى يا أمَر وتاخرت قمر في الطلوع لامها ندهت مرة اخرى تعالي يابت سرعة البت قالت: اوكي وما طلعت شوية وامها باعلى صوتها تنده تعالي يا انتي يا بتاعتي الاوكي 😂😂😂😂
Post: #195 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-21-2023, 05:40 AM Parent: #194
Quote: رمضانيات-14 باختصار شديد اجد نفسي مع رجل الشارع العادي كما يسميهو عنكبة؛ الزول العادي وبسيط وسوداني؛ اي زول كلامو بسيط وصادق وعلى سجيتو دا زولي؛ غير كدة يبدا يتفلهم وينظر املاهو تنظير وفلهمة وانتهينا.. شاب من اهلنا حاول اتفلهم عليْ قدام تجمع من اولاد الحلة؛ المهم اديتو درس في الفلهمة اسعد المجتمعين هههههها وصار تعليقي معه نكتة يتناقلها الشباب في مجالسهم؛ وصولها لود اخوي عمر فصار يعيد حكايتها منتشيا ويبداها كالاتي: الجنا متفلهم وعمي متفلهم وووو ويستمر في الحكاية.. 😂😂😂😂😂 في حلفا القديمة مع تاجر بتونس (نحن الطلاب نسمي التجار الدروز؛ ) عرفت انه ليهو اسبوعين في حلفا وما لقي لساتو حجز لمصر بالباخرة ونحن الطلاب نسافر تاني يوم طوالي؛ طبعا نحن بنجي في السنة مرة والتاجر بمشي وبجي عشرة مرات بالمنطلق الاولوية للطلبة المهم لما عرف اني جيت امس ومسافر بكرة؛ زعل وحاولت اراضيهو وافهمو في النهاية قلت ليهو انتوا للدروز ديل ما بتحبوا الطلاب صاح؟ قالي: والله كراهية شديدة زي الحرب بين دولة ودولة.. نسيبنا المرحوم علي كان بنقل في طوب لضريح الشيخ علي ود حسن؛ في جلسة افطار قلت الشيخ علي الغرفة عاوز بيها شنو هو اصلا متوفي.. دقا علي تربيزة الاكل قائلا: والله لو عارفك وهابي لقمة في الصحن دا ما اكلا معاك.. فهمه الحاضرون وانا انو ما وهابي تب مافيولا يمكن ان اكون.. طبعا اصلا كان الطوب لتوسيع الخلوة التي هي بيت الامة لاهل البلد؛ وشخصياً اسعد لحظاتي اقضيها في هذا المسيد واسوق محمد واحمد للخليفة العطا عشان يعزم لهم... في اسوان الباخرة جاية من حلفا كلها سودانيين؛ضابط الجوازات المصري قال للعسكري: دخل لي الطلاب اولا لتاشيرة الدخول؛ عنكبة علق: بالله شوف الامتيازات التاريخية دي.. العسكري يشيل ويدخل في الدروز الضابط نهره: ياحمار اقولك دخلي الطلاب تتدخلي السودانيين 😂😂
Post: #196 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-22-2023, 08:59 PM Parent: #195
Quote: رمضانيات-15 في الغالب اي جنيهات سودانية متبقية معنا في حلفا نحولا لجنيهات مصرية؛ وننزل اسوان وقبل ما نمشي الفندق او بيوت الشباب او محطة القطار للسفر مباشرة شمالا؛ نمشي القهوة نشرب شاي صاموتي ونضرب سندوتشات الفلافل ولكن ذلك موضوع اخر.. السفرية ديك ما لقى الركاب جنيه مصري واحد في حلفا؛ فاضطروا يشتروا بباقي الفلوس تسالي تسالي تسالي؛ وارتفعت اسعار التسالي بدورها في حلفا..والدروز لان معاهم فلوس كتيرة عادي تلقى الدرزي معاها اردب تسالي واصلو المية مية واردب كما يقول الاستاذ علي المك؛ المهم في الامر الباخرة وقد امتلأت بالتسالي شوالات شوالات رتخ رتخ.. دخلنا الباخرة وتبادل الطلاب التعليقات وابتدرنا السخرية من التسالي انا وصديقي حافظ Hafiz - في درزي في الحقيقة هو ما دزري هو تسالي - وفي درزي اسمو تسالي محمد تسالي - وفي تسالي ماشي براه - الباخرة دي ما باخرة ركاب دي باخرة تسالي وتسالي - ستات الفول والتسالي في الخرطوم وحلفا تحولن لستات فول بس - المظاهرات في الخرطوم وحلفا اندلعت يقودها القرفانين ومحبي التسالي ورواد السينما لانعدام التسالي - في اسوان شوال التسالي ببريزة - في اسوان اشتري شوال تسالي وخد اتنين مجانا 😂😂😂😂
Post: #197 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-23-2023, 02:45 PM Parent: #1
Up
Post: #198 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-23-2023, 02:46 PM Parent: #1
Up
Post: #199 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-23-2023, 02:46 PM Parent: #1
Up
Post: #242 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-16-2024, 01:23 PM Parent: #199
Quote: جهزنا كل متطلبات حلة العزابة القطر قام.. انا وطارق الحسن، واخر حاجة اللحمة مشينا لصاحبنا الجزار الباكستاني.. كم الكيلو؟ -20 ريال وعندنا 16 ريال طارق اقترح نشتري نص كيلو بعشرة -انا هات 800 جم ب ال16 ريال دي.. الحزار - كيف هذا صديق شرحت ليهو القصة اقتنع ولكنه نقنق: -انا 30 سنة هنا حزارة رياظ مافي نفر اشتري كدة 😂😂 ،، وطارق قرب يسميني 800 جم المهم ضربنا ال800جم، ضرب من لا يخشى القاوت هذه الذكري بمناسبة عيد ميلاد صديقي طارق الحسن محمد الحسن، الذي يقضي اجازة الصيف بالقاهرة الف صحة وهناء يا ترس طارق الحسن السنوسى
Post: #201 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-23-2023, 02:47 PM Parent: #1
رمضان-16 امي تخت الودع احيانا نادرة لخاصتها؛ واستمتع بودعها جدا فهو ونسة لطيفة؛ واذا زاد الناس في راكوبتها الاثيرة توقف الودعات؛ يمنعها حياءها الشديد من الونسة المطلوقة هكذا للعامة ولو كانوا اولادها وبناتها وامتداداتهم.. اسيا اختنا الكبيرة برضو عندها ودع عجيب؛ مرة بتخت في الودع وجاء وهبة اخوها قعد في الونسة مرتين تلاتة اسيا ترمي الودعات وتلفها على وهبة وتقول ليهو الودع محمدك في الرابعة قالت: اجش جاتني طية قروش كتيرة عشرة الف وهي قريبة عند عبدالوهاب اخوي دا كلو مرة يهبش جيبو عاوز اعصرا لي ينشغل بي حاجة؛ والموضوع دا شاغلو ليهو كم يوم؛ ههههههها قلت ليها التفاصيل دي كلها في الودعات ديل.. وهبة قال ليها: اسيا قولي ساهي عاوزة عشرة الف.. ... ا😂😂😂😂 .. وحاط الله قعدة الودع دي كاني معاكم لروح امهاتنا في الاعالي الراحة والطمانينة؛ واكيد عارفات بعد غيابهن الحياة بقت مسيخة.. .. انتا عاد يا عمر ماك سمح تلقاها امنا الرفيع بتخاف عليك من العين؛ وتلقاها بتبخرك.. 😂😂😂
Post: #202 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-24-2023, 05:54 AM Parent: #201
Quote: مضانيات-17 صاحبنا مشى بحري مخصوص؛ اشترى القلم الفرنسي داك المشهور في تمانينات السودان؛ وكان فرحان بيهو شديد؛ وقاشر بيهو، فعادته ان يحتفي بالاشياء البسيطة لدرجة انو بجيبو معاهو التمرين؛ وبحكم صداقتنا المتوسطة المتانة؛ وراني القلم فاشدت به وبخطه الجميل؛ وشكرتا القلم واضفت اني احب النوع دا اكتر من قلم البق الشهير.. كلو مجاملة مني ساكت. بعد كم يوم لاقاني صحبي متنرفز وزعلان واخبرني انه فقد القلم الشهير.. فطيبت خاطره واواضحت ان المسالة بسيطة؛ وانه مجرد قلم بِشِلِنْ فالموضوع لا يستحق.. واصر على اهمية القلم بالنسبة له؛ وانو عاوز القلم؛ يا زول الكلام دا معناهو شنو؟ - لقد كنت معجبا بالقلم وانا شفتو (مِفَنْدِر) في جيبك - طيب ليه ما كلمتني عن الموضوع في نفس لحظتو؟ واخدتا قلمك التافه دا؛ وسكتا ليه وانت شايفو مفندر؛ من كرمك ول من سترتك؛ بعدين القلم اعمل بيهو شنو واصلا الدنيا اجازة ههههها؛ وانا شكرتو ليك ساكت عشان تفرح؛ حريقة في الفرنسي وفي فرنسا، وباريس وفي فرنسوا مترا زاتو؟ قال مِفَنْدِرْ قال 😂😂😂
Post: #203 Title: Re: قصص من الدنيا؛ وبعض حكاوي... Author: محمد عبد الله الحسين Date: 10-24-2023, 06:42 AM Parent: #202
سلام وتحية الأخ عبدالمنعم
شكرا على الواحة الجميلة دي والكتابة المتسلسلة زي رذاذ المطر...
