التاريخ الذي سيصنعه الجنجويد

09:04 AM July, 02 2023

سودانيز اون لاين
عمر التاج-khartoum
مكتبتى
رابط مختصر

# المنازل والأحياء السكنية التي تم احتلالها من قبل الجنجويد في الخرطوم وبحري وامدرمان
ومن ثم نهبها وقتل أصحابها واغتصاب نسائها وسرقة عرباتها
هي منازل وأحياء مواطنين عاديين لا يملكها الجيش السوداني ولا الكيزان
بناها أهلها بالسنوات والاعمار ..
من عرق جبينهم وجهدهم وتضحياتهم وشغلهم واغترابهم وتعليمهم
لياتي الجنجويد الهمج البرابرة الغزاة من كل حد عميق ..
فيدمروها وينهبوها في أيام

# المدن والقرى في دارفور وكردفان التي انتظر أهلها اعمارها
وكانت احلامهم مجرد حياة طيبة وتنمية ومياة وكهرباء
ومدارس ومستشفيات وشوارع اسفلت
قام الجنجويد ويقومون الان
بحرقها وقتل أهلها وطردهم وتشريدهم نحو تشاد وجنوب السودان
بحثا عن إمبراطورية ال دقلو الزائفة في السودان

من الذي صنع الجنجويد؟ من الذي فتح لهم القيادة العامة والقصر الجهموري كي يغسلوا ملابسهم الداخلية وينشرونها علي اسوار القيادة العامة؟ من هم الرتب العسكرية التي كانت تؤدي التحية العسكرية لحميتي وهم يعلمون ان حميتي ما درس كلية حربية
جيشك دا في الستين يوم الماضية مش كان بقصف جنوب الخرطوم ومستشفي شرق النيل؟ جيشك دا ما يا هو القصف الجريف شرق والحاج يوسف شارع واحد والردمية ودردوق وجبال النوبة والنيل الازرق ودارفور؟ اليس جيشك كان شغال بالانتنوف بالجو والجنجويد بالبر في دارفور وغيرها؟

اضافة لما سبق الجمعة الفاتت ثلاث مساجد في منطقة السامراب ذهبو لقيادة الجيش في المنطقة يتوسلون اليهم بان يكفوا عنهم اذي عناصر الجيش الذين ياتون بعد الساعة 4 مساءا وهم في حالة سكر يسرقون المواطنيين ويغتصبون النساء وينهبون الركشات ويطلقون الرصاص الحي عشوائيا علي المواطنات والمواطنيين
الجمعة الفاتت ديل البعد العيد.
هل انت عارف ولا ماااك عاااارف؟ يبقي من المنطق ان تكشف وسخ غسيل جيشك جنبا لجنب مع وسخ الجنجا ولا الفهم شنو يا ود ابوك يا عمر يا صحاف؟؟؟

الحاصل حسع هو حرب الجنجويد والجيش على الشعب السوداني،
البرهان وحميدتي سايقين الناس بالخلا وهدفهم واحد ، قطع الطريق أمام التحول الديمقراطي حتى ولو إدعوا غير ذلك،
أرتكازات الدعم السريع معروفة وعلى إمتدادات الطرق، والجيش عميان وركبوهو طيارة ، يعني أنا ما عسكري
لو أدوني طيارة ورق كان نسفت الارتكازات دي في نص ساعة،
الجيش لم يعلن حالة طواري وحظر تجول ونسف أي مركبة بسلاح غير عسكرية ،
الاحتياط المركزي قوة غير مقاتلة تعرض للهجوم وسط ذهول أفرادها من موقف المدرعات المتفرج،
الجنجويد سرقوا ونهبوا واحتلوا بيوت المواطنين اللي إدعوا هم إنهم بيحاربوا الكيزان وحيجيبوا الديقراطية ،
الكيزان وما أفخم منازلهم ولم نسمع إنو في اي بيت من بيوتهم إنتهب ولا حصل أي شيء، بس تركوا كل ده ومشو عاثوا فسادا
في المؤسسات القومية والعلمية،
لو بس شفنا المعطيات دي بنعرف إنو مؤامرة الكيزان والجنجويد على الشعب كبيرة ومخططة بإتقان
والاصطفاف حول اي منهم سذاجة وغباء وعدم وعي،
يجب على القوى المدنية أن توحد كلمتها ولا تقف موقف المتفرج، فإنتصار اي منهما وبال وبلاء على السودان.
أقول قولي هذا وأستغفر الله لي ولكم ،،،،،، وطااااخ.

