Post: #1
Title: جرائم الجنجويد فى امدرمان
Author: النصرى أمين
Date: 06-13-2023, 12:33 PM
Parent: #0
12:33 PM June, 13 2023 سودانيز اون لاين
النصرى أمين-كالغرى, كندا
مكتبتى
رابط مختصر
احد الاصدقاء كان فى طريقه للمنزل عائدا من المسجد بصحبة صديقه ، لاحظ ان اثنين من الجنجويد يحاولون كسر عمارة اولاد محمد حسين بالسلاح ، من الخلعة بدوا فى الجرى بعيدا عن المشهد ؛ اطلق الجنجويد وابل من الرصاص لتصيب رصاصة فخد صاحبى و يقع على الارض ، بعد تحانيس تنازل الجنجويد من الاجهاز عليه بعد سباب و بصق و اهانة .
القصة لم تنتهى ...
بعد ايام اتصل نفس الصديق باخيه الاكبر للاطمئنان عليه ليجده فى قبضة الجنجويد.
احد المرتزقه قال لصاحبى فى الجوال ( ان اخوك ضابط فى الجيش وانه اسير و يطالبون بثمانية مليار جنيه للافراج عنه) ، صاحبى رد بسخرية (اخوى رجل ستينى فى العمر و مليان امراض ادونى اربع مليار و شيلو اربع مليار و شيلو) و قفل الخط .
لاحقا اتضح ان الاخ الاكبر بخير ، تركه الجنجويد فى حاله اذ لم يجد الجنجويد ما يصبون اليه من مال منهوب.
لعنة الله على الكيزان الذين فرخو امثال هؤلاء الاوغاد و سمحوا بدخول عشرات الآلاف منهم للعاصمة.
|
Post: #2
Title: Re: جرائم الجنجويد فى امدرمان
Author: Mahjob Abdalla
Date: 06-13-2023, 01:48 PM
Parent: #1
سلام النصرى,
قريت لـ واحد في الفيس بوك, قال فى نقطة تفتيش طلبو منهم اى زول يطلع بطاقته او بطاقاته.
الزول عندو بطاقة اقامة في مصر (جاب صورتها في الفيس بوك). المهم الدعامى لما شاف البطاقة قاليهو اقيف بهناك. لما خلص من الباقين, قال اول شىئ قطع فيهو سوطين قبل ما يفتح خشمو, بعداك قاليهو "يا عسكرى جيش ... نسيت الكلام شنو".
المهم قال في دعامى اخر لحقهم و قرأ البطاقة و فهمو الدعامى الاول انو الشئ ده ما بطاقة جيش.
الجماعة قالو ليهو "تحمد الله طلعت منها بـ سوطين".
|
Post: #3
Title: Re: جرائم الجنجويد فى امدرمان
Author: النصرى أمين
Date: 06-13-2023, 02:32 PM
Parent: #2
تعرف يا محجوب الحيحصل ؟
الجنجويد ديل بعدما يعوسو عواستهم فى الخرطوم حيتم دحرههم و حيضطرو يتقهقرو فى اتجاه الغرب.
سنوات طويلة حيعملوا رعب لسكان ولايات الغرب ، حتدور الحرب من جديد بين الجنجويد من جهة و كل حركات الكفاح المسلح بما فيهم جبريل و مناوى وعبدالواحد و الحلو .
|
Post: #4
Title: Re: جرائم الجنجويد فى امدرمان
Author: امتثال عبدالله
Date: 06-13-2023, 03:22 PM
Parent: #3
يا النصري
الأوباش المجرمين ديل حيقدروا على اركوى مناوي تاني وخاصة بعدما
انكسرت شوكتهم في الخرطوم والجيش عدمهم نفاخ النار !!؟؟؟
هسه مناوي بيكون عنده جيش قوامه ٢٠٠ الف جندي في دارفور
وعصابة الجنجو يد اللصوص ما بيكون فضل ليهم غير ٢٠ الف
وباقي ال١٠٠ الف الآن يتعذبون في البرزخ في نار السموم للجرائم
الوحشية التي ارتكبوها ضد المدنيين العزل ..ومناو ي عشان يحافظ
على ملكه في دارفور حيعدمهم نفاح النار وحيقضي على آخر جنجويدي
في السودان ...واذا هو فعلا عمل كده يستاهل يكون حاكم دارفور فعلا
واذا نزل انتخابات حيتولى رئاسة السودان بالانتخاب الحر المباشر
لان من يقضى على هؤلاء المجرمين الأوباش سينال ثقة الشعب السوداني
كله ...
|
Post: #5
Title: Re: جرائم الجنجويد فى امدرمان
Author: النصرى أمين
Date: 06-13-2023, 03:53 PM
Parent: #4
يا امتثال
مناوى ماعنده حاجة ..زول مسكين بتاع مظاهر ساكت
|
Post: #6
Title: Re: جرائم الجنجويد فى امدرمان
Author: امتثال عبدالله
Date: 06-13-2023, 07:28 PM
Parent: #5
مناوى ما زول مسكين ولكن زول انتهازي كامل الدسم وجنو مناصب
وعشان يحافظ على منصبه كحاكم لدارفور مستعد يحرق كل الجنجويد
بالنابالم وجميع الاسلحة الكيمائية المحظورة ..وليته فعل...
..المهم حانقل ليك هنا مقال مكتوب تحت فيديو بعنوان :" ما لا عين رات
زلا اذن سمعت ولا خطر على قلب بشر :
والفيديو بيوصف التدمير والتحطيم والخراب الذى مارسه الجنجويد عن حقد
وغل مدفون لديهم ...تدمير لم نشاهده حتى عند التتار والمغول في القرون الوسطى
..ما حاقدر انزل الفيديو ولكن ساكتب ليكم المقال عشان تعرفوا مدى اجرام
هؤلاء الاشرار ....
|
Post: #7
Title: Re: جرائم الجنجويد فى امدرمان
Author: Arif Nashed
Date: 06-13-2023, 07:39 PM
مليشيات مناوي وجبريل تنحل وتدمج في جيش قومي
الناس دي بتتعظ متين اليوم حميرتي وبكره مناوي...الخ
ده نتيجة ترك الحبل علي الغارب انتجت حميرتي وستنتج غيره.
لا ثقة في اي مليشيا ايا كانت.
|
|