السهل الممتنع والذي نجد فيه ذكريات الأهل و رموز الطيبة والخير في الحي..و رائحة الحبوبات ودفء اللمات..
منتهى الروعة..
للأسف فات مني الكثير ما تابعتوا..
Post: #204 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-26-2023, 05:03 PM Parent: #203
Quote: رمضانيات-18 صاحبنا فَكِهْ وبتاع مزاجات.. ومزاجو عجيب؛ قال ان هنالك ست شاي؛ وشايها صاموتي يعدل الدماغ المتكلفة دي؛ يركب مواصلات حلتم بحري الشهداء سوق ليبيا.. ويهبط عند ست شايو الاثيرة؛ ويجلس على كرسيهو؛ يطلب الشاي المدنكل بالبهارات الهبهانات؛ القرنفل المغلي؛ حرف نعناع واحداً لا يزيد،،، ويبدأ في الشخيب؛ يرتشف، يستمخ؛ ياخد وكتو؛ يستمرى..تتأوه الكاس في يده وتسنيم.. يفرغ؛ يتامل حركة الناس والبضائع؛ يطلب كاساً اخرى بذات النكهات؛ ويسترخي معها كما اختها البتول السابقة؛ هي اللاحقة.. ود بلغ الكيف مداه؛ مع الدبل دا.. يعرق ويجف.. يكاد يغفو؛ يعرق ويجف؛ فَتَّح صاحبنا وكان قد اعياه الخرم.. سرى الشاي الحريف؛ في دواخله كلها واتسع المدي؛ والرؤى استقامت؛ ويبدأ متثاقلا رحلة العودة للقرية زنقاحة...
........
Quote: سلام وتحية الأخ عبدالمنعم
شكرا على الواحة الجميلة دي والكتابة المتسلسلة زي رذاذ المطر...
السهل الممتنع والذي نجد فيه ذكريات الأهل و رموز الطيبة والخير في الحي..و رائحة الحبوبات ودفء اللمات..
منتهى الروعة..
للأسف فات مني الكثير ما تابعتوا.
تسلم حبيبنا الدكتور محمد نورت البوست، الفكرة نحول ونستنا من طق الحك لطق الكيبورد، ونحفظ بعضا من ذكرياتنا للاجيال القادمة جيلنا هو الاوفر حظا وفي الخواتيم اسودت امامنا بلدنا،، اولادنا لما نحكي ليهو عن ذكرياتنا بستغربوا شديد عاوزنهم لما يبقوا في سننا يعرفوا البلد كانت ماشة الكيف والانسان السوداني كاين عايش كيف..
تلك الفكرة، وما فاتك حاجة ابدا من الاول وعلى اقل من مهلك
البوست عمره اكتر من تلاتة سنوات وهو مشروع لكتاب افكر ان اجمعه واطبعه ويتوزع مجانا.. هءه ءكريات مشتركة لا يخصل ان احتكر ملكيتها ههههها تسلم حبيبنا..
Post: #205 Title: Re: قصص من الدنيا؛ وبعض حكاوي... Author: محمد عبد الله الحسين Date: 10-27-2023, 10:12 AM Parent: #204
تحياتي ومودتي عزيزنا عبدالمنعم
Quote: تسلم حبيبنا الدكتور محمدنورت البوست،الفكرة نحول ونستنا من طق الحك لطق الكيبورد، ونحفظ بعضا من ذكرياتنا للاجيال القادمةجيلنا هو الاوفر حظا وفي الخواتيم اسودت امامنا بلدنا،،اولادنا لما نحكي ليهو عن ذكرياتنا بستغربوا شديدعاوزنهم لما يبقوا في سننا يعرفوا البلد كانت ماشة الكيف والانسان السوداني كاين عايشكيف..تلك الفكرة، وما فاتك حاجة ابدا من الاول وعلى اقل من مهلكالبوست عمره اكتر من تلاتة سنوات وهو مشروع لكتاب افكر ان اجمعه واطبعه ويتوزع مجانا..هءه ءكريات مشتركة لا يخصل ان احتكر ملكيتها ههههها تسلم حبيبنا..
نحن المعطونين بحلاوة وطعم اللغة العامية و نكهتها... تستهوينا التعبيرات واللهجة...حتى اللهجات الفرعية
للقبائل والمناطق لها حلاوتها وطعمها..
المشكلة كما ذكرت أن اللهجات تتحول ببطء وتتوارى التعابير والكلمات بفعل الانتقال الجغرافي و بحكم الهجرات والتداخلات بين القبائل و سكان المناطق المختلفة فتفقد اللهجة المعينة أصالتها ..لذلك التسجيل الشفاهي والكتابي والروائي مهم ..
و لكننا للأسف نحن غافلون ...كما في أي شيء.
***قبل ثلاثة سنوات و أنا راكب القطار في لإجازتي السنوية مسافرا من الخرطوم للدامر ..ركبن بقربي نساء وفتيات وأطفال أهلهم من شندي..
وكانوا كما عرفت عائدين من مناسبة زواج بالخرطوم... كنت طوال ساعتين استمتع بتلك اللهجة القروية المحببة ..التي ساقت
لى بعضا من ذكريات الطفولة..وذكريات البلد وأعمانا و عماتنا... حدثتني نفسي بأن أنزل في شندي و أقضي بضعة أياما أستمتع بطعنم البادية ونكهتها وببساطة حياة البادية واستعيد مسمع تعبيرات وكلمات ازالت المدينة بغلظتها حلاوتها..
ولكن للأسف الإجازة قصيرة..
شكرا لك أن قمت بواجب كان من المفترض أن يكون هو واجب دوائر علمية وبحثية.. وهنا نذكر ما كان يقوم به معهد الدراسات الأفريقية و الآسيوية وجهودالطيب محمد الطيب..
ك التحية وعفوا للإطالة.
Post: #206 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-28-2023, 11:42 AM Parent: #205
Quote: رمضانيات-19 في رحلة العودة من حلفا للخرطوم، في الاجازة الصيفية، هنالك عربية محجوزة بالكامل للطلاب، لا ادري لماذا كلفني الزملاء بالاشراف على العربية دي، قلت ليهم: هوي ما عندي مانع لكن انا حدي الجيلي خايف بعد انزل منكم الحكاية تجوط،😂😂😂 رد احد الطلاب: لو وصلنا الجيلي عليك امان الله اكان ما جاطت نجوطا برانا... في سندة ما بين بربر، وعطبرة جاءت مجموعة من خمس امهات، قالت احداهن: هوي نحن ماشين السندة البعد الجاية حا نركب معاكم ، لكن -باعتباري مشرف وكدة- ياحاجة دي عربية طلبة، ما ان سمعت الحاجة كلمة طلبة حتى زغردت قائلة: واسعادتك يا فلانة( اسم زوجة الامهات ديل موصلاتنها لبيت العدل) واضافت: انا بحب الطلبة واموت في الطلبة، اولادي طلبة وبنات بناتي طلبة؛ وضافت ضاحكة: وانا ذاتي طلبة.. اتفضلي يا فلانة اقعدي جنب البنيات ديل؛ هوي آآآ الطالبات فِجَّنْ شوية لخالتكن دي، باقي عروس، اتمهلي اآآفلانة، واجلست هذه القائدة اتنين من مرافقاتها جمب العروس جمب الطالبات، العروس صانة ساهي وتقيلة كما ينبغي لعروس؛ وانا واختي دي بنقعد جنب وليداتنا ديل، اريتن وليدات السرور؛ الطلبة.... جلسن الحاجات، وبعد شوية اندمجنا في الونسة مع امهاتنا، كعادة السودانيين بعد بدء الرحلة؛ اي رحلة... العروسة واتنين من رفيقاتها في اول العربية جنب الطالبات ونحن في اخر البرنسيسة معانا الحاجة القائدة دي ورفيقتا، سالتها؟ بعد فترة، عن العروس لانها تبدو متقدمة في السن قليلا، اجابت الحاجة اللطيفة: هوي يا ولدي دا مو عرُسَنْ تحت كُرُسْ، سري دي راجلا الاول متوفي ليهو سنين طويلة، وبناتا معرسات ووالدات، وولدا قدركُنْ مغترب في ليبيا، قالت داير السترة، قنا خلاص، وراجلا الجديد كبير، لكن السترة سمحة، سمحة ولَّ مي سمحة يا اولادي،؟ سمحة تب، ان شاء الله ربنا يهنيهُن وزادت الحاجة القائدة: ونحن عاد بنسلما ونُصُد فوق دربنا، واحد من الطلاب: لكن ياحاجة باقي الليل اظنكن بتبيتو مع صاحبتكن في بيتا الجديد، العريس دا اكيد منتظركن بالشوق كله والمشاعر؛ واكيد اكيد ضابح،
Quote: ***قبل ثلاثة سنوات و أنا راكب القطار في لإجازتي السنوية مسافرا من الخرطوم للدامر ..ركب بقربي نساء وفتيات وأطفال أهلهم من شندي..