***

Quote: الحاصل حسع هو حرب الجنجويد والجيش على الشعب السوداني، البرهان وحميدتي سايقين الناس بالخلا وهدفهم واحد ، قطع الطريق أمام التحول الديمقراطي حتى ولو إدعوا غير ذلك، أرتكازات الدعم السريع معروفة وعلى إمتدادات الطرق، والجيش عميان وركبوهو طيارة ، يعني أنا ما عسكري لو أدوني طيارة ورق كان نسفت الارتكازات دي في نص ساعة، الجيش لم يعلن حالة طواري وحظر تجول ونسف أي مركبة بسلاح غير عسكرية ، الاحتياط المركزي قوة غير مقاتلة تعرض للهجوم وسط ذهول أفرادها من موقف المدرعات المتفرج، الجنجويد سرقوا ونهبوا واحتلوا بيوت المواطنين اللي إدعوا هم إنهم بيحاربوا الكيزان وحيجيبوا الديقراطية ، الكيزان وما أفخم منازلهم ولم نسمع إنو في اي بيت من بيوتهم إنتهب ولا حصل أي شيء، بس تركوا كل ده ومشو عاثوا فسادا في المؤسسات القومية والعلمية، لو بس شفنا المعطيات دي بنعرف إنو مؤامرة الكيزان والجنجويد على الشعب كبيرة ومخططة بإتقان والاصطفاف حول اي منهم سذاجة وغباء وعدم وعي، يجب على القوى المدنية أن توحد كلمتها ولا تقف موقف المتفرج، فإنتصار اي منهما وبال وبلاء على السودان. أقول قولي هذا وأستغفر الله لي ولكم ،،،،،، وطااااخ.>

شكرا ترهاقا

هذه الحرب هي حرب الكيزان ضد الشعب السوداني وضد جيشه للتأسيس لآخر فصول الإنقاذ
هي انقلاب الإنقاذ الأخير وبذات الخدعة (ما بين القصر والسجن) ولكنها هذه المرة أكثر دموية وأكثر دمار كي يصدقها العالم وكالعادة يمكن للكيزان التضحية حتى بأقرب الناس إليهم ليعود تنظيمهم إلى السلطة مرة أخرى
كل الشواهد تؤكد وبالدليل القاطع أن من يقود الجيش هم الكيزان بل وشاركت كتائب الظل في المعارك فقتلوا وقتلوا وتم نعيهم
وكذلك الشواهد تؤكد أيضا أن من يقود معارك الجنجويد هم الكيزان أيضا ومن يقودون جهاز استخبارتهم هم الكيزان وبالأسماء هم من مرافيت هيئة العمليات ومرافيت الجيش و كما أظن أن بداية سيطرة الكيزان على الدعم السريع وقيادته بصورة مؤثرة كان استيعاب مرافيت الجيش ومرافيت هيئة العمليات ومرافيت جهاز الأمن أيضا داخل الدعم السريع
أنظر لمن يقودون استخبارات الدعم السريع ومن يقودون العمليات الميدانية وأيضا من يقودون الحملات الإعلامية ستجد أ، معظمهم كيزان والكوز يا دكتور يظل كوز ان كان مع الدعم السريع أو الجيش
هي يا دكتور الحلقة الأخيرة من الإنقاذ وهي حرب المنتصر فيها هم الكيزان إن انتصر الجيش أو إنتصر الجنجويد هكذا استطاع الكيزان خديعة السودانيين والعالم أجمع

تحياتي لك لصاحب البوست عمر التاج

النصيحة يا عبد الله جعفر،
شعرك غاية في الروعة،
لكن تحاليلك السياسية دارفوري ساكت!

