إستقالة فولكر و الميديا

06:39 AM September, 14 2023

سودانيز اون لاين
Hamid Elsawi-Calgary, Alberta, Canada
مكتبتى
رابط مختصر

أثارت إستقالة فولكر ردود فعل متباينة و تعليقات كثيرة
في وسائط التواصل الاجتماعي و الجلسات الخاصة و العامة
لم يخفي البعض فرحتهم و شماتتهم و أعتبروا الحدث عبارة عن
ضربة لمليشيا الجنجويد و حلفائها في ق ح ت كما أورد الأخ
الهادي في بوست مجاور.
إستوقفتني في هذا البوست مداخلة لزميل البوست ناصر الذي أكن
له كل الاحترام و التقدير رغم إحتلافي معه لما يتمتع به من حرص
و جدية في البحث عن الحلول فضلاً عن سعة باله. ذكر ناصر في مداخلته الآتي:

Quote: ممكن تورينا كيف إستقالة فولكر ضربة لمليشيا الجندويد ؟؟؟؟ ممكن ترتقي شوية من مشاعر الشماتة دي وتتناقش في مستقبل بلدك بقليل من الجدية ؟؟؟؟؟

و هذا ما دفعني لكتابه هذا البوست و ايضاً بوست آخر لزميلة البوست أميرة حسين.
و هو رأي خاص و لكي أوضح وجهة نظري أسمحوا لي أن أخرمج شويه
لو عندك مشكله في البيت بتاعة كهرباء ما ممكن تجيب سباك عشان يصلحها
و لو عندك مشكله في الفيزياء ما ممكن تمشي لي واحد عندو دكتوراة في التاريخ
عشان يشرح ليك. و اي مهمة عندها
JOB description
و فولكر عندما حضر للسودان كان عندو مهمة محددة للمساعدة في التعمير
و هذا يتطلب أن يتعامل مع ناس جادين في التعمير
لكن وجد نفسه بتعامل مع ناس جادين في الهدم و التكسير و الحرب
حاول أن يقرب وجهات النظر و يعمل قدرته,, و لكن الحرب وقعت
و مهمته أساساً مساعدة في التعمير و ليس وقف الحرب و توصيل المساعدات
الانسانية و علاج المرضي. فمن الطبيعي أن يبتعد و يفسح المجال لشخص آخر
متخصص في ذلك, و خيراً فعل.
تحتاج لشخص بنفس مؤهلاته أم هو نفسه و لكن ليس الآن بل بعد أن تقف الحرب
و كون جاهزين للتعمير و البناء.
أتمني له التوفيق في مكان آخر و بلد ثاني ليوظف خبراته في تعميرها.
و لا داعي لمحاولة استثمار هذه الاستقالة لأغرض و أجدة خاصة كما
يفعل دعاة الحرب الاستقالة لان المهمة لم تعد مناسبة للسبب الذي حضر
من أجله بهذه البساطة
زول جابوهو لي شغل كهرباء لقي روحه شغال سباكة, مشي قال الشغلانة
دي عاوزه سباك ما كهربجي, قمة المهنية
أتمني تكون فكرتي وضحت

الإستقاله دي لو كتب فيها
إنتو رسلتوني لي بلد عشان اساعد في تعميرها
و أساهم في ذلك, لقيت ناس البلد قاعدين يكسروا فيها و يكتلو بعض,
عشان كدة مهمتي بقت مستحيلة شوفوا ليكم واحد تاني غيري
ليهو حق و لا لأ
الإستقاله هي رساله للعالم بأن السودان لم يصل مرحلة بناء و تعمير و مهمتي
أصبحت صعبة, بعد إنقلاب 25 و بعده الحرب, و بعد ده تلقي واحد فرحان
بالخيبة و مفتكر الاستقالة ضربة لمليشيا الجنجويد و حلفائها في ق ح ت و يهلل لها,,,,
الاستقالة ضربة و وقف للتعمير و البناء و التطور يا الغبيان.
لا للحرب
و لا سودان دون محاكمة كل مجرمي الحرب لا أستثني أحدا
و بالرغم من ذلك
ح نبنيه البنحلم بيه يوماتي