تجربتي في تشريط فاتورة الكهرباء الي الابد باستخدام الواح الطاقة الشمسية بعد عام من تركيبها!!!!

02:06 AM September, 15 2023

سودانيز اون لاين
بكرى ابوبكر-Peoria Arizona USA
مكتبتى
رابط مختصر

سلامات و احترامات و محبات للجميع @everyone @followers @الجميع

اليوم كلنا نعتمد اعتماداً كلياً على الكهرباء، فأصبحت ضرورة لا غنى عنها في حياتنا،و اصبحت فاتورة الكهرباء هاجسا و نسعي الي اطفاء لمبات و مكيفات بين الحين و الاخر خوفا من زيادة فاتورة الكهرباء.....
سألني الكثيرون من الاصدقاء و الزملاء عن تركيبي لالواح الطاقة الشمسية في بيتنا المتواضع ببيوريا Peoria ‪...‬ و لهذا السبب !!!! اليوم سوف احكي لكم عن تجربتي المتواضعة جدا لعل و عسي يستفيد منها اي شخص يرغب في استعمال الطاقة الشمسية في توليد الكهرباء لبيته او.. او.. الخ...و تشريط فاتورة الكهرباء الي الابد......
في عام ٢٠٠٤ م التقيت بعض شركات تركيب الواح الطاقة الشمسية في المنازل و حقيقة اعطتني ارقام فلكية عنها فتجاهلت الموضوع،لكن في الاعوام الماضية كثرت الشركات و العروض و اصبحت اسعار الطاقة الشمسية في متناول الجميع ،هذا بالاضافة لدعم الحكومة الولائية و الفيدرالية للطاقات المتجددة بنسبة تصل الي ٣٠٪ من سعر التكلفة 30% Federal Tax Credit
شجعني بالتسريع في تركيبها قبل ان تنط الحكومة من كلامها.......

تشغيل و تحويل الطاقة الشمسية الي طاقة كهربائية تحتاج الي:
1- الواح Solar Panels
2- محولات Inverters لتحويل الكهرباء المولدة من تيار مباشر إلى تيار متردد، الذي تستخدمه معظم الأجهزة المنزلية....
3- بطاريات لتخزين الكهرباء وفي حالتي لا احتاج لبطاريات لان بيتي مربوط/مدموج بالشبكة القومية Grid في اريزونا... بالاضافة الي التكلفة العالية للبطاريات في الوقت الراهن...

نقاط
* احسن الشركات من ناحية الاسعار و الجودة و بعد بحث عميق هما تسلا Tesla و سن رن SunRun ....
* تسلا Tesla عندهم خدمات الجمهور تعبانة شديد و من الصعب يردوا ليك تلفون لكن بردوا الايميل ،الشركة عليها ضغط و مرغوبة و صاحبها مجنون....ههههه...بس اسعارهم كويسة...
* في خلال ١٠ اعوام يمكنك تعويض /استرداد تكاليف تركيب الألواح الشمسية من بيعك/تصديرك للطاقة الزائدة للشبكة القومية Grid
* حجم المساحة في عرش/سطح بيتك هي التي تحدد عدد الالواح الشمسية و المبلغ الذي سوف تدفعه....
* الزيادة السوقية لقيمة المنزل بعد تركيب الالواح الشمسية
‫*‬ تجاهل الشركات التي تغرق بريدك و ايميلك بالدعايات و......

* هل يمكن تركيب/تثبيت الألواح الشمسية على السطح بدون الاستعانة باي شركة؟نعم يمكن ذلك لكن سوف تواجه بهذه المشاكل:

1- ترخيص المحلية او المدينة لالواح الطاقة الشمسية......
2- ربط/دمج الطاقة المولدة الزائدة بالشبكة القومية....
3 -تحتاج الي تطبيق App لمراقبة حركة التيار المولد من الالواح ...
4- الضمان ودا المهم :توفر معظم الشركات الضمان من كل النواحي لمدة ٢٥ عاما (عمر الالواح) في حالة اي عطل....
5- تحتاج الي معدات Tools ومعرفة لتركيب الالواح و المحولات....


خلاصة

اذا عندك عرش او سطح ممكن تركب به 43 لوح و محول سوف تحتاج الي نظام شمسي بحجم 15kW،سوف تكون الطاقة المولدة حوالي 27000kWh كيلوواتات سنويا‪,‬واذا كان مجموع صرفك السنوي حوالي 20000kwh انصحك بتركيب نظام شمسي بقوة 15kw فهو نظام سوف يغطي كل الطاقة التي تحتاجها وتبيع /تصدر طاقة تكفي لتغطة تكلفة النظام...

المهم
يقال 2023 اخر عام للدعم الفيدرالي والولائي 30% Federal Tax Credit والله اعلم You need to do your homework....
@everyone

السلام والإحترام اخى باشمهندس بكرى~
أولا التهنئة على هذا المشروع الناجح
وبعدها الشكر على اشراكنا فى تجربتكم ، بالى فى مستقبل السودان وبنائه وامكانيات الاستفادة من تجاربكم|

ونتحاشى شركات النحل والزنابير 😀
فى السودان فى باشمهندس برضه مستبدل الكهرباء بالطاقة الشمسية ، الآن هو خارج السودان والجنجويد فى بيته!

*عندى سؤال لو سمحت - عن السلامة وخاصة إنك أشرت انه ممكن تركبوها بنفسكم

Quote: ونتحاشى شركات النحل والزنابير 😀 فى السودان فى باشمهندس برضه مستبدل الكهرباء بالطاقة الشمسية ، الآن هو خارج السودان والجنجويد فى بيته!

