المسرحية...وسياسة الافقار - impoverished

07:17 PM August, 27 2023

سودانيز اون لاين
سيف اليزل برعي البدوي-
مكتبتى
رابط مختصر

المسرحية:-
الجنجويد و الجيش
اتفقوا يختلفوا
بي غتغتة وتحريش
في نصنا اشتبكوا
ما رضيو انو نعيش
قالولنا تدكوا
خلو البلد ترحل
وسابو الحريم يبكو
ملصو الأمان فيهو
وخلونا ام فكو
الشعب سابهم وفات
وللبيوت خلّا
فضيت شوارعنا
واتشردت حِلة
قلنا الصباح نرجع
والحرب تتحلا
قالو الحيرجع ده
من فوق حيتبلى
ادو الشباب دوشكات
قالو الوطن نادى
لازم نقيف في النار
وللغزو نتفادى
وهو الغزو جابو منو
الجابو يتجازى
ونزلنا دوام حرب
والقادة في اجازة
والحرب امتدت
شهور بتتعدا
كم زول فقد مالو
وبيوت بتتهدا
الناس بقت تشحد
وما لاقيه تتغدا
وغلبهم يسدوها
قام وسعو القدّا
اصلو الحرب لازم
حتماً ولا بُدّا
ولو قلتا لا للحرب
حتكون بدون مبدأ
باكر حيتلاقو
من تاني ويتصافو
والقائد يبقى رئيس
ويملوها اكتافو
اصلو العساكر ديل
من الله ما بخافو
وياكلو الفضل من خير
في خيرنا مابعافو
والشفنا نحن كضب
هم غايتو ما شافو

