الحقوا ناس البدروم الموضوع دة ماشي لي كارثة عديييل. كتب ابوبكر عيسى

05:12 AM July, 10 2023

سودانيز اون لاين
Amina Saeed-Sudan
مكتبتى
رابط مختصر

السلام عليكم يا أهلنا
أخوي محمد عيسى عسكري جيش رتبتو رقيب خرج باعجوبة من القيادة العامة في الساعات الأولى من صباح اليوم بعد التدوين الحصل للقيادة أمبارح.

حكى لي واقع مرعب عايشنوا العساكر داخل أسوار القيادة.

أول حاجة قالها لي الضرب امبارح كان شديد ومؤثر جدًا داخل القيادة العامة وهبش حتات حساسة. وما عارف منو مات ومنو حي حتى ناسو.

زحف من فوق الجثث لغاية طلع بعد طلع ربط شولات وقوارير في جسمو وعمل فيها مجنون. لغاية قدر يصل حتة آمنة وجاسف ليهو ملابس مدنية.

قال ليهم شهر ونص بياكلوا رز بي عدس مطبوخ بي موية وملح فقط وجبتين والاتنين ما تامات وجبة وشبه قربو يخلصوا.

استخدموا معظم الأثاث الخشبي وغيره في الطبيخ يعني عشان يولعوا نار يعملوا بيها أكل ما خلو لا كرسي لا تربيزة في المكاتب والله قال بالنص كدة، لا حول ولا قوة إلا بالله

المصابين عددهم كبير شديد حتى قبل ضربة امبارح لانو قال القصف في الاسبوع الأخير كان كثيف كل المصابين رابطين جروحم بالكاكي ومنتظرين الموت.

كبار الضباط العندهم أمراض مزمنة جزء منهم مات وجزء شبه منهار.

أمبارح تحديداً كان الموت كتير واغلب العساكر متمنين يحصل اقتحام للقيادة او ضرب كثيف عشان يقدرا يتخارجوا.

قال لو شكو فيك عندك نية مرقة يا كتلوك يا ختوك في غرفة كبييرة مع ناس شبه محبوسين.

اغلب المباني في الجزء الفيهو الجيش إنهارت او احترقت، الضباط بمختلف الرتب من مناطق محددة قاعدين بدون مهام ومراقبين.

حالياً أخوي دة قاعد ياخد دربات من المغرب حرفياً جسمو فاقد اي شيئ.

والله علي ما أقول شهيد

أنقذوا اخوانا قبل أن يموتوا جميعاً

1.

Quote: أول حاجة قالها لي الضرب امبارح كان شديد ومؤثر جدًا داخل القيادة العامة وهبش حتات حساسة. وما عارف منو مات ومنو حي حتى ناسو.

2.

Quote: أمبارح تحديداً كان الموت كتير واغلب العساكر متمنين يحصل اقتحام للقيادة او ضرب كثيف عشان يقدرا يتخارجوا.

لا أري فرق ما بين ضرب شديد ومؤثر وفي المقابل مع ضرب كثيف ..!! يعنى لو العساكر عايزين يهربوا بسبب الضرب الشديد ومؤثر لهربوا ..

يعنى الموضوع فيه دراما ونجر .. عشان يقولوا الأخو محمد عيسي .. لم يهرب من الميدان .. بل كان شجاعاً وأخترق صفوف العدو بالحيلة العسكرية الماكرة .. علماً أن الحيلة الجبانة التى أخرجته لم تنقذ أي جندي أخر وهو أيضاً مسؤول عن سلامتهم.

الجندي دا، بقوانين الجيش يعتبر هروب من المعركة .. والباقي معروف.

--------------------------------
تعبنا من الجوجوة الحاصلة دي.

بريمة

ناس الاستخبارات ما حيتركوا محمد عيسي، بعتبروه هرب من الحرب، وافشي اسرار الحرب، علي افتراض القصة حقيقة وليس شتلة.

ول أبا الدقم
سلام

Quote: ناس الاستخبارات ما حيتركوا محمد عيسي، بعتبروه هرب من الحرب، وافشي اسرار الحرب، علي افتراض القصة حقيقة وليس شتلة.

في أشياء بتحصل لا تصدق .. الشخص السجمان دا ورط أخوه بدون أي سبب .. ويحسب أنه يحسن صنعاً.

وبعدين حكاية حرقوا الأثاث عشان يطبخوا دي مضحكة مثل ربط الجولات والخيش والعلب في جسمه ( لمّا في الحاجات دي من وين؟) .. !!

بريمة

باشمهندس بريمة، حرق الخشب بحصل عادي، لكن هذه الامور يفترض الواحد ما يتكلم بيها نهايء لانها اسرار عسكرية، ولو عايز يحكيها يحكي بعدين بعد عشرين سنة لعيالك،