وكانوا كما عرفت في مناسبة زواج بالخرطوم... كنت طوال ساعتين استمتع بتلك اللهجة القروية المحببة ..التي ساقت إلى بعضا من ذكريات الطفولة..
حدثتني نفسي بأن أنزل في شندي و أقضي بضعة أياما أستمتع بطعن البادية وحياة البادية واستعيد مسمع تبيرات وكلمات غطت المدينة حلاوتها..ولكن
هلا يا دكتور محمد نورت البوست يا صديقي، مثلك انا زول شارع تحتاني تاسرني الكلمة البسيطة واللهجة المحببة العريقة العميقة.. اسجل هذه الخواطر والحكايات والذكريات لتؤرخ لسودان ما اظنه يعود بذات الالق.. وان عاد البلد فمن يعيد لنا الرفاق وامي.. .. صادفت هذه الحلقة في تسلسلها الزمني رحلة في القطار ومداخلتك نفسها تتحدث عن رحلة القطر وكل الركاب احباب.. انت زول واصل يا دكتور خليك قريب..
Post: #207 Title: Re: قصص من الدنيا؛ وبعض حكاوي... Author: محمد عبد الله الحسين Date: 10-28-2023, 03:07 PM Parent: #206
سلام أخ عبدالمنعم
Quote: هلا يا دكتور محمد نورت البوست يا صديقي، مثلك انا زول شارع تحتاني تاسرني الكلمة البسيطة واللهجة المحببة العريقة العميقة.. اسجل هذه الخواطر والحكايات والذكريات لتؤرخ لسودان ما اظنه يعود بذات الالق.. وان عاد البلد فمن يعيد لنا الرفاق وامي.. .. صادفت هذه الحلقة في تسلسلها الزمني رحلة في القطار ومداخلتك نفسها تتحدث عن رحلة القطر وكل الركاب احباب.. انت زول واصل يا دكتور خليك قريب..
**آه من ذكريات القطر يا عبدالمنعم... القطر ده لعب في حياتنا دور كبير ..ليس في النقل والمواصلات فقط.. بل في التواصل والتلاقح الثقافي والاجتماعي
بين سكان السودان خلال فترات رحلة القطار... كما أنتج العديد من الحكايات و الروايات والقصص...والقصائد والأغاني..
القطار كان له نوستالجيا حزينة في فترات حياتنا الفائتة... وداع الأحبة و لقائهم..( قطار الشوق) و القطار المرّ...الخ.
**لو سمحت لي أنقل بعض مما تكتب لبعض أصدقائي في بعض القروبات...وإن كان ذلك حفاظا ( حقوق الملكية) لأنك لم تنشره بعد ؟ فلك العذر..
ال* تقدير الأمر يعود لك.
تحياتي
Post: #208 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-28-2023, 04:57 PM Parent: #207
Quote: و سمحت لي أنقل بعض مما تكتب لبعض أصدقائي في بعض القروبات...وإن كان ذلك حفاظا ( حقوق الملكية) لأنك لم تنشره بعد ؟ فلك العذر..
هلا يا دكتور محمد، فعلا القطر ربط السودان ووحده، (السكة حديد قربت المسافات وجدا) قطار حلفا وبورسودان وواو وقطار الغرب، وان كنت من هواة الذكريات عن القطار فلي بوست كامل عن السفر بالقطر وعن القطر نفسه فليس بين بيتنا والسكة حديد الا شارع التحدي.. ممكن ترجع للبوست دا هنا من قوقل ودا عنوانو (في القطر كانت لنا ذكريات) ستجد ما يسرك.. اما حكاية الاستئذان لنقل بعض ما اكتب لقروباتك.. فمن غير اي اذن انقل مباشرة كل ما يعجبك لقروباتك بل اعد نشره في اي وسيلة نشر تراها.. فانا اكتب للتنفيس ولمتعة الاخرين ان وجدوا فيما سلوى وسعادة فيما اكتب لن تصدق شعوري بالفرحة والامتنان ان عرفت ان ما اكتبه يسعد ولو شخصا واحدا.. اكون انا الاسعد وزاد وجدي.. ايو ايو انسان يعمل له ما اكتب فرقا ايجابيا يكون دافع لي للمزيد، رغم الزمن الممحوق ومافي.. ومعظم المادة هنا اصلا بكون نشرت معظمها في الفيس بك وواعدت نشرها في بعض المنتديات مثل سودانيات.. وانشر هنا رغم الحروب والاحتلال، والجو العام المكهرب بالحريق ولكن لو واحد فقط قرا واستمتع افرح واستمر في النشر .. حكاية انو عاوز انشرها في كتاب تظل مجرد حلم مؤجل اذكره احيانا على سبيل التفكه .. دمت يسحبي دوما بخير..
Post: #209 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-30-2023, 04:17 AM Parent: #208
Quote: رمضانيات-20 مشيت من السعوية اجازة للبلد؛ وغفلت راجعاً.. عبدالوهاب اخوي وهبة؛ هنا في ابها كان. سألني بالتلفون.. بعدالسلام والحال والبلد واهلها؛ سالني: - يازول ما سويت لك حاجة في اجازتك دي؛ ؟يقصد حاجة للمستقبل بيت مثلا او اي مشرع استثماري.. طبعا عاوز يتونس هو عارف البير وغتاها.. -انا: حاجة شنو ياخ انا يا الله ويامين قدرت اجي راجع.. -وهبة: اصلا البلد تمشي يالله؛ وتجي راجع ياالله...
Post: #210 Title: Re: قصص من الدنيا؛ وبعض حكاوي... Author: محمد عبد الله الحسين Date: 10-30-2023, 05:04 AM Parent: #209
جمال الحكي في بساطة الأسلوب ..وعبقرية الحكي في التقاط دقائق الحياة وفي توثيق اللحظات التي تنبض بالمشاعر وبحب الحياة والناس.. صباح الخير يا صديق الصباح...يا جميل.
Post: #211 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-30-2023, 05:57 PM Parent: #210
Quote: جمال الحكي في بساطة الأسلوب ..وعبقرية الحكي في التقاط دقائق الحياة وفي توثيق اللحظات التي تنبض بالمشاعر وبحب الحياة والناس.. صباح الخير يا صديق الصباح...يا جميل.
فكرتي يا دكتور محمد هو المواصلة في هذا الخيط، كما يقول المثقفون العابرون.. اذن فكرتي لو قرأ قاري واحد وحصل له فرق، لجهة المتعة او الفرحة او النشوة او السعادة وتلك كلها انفعالات ايجابية يصنعها الحرف، ويبثها، ويقيم عليها الحب.. اذن سعادتي مضاعفة بوجود زميل في قامتك واستقامتك.. فهنيئا لي وللخيط بك.. ومعاك ذلکم القاري الصامت الحبيب، الذي قد يعوزه المود او الباصوورد ليعبر، ونقول له رسالتك وصلت.. وشكرا لوجودك وتفاعلك هنا..
