لوفكرت تجى مصر اخت بلادى تذكر التالى

الحياة في مصر
انا مصطفي نور
باعتباري مقيم في مصر في اكتوبر خمسه سنوات مضت عاوزأوضح بعض المعلومات عسي ولعل تكون مفيدة للأسر في الوضع الراهن خاصة بعد ما أصبحت ملاذ امن للسودانيين نسبة لأوضاع البلد مؤخرا .. وكل الشكر لجكومه وشعب مصر التى فتحت لنا ابوابها وكانت للكثير مكان وواحه امن وامان
مصر ما بلد اغتراب ولا بلد هجرة و لكنها بلد بتعيش فيها بقروشك واظن المعلومة دي واضحة تماما للجميع ..
لذلك مهما كانت قروشك اللي جبتها معاك كتيرة لو ما ادرتها صح حتنتهي في لمح البصر ..
لابد من ترتيب الوضع المالي بدقة عشان الأسر تقدر تستقر فترة لحين هدوء الاحوال في السودان .. طبعا معروف انه في ناس كتار عندهم شقق في القاهرة وناس كتار عندهم اهل خارج مصر حيكفلوهم ..
لكن برضو ناس كتار جدا ما عندهم .، وناس كتار مع وجود شققهم الا انه فقدو مصادر دخلهم في السودان مع توقف العمل سواء كانت وظائف او أعمال حرة ..
حتي لو الحرب وقفت اليوم ، الأعمال حتحتاج شوية وقت عشان ترجع تشتغل .. فلابد من التدبير المالي حتي تنجلي الازمة ..
فحنقول كلام عام وكل زول يشيل منو المفيد
السكن: حاول بقدر الاماكن ان تسكن فى المدن التى تبعد من القاهره شويه مثال مدينه بدر - العاشر من رمضان - اكتوبر - العبور
وهناك فرق كبير جدا فى الاسعار بتاعت الايجار قد يكون الفرق الاف الجنيهات
مافى حاجه تخليك مرتبط بمكان معين لان فى كل مصر الخدمات متوفره وبكثره وكل ما طلعت بره القاهره كل ما كان كل ارخص الخضار الفواكه الايجار الدكاتره اى شى فيه فرق كبير
مثال الاسبوع الفات كنت فى مدينه بدر وجدت اخ اعرفه من مصر وهو رجل صديق محترم عندو 11 شقه مفروشه كل شقه ثلاث غرف وحمامين عايز فى كل العماره 40 الف جنيه يعنى الشقه يكن الايجار مفروش فى
حدود 3400 جنيه فى حين فى الفيصل الان الايجار مفروش ثلاث غرف وحمامين اقل شى الان بحوالى 10 الف جنيه شوفوا الفرق
وهناك الهدوء والهواء العليل وكل الخدمات والله متوفره
السكن المفروش حيستهلك قروشك تماما ،
افضل خيار هو الإيجار قانون جديد، يعني شقة فاضية والناس تفرشها بالبسيط وعلي مراحل ..
والناس ما تخجل لانو ده وضع طاريء ..
(تلاجة صغيرة + بوتاجاز ترابيزة + مراتب + شوية عدة للمطبخ .. )
الحاجات دي كده ممكن تقعد بيها سنة كاملة في امان ..
الاستهلاك المتوقع:
الإيجار: شهر ايجار وشهرين تأمين + سمسار = 15 الف كحد أقصي ( حسب المنطقة )
المشتروات: 15 الف
المجموع: 30 الف
انت كده حليت اكبر بند صرف حيواجهك واستقريت وتاني شهريا حتدفع مبلغ 4 الف مثلا ايجار بدل ما تدفع 10 او 15 الف في ايجار مفروش.
الارقام دي ممكن طبعا تكون أقل كتييييير جدا وفقا لي ال lifestyle وال budget والمنطقة السكنية لكن عامة النسبة محفوظة انه الإيجار الفاضي 30% من المفروش ..
الإنترنت:
طبعا اكيد حيكون في استهلاك متصل للانترنت اقله للمتابعة مع الاهل ، والاستخدامات المختلفة المعروفة ..
وكمان لاحقا ممكن عبره تلقي شغل اونلاين ،،
وهو هنا اهم من الغسالة والمكيف والسرير والعفش ..
إياك وانترنت الموبايل حياكل قروشك بأسرع مما تتصور
لذلك افضل حاجة تدخل انترنت ارضي WE واللي هو بي خط التلفون ، استهلاكه بسيط ولو عندك مكالمات خليها بيه عبر الواتسب والايمو وغيرهم ..
الاستهلاك المتوقع: 250 جنيه في الشهر
العلاج:
اتجول في المنطقة حولك واسأل من العيادات الملحقة بالمساجد ، العيادات دي ممتازة جدا وقروشها بسيطة وبتحل حاجات كتيرة زي علاج الأسنان ، العيون ، الفحوصات الدورية للضغط والسكري وغيرها ..
المعيشة:
مهما كان وضعكم ابعدوا من الدليفري والمطاعم وركزو علي شراء مواد اساسية للطبخ في البيت ، وفتشو حولكم عن أسواق خضار شعبية حتلاقوه بي اسعار رخيصة جدا ومعاه الفواكه كمان .،
التنقل:
الأفضل التنقل يكون بالمترو ، وتفادي التكاسي والاوبر تقليلا للتكلفة .،
التعليم:
حاليا شووف المدراس السودانيه المفتوحه من زمان لانهم ناس عارفين ظروف الناس فى مصر وابتعد عن مدراس النصابين التى فتحت فى مصر بعد الحرب لانهم ماعندهم اى ضمير ولا انسانيه
وقاعدين ياكلوا فى لحوم المساكين السودانين اتخييل مدراس بلغت 45 الف جنيه مصرى وبلغت الاف الدولارات ووالله لو توقفت الحرب وكل زول رجع السودان ستكون نهايه محزنه لهولاء النصابين
فليعلم هولاء عديمى الضمير ان الشعب السودانى شغب مسكين مغلوب على امره شعب ذاق المهانه والذل والنهب والسرقه فى السودان الان وكان من المفترض ان يكون لدى تجار الحروب ضمير وانسانيه
وان يكرموا السودان والسودانين بان يتم قبول الطلبه بشى رمزى فقط مساعده للاسر الطيبه المسكينه فى زمن الحرب وزمن الصعوبات المتتاليه على الشعب الطيب اللشعب السودانى
تركز علي الاستقرار والهدوء ولاحقا لمن العام الدراسي يقرب يبدأ في خيارات متعددة نتكلم فيها في وقتها ولو فرنا الإنترنت ممكن نضحي وندرس سنة اونلاين او ممكن تعليم منزلي.
الترفيه للاطفال وكبار السن:
الأطفال ما حيفهمو الوضع ده وعاوزين يعيشو بصورة طبيعية لذلك فتشو حولكم عن الحدائق العامة واماكن الالعاب عشان تودوهم يلعبو ويغيرو جو ..
وطلعو كبار السن يشمو هوا و يغيرو من حبسة الشقق ..
في حدائق دخولها بي 10 جنيه بس وغيرها كتير مجاني..
الناس تساعد أرباب الأسر بضبط الصرف لاقصي حد مهما كانت القروش متوفرة ، وربنا يرفع البلاء ويصلح حال البلد عاجلا غير ا عندما بعود الناس الي الوطن بعد انتهاء الحرب يجب قبل بناء البلاد والمنازل يجب اعاده بناء اخلاق الناس لان الحرب قد فضحت الاخلاق ومعادن الناس والرجال وكانت كل الشعارات والقيم والمثل خداع وكذب وزيف وظهرت معادن الرجال وعرفنا اننا شعب تجار حروب ونسي الناس كل القيم الانسانية والدينيه واصبحنا مجرد لصوص والله العظيم شي مخزي وشي مولم ان ناكل لحوم البشر وناكل اموال الناس بالباطل
ى انسان عايز اى مساعده فى مصر الرد على الموضوع

