أحمد هارون قدا البيعة منقول

10:43 AM July, 23 2023

سودانيز اون لاين
Yasir Elsharif-Germany
مكتبتى
رابط مختصر

Quote: (( احمد هارون قدا البيعة)) د احمد الطيب إبراهيم العبارة دي بتاعة سماسرة وبقولوها لما يكون عندهم زبون اقنعهوا وداير يشتري فجأة يجي واحد سمسار عارض، والزبون كراهية للسمسار الاخير أو عدم ثقة فيه ينط من البيعة. اها ده بقولوا ليك قدا البيعة وتبقي البيعة غناء شالو الهواء. اصلا الشغاللانية بيع وشراء وتجارة دين واخيرا تجارة وطنية بعد المتاجرة بالدين ما جابت مريسة تام زين .... الحركة الإسلامية دي من زمان بتبيع وتشتري في الشعب السوداني و انا ما مزعلني البيع بقدر ما زعلان من الناس التمنهم رخيص ... __ في واحد اسمه (ود علي) وشي بي عثمان دقنة للانجليز مكان ما هو مختفي في الجبل واخد قروش و هو جاي معاهم عشان يوريهم مكانه ويأسروه لما شافو عثمان دقنة قال ليه قولته المشهورة ( بعتني يا ود علي للانجليز أن شاء الله بعتني بالغالي ما بعتني بالرخيص ).. الحركة الإسلامية بتشتري بالرخيص عادة و بتبيع بالغالي ... بشتروك بي كم حديث و آياتين تلاتة ودي ما رخيصة لو كنت بتفهم دين ودخلت بي فهم صحيح و ببيعوك بالدولار وبي الاتفاقات السياسية و بي كراسي السلطة ... الدعم السريع بشتري بالغالي وببيع بالرخيص ...يعني ممكن يشتريك بي بوكسي دبل كابينه وانت تكون زول عولاق ساي وناس حلتكم ما يدفعوا فيك هللة و لو قرروا يبيعوك تمنك طلقة بي سبعة جنيهات فقط و تكبيرتين من الاشاوش ( الاشاوش يالشاء و ليس بالسين أو الشين يا شين ) . __ الإنقاذ لمن عملت الانقلاب الترابي جمع معظم كوادر الحزب الشيوعي الفاعلين في قاعة الشارقة بالخرطوم ... طبعا جمعون بتاع ناس الأمن داك نص الليل بدل يفتحوا الباب ينطوا بالحيطة ( شغل ارهاب وكده ).. جمعهم و قال ليهم شوفوا يا اخوانا البلد دي نحن استلمناها بالضبة والمفتاح و الشعب السوداني ده نحن بنعرف نطلعوا بي حديث حديثين و نرجعوا بي آية آياتين ... المشكلة القدامنا انتوا ديل بس ما الشعب . اي واحد منكم عنده واحد من خيارين الاول تشيل شنطتك وتتخارج و نحن معاك لحدي باب الطيارة وممكن نديك التذكرة مجانا .. والخيار التاني تقعد بي ادبك ويا دار ما دخلك شر و قرأوا سورة العصر و الترابي طلع ... اها شيوعين كتاار شالوا شنطهم وهاجروا وفي ناس هسا منهم بقوا مواطنين في الدول الرأسمالية ذاتها والان بقوا راسماليين كبار . __ وصدقت الحركة الإسلامية في وعدها عندما حاكمت د مامون محمد حسين بالاعدام و تم تصفية د علي فضل بمسمار في رأسه وهو معتقل سياسي في سجونهم .. بعدها حمل قليل من الشيوعيين السلاح محاربين مع جون قرنق و مارس البعض منهم نضاله من وراء حجاب . __ الكلام ده طبعا زماااان قبل 34 سنة و كان الشعب السوداني غير الشعب الان و ما كان في موبايل ولا انترنت ولا كان في غوغل .. __ كان الشعب وقتها يتلقي المعلومة من جرائد الحكومة و اذاعة امدرمان و تلفزيون السودان المرغم أن يكون بوغا للنظام ... هسا عليكم الله القاعد يحضر تلفزيون السودان وللا ياخد منه معلومة منو فيكم ؟ شابكننا الإذاعة سقطت والإذاعة اتحررت ...الإذاعة اصلا ساقطة من يوم أصبح الإعلام يوجه بواسطة ضباط الأمن . المهم في الأمر أنه هسا الشعب اختلف والظرف اختلف و اصبح الشعب السوداني أكثر فهما و الحركة الإسلامية أقل تنظيما و توفي شيخ الترابي ولم يبقي من كوادر الحركة الإسلامية الا التراب الذي يثير كثيرا من الغبار عند المواقف الوطنية . __ اكبر دليل علي ذلك ظهور احمد هارون في كسلا حرا طليقا و محروسا بالاستخبارات الشئ الذي أفقد القوات المسلحة جزءا كبيرا من التعاطف الذي نالته بعد جرائم الجنجويد التي طالت المواطن السوداني .... ظهور احمد هارون قلب البيعة وخلي الزبائن تتوجس خيفة من مساندة القوات المسلحة و حتي من حمل السلاح شعر بالاحباط والان معظم المواطنين بقولوا ليك لو الحرب بتنتهي برجوع الكيزان خليها تستمر . __ احمد هارون ورفاقه عند الشعب موقوفين علي زمة جرائم ومطلوبين للعدالة العالمية وهم من ساهم في صناعة وتفريخ الجنجويد وان ناصب احمد هارون حميدتي العداء في مرحلة من مراحل الإنقاذ . __ اعتقد وبعض الاعتقاد صحيحا أن حركة الاستنفار في كسلا بدأت ناجحة و لكن ظهور هذه المجموعة التي اذاقت الشعب السوداني الهوان قلب البيعة و أحبط المؤيدين فلن تفلح قوات مسلحة في حسم التمرد والفارين من العدالة يتسنمون مبادرة مساندة الشعب للجيش . وكان الله في عون جنود القوات المسلحة غير المسيسين وفي عون المواطن السوداني الذي يموت سنبلة وينزح سنبلة و يلجأ سنبلة و تحتل مساكنهم وتنهب ممتلكاته سنبلة . ودمتم سالمين د احمد الطيب إبراهيم استشاري جراحة الكلي والمسالك