هههه وشكرا يا ابوبكر
فعلا أنا ما محلل سياسي بس بكتب بالارقام زي ما ذكر اخونا زهير انو من 119 قيادي من الدعم السريع منهم 41 مؤتمر وطني وكم من الصحوة وكم من المؤتمر الشعبي ولمعرفتي بأساليب الكيزان في شيطنة وتحريك الآخرين لا استبعد السيناريو الذي كتبت عنه
وياخوي البركة في الشعر كان وضل رسالة لا للحرب

تحياتي

Quote: من الذي صنع الجنجويد؟

أنا الصنعتهم
وانا الحا أدمرهم واخرص ألسنة من يعاونوهم
المشكلة وين؟
السودان كله مشتعل حروب ومعارك ويجيك دعامي فاشل يقول لك من صنع المليشيا
ولكانهم اول واخر مليشيا في السودان
ما كل السودان مليشيا ، ليه ماسالت من صنعهم ان لم يكن في السؤال غرض ؟
ليه ما سألت من صنع عقار؟
مت صنع مناوي؟
من صنع الحلو؟
من صنع عبد الواحد؟
من صنع موسى هلال ؟
ولكن السؤال الحقيقي يفترض يكون من صنع تمرد الدعم السريع وليس من صنعهم
لان من صنعهم ذهب، وتركهم قلة لاتتجاوز ال٢٠ الف يحملون الكلاش فقط..
وصنع معهم هيئة العمليات، تفوقهم عدة وعتادا
وصنع معهم الدفاع الشعبي والشرطة الشعبية
فاين هم الآن إن لم يكن وراء الدعم السريع من وراءه
وان لم يكن في توسعه في تشاد ومالي والنيجر وحتى روسيا
ودخوله عالم السياسة جهات تعمل آلان على تدمير السودان ؟
نعم .. الدعم السريع انا من صنعتهم
وصنع معهم الحوثي وفاغنر وحفتر والتقراي
ولكن معركتي اليوم ليست كيف ولماذا صنعتهم
ولكن معركتي الحقيقية هي كيف أكف اذاهم عن الناس بعد ان تطاولت انيابهم السامة وعضت كل الايادي

Quote: لو بس شفنا المعطيات دي بنعرف إنو مؤامرة الكيزان والجنجويد على الشعب كبيرة ومخططة بإتقان والاصطفاف حول اي منهم سذاجة وغباء وعدم وعي

طيب يا اخي على الاقل أقيف مع الشعب
لو كان الأمر مجرد لعبة سياسية مافي زول بقول ليك ماتقيف محايد
ولو انت شايف الحرب والدمار ده كله مجرد لعبة سياسية فأنت حر في موقفك
لكن لو أنت من الشعب، وجاك واحد مسلح طردك من بيتك
وقتل أو اغتصب اخواتك قدامك
وسرق عربيتك وعفش بيتك وشحنها في دفار إلى خارج الخرطوم
وجاب بعض أهله ليسكنوا معه للابد في بلدك
وانت وقفت في حالة حياد ..
فما شايف لك غير خيارين ..
أما ما راجل .. أو متواطئ وخائن
لو عندك شوية نخوة ورجولة .. اقيف مع نفسك
وشوف مين الاحتل بيتك وطرد جيرانك
هل هم الجيش ام الدعم السريع
شوف مين جاب مرتزقة بمئات الألوف ودخلهم جوة عاصمة بلدك عشان يحتلها
وبعدين تخلى عن حيادك وحارب مع الدعم السريع أو ضده
لأنك لو وقفت محايد في معارك بتحدد وجودك من عدمك
فأنت ضد الطرفين لامحالة

Quote: هذه الحرب هي حرب الكيزان ضد الشعب السوداني وضد جيشه

أراك ياعبد الله قد لخصت المعركة في ثلاثة أطراف، جيش وشعب وكيزان ..
وجه نظرك احترمها
وربما اقبلها لو شرحت لينا أكثر وحددت لينا مين في الاطراف الثلاثة دي
- أشعل الحرب اولا
- جهز نفسه لدخول الحرب
- اختار العاصمة لتكون المسرح
- عمل تسعة معسكرات مزودة بالمؤن الغذائية والسلاح الأمريكي والإماراتي
- انتشر في الأحياء واحتل منازل المواطنين
- حرق المؤسسات والبنوك وخرب كل البنية التحتية
- نهب وسرق ممتلكات المواطن وعرباته وعمل بيها أسواق بوكو في تشاد وليبيا والنيجر؟
هل فعل ذلك جيش أو شعب أو كيزان ، وهل مارس هذه سبق ان مارس الموبقات منذ الاستقلال ام ولد من جديد ليفعلها؟