قريتي في عبري شغالة بالطاقة الشمسية اكتر من سنتين حسع وبالعون الذاتي كالعادة

الغالية هدى ميرغنى
شكرا للزيارة و المداخلة
المشروع دا ناجح جدا يا هدي و الله احسن من السدود الضاربة بتاعة الكيزان ديك

كل الطاقات المتجددة من الرياح و الشمس امنة ....لكن الما امنة النووية علشان كدا معظم الحكومات الغربية بتحاول تتخلص منها

ده في امريكا
في السودان كيف هسة
الدولة الادنى فس ااستخدام الطاقة الشمسية
رغم ان الشمس تزود السودان بي 8000ميقا واط يوميا 4 اضعاف السد العالي المصري
والفاشلين لسه مع الجزلين
https://www.0zz0.com

شكراً على المعلومات الهامة يا هندسة..
فى تقنيات كثيرة تساعد على تقليل استعمال الكهرباء بصورة كبيرة.. منها استعمال LED بدل اللمبات الحرارية او حتى النيون.. استعمال الطاقة الشمسية المباشرة
لتسخثن الماء .. توجد مواسير خاصة فى شكل رادييتور (لديتــر) العريية تثبت فى سقف المنزل.. للطبيخ والاستحمام فى الشتاء. واساليب تقنية اخرى كثيرة.
هذه الأساليب ليست بديلاً عن الطاقة الشمسيـة ولكنها تساعد على تقليل الألواح الشمسية المطلوبة لتشغيل نفس الأجهـوة

سلام بكرى وضيوفه
نحن في اربجى لنا تجربة
ناجحة جدا في هذا المجال من
خلال المجلس الاستشارى لتطوير
الخدمات باربجى ولقد تم تحويل
سبعة ابار من مجمل عشرة ابار لتعمل
بالطاقة الشمسية غير انارة المساجد
والمستشفى والشوارع الرئيسية
التحية والتقدير للمجلس الاستشارى
ولاهل اربجي بالداخل والخارج على
هذا الانجازا العظيم

Quote: سلام بكرى وضيوفه نحن في اربجى لنا تجربة ناجحة جدا في هذا المجال

يا استاذ بدر.. لو ناس أربجى استعملوا الطاقة الشمسيــة معناها القصــة جاطت

حبيبنا بدر
مرحب بيك
لو كل مدينة عملت العملتو حا تتحل مشكلة الطاقة في السودان....اليوم هنا عندنا كل المدارس تعمل بالطاقة الشمسية

صديقي من الزمن الجميل عادل الشبح
استخدام الطاقة الشمسية مشروع ناجح جدا في السودان ....لكن نحن دولتنا و مفكريها ما بهتموا بالبحث العلمي و مراكز البحث العلمي بهتموا بالخلاوي و البلاوي
و البحث العلمي هو المهم ....الهند،اسرائيل و الدول الغربية تخصص ميزانية ضخمة للبحث العلمي و هذا اسباب تقدمهم و تميزهم.......

Quote: * حجم المساحة في عرش/سطح بيتك هي التي تحدد عدد الالواح الشمسية و المبلغ الذي سوف تدفعه....

سلام يا هندسة ..

اتجاه البيت ايضا بلعب دور في تأهيله .. يعني داير المساحة الاعرض تكون مواجهة وقت الشمس الاكتر ..

Quote: اتجاه البيت ايضا بلعب دور في تأهيله

فعلا يا قبة اتجاه البيت بلعب دور ...لكن نحن هنا في اريزونا الشمس من صباح الرحمان هي في الراس يعني بجيك من كل الاتجاهات ...يعني لو و ضعت الالواح في اي اتجاه بجيك كهرباء......

Quote: استخدام الطاقة الشمسية مشروع ناجح جدا في السودان ....لكن نحن دولتنا و مفكريها ما بهتموا بالبحث العلمي و مراكز البحث العلمي بهتموا بالخلاوي و البلاوي

تحياتي يا سيد الحوش وربنا يوفقكم
كنت متوقع أساتذنا علي عبد الوهاب يحكي ليكم تجربة أحد أعمامنا في جزيرة عبدالله نارتي
وهي جزيرة زراعية فقط وملاصقة لجزيرة أرتي قاشا وإنشاء وتركيب أول مضخة مياه
(دونكي) بالطاقة الشمسية ذو الألواح الزرقاء في الشمالية وربما في السودان وذلك عام 1985
ومستمر حتي اليوم، نعم التاريخ صحيح 1985

Quote: اذا عندك عرش او سطح ممكن تركب به 43 لوح و محول سوف تحتاج الي نظام شمسي بحجم 15kW،سوف تكون الطاقة المولدة حوالي 27000kWh كيلوواتات سنويا‪,‬واذا كان مجموع صرفك السنوي حوالي 20000kwh انصحك بتركيب نظام شمسي بقوة 15kw فهو نظام سوف يغطي كل الطاقة التي تحتاجها وتبيع /تصدر طاقة تكفي لتغطة تكلفة النظام...

تحياتي يا ريس ...
نعم انتشر خبر الطاقة الشمسية وسط المزارعين وشاهدت محطة طاقة شمسية تخدم حوالي ٧ pumps او
بوابير كما يقولون ... هذه المحطة تروي ما لا يقل عن ٧٠ فدان ... هذه البوابير كانت تستهلك يومي ما بين
جلونين ونص لي ٣ جالونات جزلين ... المهم الموضوع ناجح جدا ...
يا ريس نجي لي ال figures في الكوت اعلاه ... ما عارف هل
ستستفيد من كلامي ام لا ...
طيب اذا افترضنا محطتك الشمسية بتديك ١٥ kw في كل راس ساعة
يبقى في سنة بتديك ١٥ × ٢٤ × ٣٦٥ = ١٣١٤٠٠ kw/ساعة ...
نجي لي استهلاكك سنويا ونشوف في اليوم قدر شنو ...
٢٠٠٠٠ ÷ ٣٦٥ ÷ ٢٤ = ٢.٣ kw/ساعة
غايتو اتمنى يكون في مراجعة لي كلامي وكلامك من الخبير
الباشمهندس محمد الشيخ اذا كان لازال بالجوار ...

جالونين ونص لي ٣ جالونات جزلين لكل بابور ...

سلام يا باشمهندس صلاح زبير

Quote: يبقى في سنة بتديك ١٥ × ٢٤ × ٣٦٥ = ١٣١٤٠٠ kw/ساعة ...

x 24؟!!!
شمس شغالة 24 ساعة في اليوم طوال السنة؟ دا وين دا؟
جني وجن المهندس ال ما بيعرف يحسب.

سلام باشمهندس بكري

شكرا على عرض التجربة..
ما كنت فاكر إنه عندها جدوى كبيرة في أمريكا زي السودان..

