معاناة أهلنا ما يكتبون #

08:12 PM October, 08 2023

سودانيز اون لاين
زهير ابو الزهراء-السودان
مكتبتى
رابط مختصر

معليش معليش معليش
معليش ماعندنا جيش..

تقولوا دعامية متفقة مع حمدتي دي الحقيقه الشفناها بعيونا..
معسكر العيلفون من المعسكرات القديمه و الاسسها عبود.. و تابع لسلاح المهندسين .. يقع في نهاية العيلفون..
من ما بدت الحرب و الدعامه دخلو شرق النيل و نحن قاعدين مطمنين انو نحن حامينا الجيش خصوصا انو قيادات المعسكر اولاد العيلفون.. لمن الدعم السريع وصلو سوبا و اللهي بتبعد زي ربع ساعه من العيلفون الناس قالت حدهم هنا و ما بقدروا يتقدموا اكتر.. لعدة اسباب..
اولها انو مدخل العيلفون واحد و تانيا انو المسافه من سوبا للعيلفون خلوية و مكشوفه يعني لو اتحركو بقوة كبيرة اكيد الجيش حايضربهم بالطيارات و يبيدهم..
و فعلا حاول الدعامه كم مرة يدخلو بعربات صغيرة و ماقدرو و كان الجيش بمسكهم و يعتقلهم..
و من شدة ثقتنا في الجيش و دعمنا ليهو معظم شباب العيلفون دخلو يتدربوا مع الجيش..
لحد في يوم الخميس 5 اكتوبر.. اتفاجأنا بقوات كبيرة من الدعم وصلت لحد مدخل العيلفون و حصل اشتباك بينهم و بين عساكر الجيش استمر لثلاث ساعات متواصلة..
المعركه انتهت المغرب و لانو الكهربا كانت قاطعه لمدة عشرة يوم و الاتصالات مقطوعة الناس باتت ماعارفه الحصل شنو..
نمنا و قلنا اكيد الجيش هزمهم و رجعوا.... اول ما الصباح جا طلعنا الشارع نعرف الحصل شنو لقينا الناس من الاحياء الامامية شايلين شنطهم وطالعين ..
بقينا بنسأل ياجماعه الجيش وين.. الحصل شنو ..
قالو لينا الجيش انسحب من امس دخل المعسكر و الدعامه دخلو البيوت هجموا على الناس من بالليل و بكل غبينه و حقد نظام انتو داعمين الجيش و مستنفرين معاهم.. نهبو و قتلو و طردوا الناس من البيوت و اعتقلو الشباب.. طلعنا بهدومنا اللابسنها بالدفارات و العربات طلعنا اولادنا و اخوانا و مامصدقين انو الجيش انسحب و خلانا..
طول الطريق و انا بقول لروحي انو حاتجي امدادات للجيش اكيد ما حايخلو الدعامه تستبيح العيلفون..
لكن بالجد الجيش انسحب تماما و دخل معسكرو و الدعامه استباحو كللل العيلفون..
معسكر العيلفون كان اخر معسكر في الخرطوم من جهة الشرق و بالجد بعد سقوط العيلفون الدعامه وصلو الليله لحدود ودراوا و زاحفين على مدني..
يعني انا بالجد ما فاهمه هل الجيش باع القضية و لا الدعم بالجد اقوى و نحن كنا مخدوعين ساي و لا الحاصل شنو؟

ما بنقول الا حسبنا الله ونعم الوكيل فيهم كلهم

كسرة..
ياجماعه انا شدة الغبينة الجواي بكتب و دموعي عشرة عشرة..
نحن طلعنا و ماعارفين ماشين وين في ناس لحد الليله زحفو برجولهم بس طالعين من العيلفون..
الناس لحد هسي بتفتش في اهلها لانو الاتصالات مقطوعه و التلفونات قافله.. القروبات كلها اي زول بسأل من خالو و عمو واخوه.. مشى وين و طلعو ولا لسه..
حسبنا الله ونعم الوكيل حسبنا الله ونعم الوكيل