Post: #212 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 10-31-2023, 05:56 AM Parent: #211
Quote: رمضانيات-21
بابكرمحمد؛ ودا صاحبن لينا في ها الاسافير، رجل طيب وعلى نياته، قلبه الابيض؛ ولسانه الخفيف؛ وكيبوردو علي الهبشة .... دخل هذه الاسافيرقبل سبع سنوات تقريبا؛ ويتحاوم في المنتديات وقتا طويلا؛ يتناسب مع كون عمله شبه خاص؛ وعزابي كمان؛ المهم الرجل يبحث ان يكون رقما في عالم الاسافير؛ والحق فهو مجتهد؛ حتى انه احيانا يغرق المنتديات بكلام خارم بارم؛ من شدة اجتهاده؛ ومحاولاته ليصير رقما .... لكن ليس كل الامنيات سهلة الادراك؛ فهو يحاول، ويحاول، وفي اعتقاد كثر انه كمن يحرث في البحر، ان تصير رقما يُشار اليه، اتفاقا او اختلافا لا يضير، لكن رقما لا يمكن تجاوزه، المسالة دي تحتاج موهبة، ومزيدا من العرق .... صاحبنا فايتة عليهو هذه البديهية، فهوسريع التأثر بابسط الكتاب، وليس لديه فكرة مركزية يدافع عنها، فهو يقرأ كلاما لشيوعي فهو شيوعي؛ وبكرة كوز، وبعدو ليبرالي، وعادي ممكن يكون اخضر، وبنفسجي، وخاتف لونين .... وليس في لغته التي يكتب بها بصمة، فلا تعرف ان كان يكتب بالدارجي ولّ الفصيح، دارجيهو خفيف، وفصيحه لفيف، غايتو، مرات مرات الزول دا بحنني، وكثيرا ما قاعد افقع مرارتي، لكن في جميع الاحوال .....
راحت عليهو، .................................
Post: #213 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-01-2023, 04:14 PM Parent: #212
Quote: صلاح بن البادية كان فناني المفضل لحدت ما مشيت الجامعة بعدين اتفلهمت،( وبالمناسبة صلاح دا فنان جون قرنق المفضل..) وادمنت مصطفى وحفظت تقريبا معظم اغنياته، وتاني رجعت اسمع سيد خليفة وترباس..وفي القعدات كنا نبدا بمصطفي ووردي.. وبعد الزيادة بنقلب النور الجيلاني صحو الذكرى المنسية لا لا والذكرى بتصبح ابدية.. وياريت ياريت.. ويا جنا الوزين عام عام وانفدع يا بتنا ونغني ياغزال الحي يا غزال يا غزال متين لبست التوب متين كبرت عليْ
Post: #214 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-03-2023, 07:07 AM Parent: #213
Quote: Mutasim من وحي القعدات صاحبنا المتيم بزميلته، وكثيرا ما يحكي عنها، بل كل حكاويه عنها، يوم جاء ببدلة جديدة وسالني؟ اخوك كيف بالله؟ ما مقنع؟ انا: مقنع جدا يا زميل لكن البقنع الديك شنو؟ هههههها الليلة ديك غايتو كلها يضحك.... مرة في قعدة سال واحد عن البت الجميلة البتقرا في اداب دي من وين في بحري اجاب واحد: شمبات انا: والله متوغلة، القمر صاحبنا ضحك ضحك شديد من كلمة متوغلة دي ومشى سوق السكة اشترى لي شبشب جميل زي شبشبو الذي اشدت به قبيل التوغل بهنيهة جزلة.. ...
Post: #215 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-04-2023, 11:07 AM Parent: #214
Quote: رمضانيات-22 أُمي عليها سلام مرتبطة بغنما شديد؛ وبتحبهن؛ ولما كنت بجي الاجازات من مصر.. دوما تتبرع لي بعنبلوك رُخُصْ كرامة وسلامة.. مرة مريم اختي بتها الكبيرة قعدت معاها فترة؛ وولدا الكبير علي متربي مع حبوبتو.. مريم ماشة لبيتا؛ امي اهدتا غنماية لاولادا تساعدم في لبن الشاي؛ وعلي قال ماشي مع امو يومين تلاتة.. ومريم ذاتا خامَّة الغنماية وعلي وماشا.. الغنماية تكورك ساهي من الم الفراق، وامي خلاص اتوترت المهم بعد مريم ما مشت امي ظلت ساعات ساكتة وصابرة ... سالت عبدالدايم الحاجة دي مالا زي الزعلانة كدة؟ رد دومة الحكيم: الحاجة العليها شوية؛ بتها البتريدا وولدا البتريدو وغنمايتا البتريدة.. 😂😂😂
Post: #216 Title: Re: قصص من الدنيا؛ وبعض حكاوي... Author: محمد عبد الله الحسين Date: 11-04-2023, 12:33 PM Parent: #215
لله درُّكَ يا عبدالمنعم..
متابع متاوقة ..و أقرأ بشوق.. وأستعيد باستمتاع...
هكيف لا وما تحكيه ذه هي حياتنا الماضية في زمنا حلو و في ناسا بركة نساء ورجال.
تحياتي وودي
Post: #217 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-06-2023, 08:33 PM Parent: #216
Quote: (الحزن) الليلة - مطر الدم ، رعاف يهدر فى الفم صخاب ظهر أبى ، وخصيب رحم الأم ، فلنشعل نار "الاحزان" اذن ، ونوقد جمر النم نم.. ولنعرض ببنادقنا وسط الأصوات.. غاب الاستاذ والسياسي، والشاعر والقانوني الضليع الاستاذ كمال الجزولي.. يوم من ايام الاحزان الكبيرة كيوم غياب جون قرنق وردي نقد مصطفى سيد احمد حميد محجوب شريف التجاني الطيب.. غاب في وقت اكتر ما نكون حوجة له.. ولكنها الاقدار..
Post: #218 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-06-2023, 08:34 PM Parent: #216
Post: #219 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-07-2023, 09:28 PM Parent: #218
Quote: فريقنا فريق الشعلة في حلتنا واوسي الشيخ عبدالقادر، كنت اداري بالفريق دفعتي والاكبر مني لاعبين، كنت اداري،، اعتقد انها ترضية لحضرتي، لا بد انني لم اكن ماهرا في اللعب، فرشحوني اداري نائب الرئيس.. الرئيس هو الاخ العزيز علي الامين الزين له كل التحايا الرياضي المطبوع.. المهم فريقنا الشعلة لاعب مباراة نهائية في استاد التحرير وحاضرا الصادق المهدي زاتو.. ولاهمية المباراة، مشينا للفكي وقال حايمشي معانا عديل ويحضر المباراة ويقعد خلف قونا واي كورة تجي قبل ما تدخل قونا بلفها.. اوت.. مشى الفكي معانا وركب مقعد امامي، واتخذ موقعه خلف قونا باختصار المحس كترانج ادتنا 3 مقابل صفر .. فكي اوانطة .. وانا زاتي وقتها ما كنت مثقف زي هسا 😂😂
Post: #220 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-08-2023, 06:13 PM Parent: #219
Quote: يا سلام حبيبنا اضفت للبوست علما وطعما ورائحة .. الفحم دا طعامو وشرابو نكهتم غير.. البوتجازات والنارات الصناعية دي جهجهت باكات المشاريب ونكهات الاكل عموما.. والكلام على النفس،.امي تتحرك بهدوء في صباحاتنا الندية.. حتى لا توقظ احدا باكرا.. وكلما قرب الشاي يمرق الكركبة بتزيد ولعلها لا تهتم، ولعلها تريد ان توقظ اسرتها ون تايم.. وكانت عشة اختي الكبيرة ايام المدارس تصحيني بعبارة واحدة لا تزيد: قوم يالضوء الشمش بقت في نص السماء.. وطبعا باقي الشمش فيها اتروش والبس واشرب الشاي واخد مصاريف الفطور واحصل الطابور الصباحي في الجيلي المتوسطة حوالي 8 كلم من بيتنا.. توقيت عجيب.. المهم عشوشة الرشوشة التي ربتنا (بالقُشْقُش) كما يقول عبدالوهاب اخوها.. انها تربي الان الاحفاد يا لها من امينة،، وركيزة بيتنا.. والضوء من مضوي (اسمي الاصلي) في اولى ابتدائي اكتشفت انو عندي اسم تاني عبدالمنعم، مضوي لاحقا ان تحولت للضو (الضو الما قالولوا سو) عندما تشكرعشوشة اخوها الليهو انا،،
Post: #221 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-09-2023, 04:36 PM Parent: #220
