للإسف قناة الإقتصادية السودانية برغم النجاح الغير مسبوق مهددة بالتوقف .... !!!

11:33 PM October, 06 2023

سودانيز اون لاين
توفيق عيسى مكي-
مكتبتى
رابط مختصر

أتذكر قبل مغادرتي السودان قبل أكثر من عامين
كان لي مشروع عمل مع أحد رجال الأعمال الاتراك
واخبرته بأني مغادر السودان وإني سأتوقف عن العمل
في السودان نهائيا وجرى نقاشا بيني وبينه حار جدا
خلاصته اني كما يرى أصبحت ايقونة صحوة اقتصادية
قادمة للسودان ولابد أن أستمر للنهاية ووجهة نظري كانت
ان السودان قيم أوفر خلاص اتيته أحمل رسالة واديت
ما قدرت عليه بزيادة
والحصل قفلت مشروع الشفافية والمكاتب وسرحت التيم
العامل وغادرت السودان

جئت لمصر وانشأت الاقتصادية على تركة
قنوات الشفافية وهي ثلاثة قنوات كانت تعمل
اهمها قناة الانتاجية
الهدف كان ان يفضل خيط رقيق يربطني بالعمل
العام السوداني

نعم يوجد مشروع شراكة بيننا والاذاعة
الرياضية لبث فضائية ولكنه عثراته اصبحت
كبيرة وكثيرة واصبح في علم الغيب

العمل الخالص للوطن والسودان في زماننا هذا
شبه إنتحار وعواقبه مهلكة ولكن ليس هذا سبب
تعرض الاقتصادية للتوقف اطلاقا

السبب التمويل
ظللت أصرف من جيبي الخاص منذ قدومي إلى الآن
نعم اليوتيوب حقق عائد لكني لم اسحبه لتذبذب عائده
وكثرة التوقف والاستمرار

تكلفة يوم تصوير ما اقل من 15 الف جنيه مصري
في الشهر الاحتياج يومين تصوير او ثلاثة على مدار الشهر
سعيت لرعاية بعض البرامج وفشلت
سعيت لرعاية القناة نفسها وأيضا فشلت
وايضا سعيت لبيع بعض البرامج الجاهزة ولكن ساحة
الإعلام السوداني تريد الهشتك بشتك بس
اللهم في خط فاتح مع بعض الاصدقاء في الجزيرة وبعض
الفضائيات الكبيرة لشراء أحد برامجنا الجاهزة ولربما لو حدث
هذا سيشهد السودان قيام اول فضائية مسؤولة كبيرة تهتم بنهضة
السودان وتقدمه

خلاصة القول بالبلدي
وحات الله الفيني كملت بقى ما عندي بالجد والله ولا التكتح

وما فارقة معاي
عشان ما بيدي شئ
والقدرت عليه عملته

ما لايم زول اطلاقا ولا بيحصل
ده حظي كده
وحظ السودان كده

الفترة الفاتت كان في إنتاج وفير
وخدم المجتمع السوداني كثيرا
عشان كان اجازة الجامعات المصرية
يعني في كان وفر قروش
مع اول اكتوبر الجامعات فتحت

الغايظني ....
انا لسه ما كملت مية برنامج من ال 500 برنامج
الاتعاهدت اقدمهم للإعلام السوداني
وسبحان الله كلها جاهزة للتصوير
ملحوظة :
البرنامج الواحد حلقاته كتيرة

والغايظني أكتر
برغم تفاعل الشارع السوداني مع ما قدم
بمآت الآلاف من التفاعلات المختلفة
ولا اعلامي سوداني واحد علق تعليق ولو نقد لينا
ياخ دي سفارتنا يوم العيد منزلين ليها تهنئة بالاسم
لكن طاقمها بالاسف ببرنامج كلف آلاف الجنيهات ولا
حتى بمكالمة شكر او مرسال ساي او تعليق وصلنا مافي

مع انه المستشار الثقافي فيها في الاساس مخرج تلفزيوني

اديكم معلومة ما معروف تضحك ولا تبكي
الإشادة الوحيدة الجاتنا
جاتنا من داخل اسرائيل من عميد واساتذة جامعة الأقصى
امكن عشان طالبتهم اشتغلت معانا وقدمت برامج قوية
جدا ولا سوداني شعر بيها حتى

