Post: #1
Title: / وَ لَنا في خَلْقِ الألوانِ شُجونٌ/
Author: دفع الله ود الأصيل
Date: 11-19-2023, 11:47 AM
10:47 AM November, 19 2023 سودانيز اون لاين
دفع الله ود الأصيل-
مكتبتى
رابط مختصر
اللون الخمري و الجينز الظهري
نعترف يأنو ألواننا شوية جايطة زول أخدر
ليموني وكمان غنوا له .. زولي الاخدر و
( الأخضر ) الليموني و مشنق الطاقية
لامن يجو يصفو ليك يقولليك زول أخدراني طويل كده .
و زول أخدراني خدرة نااااعمة كده .كان ذلك دلالة جمال
في عصر ما قبل الفسخ و الجلخ ، واللعب اللصطناعي
لبنات التَّبِخ "لكن برضو كان عندنا زول أصفر و زول
أحمر ( الحمرة الواحدة اللباها ودتورشين خليفةالمهدي )
و زول أزرقاني و زول تاني أبيضاني ...ياخي شغل
صطنجية . مواصفاتنا في الجواز القديم الميلاد 01/01
و الطول 5 قدم و 6 بوصةلون الشعر أسود لون العيون
عسلية مع إنه كل غنانا في العيون السوداء
أهوى العيون السودة و أحب
سمار في خدودها
ود ال ح ي ش ا ن ال ت ل ا ت ة
رافع أذان على الفاضي في مالطا
|
Post: #2
Title: Re: / وَ لَنا في خَلْقِ الألوانِ شُجونٌ/
Author: دفع الله ود الأصيل
Date: 11-19-2023, 12:05 PM
Parent: #1
و اللون الأسمر قالوا خمري ...
اللون الخمري ده واحد ولا بختلف حسب ماركة الخمرة
هسي شن جاب عسلية دُّخُن على تبارة بي سورج فتريتة
على الويسكي أحمر شفايف بلاك ليبل رقم 7 القديم لجاك دانيال
على الجِن على القام زوت ، على الكابتن مورغان على جوني ووكر
على فودكا مصنوعة يدوياً صافية زي موية التبوب، على باكاردي
سوبريور روم ، على جراند مارنييه كوردون روج ليكيور
حيث تتعد الاسماء و الخندريسُ و احدٌ
ولا كيف يا ودالمير ؟؟
|
Post: #3
Title: Re: / وَ لَنا في خَلْقِ الألوانِ شُجونٌ/
Author: دفع الله ود الأصيل
Date: 11-19-2023, 04:28 PM
Parent: #2
+ الزول السمح و اللون القمح
و بالجد دي ماركة متوفرة سواءُ تايواني
أصلي كيف على صيني تقليد (ودا بفعل بوهيات
المهندس، تخليكدراين الواحدة سكيرت وشها و يديها
بلوزة، متل العريبة المسروقة ، يعني مرقت تتفسح في
حدايق إبريل ، و نزلت عليها مطرة أو أية عوامل تعرية
على حين غرة من صاحبها لامن يتلفت عليها يلقاها
ماهي ياهي و يقولليها: خلف الله جيب سفة)
+ عمومن اللون القمحي لذيذ وأقرب للحم الأبيض
المتوسط، و لكن اللون الأسود برضو أفتكر لا يُعيبه
شيء ما عارف بنتزاوغ منه لشنو، خسسن " لولا
اختلاف السلع لبارت" الأنظـــار و لكل فولــة
مخستكة كيانُ أعور..ما عدا كجراي حين قال :
يا قطعة ليل في لوحة
تتجسد أنثى زنجية
يا شهقة أعصابي الحيرى
يا لذعة نار قدسية
الباذنجان الأسود
في نهديك ثمار برية
و هذا على سبيل الغزل ....
|
Post: #4
Title: Re: / وَ لَنا في خَلْقِ الألوانِ شُجونٌ/
Author: دفع الله ود الأصيل
Date: 11-19-2023, 04:32 PM
Parent: #3
ثم شاعرنا القاضي الفلتة
الطيب محمد سعيد العباسي حين قال:
فلماذا أراك ثائرةً
و علام السِبَابُ يضطرد
والفراء الثمين منتفضٌ
كفؤادٍ يشقى به الجسدُ
أَلأَن السّواد يغمرني
ليس لي فيه يافتاة يد
و هذا على سبيل الاحتجاج .
|
Post: #5
Title: Re: / وَ لَنا في خَلْقِ الألوانِ شُجونٌ/
Author: دفع الله ود الأصيل
Date: 11-19-2023, 04:33 PM
Parent: #4
عمنا خليل فرح كتب و لحن و غنا :
صَبّـغْ الخـدين حُمرة
بعد ساعة بتشوف صفرة
(حربوية تتلون حسب البيئة)
الاصفـرار ده كتيـر
أخجلـوك يـا أميـر
ولّا نُمّــت نهـار.
+ أما هذه فربما جاءت على سبيل
المدح بما يُشيه الذمِّ
|
Post: #6
Title: Re: / وَ لَنا في خَلْقِ الألوانِ شُجونٌ/
Author: دفع الله ود الأصيل
Date: 11-19-2023, 07:39 PM
Parent: #5
و أرجعنا الاحمرار إلى الخجل فهل يكون
الاصفرار من نصيب نوم النهار و لا ما هل ؟؟!!
إذن الخد الزهري مقبول. .. لكن ما هو اللون الظهري
و الذي يطلق على اللون الأزرق إذا ما كان غامق أما إذا
كان فاتحا يقال عليه (لبني ) و اللبني زاتو مرات بكون لبني
فاتح و بما أن قمحي منسوبة للقمح، إذن اللبني منسوب إلى ا
للبن و لا موش كده ؟؟
+ و كمان عندنا من المستورد لون فوشي و لون بصلي
و لون بترولي و أقصى درجات الثقافة لون ( بيربل ) .ود
أخوي لينا مولود و متربي في بريطانيا فطر معانا فطور
رمضان في قرية من قرى الجزيرة و أكل معانا عصيدة ود
عكر بحكي لأبوه قال له : أكلنا عصيدة بس موش
زي بتاعت (يوما) حبوبة دي مختلفة لون
|
|