عاينت لمواضيع المنبر لقيتها بايخة ولا تستحق تشتريها بهللة، قلت أنكت لي موضوع من مواضيعي الجميلة أبركم بيهو، يمكن يمر ضيف من هنا، ما دايرو يمشي جيعان.
حسين ترمس: في الحساب عمنا، ساكن كمير العوضية، عُدّة كيلومترات من المتمّة، جدو كان شيخ خلوة اسمو الفكي ترمس. الفكي ترمس الصغير كان بحب البكيات حب شديد، بوقت يجي المقابر بعد ناس الواسوق ديك يكونوا واسوا القبر وختوا ليك الشاهد، جنو وجن غبار المقابر وغلاط الحفارين في مواسات ود اللحد بكلفت ليك الفاتحة مع أهل الميت، وبمشي يحرس ليك الفراش لو في موت في الكمير، اجازة للخلوة سبعطاشر يوم موت في الحلال المجاورة؛ اجازة عشرين يوم، بحسب حق المشوار بالحمار تلاتة يوم لكل الحلال لحدي المتمة، الحلة الوحيدة القال مقاطعها وما بحرس فرشاتا، هي الكردة ليش؟ قال ديل أصلهم دناقلة وعودم في العباس عود مرة! بحب اللهط حب شديد، خاصة دمعة العشا موصي النسوان، باقي الحلل كلو يجهزوا ليهو لطلبة الخلوة الطلبة يسمهم في اللحم بشد ليهم اللوبا عفن بالليل لو جيت ماري جنب مسيد الخلوة؛ لازم تحسب اتجاه الريح، عشان تحدد تتجاوز باليمين ولّ الشمال عم حسين أسرّ لي وأنا طفل دون أخواني وأقراني بسر علاقته بجده ترمس، قال لي في اضاني: فيك سر نبوة خليني أحكي ليك سر. قال عم حسين: مرّة كنت مع الشفع بنصلي معاهو في صلاة العصر، الوكت برد شديد، زمن البرد كان بشقق كرعين الشفع، بعد سلّم كورك لي: قشير امشي استناني جوّة في الخلوة قعدني قدامو وشايل سوطو بهز فوقو، قال لي: الصلاة دي اتوضيت ليها؟ جاني يا بكّة، يا ولدي، ثبات ورحمنة ما عرفتها قبل كدا، وقلت ليهو: ما قاعد اتوضأ للصلاة في الشتا جدع السوط وطلع من جيبو مفتاح اداني ليهو وقال لي: عفيناك من الصلاة نهائيا، عيناك أمين بيت مال الخلوة، المرافق الشخصي للشيخ في البكيات، وكاتم اسرار الخلوة. قلت ليهو: كيف عرفتني يا جدي ما متوضي؟ قال لي: عضم الشيطان بتاعك لمع مع انعكاس ضوء الشمس من انعكاس ضوءها من لوري التلب، المرّ قدامنا وأنا بسوي في الصفوف. باختصار، كرعينك لامعات بختلفن من كرعين الشفع اللونم زي فول المراروو الرمادي. رفعت يدي وخلاني أأدي قسم قبول الوظيفة الجديدة.
انتهى زمن الخلاوي وجاء زمن ما بعد الانجليز، ونحن كبار نمشي لعمك حسين ترمس، أول ما يسلم عليك بسألك: صليتوا المغرب؟ تقولوا ليهو : لسع يالا بسراع اتوضوا، المغرب وكتو ضيق، بسرعة يفرش ليك في السباتات ويجيب الاباريق بنفسو يقيموا الصلاة تلقاهو جرا كرسيهو وقعد يدخن ما بخلي ليهو زول حائم بدون ما يصلي جانا مرّة في مدني لعرس أخوي، عذب ليك الناس بالصلاة وهم بصلوا بدخل الصالون يرقد في السرير ويخلف كرعينو جيت داخل الصالون، قال لي: صلوا؟ قلت ليهو: بتنفلوا قال لي: الحمد لله نحن ربنا فكانا منها أبوي سمعو، جاهو داخل قال ليهو: إتّا يا الخائب، الله كيفن فكاك منها؟ فكيت روحك منها براك عم حسين في رقدتو ديك عاين لي وقال: أبوك دا علاقتو بالدين زي تجارة بصلو، مسكين ما نال من العلم اللدني بصلة قاورمة ساكت، واصل موجها حديثه إليّ: أوعة تكون أذعت سري قلت ليهو: في بئر، بذيعو بعد تموت صنقر علي حيلو وقال: منو القال ليك أنا بموت قبلك؟ قلت ليهو: نسيت انو أنا فيني سر نبوة؟
07-21-2023, 08:06 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 28861
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوبكر عباس
حيدر حسن ميرغني
فيس بوك
تويتر
انستقرام
يوتيوب
بنتيريست