السودان ده كله وجع في وجع
متين يتغير

طبعا مافي زول حاسي او مستوعب انا بقول شنو بس ما مشكلة عادي نحن اساسا كده مستحيل نتغير

السَّلامُ عَلَيْكُم ورَحْمَةُ اللهِ وَبَرَكاتُهُ

نعم نشهدلك بأنك ومن معك بذلتوا مجهود خارق
لكن اخطأت نفس خطأ هارموني عدم الترتيب والاندفاع دون دراسة مالية
لا ترفع الراية بعد كل هذا المجهود وهو يعتبر الأساس
فأنت بنيت الأساس فلابد إِنْ شَاءَ اللَّهُ تنوع الإنتاج بمعني جيب ناس الهشك بشك ديل
لأنهم هم المرغوبين للناس ولناس الإعلانات بالعربي طعم الموضوع

خيط آخر متبقي من رمضان اشهر
جهز برامج علي شاكلة برامج المرحوم القدير السر قدور للتلفزيونات السودانية
غناء - مسرح- اسكتشات فكاهيه
والمواراد البشرية عندك في القاهرة وعاطلة عن العمل
وممكن تشتغل وتقبض بعد الإنتاج والتسويق
لديك كمية من الفنانين السودانيين والممثلين
جهز برامج لرمضان وبيع وواصل فكرتك في نفس اللحظة

تشكر يا حبيبنا حيدر
وده المهم

Quote: اخطأت نفس خطأ هارموني عدم الترتيب والاندفاع دون دراسة مالية

على العكس تماما استفدت من اخطاء هاموني خير استفادة بدليل اشتغلت
القناة بحذر مالي شديد لم استأجر مقر او أعين استاف بمرتبات ثابتة ولم اتهور برفع القناة
على نايل سات المتاح جدا فضلت الانتشار على السوشال ميديا لانها اوسع واسرع واربح ولا
كنترول علي او مساءلة قانونية اشتغلت بمبدأ الحصص النقدية المباشرة في الانتاج بمعنى معاي
بصور واسجل وانتشر ما معاي ما علي التزام مالي والتوقف والتأخير يتحمله المجتمع السوداني
وليس انا الذي يعطيه بسخاء وبدون مقابل
وطبعا مستحيل ومن رابع المستحيلات الجأ للهشتك بشتك
ووسخ السودان بتعاطى الفن والرياضة ولكن برقي كبير هذا هو خطنا
مشاهدات اليوتيوب في زيادة باستمرار حتى لو توقفنا بمعنى نقاطة بتشتغل
طول الوقت لكن التوقف الذي اعنيه هو العطاء الوطني الكبير الذي نقدمه لشعبنا
والذي اصبح تكلفته عالية بالنسبة لظروفي الانية

الاقتصادية قوية وولدت باسنانها
عشان عزيزة ومعتمدة فقط على نفسها
النجوم السودانية صاح موجودين بمصر الآن وما
شغالين اللهم الا بعض انواع المشتك بشتك وبازارات وما شابه
فيهم المتنقعين الما بيجونا عشان شايفين نفسهم أكبر مننا وهم
في الحقيقة اقزام بالنسبة لينا اهو البيوعى بجينا وبابنا فاتح
بنقدم اعلام راقي ومحترف
محترف دي هي مقاسات زوايا تصوير وخيال ممنتجين خبرة ما سودانية
واحدث اللوكيشنات الحديثة في التصوير ومخرجين اشتغلوا في أكبر المؤسسات
الاعلامية ومواكبين النقلات الحديثة في الاعلام المتطور
بالمناسبة انا لسه في سنة اولى معاهم بتعلم منهم وبي حالتي دي لو رجعت
السودان بكون توب بروف في الشغلة دي

شكرا يا حيدر يا حبيب
اهو الكلام المسؤول بنديه حقه
غياب ود المشرف وبريمة من الخيط ده
مقلقني بقو زي باقي الجماعة مقاطعين برضو
وهي المقاطعة دي لمتين
وهي زاتها سببها شنو
عشان برش الكيزان والقحاته واحزاب السخف الخسفت
ببلادنا بلد كلها سياسيين جهلاء وما دارسين علم الاقتصاد
والسياسة المتوقع منهم شنو غير يبقو مشاطات اخبار مفبركة
نصها مدفوع تمنها من عدو السودان وعدوهم وعدو أهلهم