مع تحياتى
اخوكم
مصطفى نور

أخي الحبيب مصطفي
تحياتي
أشكرك علي هذه المعلومات بالجد هي مهمة جدا وكمان بالله حاولوا اعملوا وكالة للعقارات تخدموا أهلنا
لك الود والامتنان

مساء الخير
شكرا الأخ مصطفى نور

Quote: عرفنا اننا شعب تجار حروب ونسي الناس كل القيم الانسانية والدينيه واصبحنا مجرد لصوص والله العظيم شي مخزي وشي مولم ان ناكل لحوم البشر وناكل اموال الناس بالباط

تربية أخوان متأسلمين عمرها تلتين سنة أجارك الله

سلام
واضح انو اغلب الناس الجات اخت بلادنا نسوا بكل اسف كل ما ذكرت استاذ مصطفى

اهلا استاذ مصطفى
وشكرا على المعلومات .

يمكن فهمها بشكل أعمق لو حوّلت تكلفة كل بند بالدولار،

او لو وريتنا الدولار في السوق الحقيقي الموازي وليس في بنوك الدولة بي كم جنيه.

بعدين سمعنا انو في حركة نزوح في الاتجاه المعاكس الى السودان.
هل هذا صحيح؟

. معلومات مفيدة، مشكور كتير لتفصيلها.

وللمشاء أقول...الدولار في السوق الحقيقي يعادل حوالي 45 جنيه مصري...

سلام
واضح انو اغلب الناس الجات اخت بلادنا نسوا بكل اسف كل ما ذكرت استاذ مصطفى