هل تصدقوا أن جولة مالك عقار الخارجية تكلف ٥ مليون دولار !!!!

05:39 PM July, 04 2023

سودانيز اون لاين
امتثال عبدالله-NYC - USA
مكتبتى
رابط مختصر

قرأت خبرا يدمع العيون ويورم الفشفاش وهذا الخبر متضمن في خطاب موقع من وكيل
الخارجية دفع الله الحاج إلى سفارة السودان في القاهرة ويقول الخطاب أنه محول لكم خطاب
وزير المالية بالتصديق بمبلغ ٥ مليون دولار تكلفة جولة مالك عقار ، نائب رئيس مجلس السيادة
الخارجية. ....... ""
والسؤال الأول : هل بالله ده وقت لجولات خارجية والبلاد في حالة حرب!!؟؟
والسؤال الثانى : هل بالله هذه الجولات تكلف ٥ مليون دولار عدا نقدا!؟؟؟
والسؤال الثالث : كم من اللاجئين السودانيين يمكن اعاشتهم وتسكينهم بهذا المبلغ!؟؟؟
...والله والله لولا أن هؤلاء الجنجويد المجرمين يحتلون منازل المدنيين ومستمرون في
نهب ممتلكاتهم واغتصاب نساءهم لكنت قاتلت معهم ضد هذه الحكومة الفاسدة ...
ولكن للاسف لا يمكن لأى عاقل ان يقف مع هؤلاء القتلة المجرمين ....
ولكن إذا انتهت هذه الحرب بنصر الشعب وإيقاف هذا النهب والتدمير
فإن أول شئ سيفعله الشعب محاكمة هؤلاء الذين كانوا يديرون البلاد ويبعثرون
اموال الشعب في الفارغة والشعب يتضور جوعا في بلاد المهجر في الدول المجاورة ...
ولى عودة لهذا المسألة التى تورم الفشفاش من الغضب ...

سلام بنتنا امتثال,
نعم هذا متوقع لانو سفر اى مسؤول في الدولة (رئيس دولة) بكون معاهو تيم كامل.
في اغلب الاوقات ما بسافرو في طائرة ركاب او سفرية عامة بل يستخدمون الـ shuttle
طبعا لا يفوت انه هذه لحظة مهمة لاسماع الدولة الى العالم بسفر بعض مسؤوليه في غياب او عدم قدرة رئيس الامر الواقع للسفر.

الشئ الاخر, هذه ليست سفرية واحدة بل سفرية تمتد الي عدة دول و ربما يظل في الخارج لاطول فترة ممكنة و لذلك لابد من وضع كل هذا في الحسبان.
لما تجى لتكلفة اليوم الواحد ح تلقى الرقم عادة جدا.

Air Force One’ 747s Now Cost $177k An Hour To Fly

Quote: How much do Obama's foreign trips cost؟ By JOSH GERSTEIN 11/04/2010 05:00 PM EDT An thinly sourced report that President Barack Obama's upcoming trip to India is going to cost $200 million a day looks to be grossly inflated, but how much do presidential trips abroad actually cost؟ That answer isn't quite as secret as the White House and some press reports would have you believe. An article Tuesday from the Press Trust of India reported the "whopping $200 million a day" figure, quoting an unnamed state government official in India. "The huge amount of around USD 200 million would be spent on security, stay and other aspects of the presidential visit," the official said, according to the PTI story which was picked up by Matt Drudge. “The numbers reported in this article have no basis in reality," White House spokesman Tommy Vietor told my colleague Laura Rozen in an-emailed statement. "Due to security concerns, we are unable to outline details associated with security procedures and costs, but it’s safe to say these numbers are wildly inflated.”

ان صح الخبر
فالحكاية فيها ماكلة.


