Post: #1 Title: قمرية أم درمان Author: أبوذر بابكر Date: 10-11-2023, 07:50 AM
حزينه خليتي الغُنا ونحن زيك يا وحيده تعبنا هدّانا العَنا وتَعب الكلام يبست مواويل القصيدة سكتت غناويك يا مجيدة وما فينا غير مُر الملام غنيتي لى عطش البحر تاوقتي فجيتي الزحام راجيه الخبر ونحن زيك يا وجيدة وسط الدرادر والسفر مغسة هديلك والخصام يا جايه من حِرب الحراز المسقي بي موية المطر بي لمة الناس العُزاز إطمّني فشة غبينتك يوم قريب إطمّني طلة شبابيك الحبيب إطمّني باكر تجيب الهمبريب فرحة شوارعك وضل بيوتك وضحكة في خطوات مشيك مفطومة من نبع الحليب هدير غناكي مهر سكوتك جهرة ملامحك ضي وشيك إطمّني يا طالعه من بطن الحقيقه وساكنه في جروف الخيال إطمّني باكر نغني وننتشي بي شوق مشاويرنا الأنيقة باكر أكيد فرحك يزيد باكر نشد خيل الوصال إطمّني ما تخلي شي هزي اليك جذع الهديل يتساقط المنى والجمال فرحاٍ هميل يسقي الشوارع والبيوت ما يخلي شي وتب ما بموت وصباح بشارتك يبقى عيد إطمّني باكر أكيد ترجع سماحتك من جديد
Post: #2 Title: Re: قمرية أم درمان Author: أبوذر بابكر Date: 10-12-2023, 07:51 AM Parent: #1
Post: #3 Title: Re: قمرية أم درمان Author: أبوذر بابكر Date: 10-19-2023, 09:01 AM Parent: #1
(2)
يا ستنا بكره جاياك الأغاني يا فريدة ريح العوارض كيف تشيل ريحة جمالك مننا ونسة شجون الليل معاك غنوات هديلك والمنى وفرحة الريدة الشديدة تاني تتفتح سنا لا غباين لا بشاتن لا مكيدة باكر حداك ضحكة عيونك والهنا فرحة مواويل القصيدة تتفتح مباهج ممكنه يا بديعة يا وديعة يا اقحوانة وسوسنه
Post: #4 Title: Re: قمرية أم درمان Author: Abdalla Gaafar Date: 10-23-2023, 11:50 AM Parent: #3
العزيز أبو آمنة ياصديقي كعادتك تأتي وقت انفتاح الجرح على ملح الحزن في سبيل ابقاء حرفك شاهدا شاهدا على عصر نكبتنا الكبرى وكما قمرية أمدرمان سجن المرابون الوطن بأكمله خوف مرواح الناس ما بين الحلم وأمنيات الروح ضد زيف القول والفعل ... وكما الناس هزمهما (المدينة وقمريتها) الحزن وكبل صوتهما دوي القنابل
قوقاية ما بين الهتاف والفكرة كيف ما اتلفتت مسجونة ما بين الرصاص والحسرة لا قدرت تفر جنحاتا لا قدرت تصارع الريح قدر ما حاولت تنشد غناوي الهجرة ما قدرت تفج عتمة ليالي الجاي من تالا الحنين للنوم بكت وقفت علي جرح الأرض تلعن أبو البلد البيقدل فيها اشباه العساكر والمرابين والمليشيات والكلاب الضالة تلعن سنسفيل أصل الفتح بيبان بيوت الفقرا للكيزان فتح طاقة الهجيرة على نزيف قلب البلد والناس
Post: #5 Title: Re: قمرية أم درمان Author: أبوذر بابكر Date: 10-24-2023, 06:53 AM Parent: #4
عوافي يا عبد الله كيف الحال
عما قريب ستخرج أرض ام درمان ازهارها وسوف لن نقول مالها