حأسأل عن بلد رايح وافتش عن بلد سايح واسأل عن امانينا اللي ما بتدينا صوت صايح وأسأل وين مخابينا إذا جانا الزمن... لا فح واسأل عن بلد مجروح وعارف الجارحو ليه جارح وابكى على بلد ممدوح وعارف المادحو ما مادح واحلم بي حلم مسروق لا هو الليلة لا امبارح أعلق في جناح سفري خطابات لي زمن فجري وادخل من درب سري لكل مضاجع الأحزان واضفِّر من شجر بلدي بروقاً مارقة من صدري حأسأل عن بلد غاطٍ لحدِّ الليلهْ في الوجعة انط فوق سرجي واتْحزَّم أقوم من وقعة لي وقعة أخُتْ ايدي البتوجِعْني على السأم البراجِعْني واسأل.. يا وطن يا بيتنا ليه شوقك مواجهني ليه حبك مجهجهني وليه تاريخ زمن خسران موكّر لسَّه في شجني؟ حأكتب لي شجر مقطوع مسادير يمكن يتحرك خطابات لي طفل مجدوع يقوم يجرى يقع يبرُك رسالة لكل قُمْريّة إذا دم الشقا اتوزع على كل البيوت ما تْرِك واسأل.. عن وطن رايِح واديكم خبر جارح: بأنو جميع جموع الناس حيفضلوا لا كراع لا راس ونشترى في الدكاكين يوم مسابح من دموع الناس مساحيق من هموم الناس زهج يتْعَبّا في الأكياس ونعلن في المزاد علنا وترغي الجوقة والأجراس: "!نبيع الطفلة والكراس" واصرَخ ! ياوطن! يا بيتنا ليه ما تبقى لينا الساس قدر ما تجري فيك أفكار... يزيدوا الحبس والحراس قدر ما تجري فيك الخيل تدوس الهيبة والإحساس واسأل يا وطن رايح اذا كل القبور دخلت بيوت الناس بلا اسئذان بلا صلوات بلا أكفان جريمة اسائل الدفَان؟ حريمة طلب تمن قبري من البايع في أي مكان؟ واقولك يا وطن رايح واقولك يا وطن آمر سلام النفس ما كافر ولا كافر ولا كافر
Post: #2 Title: Re: واديكم خبر جارح: بأنو جميع جموع الناس حيفض Author: يحي قباني Date: 07-30-2023, 04:21 AM Parent: #1
معقول بشر من كتب هذه الكلمات ؟
هل رأي الدوش السودان و ما آل اليه في أواخر عهد الكيزان .؟ اليس كل ما كتبه وقع و من اجل ذلك خرج الشباب !!!
واسأل.. عن وطن رايِح واديكم خبر جارح: بأنو جميع جموع الناس حيفضلوا لا كراع لا راس ونشترى في الدكاكين يوم مسابح من دموع الناس مساحيق من هموم الناس زهج يتْعَبّا في الأكياس ونعلن في المزاد علنا وترغي الجوقة والأجراس: "!نبيع الطفلة والكراس" واصرَخ ! ياوطن! يا بيتنا ليه ما تبقى لينا الساس قدر ما تجري فيك أفكار... يزيدوا الحبس والحراس قدر ما تجري فيك الخيل تدوس الهيبة والإحساس واسأل يا وطن رايح اذا كل القبور دخلت بيوت الناس بلا اسئذان بلا صلوات بلا أكفان جريمة اسائل الدفَان؟ جريمة طلب تمن قبري من البايع في أي مكان؟
Post: #3 Title: Re: واديكم خبر جارح: بأنو جميع جموع الناس حيفض Author: يحي قباني Date: 07-30-2023, 04:22 AM Parent: #2
Post: #4 Title: Re: واديكم خبر جارح: بأنو جميع جموع الناس حيفض Author: حيدر حسن ميرغني Date: 07-30-2023, 05:50 AM Parent: #3
سلام قباني الشعر كله حِكمة الدوش كشاعر مرهف الاحساس كان يعتني بدقة بكل تفاصيل الحياة. قصيدته هذه تصوير بصري لكل ما اعتمل في دواخله من هواجس مربكة لا بصيص أمل فيها كان يقرأ المستقبل بأخذ العظة من الماضي ، وما ماضينا إلا وكله إحباطات وآمال غير محققة الخبر الأكيد .. صدقه في ما أخبر
Post: #5 Title: Re: واديكم خبر جارح: بأنو جميع جموع الناس حيفض Author: Yasir Elsharif Date: 07-30-2023, 11:53 AM Parent: #4
سلام يا قباني
بالله شوف
Quote: يا وطن رايح اذا كل القبور دخلت بيوت الناس
Post: #6 Title: Re: واديكم خبر جارح: بأنو جميع جموع الناس حيفض Author: Ali Alkanzi Date: 07-30-2023, 12:17 PM Parent: #5
سلام عليكم كلكم وليت السلام يأتي الينا والدمع يكاد يهطل من عين حزينة ووجه لا فرح فيه فقد غادرنا الفرح يا قبة اول مرة اسمع نغمة منذ اندلاع الحرب وهي تحكي نبؤة صدقت حين يقول الشاعر: واسأل يا وطن رايح اذا كل القبور دخلت بيوت الناس بلا اسئذان بلا صلوات بلا أكفان حسبي الله ونعم الوكيل
Quote: سلام قباني الشعر كله حِكمة الدوش كشاعر مرهف الاحساس كان يعتني بدقة بكل تفاصيل الحياة. قصيدته هذه تصوير بصري لكل ما اعتمل في دواخله من هواجس مربكة لا بصيص أمل فيها كان يقرأ المستقبل بأخذ العظة من الماضي ، وما ماضينا إلا وكله إحباطات وآمال غير محققة الخبر الأكيد .. صدقه في ما أخبر
تحياتي حيدر ..
هاشم صديق حينما سئل هل من شاعر كتب قصيدة استفزت شاعريتك او تمنيت ان تكتب مثلها ؟ فكان رده: ( الدوش كلما يكتب قصيدة جديده .. انا طوالي بندهش و ببدأ اتلمس في ادواتي الشعرية )
عمر الدوش من مجموعة قليلة جدا من الشعراء في عالمنا اجمع له شفافية الانبياء فيما يرى و يتصور ..