طبعا نحن في السودان موضوع الطاقة الشمسية ما واضح للناس بشكل كبير..

مثلا من ناحية التكلفة الإنشائية هي كبيرة وبتحتاج لإمكانيات مالية مقدرة للأفراد.. وكذلك الجزء المتعلق بالصيانة

الدورية و الإصلاحات ، والعمر الافتراضي للأجزاء برضه غائب عن الناس...

قبل سنتين سالأت عنها في جهة عطبرة/ الدامر لتشغيل بئر ارتوازية لقيتها تعادل حوالي أربعة ألف دولار تقريبا...

وبرضه بدون ضمان لمدة طويلة..


يعني ما بتلقى جهة واحدة/ شركة مضمونة تقدر تعتمد عليها في الإنشاء و المتابعات..

Quote: جني وجن المهندس ال ما بيعرف يحسب.لا

وأنا كمان جني وجن الاصطراطيجي الذي لا يرى ما تحت بصره ...
يا مولانا نفرض كلامك صاح ... وهذا يعني كهربة الريس جاية
من فرن الشمش فريش وحارة ... صاح ... طيب الريس مع غروب
اخر شعاع من الشمش يقفل انوارو ومكيفاتو ويمشي ينوم عند
الجيران لغاية بكرة الساعة ٧ صباحا ... مو هيك عايز تقول ...
طيب انا افترضتا إنو الريس شغال بي ١٥ kw طوال ال ٢٤ ساعة
ودا الشي الطبيعي المفروض يحصل يا مولانا ... عارفك حا تقول
لي الريس ما عندو بطاريات ... لكن ال grid موصل سلف واستلف ...
وين المشكلة ...

يا مولانا

بكري ما بولّد كهربا لي رقبتو

النظام مبني على انه يضخ في الشبكة العامة و ياخد كهربته من الشبكة العامة
و الحساب يجمع

يا باشمهندسين
بقيتوا اتنين وغلاطكم بقى صعب لكن توكلت على الله

بكري ساكن في اريزونا
متوسط عدد ساعات سطوع الشمس في اريزونا حوالي 10 ساعات.
يعني في حوالي 14 ساعة في اليوم الالواح دي قاعدة ساي.
خلال ال10 ساعات دي الشمس ما بتكون ضاربة في كل الالواح مباشرة كل الوقت،
دا بيعتمد على إتجاه البيت وميلان السقف
وبالتالي التوليد بيكون متذبذب وما ثابت على 15KW.
قد يكون متوسط التوليد خلال ال10 ساعات دي 7.5KW بعني 75 كيلواط.ساعة (متر كهربا) في اليوم.
ال75 متر كهربا دي كلها بينتجها خلال النهار، بالليل مافي إنتاج.
بكري لو بيستهلك 2.3 متر في الساعة يعني 23 متر بالنهار و32 متر بالليل.
بالنهار بكري حيشيل ال 23 متر من إنتاجه ويضخ 52 متر للشبكة العامة.
بالليل بكري حيشيل 32 متر من الشيكة العامة وبالتالي يكون باع صافي حوالي 20 متر في اليوم.

إنتاج بكري السنوي = 75x365
= 27300 كيلواط.ساعة

استهلاك بكري السنوي = 55ْx365
=20075 كيلواط.ساعة
الفائض من إنتاج بكري 7225 كيلواط.ساعة في السنة.

برافو ... مولانا ...
حقيقي لا يقل ماكتبته عن سبكة حديث السبيلين ...
مولانا السبيلين والشمشين ...
شكلو كدا في باص ثرو اتعمل من اريزونا الى مكمنك ...
او تكون أحد سكان اريزونا ... لأنو التفاصيل الجابت
الحسابات تنق قرنق زي ما كتب الريس لن تجدها إلا
من اريزونا ... فهنيأن لك ...

سلامات و محبات و احترامات للجميع

حبيبنا حافظ بشير و صلاح الزبير مرحب بيكم
اولا ...الشمس هنا بتكون فوق راسك من ٥ صباحا الي ٧ مساءآ يعني اكثر من ١٠ ساعات و بتجيك من كل الاتجاهات.....وبتضرب الالواح ..بتضربها و ما عندها علاقة بوضع او اتجاه البيت....
وحاجة ثانية لاحظت ان الالواح تولد طاقة في الغيوم و الضباب اي نعم توليدها لا يكون مية في المية لكن يكون نصف او ٤٠٪ من ما تولده في حالة سطوع الشمس
الصورة ادناه رفعتها لكم من التطبيق لتوليد النظام ليوم الجمعة ١٥ سبتمر ٢٠٢٣ ...ارجو ان تعيد حساباتكم عليها لانو حساباتكم اعلاه ما صحيحة

Quote: يا مولانا بكري ما بولّد كهربا لي رقبتو النظام مبني على انه يضخ في الشبكة العامة و ياخد كهربته من الشبكة العامة و الحساب يجمع

شكرا يا قبة....انت صاح

Quote: Ehab M. Ali النظام العندكم ده حول المواطن من مستهلك لشريك في الانتاج لو كان النظام ده موجود في السودان كان خفف الضغط على الشبكة الهلكانة اصلا، بالإضافة لان ضمان لتعامد الشمس على الألواح بكفاءة من 8 ص لحدي الساعة 5 مساء يعني زيادة ساعات تشغيلة. ده غير المزارع وٱبار المويه لحدي انارة الشوارع والجسور واشارات المرور من الفيس

ادناه صورة من التطبيق للصرف ل ٢٠٢٣ و طبعا الصرف و الاستخدام بختلف من شخص لشخص او منزل الي منزل اخر و عدد و نوع الاجهزة الكهربائية المستخدمة وهل هي Energy efficiency ....الخ بالاضافة الي عدد الاشخاص ...الخ

سلامات و محبات

لتوضيح اكثر ادناه للصورة للطقس الشهر الماضي و سوف اختار منه يوم ١٩ حيث كان يوم مغيم اي فيه اختفاء للشمس

وادناه صورة من التطبيق للطاقة المولدة عند اختفاء الشمس اي نصف الطاقة المولدة

Quote: شكرا يا قبة....انت صاح

تسلم يا هندسة .. لكن نعمل شنو مع المولانات البنضموا في شغل الهندسة و المهندسين ..