يا محجوب
وكدي اول حاجة يورونا. سافر بياتو طيران والوفد المعاهو كم ؟
واالتلاتة يوم القعدها هناك دي مثلا علي ضيافة الحكومة الروسية. ام دفعوها من جيبهم
دا مبلغ ضخم. في دولة مستوي السودان وتعيش حالة حرب طاحنة وعساكرها لابسين شباب وجزم بلدية

عقار. تمساح

سلام كمال,
طبعا هنا لست للدفاع, فقط اردت ان اقول انه سفريات المسؤولين فيها تكلفة في كل العالم و هذا الرقم في تقديرى متواضع و كما يبدو من الخبر انو ده المبلغ المصدق بيهو مقدما, يعنى ما الفاتورة بعد الرجعة.
الشئى التانى الزول تقريبا ظهر اول مرة في جيبوتى و بعدها اثيوبيا و القاهرة و اخيرا في موسكو.
بعد موسكو ما عارفو نط علي وين و يبدو ان قد يسافر الى بلدان اخرى و حتى فى عدم وجود سفريات ربما يبقى في الخارج لانو في اى لحظة ممكن يدوهو مهمة جديدة.

المهم كدا خليهم ينكتو كل سفريات المسؤوليين ذو اليوم الواحد الي الخارج و بالطيارة الرئاسية و جيبو المقارنات.

خسائر الحرب الدائرة بالمليارات من ممتلكات عامة وخاصة ونهب وتهجير ولجوء
غير الارواح التي ازهقت من عسكريين ومدنيين وجنجا هل تقدر بثمن؟
جايين تتباكوا علي ٥ مليون.
احصوا هذه الخسائر وتعالوا حاسبوا التور عقار.

أتقتلون الحسين وتستفتون في دم باعوضة

بعيدا عن كل شيء مالك عقار اثبت انه رجل وطني
زعيم الحركة الوحيد اللي ادان وهاجم الدعم السريع علناً
افضل من يقود وفد الى الخارج لشرح الوضع الراهن في بلدنا
متحدث لبق بالانجليزية يعكس الرأي دون لجلجة
تكاليف الرحلات يجب ألا تشغل بالنا طالما نتوقع نتائج طيبة لزياراته
الدعم السريع ممكن يصرف أصعاف هذا المبلغ في سبيل توصيل وجهة نظرهم

كلو. بي تمنو عن. عقار ؟
عقار عند اندلاع الحرب وحتي تعينه محل حميدتي
اعلن. ضد الحرب وانه ليس منحاز لاي طرف فيها
وانه يدعو لوقف الحرب
ثم فجاء. ومن مقدمات. تبني موقف متطابق مع برهان. واصبح. يبشر بالحرب حتي الحسم
وهو. موقف مقارب لموقفه من انقلاب اكتوبر ٢٠٢١. حيث رفضه عقار وادانه ووصفه بالانقلاب ثم عاد لينخرط فيه

اما بقية الحركات المسلحة الدارفورية. فانها مناطق تماس مع مواقع نفوذ الجنجويد وهي تعلم حجم ووزن قواتها. حاليا وهي تعلم ان الجيش لايملك القدرة. لمعاونتها في التصدي للجنجويد حتي وان اراد العمل بسياسة اضرب الغرباوي بالغرباوي - وعكس المعادلة السابقة - استخدام الحركات كترياق. مضاد للجنجويد

وطبعا. قواعد. والمكونات القبلية لحركات دارفور لها عداء تاريخي مع حميدتي وهي لاتثق به

يا محجوب
اساسا مالك عقار مسافر مع تيم لي شنو في جولته الخارجية ؟
مفروض واحد مترجم وواحد سكرتير معاهو ينظم ليه مواعيد المقابلات
هذا في حالة اذا كانت هناك ضرورة قصوى للسفر ...ومفروض هو يسافر
مع الاثنين ديل في خطوط تجارية عادية وليس في طائرات خاصة عشان
السودان ما دولة غنية زي دول الخليج او دول اوروبا..
ومفروض كل التكلفة الاجمالية لجولته الخارجية ما تتجاوز ال ٤٠٠ الف دولار
ولكن للاسف المال السايب بيعلم السرقة ...ودي سرقة في وضح النهار لمال الشعب.

العزيزة امتثال سلام~

Quote: يا محجوب اساسا مالك عقار مسافر مع تيم لي شنو في جولته الخارجية ؟ مفروض واحد مترجم وواحد سكرتير معاهو ينظم ليه مواعيد المقابلات هذا في حالة اذا كانت هناك ضرورة قصوى للسفر ...ومفروض هو يسافر مع الاثنين ديل في خطوط تجارية عادية وليس في طائرات خاصة عشان السودان ما دولة غنية زي دول الخليج او دول اوروبا.. ومفروض كل التكلفة الاجمالية لجولته الخارجية ما تتجاوز ال ٤٠٠ الف دولار ولكن للاسف المال السايب بيعلم السرقة ...ودي سرقة في وضح النهار لمال الشعب.

