الشوارع لا تخون!

09:07 AM August, 04 2023

سودانيز اون لاين
أبوبكر عباس-الإمارات
مكتبتى
رابط مختصر

غرينسبورو نورث كارولاينا:
بالرغم من ترددي لزمن طويل على أمريكا، لكن أول سنة أقعد فيها زمن طويل وصل لعشرة أشهر كانت سنة ٢٠٢٢،
اشتغلت فيها توصيل ناس وبضائع وأكل، قدرت غطيت منها مصاريفي الشهرية دون تعب مع وفر قليل يتيح لك مساعدة أهلك،
أستمتع فيها بالونسة والمكاواة في قهوة ستاربكس مع شلة سودانيين كبيرة.
خلال السنة دي كان عندي احتكاك كبير جداً بالمشردين الضائعين وفي المشردين المشردين خارج الشيلتر الحكومي،
عرفتهم عن قرب ومشاركة دورة حياتهم السنوية بالمدينة،
كيف يأكلون؟
أين ينامون في الصيف؟
أين ينامون في الشتاء وعز المطر؟
كيف يتحصلون على مخدراتهم ومشروبتهم الكحولية؟
شنو مشكلتهم مع العمل والسيستم؟

لالا عمرها زي تلاتة وعشرين سنة لاقتني في محطة بنزين في شارع سميت وهي تعرفني، قالت لي عليك الله، وصلني الآر سي*،
البت زنجية جميلة لكن المخدرات أهلكتها، وصلتها لكنها سرقت تلفوني، وأبت ترد لمان حاولت الاتصال من تلفون تاني، جيت راجع الآر سي لقيتها ما فيشا

لاقيتها بعد أيام في نفس المحطة، قلت ليها وين التلفون؟
قالت لي بعتو بعشرين دولار،
قلت ليها لو قلتي لي دايرة عشرين دولار كنت بديك،
اتحركت مشت لعربية دايرة تبيع ليها وما اشتغلت بي!!!

ما عارف أوصف ليكم الناس ديل كيف؟
موش المفروض تكون لمان لاقتني خائفة أو مُحرجة؟
أبداً في وجوهم علامات وانفعالات لا تعرفها في البشر الذين تعاملت معهم خلال مسيرة حياتك،
مرات تشوفها تبلد أحاسيس، مرات تشوفها هيام،
يعني البت دي في نفس لحظة عتابي لها ممكن تطلب مني دولار تاني،
مهما تعمل معاهم من جميل ما عندهم ليك حاجة غير شكراً في لحظة الجميل،
تركيزهم كلو بكون انحصر في توفير حق المخدرات والكحول،
المهم؛
ما يكون عندنا تجاههم رد فعل عكسي وعدم التعاطف معهم،
متى ما طلب منك واحد فيهم دولار أو خمس دولارات أديهم

RC or IRC

Interactive Resource Center is a nonprofit organization management company based out of 407 E Washington St, Greensboro, North Carolina, United States.
Provides a supportive community for people in Guilford County who are experiencing homelessness, or are at risk of becoming homeless. The Interactive Resource Center offers showers, laundry, barbershop, phone bank, mailroom, computer lab, medical clinic, gardens, a bike maintenance area, among other critical resources.

الجمعية دي هي محطة المشردين خارج الشيلتر الأساسية،
توفر لهم خلال أيام عمل الأسبوع ولحدي الساعة الرابعة الحمام، الحلاقة، القهوة، عنوان تصلهم فيه الجوابات، الانترنت المجان، المساعدات من فرش وبطاطين ومساعدات الاتصال الممكنة لتغيير وضعهم.