Quote: شمس شغالة 24 ساعة في اليوم طوال السنة؟ دا وين دا؟ جني وجن المهندس ال ما بيعرف يحسب.

حبابك حبيبنا محمد عبد الله الحسين

تعرف يا ابو حميد الواح الطاقة الشمسية و المحولات ما غالية و ممكن تركبها لوحدك و التركيب ما صعب بس نحن بقينا خرد و ما بنقدر علي طلوع السلالم و العرش و بنحب الضمان....
في بلدانا ديك السماسرة و ضرائب الحكومة بتغلي الاشياء حسب بحثي قبل سنة ال أربعة ألف دولار بتاعتك ممكن تجيب ليك حوالي ٣٠ لوح و تولد ليك حوالي ١٣ك.ت ...ودا لو ركبتها لوحدك
........

شكرا يا باشمهندس.

فعلا هذه هي المشاريع الحقيقية التي نحتاجها بالسودان. بس الأولي حاليا طبعا أن نخرج بلادنا من نفق الدمار الذي أدخلها فيه ساسة و عساكر متهورون.
الغريبة خلال زياراتي للسودان لاحظت ان الاغلبية يركزون اهتمامهم علي بطاريات تخزين الكهرباء و قليل جدا من الناس من يهتمون بألواح الطاقة الشمسية و عندما سألت عن السبب جاءني الرد بأن القضية كلها تعود الي التكلفة و بالتالي يتصارع الجميع حول تخزين الكهرباء ببطارياتهم ( لما تجيهم الكهربا) و لما الكهربا تقطع يستعملو مخزون البطاريات و دا طبعا خلق صراع حول الكهربا بالضبط كما يحدث مع الموية و موتورات المياه الشغالة جر من نصيب الجيران دون خلق مصادر بديلة تمنح الفرصة لمزيد من الاستهلاك.
الناس في السودان بتنظر للتكلفة في المدي القصير لذلك يختارون بطاريات الشحن و لو أنهم أضافوا اليها الواح طاقة شمسية لاستطاعوا تمزيق فاتورة الكهرباء في المدي الطويل كما فعلت انت بالضبط و بالرغم من أن الدولة في السودان لا تدعم انتاج الكهربا من الطاقة الشمسية الا أن التوفير عند استخدام الطاقة الشمسية يأتي اولا بايقاف التكلفة الناتجة عن استهلاك الامتار الإضافية بعد الحد الأدني للاستهلاك من الكهربا العامة ( كهربة الحكومة)و الذي تكون له تعرفة أقل و تزداد القيمة كما تعرف بزيادة الاستهلاك، ثم يأتي التوفير الاكبر عند اكتمال خصم تكلفة الواح الطاقة الشمسية و تكلفة بطاريات التخزين و تكلفة التركيب و حينها ستقترب التكلفة من الصفر و عندها سيكتشف المستهلك أنه قد رفع عن كاهله عبئ فاتورة الكهرباء.

دا طبعا من غير ما نتحدث عن بيع الفائض من انتاج الكهرباء و الذي عنده سيتحول المشروع من المجانية الي الارباحية دون شك.

الشي المحيرني في امريكا دي برغم انها اولي الدول النووية بالعالم الا أن شوارعها لا زالت مظلمة طوال الليل. و دي قصة اخري يمكن للطاقة الشمسية ان تلعب فيها دور الساحر و لكن مين يقنع انكل سام

السلام عليكم الأخ بكرى وضيوف
اعتقد صادفت كلام عن تشجيع او إلزام (لا اذكر) سكان مدينة فى كاليفورنيا بتصميم تصميم المنازل الجديدة منظومة
طاقة شمسية.
إمارة فى الإمارات العربية تشجع على تركيب منظومات طاقة شمسية وتشتري إنتاجها خصما على فاتورة الكهرباء.
---
من الاخبار الجيدة قيام ابحاث تستخدم نوع من العزل الضوئي لفلترة ضوء الشمس الوارد للوح بعزل الترددات المسبحة لرفع درجه حرارة اللوح وبالتالي يكون العائد... استقرار وجودة فى كفاءة إنتاج الطاقة
----
الطاقات المتجددة ونشرها فى باد زى السودان ربنا يرفعون من حفرة بنى يكون بقرارات تشجيع من الدولة فى الاستيراد وتركيب منظومات الطاقة على اختلافنا إضافة لحملات تثقيف ترفع الوعى بأهمية الطاقات المتجددة.
والأهم تأسيس أقسام هندسة الطاقة فى المؤسسات التعليمية

مرحب بيك حبيبنا وليد زمبركس
تعرف يا وليد مشاريع الطاقة الشمسية حا تكون من المشاريع الناجحة جدا لو الحكومة شجعت و دعمت المواطنين فيه كما تعمل الحكومة هنا.احسن من السدود ...لكن نحن حكوماتنا شغالة بالفارغة و المقدودة لانو كل البجوا في المناصب الحكومية جهلة و انصاف جهلة و خريجي مدارس و جامعات معفنة والكلية الحربية....الخ
اليوم يا وليد هنا في اريزونا و هي الاقرب للسودان من ناحية الطقس معظم المدارس و المكتبات الحكومية كلها مدورة بالطاقة الشمسية....
اما بالنسبة للبطاريات ما اعرفه عنها غالية و ما عملية لانو النظام هنا مربوط بالشبكة القومية تبيع و تشتري من شركة الكهرباء......

الطاقة الشمسية وحساباتها دي وارتباطها بالشبكة دي معلومات جديدة لنج بالنسبة لي وأنا شاكر جدا للريس بكري والمشاركين منكم نستفيد ودائما موفقين يارب

يا قباني اكلتوني حنك.

الواح الطاقة الشمسية دي في بلدكم ديك كيف؟
مجدية؟

طبعا المعلومة الاساسية هي ان توليد الطاقة يعتمد
في الالواح على الضوء لذا تقل الطاقة في اوقات الغيوم.
هناك قانون تحت الاصدار لاستخدامات الخلايا الشمسية مع عملية التبادل مع مزود التيار
بتركيب العداد ال bydirectional
كالموجود في اريزونا دا ومحن نأمل ان يتم ذلك قريبا لانو بقلل الضغط على الشبكة.
استخدام الالواح الانةفي السودان في تطور في مجالات سقيا الابار والمشاريع الزراعية
وعديد من الاستخدامات في المناطق النائية.
مولانا حافظ احسن في حساباته لان السطوع الكامل خلال اليوم بكون في ساعات محددة
وينعدم في الليل.
هناك تطبيقات اخر ى لتوليد الطاقة الشمسية الحرارية
سنتطرق لها ان شاء الله في بوست خاص.