عقار رغما عن رأى السالب فى مواقفه قبل هذه الحرب اللعينة
*لكن كدى شوفى ما كتبه أخ محجوب ، فيه توضيح لتكلفة رحلات مشابهة وخاصة انها ما دعوة من الدول
عشان يدفعوا تكلفة سفره ، سكنه والوفد المرافق
*السفريات تبع عقار ولا مؤتمر ولا اجتماع ولا زيارة بدعوة مهمة صعبة جدا ، وعندها ضرورة قصوى ،تكوين تحالفات جديدة
وافتكر انه عقار نجح جدا وكان واضح فى شرح الحاصل فى السودان وقلت بقلبى "ربنا يثبت مواقفه"

*لاحظى يا عزيزة ، من قبله عزت +الماهرى لف على كم دولة وكمان تم استقباله كمسئول رسمى فى دولة جنوب السودان وكينيا
*السؤال عزت+الماهرى دفع كل التكلفة من وين؟ - الاجابة من ذهب السودان وموارده المنهوبة
——-
معليش على الاطالة ،بس نقطة أخيرة؛
المثل بيقول "البيدفع القرش بيطلب النغم"
فشنو أفضل لموقف السودان تكون التكلفة من وزارة مالية السودان وبجواب عديل بدلا أن تدفعها دولة تانية او تدفع تكاليف الاعاشة الدولة التى يزورها|

*شوفى مجموعة قحت (صف طويل)، تكلفة رحلتهم الجبانة دى مدفوعة من دول معينة أو من قروش ذهبنا عن طريق النهب المسلح
اها الدول الممولة أو النهب المسلح حيطلبوا منهم يغنوا النغم الذى يحقق مصالحهم ورغباتهم

العزيزة هدى
كلامك مفهوم وواضح
لكن نحن بنشوف المواطنين السودانيين كيف بيعانوا في حلفا وكذلك في تشاد
وفي جنوب السودان وما لاقين حتى ياكلوا ويشربوا وكان ممكن بال٥ مليون دولار
بخففوا عنهم بعض الالام بدل يضيعوها في شى غير ضرورى..
يعنى هسع استفدنا شنو من جولة مالك عقار الخارجية دي؟؟!!
هل في دولة من الدول الزارها مالك عقار مدت السودان باسلحة او طائرات او ساعدت
اللاجئين بمساعدات غذائية ؟؟!!

العزيزة امتثال ~
أتفق معاك فى حوجة السودانين للقروش دى وعدم صرف المرتبات وإنعدام الأساسيات، والجوع الواحد دا …

*حقيقة ما عارفة لو كانت الرحلة تكلف كل المال دا - اعتمدت على حسابات الأخ محجوب
المهم جدا عندى انه رحلة عقار تكون ممولة من السودان ، وليست أى دولة أخرى عشان ما يملوا علينا أوامرهم
—من وجهة نظرى رحلة عقار (رغما عن كل شئ)
رحلة ناجحة وما كنت متوقعاها منه
…دولة جنوب السودان - شرح موقف السودان ورفضه زيارة عزت+الماهرى الفخيمة واستقباله رسميا ومعاها مؤتمر صحفى كمان!؛
…كينيا أو الاجتماع ، أوصل راى السودان فى رفض رئاسة كينيا للإيقاد لحل مشكلة السودان، وتكونى متابعة انه رئيس كينيا غير محايد اطلاقا
ما يشوفني بشاشا يجينى بآمنت بآمون 😀
حميدتى ساهم فى تمويل الحملة الانتخابية للرئيس وليم روتو عليه بالتأكيد حيكون منحاز للنهب المسلح.
وقبلها اجتماع حمدوك وابراهيم مو معاه وتانى عزت+الماهرى؛
…فى مصر عقار عمل لقاءات ومؤتمرات أدان فيها الدعم السريع نهارا جهارا ؛
…زيارة روسيا ومن حسن حظ الشعب السودانى ، حصلت مشكلة ڤاغنر ، كانت زيارة عقار فى الوقت المناسب
المسألة دى خلت العديد من الامريكان ، غير مرتاحين من موقف أمريكا (الدولة) فى حل أزمة السودان
*معليش تانى على الاطالة
#نقطة إخيرة زيارته جابت نتائج فى صالح الشعب السودانى الرافض منه للدعم السريع
وومكن تشاهدى لقاء الجزيرة مع كامرون هدسون
واسمعيها بالانقليزى لانه الترجمة ما كلها كانت صحيحة
أحمد طه سأله لو مصر أو تركيا حسب الاشاعات بتساعد فى الجيش
قال "Yes, they can"
المهم قال كلام كويس وكان فى صالح الجيش
ما قال حصل او حاصل الآن، لكن قال مثلا تركيا ساعدت ليبيا (ما حفرت) لوجستيا