Quote: قبل اسبوع في مباراة في اكاديمية امل السودان مع اكاديمية سودانية تانية انا كنت حضور ومشجع عشان ماي صن بلعب في امل السودان الاكاديمية التانية الحكم كان منهم، فجاة يناادي واحد يحكم وطلع مدرب،، جاري مع الكورة من القون للقون.. المهم بعد شوية طلع راس الحربة من فريقو ونزل يلعب جوة الميدان..😂😂 .. في رابطة واوسي الحكم من قرية فريقو لاعب ضد فريق تاني في الرابطة.. والجماهير غفيرة.. فريق الحكم جاب قون .. الحكم في الميدان يصفر ويرقص امكن 5 دقائق.. هييا ياحكم خليك محايد شوية.. 😂😂
Post: #222 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-11-2023, 04:14 PM Parent: #221
Quote: رمضانيات-23 بيت وهبة اخوي؛ جزء من البيت الكبير ويقع في الناحية الجنوبية الغربية من حوشنا الوسيع... (وحوشي يقع في الناحية الشمالية الشرقية التقاء الحوشان في زاوية راسية؛ عملنا فيها نفاج بباب كبير يدخل العربية...وباب عبدالوهاب الرئيسي على الشارع مدخلي؛) وهبة موصل الكهرباء باسلاك ميتانة كدة؛ ولاف محل وصل الاسلاك بكيس نايلون كما يفعل السودانيون بدلا عن الشريط الكهربائي البلاك داك المعد لهذا الغرض..والاسلاك دي تمر عبر الزريبة الفيها غنم امي لتصل لاول غرفة في بيت وهبة.. قوم يا السلك انقطع؛ ويصل جزء منه المتصل بالكهربا ارض الزريبة والغنماية تتحكحك؛ ضربتا كهرباء.. وقعدت تصدر اصواتا وترتجف... انتشر الخبر انو الغنماية مصابة؛ وتحركت لجنة الانقاذ بقيادة عشة وبخيتة وعبدالوهاب؛ وانا حاضر.. الغنماية تقْنِت، وباقي الغنمايات زعلانات؛ امي جاءت شافت اعز غنماية تتأوَّه؛ ورجعت سريعا راكوبتا وقعدت على طرف العنقريب وبها قلقٌ؛ عشة وبخبتة يشممن في الغنماية البصل؛ ويوكلنها في الليمون وخلطن عجين بملح وحارسات الغنماية ومازالت ترجف.. مشيت لامي: - يا حاجة الغنماية دي بردانة ما عندك بطانية نغتيها بيها؛ امي: - الغنماية ياجنا تتلصق بين أبْرَيا والتِرَية البطانية انا لي رقبتي ما لقيتا اتغتا بيها.. وبطانية شنو كمان البغتو بيها غنماية في نص الزريبة؛ 😂😂😂 بعد شوية الغنماية قامت تحوم وبقت كويسة؛ عطفا على النكتة الشهيرة قلت للحاجة: الليلة حا نشرب شاي المغرب بلبن بدرة 😂😂
Post: #223 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-13-2023, 06:28 AM Parent: #222
Quote: هبطتُ الرياضَ، في خواتيم الالفية الثانية، عقابيلها، وقد أزِفت.. مثلي مثل ملايين السودانيين الذين ضاقت بهم بلاد النيل والخير، ولكن ذلك موضوع آخر.. سرعان ما اكتشفت ان الرياض مدينة افقية.. تتمدد عمقاً وحوافاً، تتربع هنيئة وتستطيل طويلاً.. تيقنت سريعا، ان السيارة اصيلة في العمل وحتمية في الحركة، وليست ترفاً.. شرعت مباشرةً في التعلم، ودخلت مدرسة القيادة، القيادة الرشيدة.. شهر كامل كانت الفترة المقررة لي لاستلام الرخصة.. سرعان ما دعاني المعلم للاختبار النهائي بعد اسبوعين، ربما اقتنع كوني خلاص سواق ، نجحت طوالي.. واستلمت رخصتي المي خمج.. وكانت مدتها خمس سنوات، وكنت متيقن اني لن اجددها، خمس سنوات طويلة وكافية في تقديري وقتها، ولكني جددتها مرات ومرات..وبرضو دا موضوع آخر.. واشتريت كرسيدا بيضاء فخيمة موديل ٨٢، اشرف على تدريبي عمليا في الشوارع احد الاصدقاء، علمني ان اركز كل ٤ ثواني بالمرايا على السيارات التي خلفي، ظللت بالاسابيع منهمك ومنهك، في متابعة السيارات التي تسير خلفي، ولكني على كل حال تشجعت وامتلكت ناصية الطريق، وفي طريقي ان اصبح سواقا محترفاً، اكتشفت ان لا داعي على الاطلاق لمراقبة السيارات خلفي، ومفروض ارمي قدام بس،، اركز امامي، وقبل الشروع في تنفيذ فكرتي الجديدة، سالت للاطمئنان احد غلاة السواقين، قالي لي فيما معناه: لا تنظر للسيارات التي خلفك نهائيا، ركز قدامك،، ولا تنظر في المرايات الجانبية على الاطلاق، الا في حالة تؤد ان تلف شمال ترمي الاشارة شمال وتنظر في المراية اليسار، وتلف بعد التاكد من ان شمالك لك، لا سيارة في الافق القريب، وكذا اليمين، يلا بكتب الكلام دا للمتعلمين الجدد، ولكل من يطيل النظر في مراية الوسط واليمين واليسار بلا داع، قدام بس.. #درب_السلامة
Post: #224 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-14-2023, 09:52 PM Parent: #223
Quote: الناس ديل التلاتة ديل ناس مش محترمة، الزول المحترم ما بعمل عمايلم دي ولو مُبتلى بقطعا في مصارينو وما بحكيها لصديق العمر حتى، ولو براهم .. واكتر زول مهتم بالحاجات زي دي ويتكلم عنها كتير.. فهو الاكتر كذباً، ووهما.. ونقصا .. كيف ترجع بعدالكلام دا تتعامل مع اسرتك ومجتمعك الصغير.. .. اكاذيب مبالغة خاصة بتاعة العربية فل البشتريها ابوي لمقاضي البيت قبل الخريف.. وقبل كدة قال اشتغل طلبة في الاجازات والله كلنا اشتغلنا طلبة لما قربنا نبقى اسطوات،، عديل.. معلمين.. بس اولاد الحلة العندهم عربات ومونة سنة النصيحة ما بشتغلوا مونة. .. المهم، لم اقتنع بالتلاتة يوما كسياسيين، ولكن كنت احترم خياراتهم.. الان لم اعد احترم اي واحد فيهم كانسان وكبني ادم.. بل اعتبرهم مشوهين كليا وبعض حطام
Post: #225 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-16-2023, 09:23 AM Parent: #224
Quote: رمضانيات-24 * رغم المرارات والموت المجاني وقيام حرب في مدينة بها ربع سكان الوطن.. ولكنها رغم الجراحات هي نهاية الجنجويد والكيزان كليها وسينتصر الشعب.. الزموا بيوتكم؛ حتى تنقشع الازمة.. وتنتهي الماساة..
(ونحن بنكره الحرابة ونحن بنحب السلام.. الله قال الناس تعبش ما قال البنوك املوها عيش) كما قال حبيبنا بدرالدين هسا العيش بقى دهب * زمان زميلنا البعثي معانا في الجامعة في ندوة اي طالب يسالو سؤال يقول ليهو موجود الرد في كتب معاي في الشقة .. طالب قاليهو غايتو عشان نعرف راي حزب البعث دا الا نجي نسكن معاك في الشقة بتاعك دي هههههها • كنا نلعب كوتشينة في غرفة ابوي في رمضان وكان يتقلب ساهي وما ينوم بعد شوية يلملم في فردتو ومخدتو وسبحتو ماشي غرفة تانية عبدالحميد Abo Zahid -عم الطيب ما ريحناك.. ابوي - والله الراحة قبلكم في السماء مافي هههه
Post: #226 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-17-2023, 10:44 PM Parent: #225
Quote: معظم اصحاب الشهادات الكرتونية معطلين، او عطلتهم الكرتونة من اي انفتاح، او اطلاع، او اعمال للعقل، فهم يعتقدون انهم بحصولهم على الكرتونة دي قد بلغوا قمة العلم والفهم والموضوعية.. رجل الشارع العادي بدون شهادات حتى، اكتر تواضعا وفهما وانسانية.. الكرتونة لدى معظمهم، تعني الدخول لمنطقة التشوه والاعتداد الكاذب.. والخمول الفكري والذهني.. وقد طلقوا القراءة والاطلاع كما قال الدكتور حيدر ابراهيم منذ مفارقتهم مقاعد الدراسة، وطفقوا للاغتراب وبيت وعربية والبيضاء وشعرا طوال.. ياله من زيف.. ويا لهم من زائفون.