تحياتي للجميع بعد غيبة اجبارية

سلام الريس و كل الضيوف,
ده افضل بوست في الـ 6 اشهر الماضية لانو البورد و كل وسائل التواصل الاجتماعى بقت علي نمط "جغم" و "اكلو نى" و ريحة الدم.

____________
شمسنا هنا حتى لما تكون ساطعة زى الفلفلية ما فيها اى حرارة. الاشعة براها بتكفى؟

Quote: يا قباني اكلتوني حنك.

هههههههههههه
لكن انت شايل رغيفتك و حايم داير تغمس في اي ايدام .. البتعرفوا و الما بتعرفو ..

Quote: الواح الطاقة الشمسية دي في بلدكم ديك كيف؟مجدية؟

شمسنا دي في الشتا زي لمبة التلاجة انت ما شفتها و عارفها ..
عموما في بيوت عامله الشغلة دي هنا لكن ما ظنيت بصلوا مرحلة تشريط الفاتورة دي قريب ..

الصينيين شغالين شغل نانو تكنولوجيا بحيث ممكن الألواح تولد طاقة فى ظرف غيوم وأمطار اعتماد على توليد الطاقة باحترام قطرات المطر على سطح الالواح

مشاركات من الفيس


Ahmed Taha
ان شاء الله بعد تغيير الRoof هذا الأسبوع سوف نعمل الsolar Energy
شكرا للمعلومات
Reply
3d

Author
بكرى ابوبكر
Ahmed Taha حبيبنا احمد مرحب بيك و مستعدين للمساعدة
Reply
2d
Mohamed Yassin Khalifa
في سنة 2012 على ما أذكر كنا جالسين مع بعض وزراء الجنوب في بهو فندق كان يسكن فيه بعض الوزراء المرافقين للرئيس سلفا كير والذي أتى مشاركاً في إجتماعات الجمعية العامة للامم المتحدة لأول مرة رئيساً لدولة الجنوب الحبيب. تقرب مننا شخصان وعرفا نفسهما بأنهما مسؤولين في شركة معنية بأنتاج الطاقة الشمسية وعرضا خدماتهما للدولة الجديدة. ولاحظت إهتمام الوزراء بهذه العرض وقاما على الفور بدعوة الشركة لزيارة جوبا. ولقد علمت لاحقاً أن الجنوب قدر ربط معظم المدن فيه بشبكات معظمها يخدم بالطاقة الشمسية والتي قد تُكلف بعض الشيء عند تركيب أجهزتها وألواحها وبطارياتها الغالية… ولكن على المدى الطويل تعوض التكلفة عبر إنتاج طاقة مجانية وتحافظ على البيئة!
Reply
2d
Daniel Abushery Daniel
نصائح قيمة جداً يا باشمهندس بكري. نعم أنا بعرف بيتك كبيرة ما شاء الله. يعني إذا وصلتها بإسمه شنو دي بتكون حليت نفسك من تكلفة فاتورة الكهرباء الباهظة. للمرة الثانية؛ تشكر على النصيحة يا حبوب!
Reply
2d
Luke Dak
Daniel Abushery Daniel
راسي جاطت!
Reply
2d

Author
بكرى ابوبكر
يا كمرت الجوطة وين علشان نوضحها ليك براحة.....
Reply
2d

Author
بكرى ابوبكر
Daniel Abushery Daniel و الشكر ليك انت يا كمرت للمداخلة و المتابعة
Reply
2d
Luke Dak
بكرى ابوبكر
كم انت جميل!
Reply
2d


Tarig Hassan Abusalih
المستقبل للطاقة المتجددة، وأنتم ولجتم المستقبل مبكراً يا باشمهندس.
Reply
2d

Author
بكرى ابوبكر
Tarig Hassan Abusalih نعم يا سعادة السفير المستقبل للطاقة المتجددة وهي رخيصة و هبة من الله
Reply
2d
Tarig Hassan Abusalih
بكرى ابوبكر
نعم عزيزي باشمهندس بكري، وهي هبة من الله.
ونتمنى بعد انتهاء هذه الحرب وتكوين حكومة بناء وإعادة إعمار من الوطنيين المخلصين أن يكون الاستفادة من الطاقات المتجدِّدة من الأولويات.
Reply
2d


عثمان مختار
تحياتى
Reply
2d
Osama Khalifa
شكرا يا بكري مفيد جدا
Reply
10h
Fadli Elbakri
شكراً باشمهندس بكري ، بوست مفيد جداً
Reply
2d

Author
بكرى ابوبكر
Fadli Elbakri شكرا يا حبيبنا فضلي صدقني لو السودانيين في امريكا ختوا اياديهم مع بعض .... حا يفوتوا الصومالين،الكوبيين و الهنود براحة فمعظم السودانيين خريجي جامعات عريقة و،،،، و... الخ بس نحن ........................الكلام كثير ..
Reply
2d
Edited
Fadli Elbakri
بكرى ابوبكر ربنا يسهل الأخ الحبيب بكري ، بإذن الله راجينا شغل كبير جداً بعد إنتهاء الحرب اللعينة دي ، و زي ما ذكرت الكفاءات متوفرة علي قفي من يشيل فقط محتاجين لي عمل من غير تنظير .
الله المستعان .
بإذن الله راجع نهائي لأمريكا في ديسمبر ربنا يسهل و نشوفكم شوف العين 😍
Reply
2d
Emad Eldin Eltayeb Omer
بكرى ابوبكر بكوووور...
ما صعبة السودانيين يتضامنوا ...
الرك عليك انت و امثالك...
و يكون لنا عزاء النجاح في الخارج بدل الفشل و الكلام الفارغ في الداخل ... اعملوا توعية ... اتلملموا و شدوا حيلكم... بالاصرار مافي شي صعب ... و انتم قدرها ان شاء الله...
Reply
2d