سيف اليزل البرعي ...
بوسطن...........
إحفظ بيتك بعد الحرب
💟💟💟💟💟💟💟
الجنجويد وسياسة الافقار - impoverished
.
المقال ده تعقيب بسيط على افكار قوى الحرية والتغيير عن انتهاكات الحرب ووصفها بي تفلتات الطرفين .
لما نقول تفلتات فمعناها بنتكلم عن جرائم يتم ارتكابها بصورة شاذة بدون اي تنسيق او هدف بعيد المدى . وبدون توجيهات وبدون تنظيم ليها .
.
لما تاخد التفلتات دي شكل من الصورة الجماعية والتنظيم والحماية هنا بتبقى سياسة راتبة او عمل مقصود ومنظم .
في خلال الحرب دي شفنا تفلتات وشفنا جرائم حرب ممنهجة . فمثلا الاغتصابات حسب التفسير الفوق تعتبر تفلتات. لكن القتل خارج القانون للمدنيين باعتبارات الهوية او الانتماء للاجهزة النظامية فده عمل منظم ويعتبر سياسة للجنجويد .
.
من كل الجرائم دي والسياسات دي ما وجدت العن وامر واخطر من جريمة الافقار المتعمد للمواطنين .
الجريمة دي بترتكب بي صورة منهجية كبيرة جدا جدا جدا . وشفنا البيوت والمصانع البتدمر والموجودات والمدخرات والسيارات البتنهب وقفل مجالات كسب الرزق المستقبلية بي صورة ضخمة جدا .
الافقار ده ما حاجة عشوائية . دي سياسة انتهجتها مليشيات ودول كاملة زي الحوثيين مثلا وال-صه-ينة . واهدافها واضحة جدا
ففي فترة الحرب سياسة الافقار بتدفع المواطنين للهجرة القسرية وبعد الحرب اذا رجعوا بيكونو عرضة لكل انواع جرائم الفقر . فضلا عن انهم حيضطروا يبيعوا اراضيهم بي اسعار مجحفة عشان يقدرو يعيشوا .
.
فمثلا اتخيلوا اسرة عندها بيت واحد ومصدر دخلهم كان امجاد . بعد الرجوع حيلاقوا بيتهم مدمدر غير صالح للسكن وماعندهم مصدر دخل وعندهم اطفال دايرين يعيشوهم. فاسلم حل يبيعوا بيتهم وياجرو او يشوفو بيت اقل عشان يقدروا يوفرو ليهم مصدر دخل يعيشو منه .
وفجأة حيظهروا ناس يشتروا العقارات المعروضة بي اسعار بخسة لصالح جهات معينة وكدة الاستيطان حيتم لكن بصورة ناعمة ده اذا فشل يتم بقوة السلاح .
كمان الافقار ده حيكون سبب لظهور كل انواع الجريمة المنظمة والغير منظمة ونحسمه بي تجارة الاعضاء واسواق النخاسة وتجارة المخدرات وهكذا .
.
موضوع الافقار ده اكبر من انه يكون تفلت او نتيجة عرضية للحرب . ده عمل موازي للعمل العسكري ومحاولة للتغير الديموغرافي بي صورة ناعمة جدا جدا .
فمثلا اذا دخلوا ناس في منطقة مقفولة بي القوة . عاجلا ام اجلا حيطلعوا او يتم اخراجهم .
لكن لما يجوا كاصحاب ملك ومشترين للعقارات ما في قوة حتقدر عليهم زي ما حصل مع الفلسطينيين .
.
يبقى السوال هل الجنجويد بيمارسو سياسة الافقار كدة من تلقاء نفسهم ؟ ولا ده تخطيط لي ضرب ديمواغرفيا الخرطوم من جهات اخرى ؟؟
طبعا في ناس الكلام ده بتشوفو بعيد . وحيقولو انه الدولة حتعوض المتضررين .
فخلونا ناخذها كاحصائية غبية سريعة كدة
الشرطة اعلنت عن فقدان ١٥ الف سيارة ودي فقط المبلغ عنها .
الصناعيين ورجال الاعمال اعلنو عن دمار اكثر من ٤٠٠ مصنع .
اسواق الجوالات في السوق العربي فقط اعلنوا عن خسائر اوصل لي ٥٠٠ مليون درهم ( كأجهزة) فقط بدون حساب اي شي اخر .
هل الدولة حتقدر تعوض الخسائر دي كلها ؟
طيب
هل تعلموا انه في ناس ما استلمت تعويضاتها عن حرب الخليج حتى اليوم رغم استلام الدولة لاموال التعويض من عشرات السنين ؟؟؟
كل الاحصائيات المنطقية بتقول انه التعويضات حتكون رابعة الغول والعنقاء والخل الوفي .
ده جانب من الحرب حتى الان مافي جهة تطرقت ليهو وحيبقى مصيبة اكبر من الحرب ذات نفسها . والدولة ما حتقدر تقلل اثارها بي اي صورة من الصور .
ويبقى الاهم انه دي ما تفلتات ولا نتيجة طبيعية للحرب .
النتيجة الطبيعية موت ودمار محدود بحدود الحرب اما الاشياء البتتم في الحرب عندنا فدي اعمال ممنهجة موش مفروض ندينها وخلاص . دي مفروض القوى السياسية تعمل لي وقفها
وهنا منبت فشل الحرية والتغيير في اعتبارها انه الجرائم دي مرتبطة بالحرب فقط وانها انتهاكات وتفلتات.
لما الجيش يقصف حي مدني بالطيران دي انتهاك
لما الجنجويد يدخلوا حي لسرقة بيت دي اسمه تفلت .
.
لكن لما الجنجويد يخلي منطقة كاملة ويدمر منطقة صناعية كاملة ويعتمد ضرائب ويستقصد تصعيب الحياة لدفع البقية للهجرة دي اسمها سياسة افقار وتهجير قسري ودي جرائم حرب .
طيب ليه السياسيين دي بيغفلوا التوصيفات الحقيقية دي ويعتمدوا كلمات فضفاضة ؟.
ببساطة لانهم مغيبين عن الشارع زي مالقادة العسكريين في الطرفيين مغيبين عن حقيقة البيحصل . ولانه كل شخص حدد هدف وبقى ما بيشوف غيره . فالسياسي هدفه الحرب تقيف ويرجع السلطة وديلك هدفهم ينتصروا فقط .
ومع ضيق الافق ده كل جهة ذات مصلحة بتمرر اهدافها بالملي وبي سكات والنتيجة المؤكدة انه بعد الحرب السودان حيكون تابع رخيص لمن يدفع فقط
منقول
يلا الناس ما تبيع لانه ممكن يشتري زول صه-يوني زي ما عملوا في فلس-طين الناس تكون واعيه لو باعت معناها باعت السودان بيتك لو سليم حبه حبه رجع عفشك ولو بيتك اتهدم في بيوت تركيب جاهزه ولو ما مستطيع ابنيه بالزنكيه ولو ما مستطيع بالجالوص ولا رواكيب ولو شايف نفسك ما بتقدر تعيش في البيت أجر بيتك واقعد في الولاية وكل شويه صلح فيه حبه حبه والناس لمن ترجع ما ترجع فاضيه تجيب معاها بذور وتزرع في بيوتها ونعمل مبادرات تاكل من بيتك وتبيع لجارك أو تقايض معاه بحليب او بيض مافي زول يرجع فاضي لو عندك منقه جارك عنده بصل ولو عندك برتقال جارك عنده طماطم جيبو معاكم سبايط تمر وبليله وفول مصري وحاجات ما بتخرب بالساهل نتعايش على المبادرات ايد على ايد تجدع بعيد اوعكم تسلموا وتستسلموا بكره بيجوكم في الولايات لو خليتوهم يستوطنوا الخرطوم ابقو الصمود محتاجين ناس واعيه تخطط وترسم لينا خريطه ما بعد الحرب
اللهم هل بلغت اللهم فاشهد
وزعوا البوست عشان الفكره توصل للكل ويكونوا واعين بالحاصل
ابقو الصمود ماتبقو زيف
#جرعه وعي
منقول.....
Sent