Post: #227 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-19-2023, 05:29 PM Parent: #226
Quote: دالفنان حافظ عبدالرحمن موسوعة عديل في علوم الموسيقى والفن.. سمعت له سهرات في التلفزيون.. حديثه منساب كموسيقاه.. له الرحمة بقدر ما دوزن وهذب وشذب احاسيسنا وشعبنا بالابداع الموسيقي .. انه اب القيثارة والموسيقى الجزلة
Post: #228 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-19-2023, 05:37 PM Parent: #227
الفنان الموسيقار العظيم حافظ عبدالرحمن..
Post: #229 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-20-2023, 09:07 PM Parent: #228
Quote: ان تتزوج في قرى السودان، معاها تنجب في نفس السنة.. لو تاخرت ساعة، تبدا الاسئلة من المحبين، والاشفاق من العاديين، والشماتة من الحمقى، ساعة بس يا باشا.. البنات سألن عروسة من حلة مجاورة تزوجت من جارهن، عقب عودتها من شهر التعسيلة مباشرة، سألنها؟ عما اذا كانت قد حملت حسمتهن: افترضن اني حملت في الاسبوع دا، اعرف كيف.. مرة كبارية قالت لعروسة حاولي احملي سريع، الحمل دا لو ما حصل اول تاني ما بحصل، أٌحبطت العروس وكلمت امها، التي اوضحت لها ان خالتك دي بالذات حملت بعد عشرة سنوات من عقم مؤقت، وانجبت عشرة اطفال... .. بت شفتة معرفة، عرست وكان متبقي على سفر زوجها ٥ أيام فقط.. يقال انها اتعالجت من الالتهابات مبكرة، قبل الدخول مشت للدكتور، وحملت في الاربعة ايام دي.. وقد كانت حكيمة زوجها سافر للهفوف، ولم يرجع الا والولد في المدرسة،
Post: #230 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-21-2023, 09:04 PM Parent: #229
Quote: رمضانيات-25 رغم الجراحات رغم الاسى والاحزان على فقد سودانيين وسودانيات اعزاء وكرام ودمهم حرام.. تستمر الحياة.. والعسكر للسكنات والجنجويد (ينبل) ... كانت السفرة في داخلية الجيلي الثانوية رحيبة ومتنوعة ولذيذة شاي الصباح وفطور بعدس او فول وغداء بطبيخ ومرات لحم محمر عديل كدة؛ وفواكه والعشاء زي الفطور..المهم كانت الاشياء معدن؛ الداخلية اصلا كانت مخصصة لطلاب مديرية الخرطوم وريفها البعيد طلاب السبلوقة حتى تخوم شندي العزيزة التي بها بنات جعل.. وغرب النيل من الجزيرة اسلانج جنوبا حتى الوادي الاخضر والكوداب شمالا قريبا من المتمة.. ومن شرق النيل الشيخ مصطفى اللمين والفادنية حتى البطانة في ابودليق وابزليق.. وحتى جبل اولياء شرق النيل ديم البساطاب والحلة الجديدة وغرب الجبل حتى ايد الحد والسليمانية كل هذه المناطق مشينا ليها زيارات وهيتنا وبيتنا فيها وضربنا الذبائح ولكن ذلك موضوع اخر.. واصلا انا مفروض ما اسكن في الداخلية فهي غير متاحة لابناء المنطقة فقد درسنا المتوسطة بالجيلي ونحن اصغر عمراً وهي ابعد بالمناسبة من الثانوية القريبة من الزلط الرئيسي.. اما وقد استخدمت (شفتنتي) وعلاقتي القوية مع استاذ الكيمياء صديقي المرحوم معتصم احمد علي معتصم كيمياء وكان مشرفا على داخلية السوباط فاعطاني الفرصة وجبتا عنقريبي ولحاف وملاية ومخدة واحتليت مكانا وسطا بين عشرة سراير في كل جانب العنبر به 20 سريراً ومعنا الواك اكوج الذي درس معنا لاحقا في مصر.. يفتح الرادي بتاعو بصوت عالي -يا الواك وطي الصوت شوية عاوزين ننوم؛ -في ناس عاوز تسمع انا اودي خدمة واللمش عاوز يسد اضان بتاعو ههههههها السفرة بها 10 طلاب كل واحد عندو عيشة في الوجبة.. وسفرتنا بها طالب زايد؛ فهنالك 10 عيشات مقابل 11 طالب؛ وكل واحد قدامو عيشة واحدة والحدشراوي الجانا متاخر دا ما عندو عيشة بحاول يمشي قرمة من هنا وقرمة من التاني وانا كزول سنستف مشيت طوالي؛ لمشرف السفرة واجيب عيشة زيادة واكلمو بالقصة وانو يخت في السفرة ديك 11 عيشة ولكنه ينسى في الوجبة البعدا ويعود صاحبنا ولا يجد خبز زيادة فاقترحت لناس السفرة انو نعمل فتة ونفرق دم رغيفتي ورغيفتك على الكل وناكل بمتعة وراحة خلاص سفرتنا بقت مشهورة بالفتة كل وجباتنا فتة فمسوني الشباب منعم فتة هههها ... وكنا مرات نمشي نشرب شاي المغرب في بيتنا ونلحق العشاء في الداخلية... طلاب مصر شايفم بشكوا من فقر الوجبات التي بها فول وعدس وبيض وزبادي وفواكه انا كنت شايف الوجبات دي كويسة جدا ههههها امي تخت لي اكلات على جنب وتقول ولدي دا اكل برة ما بنفع معاه حتى لو مناسبة بجي البيت افتش ان شاء لقمة خلف صاحبي وناقش الفلم نكون بناكل في مناسبة يشوفني راخي - يازول هو اكل اشبع ساهي الليلة الحاجة ما مخلية اي حاجة على جمب اوعى من المقلب هههههههههههههههها
Post: #231 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-22-2023, 10:08 PM Parent: #230
Quote: رمضانيات-26
رغم المحن والإحن والجراحات الإتقَيَّحَن وموت ناس عزاز دمهم غالي وحرام وسحن سحن ولكنا نظل كما الاسفنجية نمتص الاهات ولا نُقهر العسكر للثكنات والجنجويد ينبل .... في اولى ابتدائي اعطاني استاذي حسن عبدالرحيم امد الله في ايامه اعطاني ممتاز كبيرة في كتابة حرف الالف.. وبكرة اعطاني ممتاز اصغر في كتابة حرف الباء لاني عملت سن للحرف في نهايته؛ وبدا وكانه حرف النون.. وكلمني بسبب الممتاز الصغير واشار لي ان اكتب الحرف كما فعل جاري جلال الدين حسن محمد الذي ظللنا نقعد في كنبة واحدة حتى ساتة؛ وتاني اصبح الاستاذ حسن يصحح لي بممتاز كبير حتى نهاية اولى ليلاقيني لاحقا في ساتة؛ واذكر مشينا عصر يوم؛ وكان شتل البصل عند الاستاذ حسن.. وشتلت 4 احواض واعطاني الاستاذ 6 قروش فقد كان الحوض بقرش ونصف واذكر ان استاذي المبجل جاء في الفصل صباحا واعلن عدد الاحواض والمبلغ وقد سعدت سعادة ما بعدها.. ومرة سال الاستاذ حسن عن من يعرف حرف اسمه القاف وكان جوابي: انه زي الفاء ولكن فيهو نقطتين.. واذكر ان استاذي شعر بسعادة بالغة وقد سالني من الذي علمك الحروف والارقام فقلت عبدالوهاب اخوي مع انه للحقيقة والتاريخ والذكرى فان اختي عشة بشيري هي التي علمتني الحروف وكتابتها والارقام وكتابة بعد الحاجات الساهلة زي اب وام واخ واسمي ولا ادري سببا جعلني لا اذكر معلمتي الحقيقية التي ربتنا لاحقا (بالقُشْقُشْ) كما علق وهبة دا زاته ذات مساء وونسة.. اعتذار كبير ومتاخر لعشوشة الرشوشة وكل الحب لها ولوهبة وكل الاحترام لاستاذي الجليل حسن عبدالرحيم عثمان..