Salim Alamin
طبعا خليت اهم حاجة بتهم السودانيين ما ذكرتها في البوست : التكلفة كم 🤣
Reply
2d

Author
بكرى ابوبكر
Salim Alamin صدقني ما مكلفة و خاصة بعد الدعم الحكومي
Reply
2d
Taha Elkhalifa Taha
شكرا يا بكور علي التنوير المهم
Reply
2d

Author
بكرى ابوبكر
Taha Elkhalifa Taha هلا بالزعيم طه الريفي قلنا نقدم تجربتنا لعلي يستفيد منها زول ...و هذا ما تعمل به بقية الجاليات ...شوف الهنود ديل ماشين كيف ....المرة دي منزلين مرشحين للرئاسة في الانتخابات الامريكية و معظم الشركات و المستشفيات هنا مسيطر عليها الهنود.........ونحن لسع شغالين هنا بالفارغة و المقدودة،...
Reply
2d
Edited
Taha Elkhalifa Taha
بكرى ابوبكر
كلك خير يا بكور . هذا هو المستقبل و انت تبشر به بصورة جميلة يا بكري
Reply
2d


Mohamed Mahjoub
دي معلومات قيمة جدا..شكرا بكري للاسف انا رحلت انجلترا بذكل نهائي والشمس هنا بتظهر شهرين في السنة
Reply
2d

Author
بكرى ابوبكر
Mohamed Mahjoub تعرف يا محمد من ملاحظاتي انو الطاقة المتولدة من النظام في حالة الغيوم و غياب الشمس تنخفض الطاقة الي النصف و في حالة ارتفاع درجة ححرارة الشمس الي 120 درجة تكون الطاقة المتولدة بين 85 الي 95 كيلو لكن عندما تكون درجة حرارة الشمس بين 70 الي 100 درجة مثلا (و دي اتخيل لي بتعادل درجة الحرارة في السودان) بتكون الطاقة الواردة من الالواح بين 100 الي 120 كيلو....
Reply
2d
زروق سراج
لك التحيه اخونا بكري علي المعلومه المفيده جدا خاصه في السودان ٠ دفعتك مبارك زروق
Reply
2d

Author
بكرى ابوبكر
زروق سراج مرحب بيك يا دفعة مشتاقين
Reply
2d
زروق سراج
بكرى ابوبكر بالطبع كلنا مشتاقين لبعض ٠فرقتنا الايام
لكن ح نتقابل لو مد الله في عمرنا ٠ تحياتي لك والاسره الكريمه
Reply
2d


أبو أحمد
الشغل دا ما اظن ينجح في كندا.
Reply
2d

Author
بكرى ابوبكر
أبو أحمد اتخيل بنجح اذا الحكومة اعطته للمواطنين مجاني
Reply
2d
أبو أحمد
بكرى ابوبكر يا هندسة انا قصدي الشمس زاتها مشكلة هنا..ما زي اريزونا ومناطقكم هناك.
Reply
1d


عبدالله عثمان
عجيب يا باش
نوزعها
Reply
2d

Author
بكرى ابوبكر
عبدالله عثمان حبيبنا ما فهمت بنوزعها وطالما ما عجبت حبيبنا Sabri Elshareef طوالي وزعها
Reply
2d
Edited
Abdu Adam
شكرا باشمهندس. بس انت قدرت تغطي التكلفة الابتدائية للنظام في خلال عام واحد فقط؟ اظن الفرق بين الانتاج و الاستهلاك في حالتك كبير. بالنسبة لحالتي مساحة السطح صغيرة نسبيا و حسب حساباتي بحتاج لي ٦ الي ٧ سنوات لتغطية تكلفة النظام من غير بطاريات.
Reply
2d

Author
بكرى ابوبكر
Abdu Adam التكلفة دي لعشرة اعوام و الانتاج و الاستهلاك بختلف من شخص لاخر اقصد عدد الالواح و عدد الاجهزة التي تحتاج لكهرباء بالبيبت......
Reply
2d
Naser Osman
الحبيب بكري
ما اسم الواح الطاقة الشمسية الصينية الموجودة في امريكا
Reply
2d

Author
بكرى ابوبكر
Naser Osman و الله يا حبيب ما بعرف اسمها لانو ركبوها لي و معظم الاشياء هنا جاي من الصين.....
Reply
2d
Naser Osman
بكرى ابوبكر
🙏 مشكور
Reply
2d


Ehab M. Ali
النظام العندكم ده حول المواطن من مستهلك
لشريك في الانتاج
لو كان النظام ده موجود في السودان كان خفف الضغط على الشبكة الهلكانة اصلا، بالإضافة لان ضمان لتعامد الشمس على الألواح بكفاءة من 8 ص لحدي الساعة 5 مساء
يعني زيادة ساعات تشغيلة. ده غير المزارع وٱبار المويه لحدي انارة الشوارع والجسور واشارات المرور
Reply
2d
Hafiz Arkash
Ehab M. Ali
النظام د ا حقيقي كان محتاج له السودان وبدات تجربة لكن اساطين الكهرباء ما كان جادين في هذا النظام ربما الي احتكار اسعار الكهرباء عبر الشركة السودانية .
Metric unit of measurement
نظام ساهل وبدات تجربة قبل الحرب ، لكن نحن عندنا شبكة رديئة التوصيل حساب الفاقد او تبادل حساب الفاقد يمكن ان يصبح مسار جدال .
علي العموم الان الطاقة المتجددة ماشة ان تصبحت اساسية وليست بديل
Reply
2d
Edited
Ehab M. Ali
Hafiz Arkash
لخصت الحكاية بكلمة "أساطين"
الحمدلله على ما ابتلانا
Reply
2d

