كفاية

04:07 AM November, 18 2023

سودانيز اون لاين
Hani Arabi Mohamed-كوكب الأرض
مكتبتى
رابط مختصر

صباح الخير
الوطن بيضيع من يدينا ...
وباستمرار الحرب ما هنلقى وطن نعيش فيه او نحكمه او نعارض فيه ...
الخسائر ماليها حد في الارواح والاخلاق والنسيج الاجتماعي والتعايش السلمي والبنية التحتية والاعيان المدنية والعسكرية وفي ممتلكات الدولة واملاك المواطنين ومنقولاتهم ...
ده ما وقت جدال وانتصارات ذاتية ...
_______
قبل سنوات في دولة عربية شباب سودانيين بياكلو في مطعم افريقي وبيتونسو يسبو للسودان ... جاهم الطباخ مارق بكمشتو قال ليهم انتو عارفين انكم بدون السودان ده ما عندكم قيمة؟ حافظو عليه واتكلمو عنو كويس ... واحد من الشباب طنطن يا عمك ما تقدنا طباخ وبتتفلسف. الطباخ سمعو ورجع طربيزة الكاشير فتح الدرج مرق منو شهادة وبطاقة شخصية قال ليهم عاينو ...
لقو مكتوب فيها اسمو وصورتو ومكان المهنة مكتوب وزير الدفاع.
عاينو فيه كده ... قال ليهم لمن الصومال انهارت شلت قروشي ومرقت مشيت سنغافورة وهناك نصبو علي شالو نصف قروشي منها تاني جربت كم دولة ونفس الفكرة وفي الاخر جيت هنا بباقي القروش اشتريت المطعم ده واشتغلت فيه براي .... زمان لمن كان في صومال كان عندي قيمة وكنت بقدر ارجع ليه معزز مكرم في اي لحظة ...
هسه انتو لسه عندكم سودان ... حافظو عليه واعرفو قيمتو وما تسبو ليه

الحرب الحالية هي استنزاف للسودان في انسانه واقتصاده وامكاناته ...
هي خطوة تمهد لما بعدها ...
الغزو المباشر واحتلال وطن جريح ومواطن منهك