Post: #232 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-25-2023, 10:33 AM Parent: #231
Quote: ... قال ابوي بعد شاكوش يصف ست الشاكوش : يا ام شركا هبر تب قمَٓح القجاج انتي مدينة بس واللاخرات حُجاج .. وقال في نفس الشاكوش ولسته: ما يستاهلك العريبي راعي الضان يستاهلك برنجي حريف جيبو ملان ركب عربتو بوووو ادلى في ام درمان .. وقال يصف حاله بعد الشاكوش: بام (صعيب)' تراني احوم ومتحزم علي بطني وبقيت موهوم بخيت السجلك واخد عليك رسوم وبعد الحالة دي لي ريدة مافي لزوم .. في لزوم يا جماعة يسال اهل مجلسه فيرد المجلس: مافي لزوم مافي لزوم .. '(ام صعيب)=اسم قديم لحلتنا
Post: #233 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-26-2023, 08:07 PM Parent: #232
Quote: - عين السِيد بِتْزيد - (اشارة عبدالدايم اخوي في اخريات الإجازة، عن حال شديراتي المسميهن انا حديقة، في بيتي الكائن بواوسي الشيخ عبدالقادر،) وقد راى ان الليمونات، وقد زادت اخضرارا وليمونن، والسَمَرة والسيالة خضرا وميالا.. والسدرة سدرت، والقرض حتا.. حتى النيمات وقد تكاثف ظلها.. والقمريات وودابرق، ومرتو.. الطير كله استكان وبنى اعشاشا، وقد وزع له محمد وفاطنة الموية هنا وهناك.. واصلا الجدول طوالي ماشي، حرفيا معظم الإجازة بكون قاعد تحت الشديرات ديل.. عنقريبي الهبابي، وجوالي والشبكة تحت الشدر فل اوبشن.. وكم كرسي وكتبي وجرائدي.. ومرات اغفو.. بي شوق عظيم لتلك الأنحاء
Post: #234 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-27-2023, 08:50 PM Parent: #233
صورة لمزرعتي السعيدة في بيتي في حلتنا
Post: #235 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 11-30-2023, 07:04 AM Parent: #234
Quote: والله يا منعم نجاة دي ملالة بس احياااا انا.. عبدالرحمن دا كب.. محمد على دا اطيب زول الخالة نفيسة دي فسلة شديد.. وعمر خواف.. ديل كلهم ناس من حلة صديقي منتصر القابلتو هنا في الغربة..منتصر يتحدث معي وكأني بعرف الناس ديل، وكاني من حلتم التي لم اراها ولم اسمع بها الا عندما التقينا هنا على ضفة الصحراء.. في الاول استغربت، لاحقا مشيت ولما كانت تجيهوا خطابات،، كنت بسالو عن بعض الناس والتطورات، لاحقا جدا كان يمرر لي الخطابات، وامرر ليهو خطاباتي.. .... وظل يونسني هنا على مدى السنين عن ناس حلتم، وبقيت احب البحبهم واكره البكرهم، وعموما هو بكره معظم ناس حلتم والحلال المجاورة...😂😂😂 .. كلو زي دا . المهم
سف وقارن كما يقول صاحبنا عبدالله ود البوش .. البوست دا مهداه لودالبوش، الذي غادر بيته في جبرة،، واستقر في بيته الجميل في غرب الجزيرة صقيعة سلامة . كل الحب للحلوين هناك وبرضو مهداه للصديق العزيز عبيد حسب الرسول الشيخ في قرية بريبيرة ريفي المناقل
Post: #236 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 12-12-2023, 08:43 PM Parent: #235
Quote: محمد الفكي اول قحاتي يختها واضحة، والغريبة قالها في وقت انحسار جنجويده واقتراب النهايات، ولكنها الضغوط والعمالة.. ... ياخ منقة دا غبي، وشكلو قابض على تقيل.. اصلا الدعم ما فضل فيهو حاجة والشعب وجيش الشعب مصر على دفن اخر جنجويدي في الخرطوم.. كنا ممكن نقول كلام كاسات هههههها لكن منقاوي دا شكلو ما راجل كاسات.. دا النوع داك البكون كل القعدة كارهاهوا رغم انو بشرب ربع كاس، وبدفق كاس، وبفط كم كاس.... اول واحد يشعشع بطردو.. وبعد ما تشعشع كل القعدة بتفتش عليهو فيهم ناس عنيفين ونقط نقط.. ولما يكتشفوا الطردة يشكروا الطارد الاول وتستعدل جلسة الانس.. سمعنا -وسلمنا- في ناس قالوا بطبخ للقعدات وبتخارج بدري😂😂 يكفي ان صديقه وخليله المراهق جعفر سفارات داك.. المهم #منقة_انتهىه
Post: #237 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 12-15-2023, 11:27 PM Parent: #236
Quote: لها الرحمة والمغفرة ولكم الصبر الجميل ان الحزن على الام يا علي يصحبي يستمر طويلا وابديا وسرمديا.. لقد غابت امي منذ نحو 18 عاما.. ما زلت حتى كتابة هذه الكلمات ابكيها سرا وعلانية.. افتقدها في الملمات العصيبة وما اكثرها.. وعندما اكون وحيدا سائقا في شوارع الرياض السريعة، تاتيني ذكراها وذكرياتها وتتهيج جواي المصيبة والغياب، وسرعان مع تنساب الدموع.. ابكيها وارتاح قليلا . وفي كل مساء احكي لها واسمع منها ذات الحكايات والتعليقات والنكات. اسمعها كل ليلة، اسمعها، واضحك في حزني وانتشي.. امك هي امنا كلنا يا علي ..
Post: #238 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 12-19-2023, 06:01 AM Parent: #237
Quote: الصورة الرمزية عبدالمنعم الطيب حسن
تاريخ التسجيل: Jul 2010
رقم العضوية : 2307
الدولة : الرياض السعودية
المشاركات : 5,066 افتراضي احمد اخوي،،،الرحيل المر،، تاني قام واحد جميل من اخواني مات، ....... يا منايا حومّي حول الحمى واستعرضينا واصطفي كل ّ سمح النفس بسّام العشيات الوفي الحليم َ العف كالأنسام روحًا وسجايا ...... غادرنا قبل ساعات احمد اخوي الوسيم الفهيم، البقسم العدم، البشيل فوق الدبر والدم، ،،،، فقدنا في ظرف شهر رحمة احمد الطيب الشيخ بشيري واخوها محمد احمد الطيب ود بشيري، ومحمود اخوي واليوم احمد اخوي وما نقول الا ما يرضي الرب، وان لفراقكم لمحزنون وانّ لفراقك يا احمد الطيب لمحزنون،، ،،،،، قام الكي اجدد تاني وهو لم يبر بعد، .. مكتوب قديم شوية، ان اصلا بغذي البوست دا هنا من بوست انشط من حلة تانية تحياتي
Post: #239 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 12-22-2023, 12:26 PM Parent: #238
من زمان بطي في حكاية الحلاقة دي، حتى انني دوما اقرب للشعر الكثيف منه للمشذب... لاقتل الانتظار -في محل الحلاق- جبتا عصير ليمونادا، حلاقي المصري في الرياض قالي يا استاذ عبدالمنعم انت عندك ضغط، هجمني!!!! قال: عشان بتشرب ليمون، وافقت كدة على كلامو، واشدت بعقليته فصدق وانبسط؛ وانتفخ قائلا: انو عقليتو كبيرة تساوي عقلية دكتور واتنين مهندسين، دي كانت المرة الاخيرة.. احلق عندو، معقولا، عقلية اكبر من عقلية دكتور واتنين مهندسين.. 🤣🤣🤣 .. القصة قديمة، ولكن الصورة حديثة، ..