Author
بكرى ابوبكر
Ehab M. Ali شكرا يا إيهاب للمداخلة السمينة أقصد انك لخصت بوستي في السطر الاول لمداخلتك.....
نقطة سطر جديد
فعلا يا صديقي إيهاب السودان بشمسو الحارة ما محتاج لسدود و لا محطات طاقة حرارية...بس لو الجلاكين الفوق ديل زحوا للشباب صدقني السودان حا يفوت رواندا مية مرة
Reply
2d
Hafiz Arkash
Ehab M. Ali فعلا يا ايهاب ود حقيقة ، تصدق الاساطين ديل لو عندك مشكلة فنية او تجارية ممكن ياخدو معاك الموضوع شخصي ، وعقود ازعان لحدي الان ما فاهمين انو نحن المستهلكين ودافعي الفواتير
Reply
2d
Hafiz Arkash
بكرى ابوبكر
يا باشمهندس الجلاكين ديل عارف ثمرة تربيتهم شباب صورة طبق الاصل ، محتاجين ثورة وعي حقيقة .
Reply
2d

Author
بكرى ابوبكر
Hafiz Arkash والله يا حافظ دي تكون مصيبة....كان كدا نعتمد علي الشباب السوداني الذي تربي في الشتات...كما تفعل اسرائيل و فعلت رواندا
Reply
2d


Awad Qofran
وين بطاريات تسلا في السودان؟
Reply
2d

Author
بكرى ابوبكر
Awad Qofran والله ما عندي فكرة لكن يا حبيب البطاريات دي مكلفة في الوقت الراهن اصبر شوية...حا ترخص
Reply
2d
Awad Qofran
بكرى ابوبكر
شكرا بكري، والله حوجتها اليومين دي. زنقة زنقة
Reply
2d


Ali Mohammed Omar
السلام عليكم ورحمة الله وبركاته صباح الخير
جزاكم الله خيرا
هل تعتقد أنها عملية في السودان؟
هل شركة الكهرباء السودانية عندها نظام لشراء
الكهرباء الزائدة حسب علمك؟
ولكم جزيل الشكر والتقدير
Reply
2d
Wael Jamaladdeen
Ali Mohammed Omar في السودان مافي نظام لشراء الكهرباء من الطاقة للشمسية لشركة الكهرباء لكن الخبر الجيد ان تكلفة تركيب الطاقة الشمسية للمنازل في السودان رخيصة جدا جدا وتشمل حتى البطاريات. في انظمة للبيوت تكلفتها ما بتنجاوز اربعة الف دولار شاملة البطاريات والالواح والمحولات وكلو... وفي انظمة اقل من كده كتير. وطبعا عملية جدا لانو الشمس اكتر حاجة متوفرة في السودان
Reply
2d
Edited
Mohamed Yassin Khalifa
Ali Mohammed Omar في بوسطن من يملك هذه التقنية عندو عدادين واحد للكهربة المنتجة والمستهلكة والتاني للكهرباء الخارجة منك لمنفعة الولاية!
Reply
2d

Author
بكرى ابوبكر
Wael Jamaladdeen سلام يا وائل و الله مشتاقين كيف و كيف اخبارك و ناس الجزيرة و الشرفة
فعلا يا وائل الألواح رخيصة ...لكن نحن هنا اولا حاجة بتفتش ليها الضمان و شعارنا الضمان امان
Reply
2d
Edited
Wael Jamaladdeen
بكرى ابوبكر يا باشمهندس تحياتي وان شاء الله انت بخير والاهل كلهم في السودان يكونو بخير مع الحرب والجوطة دي.. الحمد لله تمام.. طبعا نحن هنا الالواح والبطاريات وكلو صناعة صينية وانت وحظك مافي ضمانات كبيرة لكن عموما كويسه
Reply
2d
Edited

Author
بكرى ابوبكر
Wael Jamaladdeen الحمد لله يا وائل انك بخير و الاهل بالجزيرة بخير فعلا يا وائل الالواح صينية و رخيصة لكن هنا البطاريات غالية ...اها الضمانات دي نحن عندنا المهمة....لانو الصيني دا ما مضمون معا انو هنا بجينا فرز اول ...لكن الضمان اهم حاجة عندنا و ل ٢٥ سنة ولا ما دايره
Reply
2d


Shamam Shamam
شكرا يا باش مهندس لكن ما ادينا ارقام التوفير في الفاتوره ؟
Reply
3d

Author
بكرى ابوبكر
Shamam Shamam ما حا تدفع أي حاجة بل حا تجيك قروش من شركة الكهرباء و دا بعتمد علي استهلاك و عدد الواحك
Reply
2d
Edited
Shamam Shamam
بكرى ابوبكر شكرا ليك مره اخري . كان حاولت في ٢٠١٤ الوقت داك كانت التكلفه الابتدائيه عاليه جدا مقارنه بسعر فاتوره الكهرباء . كلامك دا خلاني اعيد التفكير .
Reply
2d
Hafiz Arkash
Shamam Shamam
سؤالك وجية ، لكي تحسب قيمة التكلفة الكلية زايد اهلاك الاصول والصيانة والاحلال والابدال بعد انتهاء فترة الضمان .
Reply
2d
Shamam Shamam
Hafiz Arkash
طبعا ذي ماقال باشمهندس بكري ابوبكر حسب الاستهلاك . تكلفه التركيب عاليه رغم النسبه الراجعه من الضرائب . عشان تقلل التكلفه للمدي البعيد لازم ترشد الاستهلاك عشان علي الاقل تجيك دفعيه راجعه من شركه الكهرباء . .
Reply
2d

Author
بكرى ابوبكر
Shamam Shamam يا حبيب ذي ما قلت في اول البوست ...امسك ال 30% Federal Tax Credit لانو حسب ما سمعتو ان الحكومة حا تقلل النسبة او تلغي الحاجة دي .....دائما العب علي المضمون ...و الباقي ساهل
Reply
2d


Sami Talab
Congratulations ❤️
Reply
2d
Kamal Alalla
Sustainability
Reply
3d
Deena Khalid
بكور اسمها تمزيق تمزييق حالك ما بتخليهو 🤣🤣انا من قبيل بقرا بقرا بحاول القى المعنى العلمي لتشريط دى 🤣🤣 افتكرتها من شريط😊
Reply
2d
Edited
Omeralfaroug Sheikhaldeen
لو قال شررريط كان اعمق..🤣🤣🤣🤣
Reply
2d

Author
بكرى ابوبكر
Deena Khalid دندنة تصدقني كنت قادي عربي ودين في الشهادة....ههههه
Reply
2d
Adel Abbas
Deena Khalid
قطيمة .... 🤣
Reply
2d
Mohammed Aburreesh
Deena Khalid
إنتو أكتبو تمزيييق ... ونحن بنركب الألواح.
التوقيع .... بكري أبصلعة.
Reply
18h


