جديّة الشيوعيين

07:26 AM August, 01 2023

سودانيز اون لاين
أبوبكر عباس-الإمارات
مكتبتى
رابط مختصر

جديّة الشيوعيين الشديدة:
طبعاً بروفسور علي المك زول شعبي جداً وبحب القفشة والمرح والحياة الشعبية الساهلة الخالية من القيود زي محجوب شريف، قام أيام نميري استقال من الحزب الشيوعي، وبرر استقالته بأسباب فكرية،

أها جات الانتفاضة ونقد طلع من "البدروم"، لاقى علي المك وكان حريص يناقشو في الخلاف الفكري دا وقام سالو،
علي المك قال ليهو: والله، يا محمد، أخوي، ما عندي خلاف فكري ولا حاجة، لكن شوف، أكون ماشي اجتماع للحزب او مهمة وأجي ماشي جنب دار الرياضة أمدرمان وتكون كورة مسخنة في الميدان والمدرجات تغلي حيث الونسة والقفشة، وستات التسالي والفول وقصب السكر، ما بقدر أقاوم ما أدخل دار الرياضة، وفي نفس الوقت الزملاء ح يزرزروني في حالة الغياب،

فشنو؟
الحزب بتاعكم دا حزب عظيم، لكن والله، ما بقدر على الجديّة دي.

مراجع:
ما في داعي عشان الناس ما تخاف من الونسة معاي

Quote: الحزب بتاعكم دا حزب عظيم، لكن والله، ما بقدر على الجديّة دي.

دا خلاف فكرى ووجودى كبير يا مستنيــر.. ما خلاف بسيط
تبرير دلوماسى غاية الذكاء من العالم الجليل الراحل على المك. كان يمزح ولا يقول الا حقاً.. او السهل الممتنــع.
يعنى باللاى الشيوعيين من زمان لو قعدوا مع ستات التسالى والشاى وتبادلوا القفشات موش كان أكثر فاعلية والتصاق بالشعب من اجتماعاتهم (السريـة)
أو الجهرية اللى ما عندها نهاية وما عندها نتائج إيجابية ؟

Quote: يعنى باللاى الشيوعيين من زمان لو قعدوا مع ستات التسالى والشاى وتبادلوا القفشات موش كان أكثر فاعلية والتصاق بالشعب من اجتماعاتهم (السريـة)

ابو الريش كيفنك و كيف الصحة يا زول ؟

يا محمد .. و شهادتي مجروحة ..
مافي حزب قعد مع من يشابه ستات التسالي و الشاي وكان مهموم بالشعب اكتر من الحزب الشيوعي .. اما اجتماعاتهم السرية فانت سيد العارفين المطاردة و السجون و فزاعة انهم ملحدين الى اخره لتخويف الناس و تكريه الناس في الحزب ..

هلا أبو الريش،
هاشم صاحبي علق البوست دا ب:
"الفنانين ديل صعب يتنظموا ياخ، ما بنضبطوا ما بنضبطوا. ثم أن خرمجاتهم مرات بتكون أفيد وأجدى لمقاصد المنظمين."

علي مك فنان طليق وجوده خارج التنظيم يخدم التنظيم أكثر

المهم؛
التنظيمات بالرغم من ضروريتها، لكنها بتحكرك

المهم تاني؛
سمعت القصّة دي من زول شيوعي، وقلت أوثقها وفي نفس الوقت مداخلات الناس ممكن تأكدها أو تنفيها.

أهلا بشمهندس يحيى
أرجو أن تكون طيب
شكرا على السؤال وأنا بخير الحمد لله.

ما عارف إن كان لهذه علاقة مباشرة بالنقاش الدائر.. فى سبتمبر 2002 وفى قمة الجدل اللى كان دائر عن المفاصلة وما إذا كانت مسرحية ام جد
زار البشير نيويورك لحضور إجتماعات الأمم المتحدة وقد قابلته وسألته وحضرت له لقاء مع الجالية السودانية فى نيويورك، أذكر من ضمن الحضور
السيد بابكر ... عضو الحزب الإتحادى الديمقراطى (مع الأسف نسيت الإسم الكامل) ثم حضرت جلسة الأمم المتحدة ضمن وفد السودان.. المهم سألت
البشير كما تحدث هو فى الموضوع فى إجتماعه بالجالية، ولم أكن أعول على الإجابة الشفهية لأنه يكذب ولكن على لغة الجسد ولحن الكلام. وفهمت ان الموضوع
كان فراق الطريفى لجمله بدون رجعة.. وأثناء جلسة الجمعية العموميـة كان السودانيون فى المنطقة خارج مبنى الأمم المتحدة يتظاهرون ضد البشير
ولما كتبت فى قروب السودانيين sudsn-L list قبل المنابر ما تظهر...رد على الأخ .... وقال موش عيب نحن نتظاهر فى الخارج تحت الشمس الحارقة
(كان الوقت صيفاً) نحن نتظاهر فى الشارع وعرقانين وانت جوة فى مبنى الأمم المتحدة المكيف؟!! قلت ليه طيب هسى واحد برة يهتف فى الشارع تحت الشمس
وواحد قاعد جوة تحت المكيف.. العاقل منو والمجنون منو؟!! هههههه طبعاً كان صديق وكلامى كان مزاح وفهمه كذلك

ابو الريش يعني انت كوز مدغمس