Post: #240 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 12-29-2023, 08:04 AM Parent: #239
Quote: تسلم يا عمدة.. ساظل ارسل مداخلات في منبرنا سودانيات.. بل هو الوحيد الذي اكتب فيه بصورة راتبة.. ففيه تعرفت وصادقت اجمل واطيب والطف واكتب الناس.. وتعلمت منه ومنهم الكثير، وتعلمت تكنيك الكتابة وفنيات السرد.. وتطوير اللغة واتجاه سريانها لتخدم الفكرة وليس العكس.. اهتمامي بلغة قريبة للونسة العادية.. وفكرتي هي هزيمة المشافهة التي طالما اشتهرنا بها كسودانيين لصالح التدوين.. وكما قال العظيم محمد ابراهيم نقد ليست القراية هي ام دق ولكنها الكتابة.. فكرتي هى الونسة المكتوبة عن جيلنا عن واقعه احلامه واماله انتصاراته وانكساراته.. وواقع البلد الذي انتج هذا الجيل.. ومحطاتي هي واوسي حيث نشأت، ومصر حيث درست.. ونجد حيث اغتربت ما زلت.. وهي محطات كل جيلنا فواوسي هي القرير وهي اي بقعة في بلدنا.. ونجد هي العين وراس الخيمة وسان فرانسيسكو واليمن وليبيا واستراليا واي بقعة من اركان الارض الاربعة في الدياسبورا السودانية الواسعة التشتت والفرقة.. تشدنا نوستولجيا عظيمة لمراتع. صبانا وقد طال النوى وفي غربتنا الطويلة. في الجراب فكرة طويلة للكتابة عن هذه الوطن العظيم هنا السعودية التي هي بلاد طيبة واهلها قوم كرام.. وذلك موضوع يطول.. تسلم يا هندسة.. تسلم ابومحمد
Post: #243 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-18-2024, 05:21 AM Parent: #240
Quote: عمي الشيخ الاكبر في اسرتنا، عاش اكثر من مئة عام، وتوفي 1984.. حزنت عليه حزن السنين، وكان اول فقد عظيم احس بمرارته.. في طفولتي ياتي كل جمعة ليستانس مع اخيه الذي هو ابوي.. كنت استمتع بانسه وحكاويه وطيبته، وما حصل مرة ما اداني قرش او امقرشين او شلن او ريال .. وكنت اذهب لدكان عمنا الياسواشتري تمرا او فول مدمس، حلاوة حربة وحلاوة لكوم، او اذهب لحبوبتنا فاطنة بت علي القرم صديقة امي اشتري رغيفة.. كنت لا اكل الكسرة تمردت عليها باكرا.. وعندما اشتغلت والدتي بالتجارة، كانت لا ترجع من بحري والا معاها على الاقل رغيفة واحدة لولدها الاثير.. لم اتصالح مع الكسرة الا في غبيرة بالرياض في بداية الالفينات.. كانت دهشة عبدالدائم اخوي عظيمة، في اول وجبة في الاجازة، عندما رآني اكل الكسرة بمتعة.. وهو من اطلق كلمة تصالح بيني وبينها.. اما اعمامي رملي والشيخ ادريس واحمد فهؤلاء كانت غمتتهم اكبر، وكونهم ساكنين ام ضوا بان فانهم ياتون على فترات متباعدة قليلا، ابوي يحتفي بهم ايما احتفاء، وكنت استمتع بونستهم وحكاويهم وذكرياتهم مع اخوهم الذي هو ابوي.. اما ابوي فقد كان المستمتع الاكبر من الونسة دي، دوانا طبعا طفل( شفت) فقد كنت ارى محياه الجميل وقد كساه الطلق والبشارات، ورجع سمحا وسعيدا، واصغر سنا وشبابا ، هكذا تفعل الذكريات، فكان وكانه يرجع القهقهري لتلكم ايام الخريف والخضرة واللبن الشخيب، والبطانة السمحة وريانة.. ابوي عاش متنقلا بين البطانة من شرق وادي سوبا شرق ام ضوا بان.. ويتمددون في الفضاء الممتد حتى نواحي ابودليق فكنت تسمع في ونستهم ريرة والصفية وربوب، ورفاعة ابسن، وشعر اهل البطانة الحردلو والطيب ود ضحوية, وقد قال شعرا عن الخوة..في مناجاة مع بت اخوه الشيخ اختنا حننةقال: شوق حننة علي ما زعلوا في قول قالوشوق عمك علي الخوة ام فراقا حار.. اليوم اول مرة اتكلم مع عبدالوهاب اخوي منذ بدء الحرب، والله لو ما خفتا عليهو يتاثر (وهو الحساس) ويقول الزول دا في غربة كان ممكن ابكي عادي.. صحيح الخوة فراقا حار يارب تجمع شمل الاسر وقد تفرقت بها السبل....
Post: #244 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 01-20-2024, 05:17 PM Parent: #243
في سيرة الناس الطيبين وبُساط او عبيد حسب الرسول الشيخ،
اول عمل اشتغلتو بعد الاقامة كان مع عبيد دا كان ذلك في مطلع 1998، ومنذ ذلك التاريخ لم نفترق ابدا عملنا لسنين طويلة ذات العمل.. وكان عملنا ميدانيا في كل المملكة من تبوك في اقصى الشمال للطايف وفي وكل مدن المنطقة الشرقية، الخبر والدمام وعنك والقطيف والجبيل، وراس تنورة وحضرنا حفل في شاطي نصف القمر للفنان محمود عبدالعزيز.. وقربنا نعبر جسر الملك فهد وندخل البحرين ثم مشينا الطائف ومكة وجدة وفي كل مدينة مدة المشروع اقلاها شهر، ومعظم شغلنا في الرياض.. وسكنا سويا في كل تلك الاصقاع شقق مفروشة.ونرتاد المطاعم.. عبيد له خاصية عجيبة فهو يعرف كل الشوارع والمداخل والمواقع في كل تلك المدن.. وهو اشهر مغترب ركب قدام جوار السائق فقد كنت طوال تلك السنين انا السواق.. (حتى عندما اشترى عربية خاصة به، كنت انا السواق..ههههها) وعبيد مقعد امامي، وجاء والدته ووالدته هنا.. وقد سفرنا والده من الرياض لحدت مكة ومطار جدة استغرقت الرحلة اياما.. وقبلها كنت استانس مع عمنا المرحوم حسب الرسول بالساعات وهو في مقام ابوي وكان يضحكني دوما.. وخفة دم عبيد ورثها من والده اللطيف، خفيف القلب والروح.. كان عندنا مشروع مع صاحبنا هنا في الرياض وفي فترة المشروع توفى ولد صاحبنا البكر وحزنا عليه حزن السنين وهو صديقنا المشرك قلت لعبيد بعد فترة من الوفاة وانتهاء المشروع - يا اخوي قريشاتنا العند فلان ما منها خبر - اسكت يا زول قريشات شنو كمان نبقى عليهو اتنين، نحن والدنيا.. اعفي بس ولا تذكر الموضوع دا تاني وقد فعلت عبيد انسان نبيل.. نحن جيل واحد تخرجنا سويا من مصر وتعارفنا هنا هو حزب امة وانا يسار حزب الامة ذهب لارتيريا مقاتلا من مصر مع قوات الامة وعندما طُرح علينا للذهاب شرقا مع قوات مجد.. انا النصيحة اعتذرت، كانت الظروف صعبة تلكم الايام.. وقدّرت ان امي تحتاج للمصاريف شهريا.. لدواء الرطوبة والناقص من مصاريف الحياة اليومية، ومية ريال من السعودية تسعدها ايما سعادة.. وفعلا.. انا مشيت السعودية عمرة وعبيد مشى ارتيريا ولحق بنا بعد سنوات في السعودية.. طوال الربع قرن دا بيننا الاف الحكاوي والذكريات وحب بلا حدود, عبيد صديقي ومن القلائل الذين احبهم بلا تحفظ.. نختلف نتفق نتشاكل لساعات ونعود زي الاخوان.. عبيد الان في الجزيرة، وولده الشيخ على وشك الدخول للجامعة. .. ووشيهو ملان وقلبو كمان،
التوقيع: الثورة مستمرة و
Post: #247 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-13-2024, 12:49 PM Parent: #244
العم بحكي لاصحابو: والله ختت كراعي في مطار جدة صقعني اذان في اضاني دي، التقول وطيتو 😂😂
Post: #248 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-14-2024, 01:12 PM Parent: #247
Quote: وباعتباري معلم قديم، الف تحية لطلابي الاذكياء، من جبال مكة وهضابها حتى فيافي نجد الوضيئة، الذين طالما كنت معهم مجتهدا ومخلصا وصادقاً، هدفي الذاتي ان تصحبهم المعرفة كقيمة وكسلوك في متعرجات الحياة لاحقا.. انقطعت عن ممارسة المهنة لاحقا لسبب او آخر، ولكني ما زلت احن لذلك البريق الأخاذ المنبعث من وجه طالب وقد اكتسب معلومة جديدة تواً، وقد اكتسى محياه سمؤا وتواضعا ورفعة..
Post: #249 Title: Re: قصص من الدنيا؛ وبعض حكاوي... Author: عبدالمنعم الطيب حسن Date: 06-16-2024, 10:43 PM Parent: #248
Quote: كل سنة وانتم بالف صحة وسعادة وخير.. .... عبدالوهاب اخوي وعبدالحميد وهرول اصحاب اشتروا طحنية ملفوفة في جريدة، ومشوا الفرن جابوا رغيف سخن، ومشوا الخور ياكلوا في الرملة الساقطة، صاحبم جاء متاخر .. ادوهوا باقي رغيفة وعبدالوهاب مدا ليهو جريدة الطحنية قائلا: قَلِّعْ في الكتابة دي اتعشى 😂😂😂 ...