Mohamed Yassin Khalifa
أها كان الشمس قطعت مننا أو حردت وما خرجت نعمل شنو؟ بالجد أهنيك على هذا التحول البيئي والاقتصادي يا باشمهندس. طبعاً عندنا برنامج دعم ولائي عظيم في ماساشوستس ممكن يقدم ليك حتى 40 ألف دولار لتساعدك في هذا التحول. وموش كده وبس.. كمان ممكن تبيع ليهم الطاقة الزايدة عندك وتجيك شيكات نهاية كل شهر أو كل ربع سنة. وأجمد ما في هذه الطاقة أن العلماء عندنا في بوسطن توصلوا لتقليص حجم الالواح الشمسية مع زيادة منتوجها من الكهرباء. وحالياً تستخدم وكالة ناسا هذه التقنية لمد المحطات الفضائية بالطاقة مع تقليل حجم الالواح. وهنيئاً لكم!
Reply
3d
Basheir Altaher
Mohamed Yassin Khalifa
هل توجد هذه الألواح الجديدة بشكل تجاري يمكن الحصول عليها
Reply
3d
Mohamed Yassin Khalifa
Basheir Altaher لا والله يا بشير. وكالة ناسا هي من إحتكرت الشراء من الشركة المنتجة والظاهر عليها إستثمرت فيها ملايين. لكن أكيد ستعرض يوماً ما للبيع التجاري!
Reply
2d
El Mardi Abdullah
Mohamed Yassin Khalifa حلوة كان الشمس قطعت. نصدر ليك من السودان أصلا ما يتقطع وحارقانا حربق.
Reply
2d
Mohamed Yassin Khalifa
El Mardi Abdullah ههههه، والله الشمس دي لامن تعنقد عندنا وتعرد في الشتاء عندنا في شمال أمريكا البارد.. لامن نشتاق ليها. وطبعاً في الجنوب عند ناس بكري ديل بتطلع طول السنة وسخانتها نار!
Reply
2d

Author
بكرى ابوبكر
Mohamed Yassin Khalifa نرسل ليك شمس من اريزونا...٤٠ الف دي سعر التكلفة لكن ال ٤٠ الف في بوسطن ولا حاجة ......
Reply
2d


Yousri Burie
المافيا مابخليها مشينا من شمس الله دي تصديق والأمن القومي مهدد باستخدام الطاقة الشمسية برودوم للوراء الشمس
Reply
1d
Muna Ahmed
سبحااان الله حينما كنت في السودان كنت اعمل في منظمة رعاية الطفل العالمية برنامج السودان بشرق الجزيرة حيث امتدت فترة عملي سبعتاشر سنة
ومن ضمن المساعدات كان إدخال الطاقة الشمسية وفعلا تم لهم ذلك
وبعد أن اكتمل العمل التنموي في شرق الجزيرة تحول البرنامج إلى النيل الأبيض و كسلا و مناطق السودان الاخرى ولكن ظل المكتب الرئيسي في الخرطوم بالقرب من مشتل الرياض
وفي عام أربعة و تسعين شاءت الظروف أن انتقل مع اسرتي إلى سلطنة عمان وتزامن ذلك مع ظروف انتقال المنظمة خارج شرق الجزيرة
و اعتقد أن تجربة الطاقة الشمسية كانت ناجحة جدا خاصة في المصانع و المستشفيات في منطقة البطانة بشرق الجزيرة
Reply
2d
Ayman Mahmoud Ibrahim
انا ركبتها في السودان في مزرعة قبل تلاتة سنوات، في امان الله حتى الآن مستغني عن كهرباء الحكومة تماما 🫡
Reply
2d
Inti Osman
Ayman Mahmoud Ibrahim شنو الشركات الكويسة في المجال
Reply
1d


Alamin Bushari
يا ريس ... اسمها تمزيق ياخ 🙂
شرطته عينه هههه
طبعا تجربة ناجحة جدا بالرغم من كونك في امريكا وكدا
التجربة ناجحة وبكل المقاييس في السودان مع عدم استقرار الكهرباء وقطوعاتها الكتيرة
بصراحة وعن تجربة بشجع اي زول يعملها ويستغني عن الكهرباء العامة و (يشرط) 🙂 🙂 الفاتورة ويرميها في وشهم كمان.
تدفع مقدما حق الكهرباء دون ان تتمتع بها.
لي مقال اعتقد منشور في سودانيز اونلاين وهي سلسلة مقالات باسم استخدامات التقنية العرجاء في السودان تناولت فيه معاناة الشعب مع بداية الحرب وصعوبة شحن العدادات مسبقة الدفع او كما يسمونها الجمرة الخبيثة.
تحياتي
وشكرا لمشاركة التجربة
Share what you know yo benifit others
Reply
2d
Edited
حامد بدري
Alamin Bushari تشرييط قحة ووقعها يناسب السخانة
Reply
1d
Inti Osman
تجربة جميلة و نحتاجها . الشركات في السودان تعبانة
و اسعار خرافية
و لا يوجد دعم رغم شمسنا الحراقة
الامر يحتاج تحريك شركات كبيرة للدخول السودان
و تحياتي
Sudania2000

سلام
انا من قرية في شمال كردفان ريفي امروابة،،، الاهل بالعون الذاتي قدروا يحفروا اربعة ابيار موية للشراب وللبهايم ويادوب كانت مكفية، استعانوا بي شركة للطاقة الشمسية وبدينا في تركيب الألواح السنة دي لي واحدة من الآبار، للأسف وللظروف الححاصلة تعرضت الحلة لي عدد من الهجمات وسرقة عدد من ألواح الطاقة وتوقف البير في ظرف الناس في اشد الحوجة ليها نسبة لي زيادة الاستهلاك.
التجربة كانت ناجحة وساعدت في تقليل تكلفة الجازولين، ان شاء الله تستقر الاوضاع وتكون لينا جكة تاني ونبدا، على الاقل عندنا الأساس والتجربة،، دعواتكم

شكرا tabaldy للمداخلة و الزيارة