شكرا مولانا حافظ..والصديق بشاشا

03:37 PM June, 21 2023

سودانيز اون لاين
محمد عبد الله الحسين-
مكتبتى
رابط مختصر

لعن الله الشيطان...

مولانا حافظ كتب بتلقائية ( ومودّة) جملة فتحت في داخلي طاقة..من نور..

كتب الأخ حافظ في بوست ابنتنا امتثال ردا على بشاشا ما يلي:

(بشبوشي الكشكوشي
ياخي أنا والله ما قاعد ازعل منك، إنت ما كعب والله وممكن تكون صاحب نوايا كويسة لكن مخك دا

مليان خزعبلات قاعدة تحجب عنك رؤية غيرها من المواضيع.)

وهي عبارة تحمل من المودة والمعزة ما تحمل ..كما تكشف عن جانب آخر وهو التفريق بين ما يكتبه الشخص وما يقصده..

فاحالتني تلك الجملة إلى لحظة من المواجهة الصامتة مع النفس وبعض من لوم وعتاب ذاتي صامت..

غذا كان هذا الشخص الذي تبادلت معه الشتائم هو كذلك ..فكيف سقطت أنا في ذلك الفخ الشيطاني اللئيم.

اعتذرت للأخ بشاشا فقبل مشكورا..

وإن شاء الله ما يحخصل بينا إلا كل خير..

والشكر للصديق المحترم مولانا حافظ

ومنكم نتعلم..

كتر خيرك ياعزيزي،
بالنسبة لي ده صراع فكري، ينتهي بي نهاية اليوم، مهما كان من حيث العنف..
بالذات الان واللحظة، وبحكم الحاصل مفروض "الدم الاسفيري" يكون فات الركب، أو مشي علي الصرة!!
اعترف منقهم من الانضباط!!

كده، البوست ده، مهد لي حوار "حادي"، هادئ بكون مفيد للغاية، وهذا غير متاح لي كقاعدة، ولكن متي ماالفرصة جات بكون تمام جدا.

Quote: الدم الإسفيري

ما شاءالله.
عقبال ما سفك الدم الحقيقي يقيف.
يا خسارتك يا بلد، عقلاؤك في الإسافير
و جهلاؤك في القصر الجمهوري.

تحياتي، يانعومة أو مشتاقين.

يادكتور محمد عبدالله
مولانا حافظ لم تعرف عليه
غير من خلال كتاباته هنا ام الرطانى
بشاشة بعرفو زي جوع بطنى وزي مابقولو
اهلنا في الجزيرة (جضمن متعود على الكفيت)
الجدادة تاكل عشاهو بس بجيب كثافتك في ثانية
ودى مدرسته في التحاور ولمن يجيب كثافاك طوالى
بحس بنشوة الانتصار وياماصرفت له هنا شوالات
من البركاوى وغير البركاوى وهو اب قلب ميت بكون يضحك
اصرف ليهو عادى ولايهمك

هلا صديق العزيز ود الأمير
والله حافظ وبشاشة أخوة العزاء
وما يحصل بينا الا كل خير.. وبذلك نسمو ونلتقي..
تحية كبيرة لك ولهم ولجميع احبابنا في المنبر.

سلام دكتورنا محمد عبد الله الحسين
شكراً جزيلاً وكتر خيرك على حسن استقبالك لما كتبت.

شوية كدا وأتم 20 سنة من بداية معرفتي ومتابعتي لسودانيزاونلاين.
مدرسة التقينا فيها بإخوة إعزاء* تعلمنا منهم الكثير والمفيد وفتحوا أعيننا بآرائهم المختلفة على ما لم نكن سنراه لولاهم.
حق لنا ان نشكرهمجميعاً.

في الأيام اأخيرة دي تلخصت عندي مشكلة السودان كلها في الفشل في إدارة الإختلاف.
الإختلاف في حد ذاته قد يكون عامل بناء إيجابي وقد يكون عامل هدم، وذلك حسب إدارتنا له.
المنبر ليس إستثناء لذلك نحاول ان تكون خلافاتنا عامل بناء.

*بشاشا ليس إستثناء، فقد تعلمنا منه الكثير ولكني تجاوزته إلى فضاءات اوسع في التفكير.
وربما إنه كان شيخي في فترة من الفترات زماااان إلا أنني الحوار الغلب شيخه.😄😄😄
وعليه أن يتقبل هذا الأمر بصدر رحب.

يقول أحد الفلاسفة أن الفرق بين الرأي والقناعة، جزئية صغيرة،
فالرأي شخصي أما القناعة فهي شيء صحيح يتفق عليه كل الناس.
نظرية فلسفية معقدة ستتعب عقل قارئها المرهق بمفعول الحرارة.
-
هذه النظرية قد تنطبق على الكثيرين في هذا المنبر

ياحافظ،
عايز اعترف بي حقيقة بعينها، ولكن خليني اتلفت يمين اوشمال، في الأول وأشوف ناس "ابلة ظاظا" لو هنا!!!!
نعم اعترف الابر الكوشية، والصعق الكهربي، معاك انتا مااشتغل!!!
عيييبببك!!!

ليه؟

ماعارف!!!

شغالين بحث، وتقصي، في المعمل!!!