**وأضاف انه فاغنر وحفتر ساعدوا الدعم السريع ، بمده بالسلاح وإفتكر قال التدريب أيضا

في مثل هذه المسائل الحساب ولد وكل شيء بالورقة والقلم
اتوا ببيناتكم وحساباتكم من تكاليف الرحلة طيران، اقامة، اعاشة
وخلافه واحسبوها وبعدها انصبوا مشانقكم .
التنظير والتقديرات الجزافية كلام فارغ.
ورجغة في الفاضي.

مصدر الخبر

Quote: وافتكر انه عقار نجح جدا وكان واضح فى شرح الحاصل فى السودان وقلت بقلبى "ربنا يثبت مواقفه"

...........
نجح كيف يعني ؟ روسيا الحياد وإختارت دور الوسيط ـ وعقار أعلن إنو فاقنر
غير موجودة بالسودان دا بعد سمع ـ تصريح وزير الخارجية الروسي ـ
ـإنو دور فاقنر سيتسمر في أفريقيا ـ خصوصا مالي وأفريقيا الوسطي
وطبعا روسيا تعلم أن حميدتي الأشتر هو أول من أيدو غزو روسيالأوكرانيا
ـ عموما العالم يعلم خلفية حميدتي مع الكيزان ويعلم تأيييد تنظيم الأخوان المسلمين لبرهان ومحاولة المشي بالإستيكة علي خط الثورة
نفهم أن يقف الناس كمؤسسة ـ وكرتب صغيرة ومتوسطة ولكن الرهان علي برهان وعقار وجنرلات الجيش وتأييد دبلوماسيتهم دا محير وجد مربك
ـ الثائرات قالوها ماتديك قفاك للعسكر ـالعسكر ماحيصونك
ــوالمقصود قيادة العسكر وشركاء حميدتي وربيبة الكيزان
قيادة الجيش هي من مكنت الجنجويد وإستخدمتهم ضد الشعب
لانثق بها ولا بالكيزان

ستنجلي الحرب وستفرز إصطفافا جديدا وخناذقا جديدة

سيبقي من راهن علي قيادة وخط الكيزان المهيمن علي جنرلات الجيش ـحسم عسكري في الموقع الذي إختاره ـ وهذا هو الخندق الي سيسعي لتصفية الثورة السودانية
وستقف لجان المقاومة والقوي الثورية ذات الموقف ـ ضد الحرب وضد الجنجويد وجنرلات الجيش ـمع إعادة صياغة وإصلاح الجيش ليعود مهنيا وقوميا وطنيا وثوريا
- وستذبب القوي السياسة التي شاركت العسكر السلطة وكسب مودة دويلات تبحث عن موطئ ـ قدم ومنارة بوصلة جديدة
وسنظل نحن نثق بالشعب والثورة ولايهمنا روسيا أو مصر فقد وقفو مع البشير ورغما عنهم أسقطه شعبنا
ولا يهمنا ثدي الأماراتي الذي غذي حميدتي وبرهان والبشير من مال السحت مقابل عمالة وإرتزاق في عاصفة الحزم ـ واليوم يحتضن بعض القوي السياسية ـ
...

مداخلتى الأخيرة مع العزيزة إمتثال فيها الرد على سؤالك
#الجنجويد لجهنم