صرفــة للسيـــــــــــــــــادي :)

00:02 AM June, 23 2023

سودانيز اون لاين
Elhadi-
مكتبتى
رابط مختصر

الانصرافي طلع أثقل وزن سياسي من كل أحزاب الحرية والتغيير (المجلس المركزي )

ديمحي ده يلقاها من وين ولا من وين ؟؟

يلقاها من الجيش الشغال يلقط في مرتزقته وعرباته بالملقاط

ولا من خذلان وضعف وعزلة الحليف الحرية والتغيير (المجلس المركزي) الما قدرت تطلع ولا حتى موكب واحد لدعم الإطاري والعملية السياسية المزعومة حتى قبل الحرب

وحتى الجبهة المدنية التي حاولت تأسيسها بعد الحرب انتهت إلى لا شيء وإلى الفشل الذريع بعد الانسحابات المتتالية للجان المقاومة والشخصيات الوطنية الذين جيء بهم كقطع ديكور لتوفير الدعم والغطاء السياسي للمليشيا المتمردة تحت ستار ( لا للحرب )

أنا نفسي أعرف الحرية والتغيير دي بتمثل ناس منو بالضبط ؟؟ يعني ياتو فئة من الشعب ؟؟

يقول ليك القوى المدنية والمدنيين ـ وهم مظاهرة واحدة ما قادرين يطلعوها ـ لا زمان ولا حالياً ولا حتى بعدين

زمان كانوا شغالين استنكاح شديد لي لجان المقاومة ـ و ياهو يعني يخلوا لجان المقاومة تزبط المظاهرة وتحشد ليها وهم يجوا يزقوا أجندتهم في النص وأوووباح يروحوا خاطفين ليك المظاهرة ويخلوا المساكين ديل يتلفتوا

لأنو للأمانة الفترة الفاتت أثبتت إنو لجان المقاومة رغم قدرتها على الحشد والتعبئة ورغم وطنيتهم و بسالتهم في التظاهرات ومواجهة قمع السلطات، والكلنا شفناها شوف العين وما فيها شك وشهد ليهم بيها العالم كذلك.

لكن للأمانة ما كان في حتة الوعي والنضج السياسي الكافي بأحابيل وحيل وألاعيب أفندية الحرية والتغيير

على سبيل المثال :

كل المظاهرات بعد انقلاب 25 أكتوبر نظمتها لجان المقاومة ـ لكن في النهاية الحصاد السياسي للمظاهرات دي أختطفتوا قوى الحرية والتغيير ومشت اتحالفت بيهو مع حميدتي باعتبار انو أها يا ديمحي أنحنا ناس الشارع وهم لا عندهم شارع ولا هم يحزنون

30 يونيو 2019 المسيرة الأعظم في تاريخ السودان قاطبة بعد فض الاعتصام لم تنظمها الأحزاب السياسية ـ بل على العكس أكبر أحزاب الحرية والتغيير وهو حزب الأمة كان عندو موقف واضح منها ومعارض ليها بالدرب العديل ـ وأرجعوا للمواقف ده تاريخ قريب ما بعيد

رغم كده حصاد 30 يونيو 2019 صب لصالح الحرية والتغيير والمشت عملت بيهو التسوية السياسية

والله العظيم أنا أتحدى أحزاب الحرية والتغيير انو تطلع ليها مظاهرة في أي وقت من الأوقات بمعزل عن لجان المقاومة

لو كانوا بقدروا كانوا طلعوا دعماً للاتفاق الاطاري والعملية السياسية، لكن لأنو لجان المقاومة كان معارضين الاتفاق ده، فالحرية والتغيير فشلت في انها توظف ضغط الشارع لدعم الاتفاق

أفندية كيسهم فاضي

وإن شاء الله الحرب دي بتنتهي من حميدتي وتنتهي منهم بضربة واحدة

ول أبا الهادي
سلام
هل تظن أن الأنصرافي وراء جمعة الغضب؟ .. أنا أفتكر محرك جمعة الغضب هم الأخوان، أول من أبتدر الكلام العميد د. طارق الهادي كجاب ..

بريمة

حالياً الإعلام البديل ( وسائل التواصل) هي الأقوى تأثيراً على الناس يا بريمة

وهو قطع شك طبعاً الكيزان بيكونوا لاعبين دور في قصة المظاهرات دي لكن حتى الكيزان قدرتهم على الحشد بقت ما تفرق عن قدرة قحت يا بريمة، الاتنين ما عندهم ديك قدرة على الحشد

زمان الكيزان كانوا بيستغلوا أجهزة الدولة وسلطة الدولة ومؤسساتها في الحشد، حالياً ما عندهم القدرة دي، وهم زاتهم فتروا وتعبوا ومنقسمين على نفسهم، ما في حاجة اسمها الكيزان كتلة واحدة بقوا مشتتين، المجموعة مع علي عثمان ونافع ـ لا تثق في المجموعة المع علي كرتي ـ لانو انقلبوا عليهم ودخلوهم السجون ـ ونفس الشيء ينطبق على مجموعات الأمنجية الموالية لصلاح قوش بعد ضرب مراكز قوتهم من قبل مجموعة علي كرتي بحل هيئة العمليات بعد التخلص من صلاح قوش نفسه ونفيه إلى مصر ثم إقصاءه بالكامل من المشهد السياسي وتحطيم تطلعاته السياسية بعد قرارات مارك بومبيو بحقه.

وهكذا وجزء منهم التحق بالدعم السريع ـ الناس دي اتشتت لكن قحت مصرة على التعامل معاهم ككتلة واحدة لغرض سياسي بحت.

المع برهان ديل أرزقجية /أمنجية وفاسدين ـ أكتر من كونهم كيزان مؤدلجين ومنظمين

هنا العميد د. طارق الهادي كجاب .. الذي دعي فيه للخروج بعد الصلاة ..




بريمة